1. ¿Ni Ngöbö mikaka täte tä ja tarere bökän ye tä bämike ño?

NI NGÖBÖ mikaka täte ye abokän ni ja mräkäre kukwe ja üairebiti aune nita ja tarere kwärikwäri (1 Juan 4:16, 21, TNM). Nita ja tarere bökän kwärikwäri ye bämikata nita kukwe keta kabre kwin nuainne ni mada kräke yebiti, ñodre, ni raba kukwe niere töi jämebiti aune ja töi mike kwin ni mada kräke. Nita ja töi mike kwin ni mada kräke aune nita ni mada töi mike nüke gare jai ngwane, nita ‘ja ngwen Ngöbö erere’ (Efes. 5:1).

2. ¿Jesukwe nitre tarebare ño Rün erere?

² Jesukwe ja ngwani Rün kwe ye erere. Käre nämäne nitre tarere. Niebare kwe: “Mun mden mden dräre amne tribe doboko mun kötärä, mun ye abko jakwe jökrä tie amne tikwe mun mikadi jadüke”. Aune niebare kwe arato: “Ñobtä ñan angwane ti abko moto jäme amne tita bike tidrä ni mda mdabtä” (Mat. 11:28, 29). Nita ja ngwen Jesús erere aune nita “ni bobre töi mike nüke gare jai” ngwane, ni  Rün kä kwinbiti tä ni kain ngäbiti bätä käta nemen juto krubäte nibätä (Sal. 41:1). Nikwe ni mräkätre, ja mräkätre konkrekasionte aune nitre ie nita kukwe driere töi mikadre nüke gare ño jai ye ani mike gare jai.

3. ¿Ni brare gure rabadre muko kwe mike tuin ño jai? (Üai bämikani kena mikadre ñärärä).

³ Metrere nitre brare gure rabadre mräkätre töi mike nüke gare jai (Efes. 5:25; 6:4). Ñodre, nitre brare ie ‘nüna rükadre gare kuin meri kwe yebe’ nieta Bibliakwe. Ye abokän rabadre muko kwe “töi mike nüke gare jai” meden gärätä (1 Ped. 3:7). Ni mada ie ja ruin ño ye rabadre gare nie yekäre, töi mikadre nüke gare jai. Ni brare gure tä muko kwe töi mike nüke gare jai ngwane, muko ye niara dimikaka aune niaratre nibu ye töi ñaka ja erebe kukwe keta kabrebätä ye nüke gare ie, akwa ye ñan tä mike gare muko kwe ye ñaka ütiäte (Gén. 2:18). Ye medenbätä, muko ie ja ruin ño ye tä mike nüke gare jai aune tä mike tuin ütiäte jai. Meri Testiko iti käi Canada, niebare: “Ja ruin ño tie ye ti muko tä mike nüke gare jai aune ñaka niere tie: ‘Ja ñaka rabadre ruin kore mäi’. Ne madakäre, niara tä ti kukwe nuin kwin. Tä kukwe niere tie ti töi ükatekäre ye ngwane, tä nuainne töi jämebiti”.

4. Ni brare gure tädre blite meri madabe ye ngwane, ¿tä muko kwe töi mike nüke gare jai ye tä bämike ño?

⁴ Ni brare gure tä muko kwe töi mike nüke gare jai ngwane, muko kwe ie jata nemen ruin ño ye tä mike nüke gare jai, yebätä ñaka kukwe nuäre nuäre niere meri madai töi mikakäre jabätä. Aune ñaka nuainne Internet o redes sociales yete (Job 31:1). Tä ja ngwen metre muko kwe ie, tare kwe ye ñan aibebätä, ñakare aune tä Ngöbö tarere aune kukwe käme ye tuin blo ie yebätä tä nuainne (ñäkädre Filipenses 4:8; Salmo 97:10 yebätä). *

5. ¿Meri gure rabadre muko kwe töi mike nüke gare ño jai?

⁵ Ni brare gure tä ja ngwen Jesukristo erere ngwane, muko kwe tä mike “ütiäte jae” (Efes. 5:22-25, 33). Ye erere ngwane, sribi meden täi niara kisete konkrekasionte o kukwe mada tädre mike töbike ye ngwane, muko kwe niara töi mikai nüke gare jai arato. Ni Testiko iti käi Gran Bretaña, tä niere: “Ruäre ngwane, kukwe ruäre tä ti mike töbike ye ti muko tä gain tibätä, ñobätä ñan aune käre ti abokän ñaka ja ngwen ye erere. Ye ngwane, Proverbios 20:5 känti kukwe nieta ja jie ngwankäre ye tä mike täte, kukwe meden tä ti mike töbike ye mikakäre gare jai rabadre ti ngübare bätärekä, akwa kukwe ruäre ti ñaka raba mike gare ie ye ngwane tä mike nüke gare jai”.

