1. ¿Nitre ja ngwanka metre ye raba Jehová mike tuin ño jai?

NITRE ja mräkäre kwati tä Jehová mike täte ye ngätäite Jesús “sribebare kena jondron jökrä ye känenkri” aune angeletre kwati ye tä (Col. 1:15, TNM; Sal. 103:20). Jesús nämene kä tibienbätä ngwane, nitre ja ngwanka metre ye raba Jehová mike tuin jai ja Rün erere mikani gare kwe. Bati nämene blite nitre ja tötikaka kwe ben ngwane, Jehová ye abokän “ti Rün amne mun Rün” niebare kwe (Juan 20:17). Ne madakäre, nita ja denkä mento Jehová kräke aune nita ja ngökö ñöte ngwane, nitre ja mräkäre känti ja etebatre aune ja ngwaitre tätre ja tarere ye ngätäite nita nemen (Mar. 10:29, 30, TNM).

2. ¿Dre rabai gare nie kukwe ja tötikara nekänti?

² Jehová ye abokän ni Rün ni tarekä ye kwrere mikadre tuin jai ye ñaka tä nemen nuäre nitre Ngöbö mikaka täte ruäre kräke. Mada abokän ja tare bämikadre ño kwetre ja mräkätre mada ie ye ñaka tä nemen gare ietre. Jehová ye abokän ni Rün ni tarekä erere mikadre tuin jai aune ni raba nökrö niara ken, ye Jesús tä ni dimike mike nüke gare ño jai ye rabai gare nie kukwe ja tötikara nekänti. Aune nita ja mräkätre mada mike tuin ño jai yebiti nita ja ngwen ño Jehová erere ye rabai gare nie arato.

3. ¿Orasion padrenuestro ye ñobätä tä ni mike nökrö bäri Jehová ken?

³ Jehová ye abokän ni Rün ni tarekä ye erere nikwe mikadre tuin jai ye ie Jesús tö: Jehová ye abokän ni Rün ni tarekä aune ni raba blite käre ben ye erere nikwe mikadre tuin jai aune ñaka ni iti ñaka ni töibikaire aune jerekäbe tä kukwe nuainmana nie ye erere. Oradre ño ye Jesús nämene driere nitre ja tötikaka kwe ie ngwane, “nun Rün” niebare kwe orasion kömikakäre yebiti bämikani metre kwe (Mat. 6:9). “Ni Dite krubäte”, “ni Sribekä” o “Gobranka  kärekäre” niedre Jehovai ye Jesukwe driedre näre ñobätä ñan aune kukwe ye tä Bibliabätä (Gén. 49:25; Is. 40:28; 1 Tim. 1:17). Akwa ñaka ye erere nuainbare kwe ñakare aune kukwe nuärebiti ja driedre Jehovai ye abokän ni “Rün” niedre Jehovai niebare kwe.

4. ¿Ni rökradre Jehová ken ye ie niara tö ye ñokänti gare nie?

⁴ ¿Jehová ye abokän ni Rün ni tarekä ye erere mikadre tuin jai ye ñaka nemen nuäre ni kräke? Nun ruärebätä kukwe ye erere nemen bare. Nun ruäre nämäne chi ngwane nunkwe ja tuani kukwe ñaka nuäre ben yebätä kukwe ye erere raba nemen bare nibätä. Akwa ja ruin ño nie ye nüke gare Jehovai aune niara tö rökrai ni ken ye nemen gare nie ye tä ni töi mike jäme. Ye medenbätä niara tä ni nübaire kukwe ne erere nuainne: “Krötö känime Ngöbö ken munkwe amne Ngöbökwe krötadi känime mun ken” (Sant. 4:8). Jehová tä ni tarere aune niara abokän ni Rün bäri kwin raba nemen nikwe ye niara tä mike gare nie.

