KUKWE JA TÖTIKARA 39
Ni mräkä tare nikwe tä kämikekä Jehovabätä
“Bä kabre niara mikani ulire kwetre” (SAL. 78:40).
KANTIKO 102 Nikwe nitre mada dimikadre
KUKWE NEBÄTÄ JA TÖTIKAI *
1. ¿Ja mräkä iti kitakata kukwebätä ngwane mräkätre kwe ie jata nemen ruin ño?
JA MRÄKÄ iti kitakata konkrekasionte ngwane mräkätre moto tä nemen ulire krubäte. Meri testiko kädekata Hilda * tä niere: “Tikwe ja mäkäninte ti muko ben ye käi nikani 41 ta ye bitikäre krütaba, niarakwe ja ngwanba metre nememe köbö ye näire aune kukwe ye bäri tare rababare tibätä rababa ruin tie. Akwa ti ngobo käkwe konkrekasion tuanmetreba, muko kwe tuanmetreba aune monsotre kwe tuanmetreba ngwane ye rababa bäri tare krubäte tie”.
Ni mräkä tare nikwe ye tä kämikekä Jehovabätä ngwane, ye tä nemen tare nie ye nüke gare Jehovai (Párrafo 2 aune 3 mikadre ñärärä) *
2, 3. Salmo 78:40, 41 tä niere erere, ¿nitre Jehová mikaka täte tä kämikekäbätä ngwane jata nemen ruin ño ie?
2 Angeletre kwati nämäne Jehová mräkätre ngätäite ye käkwe trö kwitani ie ngwane namani tare krubäte ie yebätä ani töbike (Jud. 6). Aune juta kwe Israel nämäne tare kwe ye nämäne ja mike niara rüere bati bobu ye ngwane namani tare krubäte ie, ¿ye ni raba bämike ja okwäte? (Ñäkädre Salmo 78:40, 41 yebätä). * Mä mräkä tare mäkwe käkwe kämikadrekä Jehovabätä ngwane ye rabai tare ni rün kä kwinbiti ie ye tädre gare metre mäi. Mata ja tare nike ye nüke gare ie aune mä mikai tuin bobre kwe jai yebätä mä töi mikai jäme kwe aune mä dimikai kwe.
3 Ni mräkä tare nikwe kitakata kukwebätä ngwane nikwe dre nuaindre ne kwe ni dimikadre, ye rabai gare nie kukwe ja tötikara nekänti. Aune ja mräkätre konkrekasionte meden tä ja tuin kukwe ne kwrere ben ye ni raba dimike ño yebätä blitai arato. Akwa töbika keteiti ñaka kwin yebätä nikwe ja ngibiadrebiti yebätä ani blite käne.
MÄKWE ÑAKA NGITE KITA JABITI
4. ¿Monso iti tä kämikekä Jehovabätä ngwane jata nemen ruin ño rün aune meye ie?
4 Monso tare rün aune meye yekwe kitakata kukwebätä ngwane niaratre dre mada nuaindre ne kwe monso kwe tädre känime Jehová mike täte ye tätre nemen ngwentari jai. Ja mräkä kädekata Luke ye ngobo kitaninkä kukwebätä ye bitikäre ja nämäne ruin ño ie nieta kwe: “Ja nämä nemen ruin ngite tie, kukwe ye nämä nemen rite tibiti köböre. Ruäre ngwane ti nämä muen aune ti brukwä nämä nemen nötöte”. Meri testiko iti kädekata Elizabeth ye nämä ja tuin kukwe ye kwrere ben aune nämäne töbike jankunu ne kwrere: “¿Tikwe dre ñaka nuainbare kwin ni meyere erere? Tikwe ñaka ja di ngwani kukwe metre mikakäre gare monso tikwe ie rababa ruin tie”.
5. ¿Ni iti Jehová tuanemetre ngwane nire ngite kukwe yebätä?
