1, 2. ¿Eclesiastés 11:6 yete kukwe meden ütiäte mikata gare Gobran Ngöbökwe kukwei kwin drieta yebätä?

JUTA ruäre känti kukwe kwin Gobran Ngöbökwe yebätä drieta ye nitre tä kain ngäbiti kä jutobiti. Kukwe ye ara nämänentre ribere jai. Akwa kä mada känti abokän nitre ñan töta nemen blitai Ngöböbätä aune Bibliabätä. Nitre ni käite ni kukwe nuadre o ñakare, akwa nikwe kukwe driedre jankunu rabadre tuin debe Jehovai ye ngwane ie niara tö.

² Kä kitani medente mrä Jehovakwe kukwe driekäre ye rükai ngwane nitre käme gaite (Mat. 24:14, 36, TNM). Kä ye rükadre känenkri, ¿ni raba dre nuainne ne kwe ni kise ñan rabadre kwekebe? * (Ñäkädre Eclesiastés 11:6 yebätä). *

3. ¿Dre rabai gare nie kukwe ja tötikara nekänti?

³ Kukwe ketabokä raba ni dimike nitre kain kukwe ja üairebiti ye rababa gare nie kukwe ja tötikara käne yekänti (Mat. 4:19). Kukwe ketamä raba ni töi mike kukwe driere jankunu kukwe ño ererebiti ta, ye rabai gare nie kukwe ja tötikara nekänti. Ja töi mikadre kwatibe kukwe driebätä, kukwe ngübadre bätärekä aune tödeka mikadre dite ye ñobätä ütiäte yebätä nibike ja kite arato.

4. ¿Ñobätä ja töi mikadre kwatibe Jehovakwe sribi mikani ni kisete yebätä?

⁴ Kä krüte näire dre rabai bare aune nitre ja ngwain ño ye Jesukwe mikani gare nitre ja tötikaka kwe yei. Kukwe ye raba niaratre näkwite aune ñaka töi mike kukwe driere ye nämäne gare ie  arato. Yebätä niebare kwe ietre: “Munkwe mokre jabti” (Mat. 24:42). Noé näire kukwe keta kabre nuain nämäne käkwe nitre töi mikani kukwe mada jiebiti aune ñaka Noé kukwei ye töibikaire. Ye erere tä nakainkä kä nengwane kukwe keta kabre nuainta ye raba ni töi mike kukwe mada jiebiti (Mat. 24:37-39; 2 Ped. 2:5). Yebätä, ni tö ja töi mikai kwatibe Jehovakwe sribi mikani ni kisete ye nuainkäre.

5. ¿Hechos 1:6-8 tä niere erere kukwe kwin ye driei nememe medente?

⁵ Kä nengwane, ni töi tädre kwatibe kukwe kwin Gobran Ngöbökwe ye driebätä. Kukwe kwin ye driei jatai bäri niebare Jesukwe aune niara krütadre ye bitikäre nuain rabai jankunu niebare kwe (Juan 14:12). Jesús krütani ye bitikäre nitre ja tötikaka ruäre kwe ye nikaninta gwakiteta. Biti niara ganinkröta ngwane, nitre ja tötikaka ruäre kwe ye dimikani kwe gwa ere kain. Nitre kadre kukwe ja üairebiti ye sribi bäri ütiäte mada yebiti ta mikani gare kwe ietre köbö yete (Juan 21:15-17, TNM). Jesús kukwe drie kömikani juta Israel yete ye driedi juta mada mada yete arato niebare kwe nitre ja tötikaka kwe yei jatanina nikenta kä kwinbiti ye känenkri (ñäkädre Hechos 1:6-8 yebätä). Ja känenkäre dre rakaikä, “köbö ni Dänkienkwe” yete ye Jesukwe mikani tuare apóstol Juan ie. * Kukwe keta kabre mikani tuare Juan ie ye keteiti ñan tuabare jutuabare ie: “Kukwe kwin kärekäre nämäne niedre [...] nitre juta jene jene, nitre bätäkä ngwarbe, nitre kukwe jene jene aune nitre kä jene jene te ie” ye angeletre nämäne jie ngwen tuani kwe (Apoc. 1:10, TNM; 14:6, TNM). Kukwe kwin drieta kä jökräbiti tibien ye Jehová tö ni tuai driere siba nememe rabaira täte ye ngwane.