5. Lucas 10:22 tä niere erere, ¿ñobätä Jesús raba ni dimike nökrö bäri Jehová ken?

⁵ Jesús raba ni dimike nökrö bäri Jehová ken. Niara ño ye gare kwin Jesús ie aune Jehová töi kwin keta kabre ye niara tä bämike bäri kwin. Yebätä kukwe niebare kwe: “Nire nire käta ti tuen, ye abko tä ti Rün tuen arato” (Juan 14:9). Nikwe ni Rün mikadre ütiäte jai, kukwei mikadre täte, nikwe kä mikadre jutobätä aune ñokänti raba ni kain ngäbiti ye ni mräkä bäri umbre tä driere nie ye erere Jesús tä driere nie. Akwa Jesús nükani kä tibienbätä ngwane, kukwe meden nuainbare kwe yebiti Jehová ye abokän töi kwin aune tä ni tarere ye mikani gare metre kwe nie (ñäkädre Lucas 10:22 yebätä). Kukwe ruäre ye ani mike gare jai.

6. ¿Jehovakwe Jesús kukwe nuani ye ñobätä ni raba niere?

⁶ Jehová tä monsotre kwe kukwe nuin. Monso kwe mubai ye kukwe nuani ño kwe ye ani mike gare jai. Jesukwe orabare bä kabre Jehovai nämene kä tibienbätä ngwane, Jehovakwe kukwe nuabare ye gare metre nie (Luc. 5:16). Kukwe ütiätebätä Jesukwe ja di käräbare ie, Jesús jababare nitre apóstol 12 denkä ye ngwane (Luc. 6:12, 13). Jesús nämäne ja tuin kukwe tare ben ngwane ja di käräbare kwe Jehovai aune niarakwe kukwe nuabare arato. Judas  jababare Jesús kite ngise ye känenkri, Jesukwe ja di käräbare Rün kwe ie ja tuakäre kukwe tare yebe. Jehovakwe ñaka monso kwe tare kwe ye kukwe nuabare jerekäbe, ñakare aune ángel iti juani kwe niara dimikakäre (Luc. 22:41-44).

7. ¿Jehovata orasion mäkwe kukwe nuin yebätä ja ruin ño mäi?

⁷ Kä nengwane nita orare Jehovai ye niara tä kukwe nuin arato. Nita dre ribere ie orasionte ye niara tä mike nemen bare ni kräke kä debe näre te aune tä mike nemen bare kwin (Sal. 116:1, 2). Meri testiko nünanka käi India yekänti yebätä kukwe ye namani bare metre. Ja töibikata krubäte yebe niara nämäne ja tuin aune ja di käräbare kwe Jehovai. Niara tä niere: “Nita ja töibikaire krubäte yebe ni raba ja tuin ño ye mika nämä gare JW Broadcasting^® mayo 2019 kräke yete, kukwe ye ara ti nämä ribere jai. Jehovakwe orasion tikwe kukwe nuaba ye rababa gare tie kukwe yebiti”.

8. ¿Jehová nämäne Jesús tarere ye bämikani ño kwe ie?

⁸ Jehovakwe ja tare bämikani Jesús ie nämene kä tibienbätä ngwane, ye erere Jehovata bämike nie (Juan 5:20). Jesús nämäne dre ribere jai kukwe ja üairebiti, ja ngätärebiti aune ja nämäne ruin ño ie, ye erere Jehovakwe biani ie. Aune Jehová nämäne niara tarere bätä kain ngäbiti ye ñaka töbikaibare krubäte kwe bämikakäre ie (Mat. 3:16, 17). Ja ñaka namani ruin kaibe jire Jesús ie ñobätä ñan aune niara Rün kä kwinbiti nämäne käre ben ye nämä gare metre ie (Juan 8:16).

9. ¿Jehovata ni tarere ye nemen gare nie kukwe medenbätä?

⁹ Jehová tä ni tarere ye tä bämike bä kabre nie ye tä nemen gare metre nie Jesús erere. Ani töbike kukwe nebätä: Jehová jatani ni ngwena ja kokwäre aune ja mräkätre ja üaire tä ja tarere, nüne keteitibe jabe ye tä kä mike juto nibätä aune tä ni dimike ye biani kwe nie (Juan 6:44, TNM). Mrö ja üaire bänänte aune ere krubäte ye bianta kwe nie arato. Ne madakäre, nita dre dre ribere jai köbö kwatire kwatire te ye niara tä bien nie arato (Mat. 6:31, 32). Jehovata ni tarere yebätä nita töbiketari ngwane nita kite niara tarere bäri.