5 Jehovakwe ni sribebare ne kwe ni rabadre kukwe den nuaindre akwle jai. Yebätä nikwe niara mikai täte o ñakare ye tä gare nie. Monsotre bati ruäre rün aune meye ñaka kukwe kwin bämikani käne, akwa niaratre ja töi mikani Jehová mike täte aune täbe ja ngwen metre ie. Monsotre mada abokän rün aune meye käkwe ja di ngwani kukwe ja jie ngwankäre Bibliabätä ye driekäre ietre, akwa jatanintre ünä ngwane Jehová tuanimetre kwetre. Ye medenbätä nikwe Jehová mikai täte o ñakare ye ni itire itire rabadre den nuaindre akwle jai (Jos. 24:15). Aisete nitre rüne monso mäkwe käkwe kämikadrekä Jehovabätä ngwane, mäkwe ñaka ngite kita jabiti.
6. ¿Nitre rüne tä kämikekä Jehovabätä ngwane jata nemen ruin ño monso bati ie?
6 Ruäre ngwane nitre rüne o meyere ara tä kukwe metre tuenmetre aune tä mräkätre kwe tuenmetre arato (Sal. 27:10). Kukwe ne tä nemen tare monsotre ie ñobätä ñan aune rün aune meye ye ni kukwe kwin bämikaka käne ye erere tuin ie yebätä. Esther rün kitaninkä kukwebätä ngwane, ja namani ruin ño ie ye nieta kwe: “Ti rün ñaka kämikakaba bätärekä bätärekä Jehovabätä, ñakare aune nämä dre nuainne ye nämä gare ie, yebätä bäsi käre ti nämä muen. Ti nämä ti rün tarere, aisete täi kwin o ño yebätä ti nämä töbike käre aune ti nämä nekwetekä jiebiti arato”.
7. ¿Monsotre kwe rün aune meye tä kitaninkä kukwebätä ye kräke Jehová töita ño?
7 Monsotre bati mä rün aune mä meye kitaninkä kukwebätä ngwane ye nemen tare mäi aune ye nemen tare nunye arato. Aune ja ruin ño mäi ye gare Jehovai ye tädre gare metre mäi. Jehová tä mä tarere aune mätä sribire jankunu kräke ye käi jutobätä. Aune nun mä etebantre aune mä ngwaitre mä käi juto nunbätä arato. Mä rün aune mä meye käkwe kukwe diandre jai yebätä mä ñaka ngite ye mäkwe ngwan törö jai arato. Nikwe mirira gare erere, nikwe Jehová mikai täte o ñakare ye tä diandre jai ni itire itire ie. Aune nikwe ja dianinkä mento Ngöbö kräke aune ja ngökani ñöte ye “käkwe töbikadre tribe jen kwe ngwianbtä kuin metre” (Gál. 6:5).
8. Ja mräkä kitaninkä kukwebätä ye jatadreta ye käi rükadre ye känenkri mräkätre kwe ja ngwanka metre, ¿rabadre dre nuainne? (Recuadro “ Mä jatadreta Jehová kokwäre ye ie niara tö” ye mikadre ñärärä).
8 Mä mräkä tare mäkwe ye tä kukwe metre tuenmetre ngwane, ja känenkäre jataita Jehová kokwäre yei mätä tö ngwen ye nierare. ¿Akwa köbö ye rükadre ye känenkri mäkwe dre nuaindre? Mäkwe ja ngibiabiti kukwe ja üairebiti. Ye köböire mäkwe kukwe kwin bämikai mä mräkätre mada ye käne aune mä mräkä kitaninkä kukwebätä ye käne arato. Ne madakäre, ye käkwe mä dimikai ja tuakäre kukwe tare yebe aune mätä ulire yebe. Ni raba kukwe ruäre meden nuainne ne kwe ni tädre dite kukwe ja üairebiti ye ani mike ñärärä.