6. ¿Drebätä nikwe töbikadre abokän raba ni dimike ja töi mike kwatibe kukwe driekäre?

⁶ Jehová tä dre dre nuainne ni dimikakäre yebätä nita töbike ngwane, tä ni dimike ja töi mike kwatibe kukwe driere. Ñodre, tä tärä bien täräre nie aune Internet, kukwe grababare aune video aune JW Broadcasting, ye mrö  ja üaire biainta krubäte kwe nie. Ne madakäre, ani töbike kukwe nebätä. Kukwe 1,000 jene jenebiti bäri kukwe ütiäte raba kwen nie sitio internet nikwe yete (Mat. 24:45-47, TNM). Nitre kä jökräbiti tibien ye töita ñaka ja erebe nitre político köböite, iglesia köböite aune nitre jondron rürübäinkä krikri ye köböite, akwa ni Ngöbö mikaka täte 8 millón biti bäri tä keteitibe ni ja mräkäre metre erere. Ñodre, viernes 19 abril kä 2019 yete, kä jökräbiti tibien nitre testiko Jehovakwe käkwe video keteiti nämäne blite texto köbö kwatire kwatire yebätä ye mikani ñärärä gwairebe. Köbö yete deu nitre 20,919,041 ye ja ükaninkrö Jesús ja nire biani ngwankäreta törö jai. Nitre kwati krubäte tä keteitibe aune ye ngätäite nita siba ye jondron ñan tuabare tä nemen bare, ¿ye tä kä mike juto nibätä ñan ererea? Nita töbike kukwe yebätä ngwane tä ni töi mike kwatibe kukwe driere jankunu.

7. ¿Jesukwe kukwe kwin bämikani ye tä ni dimike ño ja töi mike kwatibe kukwe driere?

⁷ Jesús ja ngwani ño ye erere nikwe ja ngwandre ye käkwe ni dimikai ja töi mike kwatibe kukwe driere. Ñaka kukwe tuanimetre kwe ja näkwite kukwe metre driekäre (Juan 18:37). Satanakwe gobrantre jökrä kä tibienbätä driebare ie aune nitre tö namani mikai reire ye ngwane ñaka ja tuanimetre kwe nuadrete (Mat. 4:8, 9; Juan 6:15). Ñaka ja töi mikani kwe näin jondron ütiäte kä nebätä ye jiebiti aune ñan namani nekwetekä rüe käne (Luc. 9:58; Juan 8:59). Jesús ñan namani dräre aune di nekä ye erere nikwe ja ngwandre, ye käkwe ni dimikai ja töi mike kwatibe kukwe driere tödeka nikwe nuaite ngwane niebare Pablokwe (Heb. 12:3).

8. ¿Nikwe kukwe ngübadre bätärekä ye ñobätä ütiäte kä nengwane?

⁸ Ni kukwe ngübaka bätärekä ye tä kukwe kwin rükai o kukwe käme ngwain krüte ye ngübare töi jämebiti. Kukwe käme nuain nämäne Judá ye Habacuc ni Ngöbö kukwei niekä tö namani tuai krüte (Hab. 1:2). “Gobran Ngöbökwe ye rükai batibe kore” nitre ja tötikaka Jesukwe nämäne nütüre aune gobran ye käkwe niaratre mikai kwäre nitre romano yebätä nütü nämäne kwetre (Luc. 19:11, TNM). Köbö te Gobran Ngöbökwe kukwe käme gaite aune kä tibien kwitai bä nuäre ye ngübata nikwe (2 Ped. 3:13). Akwa, Jehovakwe köbö kitanina kukwe ye nuainkäre ye nikwe ngübadre bätärekä. Nikwe kukwe ngübadre bätärekä ye Jehová tä driere ño nie ye ani mike gare ruäre jai.

9. ¿Jehovata kukwe ngübare bätärekä ye bämikanina ño kwe?