10. ¿Jehovata ja mräkätre tarere ye erere ni raba nuainne ño?

¹⁰ Jehovata ja mräkätre jökrä tarere akwa ni rabadre ja mräkätre tarere aune bämike ie ye ñaka tä nemen nuäre ruäre ngwane ni kräke. Nita nüne kä jene jene känti o kukwe jene jene te ni ririabare yebätä ñaka tä nemen nuäre ni kräke ruäre ngwane raba ruin nie. Aune ni jökrä tä ja mike ngite yebätä kukwe nuainta nikwe ye raba ja mräkätre mike ulire o raba mate tare bätätre, akwa yebiti ta nikwe ja mräkätre taredre Jehovata nuainne erere, ne kwe ja mräkätre ja üaire ye tädre ja tarere kwärikwäri jankunu (Efes. 5:1, 2, TNM; 1 Juan 4:19). Jehovata kukwe kwin bämike ni käne yebätä dre raba nemen gare nie ye ani mike gare jai.

11. ¿Ni ruentari tare Jehovai ye Jesukwe bämikani ño?

¹¹ Nitre “ruentari tare kri “Jehovai (Luc. 1:78). Nire tä nitre mada mike tuin bobre jai ngwane, nitre tä ja tare nike ye tä nemen töibikaire aune tä kukwe känene dimikakäre. Jesukwe nitre mikani tuin ño jai yebiti Jehovata ni mike tuin ño jai ye bämikani metre kwe (Juan 5:19). Biblia tä niere “obeja ngibiaka ñakare abko jändrän krübäte tä nike bäri amne di ñakare ja ngibiakrä rüe ngäniene, aibe kisete tä nebe dräre, ye kwrere jire nitre ye rababa tuen Jesuye” (Mat. 9:36). Jesús nämene nitre mada mike tuin bobre jai ye kräke ñaka jerekäbe ja töi mikani kwin kwe ñakare aune nitre bren mikaninta räre kwe, nitre nämene sribire krubäte aune dräre ye niarakwe dimikani (Mat. 11:28-30; 14:14).

12. ¿Nita ni mada mike tuin bobre jai ye ni raba bämike kukwe medenbiti?

¹² Nita ja mräkätre töibikaire aune nita mike tuin bobre jai ye ni tö bämikai ietre ngwane, kukwe meden meden tä kisete yebätä ni rabadre töbike.  Ñodre, meri testiko itibätä bren tare tädre kukwe meden ben tä ja tuin yebätä ñaka blite krubäte, akwa dimikadre ye raba nemen kwin kräke. ¿Raba mräkätre kwe ngübare? ¿Nikwe niara dimikadre mrö rien o ju mike mrebe ye raba nemen kwin kräke? O ja mräkä iti kwe sribi nianinte aune sribi jämi kwen ie yei ni raba ngwian bien käbube dimikakäre.

13, 14. ¿Jehovata ja ngwen mantiame ye erere ni raba nuainne ño jankunu?

¹³ Jehová ye abokän mantiame (Mat. 5:45). Ni tö nitre mada mikai tuin bobre jai ngwane, ja mräkätre ja di kärädre ye ngwane batibe ni rikadre dimike ye ni ñaka tö ngübai. Ñakare aune ni tö kukwe nuainbätä käne Jehová tä nuainne erere. Ni ñaka ribere Jehovai akwa köbö kwatire kwatire te tä ñänä mike betekä kwin aune ñänä trä ye ta nemen kwin nitre jökrä kräke aune ñaka nitre tä debe bien ye aibe kräke. Dre dre ribeta nikwe jai ye Jehová tä bien nie yebiti tä ni tarere bämikata kwe nie, ¿ñan ererea? ¡Jehová töi kwin aune mantiame yebätä nita niara tarere krubäte!