NI TÄDRE DITE ÑO KUKWE JA ÜAIREBITI
9. ¿Dre raba mä dimike tödeka jakwe mike dite jankunu? (Recuadro “ Mä mräkä tare mäkwe käkwe Jehová tuanimetre ngwane texto ne raba mä dimike” ye mikadre ñärärä).
9 Mäkwe käre kukwe ja üaire nuain. Mäkwe ja di ngwan ja ketakäre bäri Jehovabe aune mä mräkätre ben ye ütiäte krubäte. ¿Mä raba nuainne ño? Mäkwe ñäkädre käre kukwe Ngöbökwe yebätä, töbikadretaribätä aune mä tädre näin käre gätäbätä ye käkwe mä dimikai tödeka mäkwe mike dite. Kukwe namani bare Joannabätä yebätä ani töbike. Rün aune eteba kwe käkwe kukwe metre tuanimetre. Niara tä niere: “Kukwe nieta Abigaíl, Ester, Job, José aune Jesubätä yebätä tita ñäke ngwane, ye tä ti töi mike jäme. Kansion tä JW Broadcasting ye tä ti dimike krubäte arato”.
10. Salmo 32:6-8 tä niere erere, ¿jata nemen ruin ulire krubäte nie ngwane nikwe dre nuaindre?
10 Mäkwe ja drie ja brukwä ngöibiti Jehovai. Jata nemen ruin ulire krubäte mäi ngwane, mäkwe ora jankunu Jehovai. Kukwe tuin ño Ngöböi ye erere mikadre tuin kwe mäi, mä dimikadre kwe kukwe mike nüke gare jai aune ji meden mäkwe diandre jai ye driedre kwe mäi ye mäkwe ribe ie (ñäkädre Salmo 32:6-8 yebätä). * Ñan tä nemen nuäre mä kräke ja driekäre Jehovai ye nierare, akwa ja ruin ño mäi ye nüke gare kwin Jehovai. Niara tä mä tarere krubäte aune mäkwe ja driedre ie ye ie niara tö (Éx. 34:6; Sal. 62:7, 8).
11. Hebreos 12:11 tä niere erere, ¿Jehovata ni tarere yebätä mäträta kwe nibätä ye ñobätä nikwe tö ngwandre ie? (Recuadro “ Ni kitakata yebiti Jehovata ni tarere bämikata kwe nie” ye mikadre ñärärä).
11 Nitre umbre ji ngwanka konkrekasionte tä kukwe ükete ye nikwe kadre ngäbiti. Ni kitakata yebiti Jehovata ni tarere bämikata kwe nie aune kukwe ye kwin ni jökrä kräke aune ni kitaninkä kukwebätä ye kräke arato (ñäkädre Hebreos 12:11 yebätä). Nitre umbre ji ngwanka konkrekasionte ye ñaka kukwe ükaninte kwin ye köböite ja mräkä iti kitaninkä konkrekasionte ye ja mräkätre ruäre raba niere, akwa kukwe ñaka kwin nuainbare ni ja mikaka ngite yekwe ye niaratre ñaka töita niebätä raba ruin nie. Akwa dre namani bare ye gare ñaka jökrä nie. Aisete nitre umbre ji ngwanka nämäne siba comité judicial yete ye käkwe ja jie ngwani Bibliabiti aune kukwe ükaninte Jehová kräke yei nikwe tö ngwandre (2 Crón. 19:6).
12. ¿Jehovata mäträre ye ja mräkätre ruäre tä kain ngäbiti ye köböire dre kwin tä nemen kwetre?