⁹ Kukwe ngübadre ño bätärekä ye Jehovata bämike metre. Kä biani kwe Noé ie arka sribekäre aune kukwe driekäre (2 Ped. 2:5; 1 Ped. 3:19, 20). Jehovakwe ja töi mikani nitre Sodoma aune Gomorra gainte yebätä Abrahán namani kukwe ngwentari bäre bäre ie ye ngwane kukwe nuabare bätärekä kwe (Gén. 18:20-33). Nitre israelita ñaka ja ngwani metre Jehovai, akwa Jehovakwe ngübabare bätärekä kä kwati krubäte te (Neh. 9:30, 31). Kä nengwane Jehová tä nitre ngübare bätärekä arato, tä kite nitre ngwena ja kokwäre yei kä bianta kwe ja töi kwitakäre ne kwe rabadre ja ketamuko kwe (Juan 6:44; 1 Tim. 2:3, 4; 2 Ped. 3:9). Jehovata ni mada ngübare ño bätärekä ye tä ni dimike kukwe ngübare bätärekä kukwe drieta nikwe aune nitre tötikata nikwe ne näire. Bibliabätä Jehovata kukwe keteiti bämike käta ni dimike kukwe ngübare bätärekä arato. Ye meden ani mike gare jai.

10. ¿Santiago 5:7, 8 yete kukwe bämikani ni nura nökaka yebätä ye tä dre driere nie?

¹⁰ (Ñäkädre Santiago 5:7, 8 yebätä). Ni nura ngwä nökaka tä nura ngwä ngübare bätärekä ye tä kukwe driere ja töi kräke nie. Kri mu ruäre tä nirien jötrö, akwa bäsi jökrä tä nirien bätärekä, meden meden ngwäta nemen ye bärira  jire. Israel kirabe yete sribi nämäne nurabätä, ni nura nökaka nämäne nura nökö octubre ötare ñü nämäne näkäin kena ye bitikäre aune nämäne nura ngwä ötö abril ötare ñü nämäne näkäin mrä ye bitikäre (Mar. 4:28). Nikwe kukwe ngübai bätärekä ni nura nökaka erere ngwane nikwe ja ngwain töbätä. Akwa kukwe ngübadre bätärekä ye ñan nemen nuäre ni kräke.

11. ¿Nita kukwe ngübare bätärekä ye tä ni dimike ño kukwe driekäre?

¹¹ Ni töi ngite yebätä ni ñaka kukwe ngübare bätärekä ñakare aune sribi ño nuainta nikwe yekwe kukwe kwin mikadre nemen bare ni kräke ie ni töta nemen biare. Akwa tire tädre chi ni itikwe aune tö rabadre nura ngwä ötai yekäre, rabadre käre kä ükete tibien, nura nökö, nura bäsekä aune ñö metekäbiti. Ye erere tä nemen bare kukwe ja üairebiti nitre mikakäre ja tötike. Nikwe kä diandrekä krubäte jai ne kwe nitre tä ja tötike nibe ye ñaka rabadre ni mada kitete aune rabadre ni jökrä tarere ye driekäre ietre. Nitre ñaka tä ni kain ngäbiti ngwane, nita kukwe ngübare bätärekä ye köböire ni ñaka rabai di nekä. Akwa nitre tä ni kukwei kain ngäbiti ngwane nikwe kukwe ngübadre bätärekä arato, ñobätä ñan aune ni ñaka raba ni ja tötikaka ye töi mike ja dibiti nirien kukwe ja üairebiti. Jesús kukwe niebare ye ruäre ñan nükani gare bengwairebe nitre ja tötikaka kwe ie arato (Juan 14:9). Nita nura nökö aune ñö metekäbiti, akwa Ngöbö aibe tä mike nirien ye nikwe ngwandre törö jai (1 Cor. 3:6).

12. ¿Ni mräkä ñaka testiko ie nita kukwe driere ye ngübata bätärekä nikwe ye ni raba bämike ño?