¹⁴ Ja mräkätre kwati tä ja mräkätre mada dimike aune tä ja ngwen mantiame yebiti tätre ja ngwen Jehová erere. Kä 2013 yete ñü kri muriebe minimini kädeka nämäne Haiyan käkwe kukwe tare mikani nemen bare kä ruäre Filipinas yete yebätä ani blite. Ja mräkätre kwati kän ju nikani ngwarbe aune jondron nianinte jökrä kän, akwa bengwairebe ja mräkätre ja üaire kä jökräbiti tibien nikani niaratre dimike. Ja mräkätre käkwe jondron biani aune sribibare dite kwe ye köböire sribi kri krubäte nuainbare ju 750 näre ükatekäre kä kwatibe te. Aune COVID-19 nemen bare käbiti tibien ye näire, nitre testiko Jehovakwe kä jökräbiti tibien tätre ja mräkätre dimike. Nita juto biare ja mräkätre kä jökräbiti tibien dimikakäre ngwane, nita tarere ye nita bämike ietre.

15, 16. Lucas 6:36 tä niere erere, ¿ni tö ja ngwain Jehová erere ngwane nikwe dre nuaindre?

¹⁵ Jehová ye tä ni mike tuin bobre jai aune tä ngite juen ta nibiti (ñäkädre Lucas 6:36 yebätä). Köbö kwatire kwatire te ni Rün kä kwinbiti tä ni mike tuin bobre jai ye tä bämike nie (Sal. 103:10-14). Ye erere arato nitre ja tötikaka Jesukwe ye töi ñaka nämäne metre, akwa Jesukwe mikani tuin bobre jai aune ngite juani kwe ta bititre. Aune Jesús nämene juto biarebe ja nire biankäre ni ütiäre ne kwe ngite juandre ta nibiti  (1 Juan 2:1, 2). Jehová aune Jesús tä ni mike tuin bobre jai aune tä ngite juen ta nibiti ye tä ni mike nökrö bäri niaratre ken, ¿ñan ererea?

¹⁶ Töi kwinbiti nita ngite juen ta ni madabiti ngwane, ja mräkätre ja üairebiti tä nemen ja tarere bäri (Efes. 4:32). Akwa ngite juandre ta ni madabiti ye ruäre ngwane ñan tä nemen nuäre ni kräke, akwa nikwe ja di ngwandre nuainkäre. Kukwe kädekata “Ngite juandre ta jabiti kwärikwäri” * tä täräkwata Ni Mikaka Mokre yebätä ye käkwe meri testiko iti dimikani. Niara tä niere: “Tikwe ja tötikabare tärä yebätä ye käkwe ti dimikanina töbike kwin ja käne kukwe yebätä. Nita juto biare ngite juankäre ta ni madabiti ye ngwane, kukwe käme nuainbare ni yekwe ye nita kain ngäbiti o ñaka ütiäte ni kräke ye ñan ai gärätä. Ñakare aune kukwe nuainbare ni yekwe yebätä ni moto ñaka rubun jankunu kräke aune nita nementa jäme jankunu ye meden gärätä mikaba gare täräkwata yebätä”. Töi kwinbiti nita ngite juen ta ja mräkätrebiti ngwane nita niaratre tarere aune nita ja ngwen ni Rün Jehová erere ye nita bämike.

17. Mateo 5:16 tä niere erere, ¿ni raba dre nuainne Jehová mikakäre ütiäte?

¹⁷ Nitre ja mräkäre kä jökräbiti tibien tä ja tarere ye ngätäite nita siba ye ütiäte krubäte ni kräke. Aune ni kwati krubäte rabadre Jehová mike täte nibe siba ye ie ni tö. Ye medenbätä, ni ñaka tö Jehová kä aune juta kwe ye bämikai käme nitre okwäte. Aune käre ni tö ja ngwain kwin ne kwe kukwe kwin drieta nikwe ye rabadre tuin kwin nitre ie yekäre (ñäkädre Mateo 5:16 yebätä).