6. ¿Ni jökrä raba monsotre kia dimike ño ni mada töi mike nüke gare jai aune ye köböire dre kwin rabai kwetre?

⁶ Ni rüne aune meyere tätre ja töi mike nüke gare jai kwärikwäri ngwane, tätre kukwe kwin bämike monsotre kwetre käne. Akwa, monsotre ye rabadre ni mada töi mike nüke gare jai ye rabadre driere ietre arato. Ñodre, niaratre raba niere monsotre kwetre ie, ñaka rabadre nen Ju Ja Ükarakrö yete o tätre kä denkä jai rabakäre keteitibe ye ngwane, monsotre rabadre nitre niena umbre ye tuenmetre mrö den käne jai. Ni jökrä konkrekasionte raba nitre rüne ye dimike arato. Ani bämike keteiti, monso chi käkwe kukwe kwin nuaindre ni kräke, ñodre jukwe tikadre kwe nie ye ngwane, nikwe kwin niedre ie. Yekwe monso chi ye dimikai aune ye köböire “nita jändrän bien ni mdaye, btä käta neme bäri nuäre nibtä ni jändrän kaka ngäbti ye ngwä” rabai gare ie (Hech. 20:35).

7. ¿Jesukwe ni olo ngidianinte ye töi mikani nüke gare ño jai aune ye tä dre driere nie?

⁷ Bati Jesús nämäne kä Decápolis yekänti ngwane, “ni iti abko olo ngidianinte amne  kukwe ritete jänükani mräkäkwe” ie (Mar. 7:31-35). Niara nikani ‘ni ye ngwena mento’ aune mikaninta räre kwe. ¿Ñobätä ñaka nuainbare kwe nitre mada okwäbiti? Ni ye olo ngidianinte yebätä nane ja ñaka rabadre ruin kwin ie nitre kwati okwäbiti namani ruin Jesús ie. Erametre, ni ñaka raba kukwe ñan tuabare nuainne. Akwa, ja mräkätre tä dre ribere jai aune ja ruin ño ietre yebätä ni raba dimike. Apóstol Pablo tikabare: “Ari ja kite ja tarere kwärikwäri amne sribi kuin nuene jakrä kwärikwäri” (Heb. 10:24). Jesukwe ni olo ngidianinte töi mikani nüke gare jai, ¿ye erere ni raba nuainne ño?

8, 9. ¿Ja mräkätre niena umbre aune tä bren ye ni raba töi mike nüke gare ño jai? (Mä raba mike gare ruäre).

⁸ Nitre niena umbre aune nitre bren ye nikwe töi mikadre nüke gare jai. Nita sribire ño konkrekasionte ye ñan bäri ütiäte, ñakare aune nita ja tarere ye bäri ütiäte (Juan 13:34, 35). Nita ni mada tarere bökän ye tä ni töi mike ja mräkätre niena umbre aune tä bren ye dimike ne kwe rabadre nemen gätäbätä aune kukwe driere. Niaratre ñan raba sribire krubäte Ngöbö kräke, akwa ni töita dimikabätä (Mat. 13:23). Michael tä silla de rueda yete, ye tä debe bien krubäte mräkätre kwe aune ja mräkätre ükaninte braibe kukwe driekäre ben tätre dimike yebätä. Niara tä niere: “Ti dimikata kwetre ye köböire, tita nemen bäsi gätä jökräbätä aune kukwe driere arato. Kukwe drieta nitre kwati ngwärekri ye tuin bäri kwin tie”.

⁹ Ja mräkätre niena umbre aune bren ye tä Betel keta kabre yete. ¿Nitre umbre ji ngwanka tä niaratre töi mike nüke gare ño jai? Niaratre ye kräke kukwe ükateta ne kwe rabadre tärä tike kukwe driekäre aune nuainne teléfono yebiti. Ni Testiko iti kädekata Bill, abokänbiti kä niena 86, tä tärä tike nitre nünanka mente ie. Niara tä niere: “Nunta tärä tike nitre ie yebätä nunta debe bien krubäte”. Meri Testiko kädekata Nancy, abokänbiti kä niena bäsi 90 näre, tä mike gare: “Tita tärä tike ye ngwane, ñan tita täräkwata ye mike jerekäbe ngwäte. Tita nuainne kukwe driekäre. Kukwe metre ye rabadre gare nitre ie”. Ethel, abokän därebare kä 1921, tä niere: “Käre tita bren. Ruäre ngwane, ñaka tä nemen nuäre ti kräke ja ngwäkitakäre arato”. Akwa yebiti ta, niara töta nemen kukwe driei teléfono yebiti aune tä nitre tuinbiti. Aune Barbara, abokänbiti kä niena 85, tä niere: “Ti abokän tä bren yebätä ñan nemen nuäre ti kräke kukwe driekäre käre. Akwa teléfono yebiti tita blite nitre ben. ¡Tä debe, Jehová!”. Kä jämi niken kwati ta ye känenkri ja mräkätre niena umbre ye ruäre käkwe ora nuainbare 1,228 kukwe driekänti, tärä tikani kwetre 6,265, blitabare kwetre teléfono yebiti 2,000 jire aune tärä bätä täräkwata döräibare kwetre 6,315. ¡Ye tä kä mike juto krubäte Jehovabätä! (Prov. 27:11).