12 Nitre umbre ji ngwanka konkrekasionte tä kukwe ükete mä mräkä kitakakäre kukwebätä ngwane, mäkwe kukwe ye kain ngäbiti ye käkwe mä mräkä ye dimikai kiteta Jehová kokwäre. Elizabeth kädrite párrafo 4 känti tä niere: “Nunkwe ñaka ja ketadre nun ngobo ünä yebe ye rababa tare nun kräke. Akwa jatabata Jehová kokwäre ngwane, kitadrekä kukwebätä ye namani kwin kräke nieba kwe. Ye bitikäre kukwe ütiäte namani gare ie ja töi kräke nieba kwe. Ye käkwe ti dimikaba Jehovata mäträre nibätä ye mike ütiäte jai”. Muko kwe kädekata Mark tä niere: “Kä rikaba ta ye bitikäre, nunkwe dre nuaindre ye erere munkwe nuainbare metre ye käkwe ti ngobo dimikani kiteta Jehová kokwäre arato, nieba kwe tie. Jehovakwe nun dimikani kukwe kwe mike täte yebätä tita debe bien krubäte”.
13. ¿Dre raba mä dimike ja tuakäre kukwe tare yebe?
13 Ja ketamukotre raba mä töi mike nüke gare jai yebe mäkwe blita. Ja mräkätre ünä kukwe ja üairebiti raba mä dimike töbike kwin, yebe mäkwe kä diainkä jai blitakäre (Prov. 12:25; 17:17). Joanna kädininte párrafo 9 yekänti tä niere: “Ja nämä nemen ruin kaibe tie ye ti raba niere metre. Akwa ja ketamukotre ie ti nämä tö ngwen yebe ti nämä blite ye käkwe ti dimikaba krubäte”. Ne madakäre, ja mräkä iti käkwe kukwe niedre mäi ye köböite ja rabadre ruin bäri käme mäi ngwane, ¿mäkwe dre nuaindre?
14. ¿Ñobätä nikwe jankunu ja ngibiadre bätärekä aune ngite juandre töi kwinbiti jabiti kwärikwäri?
14 Nikwe ja mräkätre ngibiadre bätärekä. Ja mräkätre jökrä käkwe kukwe kwin niedre nie ni dimikakäre ye nikwe ñaka ngibiadre (Sant. 3:2). Ni jökrä töi ngite, aisete ja mräkä iti ie kukwe ñaka kwandre niekäre nie o raba kukwe tare niere nie akwa ñaka nierare, ye käkwe ñan ni mikadre töi krütare. Kukwe niebare Pablokwe ne nikwe ngwandre törö jai: “Ni mda mda tä kukwe nuene mun rüere ne ngwane, munkwe ñan ja ngie mika amne, kukwe tärä ja rüere kwärikwäri munkwe ne ngwane, munkwe kukwe ye dian jabti ta kwärikwäri” (Col. 3:13). Meri testiko iti kän mräkä kwe kitaninkä kukwebätä tä niere: “Ja mräkätre nämä ja di ngwen kukwe metre nuainkäre, akwa ni töi ngite yebätä ñan nämä nemen bare kwin ietre. Ye Jehovakwe ti dimikanina ngite juen ta bititre”. Ja mräkätre tä ja ngwen metre ye konkrekasion raba dimike ño ye ani mike gare jai mada.
KONKREKASION RABA JA MRÄKÄTRE YE DIMIKE
15. ¿Ja mräkä kan mräkä kitaninkä bitinkä kukwebätä ye ni raba dimike ño?
15 Ja mräkätre tä ja ngwen metre ye kräke nikwe ja töi mikadre kwin aune taredre. Meri testiko kädekata Míriam ngwai kwe kitaninkä kukwebätä ye bitikäre, kä jürä nämäne nemen chibätä rikakäre gätäbätä nieta kwe. Niara tä niere: “Nitre mada käkwe dre niedre ye jürä nämä nemen tibätä. Akwa ja ketamuko kwin nämä tikwe ye nämä ulire siba kukwe yebätä aune ñaka nämä kukwe käme niere ti ngwaibätä. Ye köböire ja ñaka rababa ruin kaibe tie”. Meri testiko mada tä niere: “Nun ngobo kitakaba kukwebätä ngwane, ja mräkätre konkrekasionte nun tarekä ye rikaba nun töi mike jäme. Niaratre ruäre käkwe dre niedre ñan nämä gare ietre nieba kwe nunye. Muaba kwe tibe aune kukwe tikaba kwe ti kräke. Ye käkwe ti dimikaba krubäte”.