18. ¿Dre käkwe ni dimikai ñaka kä jürä ngwen jabätä kukwe driekäre?

¹⁸ Ruäre ngwane nitre ni mikai tuin ngwarbe jai aune ja mikai ni rüere, nita ni Rün kä kwinbiti mike täte yebätä. Nita dre mike täte ye jüräta nemen nibätä mikakäre gare nitre madai ngwane, ¿ni raba dre nuainne? Jehová aune monso kwe käkwe ni dimikai ye nikwe ngwandre törö jai. Nitre ja tötikaka Jesukwe käkwe dre niedre aune niedre ño kwe yebätä ñaka töbikadretari krubäte kwe niebare kwe ietre. Niara ara käkwe mikani gare ietre: “Mun järabara ja ngwärekri yete angwane, ñan munkwe blitadi kaibe au jakrä  akwa, Ngöbö mun Rün abko Üai kwe ara jire käkwe kukwe biandi munye ja kwetakrä jakrä amne blitadi kwe mun köböire munkrä” (Mat. 10:19, 20).

19. ¿Ni iti ja tötikaka Bibliabätä käkwe ja ngwani dite kukwe mikakäre gare ño?

¹⁹ Ja mräkä kädekata Robert yebätä dre namani bare ye ani mike gare jai. Niara jatani krire ja tötike Bibliabätä aune kukwe ñaka nämene gare krubäte ie ngwane, niara jänikani ni kukwe ükatekä Sudáfrica yete ye ngwärekri. Niara ñaka näin rübätä ñobätä ñan aune ja etebatre aune ja ngwaitre Ngöbö mikaka täte ben ye nämene tare kwe yebätä, ye ñan kä jürä ngwani kwe jabätä mikakäre gare. Niara tä Jehová mräkätre ye ngätäite ye ütiäte krubäte kräke ye bämikani metre kwe. Batibe kore ni kukwe ükatekä iti käkwe ngwanintari Robert ie: “¿Ja etebatre aune ja ngwaitre mäkwe ye abokän nire nire?”. Kukwe ye erere ngwandretari Robert ie ye ñaka ngüba nämäne kwe akwa bengwairebe texto köbö yete kräke ye nükani törö ie. Ye abokän Mateo 12:50: “Ñobtä ñan angwane ti Rün kä käinbti ye nire nire käta kukwei mike täte, ni ye abko ti etba tikwe, ti ngwai tikwe amne ti meye tikwe”. Robert nämene krire ja tötike Bibliabätä, akwa üai deme Ngöbökwe ye käkwe niara dimikani kukwe ngwantaribare ie ye aune mada mada ye mikakäre gare. ¡Niara käi namani juto krubäte Jehovabätä! Nikwe tö ngwain Jehovai kukwe driekäre kukwe tare näire aune nikwe ñaka kä jürä ngwain jabätä nuainkäre ye ngwane ni käi rabai jutobätä arato.

20. ¿Nikwe dre nuaindre jankunu? (Juan 17:11, 15).

²⁰ Jehová mräkätre tä ja tarere ye ngätäite nita ye nikwe mikadre ütiäte jankunu jai. Ni Rün bäri kwin tä nikwe aune ja etebatre bätä ja ngwaitre tä ni tarere ye tä nikwe arato. Nikwe ñaka kukwe ye mikadre tuin ngwarbe jai. Ni Rün kä kwinbiti tä ni tarere ye ñaka rabadre era ni kräke ye ie Satana aune nitre ja mikaka niarakri tö aune ñaka tö ni tuai keteitibe. Jehovakwe ni ngübadre ne kwe ni tädre keteitibe jankunu ye Jesukwe ribebare orasionte ni kräke Jehová ie (ñäkädre Juan 17:11, 15 yebätä). Aune Jehovakwe orasion ye kukwe nuani aune tä mike nemen bare kä nengwane. Nikwe ja ngwandre Jesús erere aune Jehová tä ni tarere bätä tä ni dimike ye nikwe mikadre era jai. Ni rökradre bäri ja mräkätre ja üaire ye ken.