10. ¿Ni raba ja mräkätre dimike ño ne kwe gätä ye kukwe nuadre kwin kwetre?

¹⁰ Ni tädre gätäbätä ye ngwane, nikwe ni mada töi mikadre nüke gare jai. Nikwe ja mräkätre töi mikai nüke gare jai ngwane, nikwe niaratre dimikai gätä ye kukwe nuin kwin. ¿Ni raba nuainne ño? Ye abokän ni rükadre gätä ye känenkri ne kwe ni ñan rabadre ni mada töi nike. Ruäre ngwane, kukwe ngüba ñaka abokän tä nemen bare ye köböite ni ñan raba nüke gätä känenkri. Akwa, käre nita nüke kä rairebiti gätäbätä ye ngwane, ni raba dre nuainne yebätä nikwe töbikadre ne kwe nikwe ja mräkätre töi mikadre nüke gare jai. Ne madakäre, Jehová aune Jesús tä ni nübaire ye nikwe ngwandre törö jai (Mat. 18:20). Aisete nikwe niaratre mikadre ütiäte jai.

11. Ja mräkätre ie kukweta kädriedre gätäte, ¿ye ñobätä rabadre kukwe nieta 1 Corintios 14:40 ye mike täte?

¹¹ Ja mräkätre konkrekasionte töi mikakäre nüke gare jai, “jondron jökrä nuaindre kwin metre aune ükaninte ye ererebätä” nieta ye nikwe mikadre täte arato (1 Cor. 14:40, TNM). Ñodre, ja mräkätre ie kukweta kädriedre gätäte ye ñaka rabadre blite minuto tä ükaninte ye biti bäri. Tätre ye erere nuainne ngwane, tätre töbike ni  mada kukwe kädriekä aune ja mräkätre konkrekasionte yebätä. ¿Ñobätä? Ñobätä ñan aune ja mräkätre ruäre tä nüne mente krubäte Ju Ja Ükarakrö yebätä, ruäre tä näin bute aune ruäre abokän muko kwe ñaka Testiko ye tö tuai nementa jötrö gwi.

12. ¿Ñobätä nikwe nitre umbre ji ngwanka ye ‘taredre aune mikadre ütiäte jai’? (Recuadro “ Nitre ji ngwanka juta ükaninte Ngöbökwe yete ye nikwe töi mikadre nüke gare jai” mikadre ñärärä).

¹² Nitre umbre ji ngwanka konkrekasionte ye tätre sribire ja dibiti aune tätre kukwe driere kä jutobiti ye ngwane tätre kukwe kwin bämike, yebätä nikwe niaratre mikadre tuin ütiäte jai (ñäkädre 1 Tesalonicenses 5:12, 13 yebätä). Niaratre tä ni dimike yebätä nita debe bien krubäte ietre. Aisete nikwe sribidre gwairebe bentre aune nikwe dimikadre arato. Ñan ñobätä aune, “niaratre käre tä mun ngibiarebti. Erere arato, nitre mun jie ngwianka käkwe sribibare ño abko niedita jökrä kwetre Ngöböye” (Heb. 13:7, 17).

13. ¿Jesús nämäne nitre mike tuin ño jai ye tä dre driere nie?

¹³ Isaías ni Ngöbö kukwei niekä kukwe ne mikani gare Jesubätä: “Ñaka mikä krä ye ötaibätä kwe aune ñotra jutra trä chi ye ñaka ötaite kwe” (Is. 42:3). Jesús nämäne nitre tarere aune töi mike nüke gare jai. Mikä krä nämänena nemen nötöbätä aune ñotra trä chi nämänena nemen nötöte ye kwrere ja nämäne nemen ruin nitre ie, ye niara nämäne töi mike nüke gare jai. Ye medenbätä, niara nämäne nitre töi mike nüke gare jai, tarere aune ngübare bätärekä. Monsotre kia ie ja nämäne nemen ruin kwin niara ken arato (Mar. 10:14). Ebökänä, nitre töi ñaka raba nüke gare nie aune ni ñaka raba dirire ietre Jesús  erere. Akwa, nitre ie nita kukwe driere ye nikwe töi mikadre nüke gare jai. Nita blite ño, ñongwane nita blite aune kä nuäi te nita blite ye köböite dre raba nemen bare ye ani mike gare jai.