16. ¿Ja mräkätre tä ja ngwen metre ye konkrekasion raba dimike ño jankunu?
16 Ja mräkätre tä ja ngwen metre ye dimikadre jankunu. Ja mräkätre ye taredre aune dimikadre ye tätre ribere bäri jai nengwane (Heb. 10:24, 25). Ja mräkätre ruäre kän mräkä kitaninkä kukwebätä yebe ñaka blitata ja mräkätre ruärekwe konkrekasionte ye tuin ietre, niaratre kitaninkä kukwebätä kwrere mikata tuin jai yebätä. ¡Nikwe ñaka ye erere nuaindre jire! Monsotre bati kän rün aune meye kitaninkä kukwebätä ye dimikadre aune kukwe kwin niedre ie tätre ribere metrere jai. Meri testiko kädekata María muko kwe kitaninkä kukwebätä aune niaratre tuanimetre kwe, dre namani Mariabätä tä mike gare: “Ja ketamukotre ruäre rikaba ti gwirete, jondron riaba kwetre aune ti dimikaba kwetre monsotre tikwe tötike. Ja nämä ruin ño tie ye rükaba gare ietre aune muaba kwetre tibe. Nitre ruäre kukwe ngwarbe nieba tibätä ngwane niaratre blitaba tikrä. Niaratre käkwe ti dimikaba krubäte” (Rom. 12:13, 15).
Ja mräkätre tä ja ngwen metre abokän kän mräkä kwe kitaninkä kukwebätä, ye konkrekasion raba dimike ja tare yebiti (Párrafo 17 mikadre ñärärä) *
17. ¿Nitre umbre ji ngwanka raba dre nuainne ja mräkätre tä ja tare nike ye töi mikakäre jäme?
17 Nitre umbre ji ngwanka, ja mräkätre tä ja ngwen metre ye munkwe ja di ngwandre dimikakäre kä jökrä ngwane. Ja mräkätre kän mräkä käkwe kämikaninkä Jehovabätä töi mikadre jäme ye metrere tä mun kötärä (1 Tes. 5:14). Mun ja töi mika käne niaratre dimikakäre gätä känenkri aune gätä ye bitikäre. Mun rika tuinbiti aune munkwe ora bentre. Mun raba kukwe driere bentre o munta ja tötike mun mräkätre ben ngwane mun raba nübaire siba. Nitre oveja ngibiaka kukwe ja üairebiti rabadre oveja Jehovakwe mike tuin bobre jai, tarere aune tätre dre ribere jai ye ererebätä dimike (1 Tes. 2:7, 8).
MÄ MRÄKÄ JATAITA JEHOVA KOKWÄRE YEI MÄKWE TÖ NGWAN AUNE MÄKWE TÖ NGWAN JANKUNU JEHOVAI
18. 2 Pedro 3:9 tä niere erere, ¿nire käkwe kämikaninkä Jehovabätä käkwe dre nuaindre ie Jehová tö?
18 “Ni jökrä kukwe nuenkä kämekäme Ngöbö rüere, ye abko käkwe tödekadre jökrä Jesubti” aune ñaka gadrete ie Jehová tö (ñäkädre 2 Pedro 3:9 yebätä). Ni iti tä ja mike ngite krubäte, akwa ye täbe ütiäte Jehová kräke. Jehovakwe kukwe ütiäte nuainbare ni itire itire ütiä biankäre ye nikwe ngwandre törö jai: ye abokän monso tare kwe biani kwe ni ütiäre. Nirekwe kä mikaninkä Jehovabätä ye Jehovata dimike kiteta ja kokwäre ja tare yebiti. Monso nianintebätä blitabare Jesukwe käkwe kukwe nuainbare erere, nirekwe kämikaninkä Jehovabätä käkwe ye erere nuaindre (Luc. 15:11-32). Nitre kwati käkwe kukwe metre tuanimetre biti jataninta Jehová kokwäre aune konkrekasion käkwe kani ngäbiti kwin. Elizabethbätä blitani käne ngobo kwe namaninta kukwebätä ngwane, kä namani juto krubätebätä. Niara tä niere: “Ja mräkätre meden käkwe ti dimikaba ne kwe ti ngobo jataita Jehová kokwäre ye ie tikwe tö ngwandre, yei tita debe bien krubäte”.