¹² Akwa nita kukwe driere ni mräkätre ie ngwane bäri ñan tä nemen nuäre ni kräke niaratre ngübakäre bätärekä. Kukwe nekänti kukwe ja jie ngwankäre tä Eclesiastés 3:1, 7 ye raba ni dimike. Yete nieta: “Kä [...] tärä rabakäre kwekebe aune blitakäre”. Nita ja ngwen kwin yebiti nita kukwe driere ni mräkätre ie, akwa ni raba ngwane ni tädre juto biare blitakäre kukwe metrebätä bentre (1 Ped. 3:1, 2). Ni rabadre kukwe driere aune nitre tötike kä jutobiti, akwa ni  rabadre ni jökrä ngübare bätärekä aune ni mräkätre arato.

13, 14. ¿Nire nire erere ni raba kukwe ngübare bätärekä?

¹³ Nitre kirabe Ngöbö mikaka täte kukwe ngübabare bätärekä aune ja mräkätre kwati kä nengwane tä ye erere nuainne, niaratre kukwe ngübabare bätärekä yebätä kukwe kwin raba nemen gare nie. Habacuc tö namani kukwe käme nämäne nakainkä ye tuai krüte, akwa nämäne tö ngwen Jehovai yebätä niebare kwe: “Ti täi nünaninkä krö jankunu ni mikaka mokre erere” (Hab. 2:1). Apóstol Pablo juani kukwe driere ye niara tö namani mikai krüte. Akwa yebiti ta nämäne kukwe ngübare bätärekä yebätä kukwe kwin ye driebare kwe täte (Hech. 20:24).

¹⁴ Ja mräkätre gure nikani Kwela Galaadbätä yebätä ani blite mada. Niaratre graduabare ye bitikäre juani kukwe driere juta känti nitre Testiko ñaka krubäte aune nitre jökrä bäsi ñaka ja bien kristiano yete. Nitre ñan namani kwen krubäte ietre ja tötikakäre Bibliabätä. Akwa, ja mräkätre mada janamane bentre kwelate juani juta madate ye nämäne kukwe kwin mike gare, niaratre nämäne nitre kwati dimike ño ja ngökö ñöte ye nämänentre mike gare ietre. Akwa ja mräkätre gure nämäne kukwe ngübare bätärekä yebätä kukwe driebare jankunu kwetre sribi Ngöbökwe ñan nämäne nirien jötrö yebiti ta. Nitre ñan nämäne niaratre kukwe nuin krubäte, akwa kä kwä kwä ye bitikäre kukwe kwin namani bare, ni ja tötikaka iti kwetre ye ja mikani testiko Jehovakwe ye käi namani juto krubäte bätätre. ¿Nitre kirabe aune ja mräkätre kä nengwane ye kukwe meden ja erebe nuainbare? Niaratre ñaka ja ngwani krene aune ñaka ja kise mikani nemen kwekebe, ñakare aune kukwe ngübabare bätärekä kwetre yebätä Jehovakwe kukwe kwin mikani nemen bare kräketre. Ye medenbätä, “nitre tä tödeke aune kukwe ngübare bätärekä ye köböire jondron käbämikata ye tä nemen kwetre” ye erere nikwe ja ngwandre (Heb. 6:10-12, TNM).

15. ¿Ni tö kukwe driei ye ñobätä tä tödeka nikwe mike dite?

¹⁵ Kukwe kwin drieta nikwe yei nita tödeke, aisete ni töta nemen nitre kwati tuai kukwe nuin. Kukwe kwin käbämikata Bibliabätä yei nita tö ngwen (Sal. 119:42; Is. 40:8). Profecía tä Bibliabätä ye ruäre namanina bare ni näire tuin nie. Kukwe nieta Bibliabätä ye nitre tä mike täte ngwane tätre nüne bäri kwin ye nikwe tuanina arato. Kukwe ne jökrä tä mike gare metre nie nitre käbiti tibien ie kukwe kwin driedre tätre ribere jai.

16. a) Salmo 46:1-3 tä niere erere, ¿nita tödeke Jehovai ye ñobätä tä ni dimike kukwe driere bäri? b) ¿Nita tödeke Jesús ie ye ñobätä tä ni dimike kukwe driere bäri?