14. Nita blite ño ni madabe ye ngwane, ¿ñobätä nikwe ja ngübadrebiti?

¹⁴ ¿Nikwe blitadre ño nitre ben? Kä nengwane, nitre ji ngwanka kukwe keta kabrebätä töi käme ye tätre nitre kwati krubäte ngwen ja tare nike ruin ietre (Mat. 9:36). Nitre kwati krubäte ñaka tö ngwen ni madai aune ñaka tö ngwen kukwe kwin ie ja känenkäre. Aisete, ütiäte krubäte nita blite ño aune ja kukwei mike ño yebiti nikwe bämikai nita ni mada tarere aune mike tuin bobre jai. Ñodre, bä kabre nitre kwati tä kukwe drieta nikwe ye kukwe nuin, akwa ñan kukwe Bibliabätä gare nie o nita mike gare metre ietre ye aibätä, ñakare aune nita niaratre mike ütiäte jai aune nita ja töi mike bätätre yebätä tätre ni kukwe nuin.

15. ¿Nitre ie nita kukwe driere ye ni raba töi mike nüke gare ño jai?

¹⁵ Nitre ie nita kukwe driere ye ni raba töi mike nüke gare jai kukwe keta kabre känti. Ñodre, nita kukwe ngwentari ye kwin krubäte dirikäre, akwa nikwe kukwe ngwandretari ngwane nikwe ni mada ye mikadre ütiäte jai aune ja töi mikadre jäme kräketre. Ni iti nämäne sribi prekursor nuainne nitre ñaka blite krubäte yekänti. Aisete, kukwe meden raba nitre mike jakaire ye ja töi mikani kwe ñaka ngwentari ietre. Ngöbö ye kä ño o dre abokän Gobran Ngöbökwe ye ñaka nämäne ngwentari ietre. Ñakare aune, nämäne kukwe ne erere niere: “Ngöbö kä tärä ye namani gare tie Bibliabätä. ¿Ti raba mike gare muen?” Nitre ñaka nüne ja erebe aune töi ñaka ja erebe, yebätä ni ñaka rabadre kukwe jene jene ükete. Akwa, käre ni rabadre ni mada töi mike nüke gare jai aune mike tuin ütiäte jai. Ye nuainkäre nitre nünanka ni käite ye tätre ja ngwen ño yebätä nikwe töbikadre.

16, 17. a) Ni tö nitre töi mikai nüke gare jai ngwane, ¿ñongwane ni rikadre kukwe driere ju ju te? b) Ni tö nitre töi mikai nüke gare jai ngwane, ¿kä nuäi te nikwe blitadre nitre ben?

¹⁶ ¿Ñongwane nikwe blitadre ni madabe? Nita kukwe driere ju ju te ye ngwane nitre ñaka ni ngübare, ñobätä ñan aune niaratre ñaka ni kärere jakänti. Aisete, ora ñongwane ni raba blite nitre ben ye erere te ni rikadre ye ütiäte krubäte (Mat. 7:12). Ñodre, ¿bämän krüte yebätä nitre tä nüke kä rairebiti ngwäte? Ye erere ngwane, ni raba kukwe driedre ji ngrabare o kukwe driere nitre kwati ngwärekri o nitre meden rükadrera ngwäte gare nie ye nikwe tuadrebiti.

¹⁷ ¿Kä nuäi te nikwe blitadre nitre ben? Sribita krubäte nitre kisete, yebätä bäri kwin nikwe blitadre nitre ben ye ngwane ñaka nuaindre raire. Nikwe blitadre bä jötrö nitre ben (1 Cor. 9:20-23). Kukwe meden tä nitre kisete o kä ñaka krubäte ietre ye nikwe mikai nüke gare jai ngwane, niaratre raba ni kain ngäbitita bobukäre. Üai deme Ngöbökwe köböire ni töi keta kabre ye tä kwin ngwane, ni rabai “sribikä jen Ngöbökwe”. Jehová raba ni dimike ni mada töi mike kukwe metre ye kain ngäbiti arato (1 Cor. 3:6, 7, 9).

18. Nita nitre mada töi mike nüke gare jai ngwane, ¿dre dre kwin rabai nikwe?

¹⁸ Nikwe miri gare jai ye erere, nikwe ja di ngwandre ni mräkätre, ja mräkätre konkrekasionte aune nitre ie nita kukwe driere ye töi mike nüke gare jai. Ye köböire, kukwe kwin rabai nikwe nengwane aune ja känenkäre. Salmo 41:1, 2 tä niere: “Nire nire tä ni bobre töi mike nüke gare jai yebätä käta juto; kukwe tare ye näire Jehovakwe mikai kwäre”. Ne madakäre, “kä rabai jutobätä kä tibienbätä”.