19. ¿Ñobätä ni raba tö ngwen jankunu Jehovai?
19 Ni raba käre tö ngwen Jehovai. Kukwe meden raba kukwe tare mike nemen bare nibätä, ye niarakwe ñaka ribedi nuaindre nie. Nireta niara tarere krubäte aune mike täte ye kräke niara tä ja töi mike mantiame aune tä mike tuin bobre jai. Niarakwe ñaka ni tuainmetre kaibe kukwe tare näire ye tädre gare metre nie (Heb. 13:5, 6). Mark kädininte párrafo 12 känti tä niere: “Jehovakwe ñaka nun tuanimetre. Kukwe tare ye näire käre niarata nun ken”. Ngöbökwe ja “di kri bä nuäre” ye biandi jankunu nie (2 Cor. 4:7). Aisete ni mräkä tare nikwe käkwe kämikadrekä Jehovabätä ye ngwane arato, ni raba tödeke aune tö ngwen jankunu.
KANTIKO 44 Ni ulire tä orare
^ párr. 5 ¡Ni mräkä tare nikwe tä kämikekä Jehovabätä ye tare krubäte! Kukwe ye tä nemen bare ngwane, jata nemen ruin ño Ngöböi ye rabai gare nie kukwe ja tötikara nekänti. Ja mräkä kitakata ye mräkä tä ja ngwen metre ye raba dre nuainne ja tuakäre kukwe tare yebe aune rabadre dre nuainne tädre dite ja üairebiti yekäre rabai gare nie arato. Aune mrä, ja mräkä ja ngwanka metre ye konkrekasion raba töi mike ño jäme aune dimike yebätä blitai arato.
^ párr. 1 Nitre ruäre kä kwitani.
^ párr. 2 Salmo 78:40, 41: “¡Bä kabre niaratre ja mikani niara rüere kä nötare yekänti! ¡Bä kabre niara mikani ulire kwetre kä nötare yekänti! Bati bobu ñäkäbare kwetre Ngöbö rüere aune nämenentre Ngöbö Deme juta Israelkwe ye mike ulire”.
^ párr. 10 Salmo 32:6-8: “Ye medenbätä, ni jökrä ja ngwanka metre käkwe oradi mäi kä tä mä känäntarikäre ngwane. Yebätä, kätä niken ñöte ye ie niara ñaka rakaitari. Mä ye kä ja rükantekrä tie; kukwe tare yebätä mäkwe ti kriemikai. Mäkwe ngwänäinkä kä jutobiti ti bäre ti mikakäre kwäre. (Sélah). ‘Tikwe kukwe mikai nüke gare mäi aune ji medenbiti mä rikadre ye tikwe driedi mäi. Tikwe mäträi mäbätä aune ti okwä täi mäbätä’”.
^ párr. 81 KUKWE MIKATA GARE ÜAIBÄTÄ: Ja mräkä iti tä Jehová aune mräkätre kwe tuenmetre ngwane, muko kwe aune monsotre kwe tä ja tare nike.
^ párr. 83 KUKWE MIKATA GARE ÜAIBÄTÄ: Nitre umbre ji ngwanka nibu tä nitre ja mräkäre konkrekasionte tuinbiti dimikakäre kukwe ja üairebiti.