¹⁶ Arato nita tödeke Jehovai ñobätä ñan aune kukwe kwin drieta nikwe ye kite niarakri aune nita tödeke Jesús ie, ñobätä ñan aune Jehovakwe niara kädekani Reire Gobran kwe yete (Juan 14:1). Dre dre rakadrekä yebiti ta, käre Jehovakwe ni kriemikai aune ni dimikai (ñäkädre Salmo 46:1-3 yebätä). * Ne madakäre, Jehovakwe ja di biani Jesús ie aune sribi mikani kwe kisete yebätä Jesuta kukwe drie jie ngwen ye gare metre nie (Mat. 28:18-20).

17. ¿Ñobätä nikwe kukwe driedre jankunu ye mä raba bämike keteiti?

¹⁷ Nita ja di ngwen kukwe driekäre yebätä Jehovakwe kukwe kwin mikai nemen bare ni kräke ye gare metre nie nita tödeke ye köböire aune ruäre ngwane kukwe meden ñaka ngübata nikwe yebiti nuaindi kwe ni kräke arato (Ecl. 11:6). Ñodre, nita tärä aune täräkwata mike  tuare exhibidor yebiti ye nitre kwati tä mike ñärärä. ¿Kukwe drieta ye erere ye köböire kukwe kwin tä nemen bare? Jän, kukwe kwin tä nemen bare. Sribi Nikwe Ngöbökrä noviembre 2014 yebätä kukwe ne mikani gare, meri nänkä kwela krite käkwe ja töi mikani kukwe tike ni testiko Jehovakwe yebätä. Ju Ja Ükarakrö ñaka kwani jire ie, akwa kwela krite yekänti tärä bätä täräkwata jutuabare mesabiti ie. Ye köböire tö namani dre tikai nitre testiko Jehovakwe yebätä ye jökrä kwani ie yete. Kä nikani ta ye bitikäre ja ngökani ñöte kwe aune nengwane tä sribire prekursora regular erere. Kukwe kwin ne erere tä nemen bare ngwane, tä ni töi mike kukwe driere jankunu ñobätä ñan aune kukwe kwin Ngöbökwe drieta ye nitre ruäre tä ribere jai tä nemen gare nie.

18. ¿Jehovakwe kä debe näre te kukwe kwin Gobran Ngöbökwe drieta ye ngwain krüte ye ñobätä gare metre nie?

¹⁸ Kä debe näre te kukwe kwin Gobran Ngöbökwe drieta ye ngwain krüte ye gare metre nie. Dre nakaninkä Noé näire yebätä ani töbike. Jehová tä kukwe jökrä nuainne kä debe näre te bämikani kwe yete. Köbö meden te ñü kri ränkädre ye Jehovakwe köböi kitanina kä 120 ye känenkri. Kä kwati krubäte te ye bitikäre arka sribe mananbare kwe Noé ie. Kä 40 o 50 te Noé arka sribebare jankunu. Nitre ñaka nämäne Noé kukwei töibikaire, akwa yebiti ta mikani mokre kwe jankunu nememe jondron nire mikadre arka teri niebare Jehovakwe ie ye ngwane. Biti, kä debe näre te Jehovakwe jukwe dikani (Gén. 6:3; 7:1, 2, 16).

19. ¿Nikwe ñaka ja kise mikai nemen kwekebe ngwane nikwe kukwe meden kwin tuai nemen bare?

¹⁹ Gwä ngwarbe, kukwe drieta nikwe ye Jehovakwe ngwain krüte. Satana tä gobrane ye jukwe dikai kwe aune kä tibien ükaite bä nuäre kwe. Yete nitre kukwe metre nuainkä aibe nünain. Akwa köbö ye rükadre känenkri, ani ja töi mike ñaka ja kise mike nemen kwekebe Noé, Habacuc aune nitre Ngöbö mikaka täte mada ye erere. Ani ja töi mike kwatibe kukwe driere jankunu, kukwe ngübare bätärekä, tödeke kwatibe Jehovai aune kukwe käbämikata kwe yei.