KUKWE JA TÖTIKARA 39
¿Mä kä tä tikani “tärä ja nire kräke” yebätä?
“Niara okwäbiti tärä tikani nire nämäne Jehová jürä ngwen jabätä [...] ye ngwankäre törö jai” (MAL. 3:16).
KANTIKO 61 ¡Nändre ja käne!
KUKWE NEBÄTÄ JA TÖTIKAI a
Mekerabe nükebe kä nengwane, Jehovakwe nitre mada kä tikanina “tärä ja nire kräke” yebätä (Párrafo 1 aune 2 mikadre ñärärä)
1. Malaquías 3:16 tä niere erere, ¿tärä meden tikata Jehovakwe aune dre tä tikanibätä?
KÄ NIKANINA kwati krubäte ta yete, tärä ütiäte Jehovakwe yebätä nire ja ngwani metre ie ye kä tikanina kwe. Kömikani kwe Abel yebiti. Abel ye abokän ni testiko kena käkwe ja ngwanbare metre (Luc. 11:50, 51). b Mekerabe nükebe kä nengwane Jehovakwe nitre mada kä tikaninabätä, nitre millón kwati kä tikanina kwebätä. Bibliabätä tärä ye kädekanina kukwe jene jenebiti: ‘tärä ngwankäre törö jai’, “tärä ja nire kräke” “tärä ni nünandi kärekäre kräke” mikakäre gare. Kukwe ja tötikara nekänti nikwe kädekai “tärä ja nire kräke” (ñäkädre Malaquías 3:16 yebätä; c Apoc. 3:5, TNM; 17:8, TNM).
2. Tärä ja nire kräke yebätä nire kä tä tikani aune ni kä rabadre yete yekäre, ¿ni rabadre dre nuainne?
2 Tärä ütiäte nebätä nire tä Jehová jürä ngwen jabätä bätä mike ütiäte jai aune tarere ye kä tä tikanibätä. Ni ye raba tö ngwen nüna ja nire kärekäre yei kä tibienbätä o kä kwinbätä. Ni kä tädre tikani tärä yebätä yekäre, nikwe ja ketadre kwin Jehovabe, Jesús ja nire biani ni ütiäre ye köböire (Juan 3:16, 36, TNM). Ni jökrä kä tädre tikani tärä yebätä ie ni tö, ¿ñan ererea?
3, 4. a) Ni kä tä tikani tärä ja nire kräke yebätä, ¿aisete ja nire käre rabai nikwe meden gärätä? b) ¿Dre rabai gare nie kukwe ja tötikara ne aune ja käne yebätä?
3 Ni kä tä tikani tärä ja nire kräkebätä, ¿aisete ja nire käre ye rabai nikwe? Kukwe ye mikata gare Éxodo 32:33 yekänti, yete Jehovakwe niebare Moisés ie: “Nirekwe ja mikani ngite ti rüere, ye tikwe kä diainkä tärä tikwebätä”. Ni kä ye dianka raba tärä yebätä, Jehovakwe tikani lapibiti ye kwrere mikata gare (Apoc. 3:5, TNM). Ni kä tädre tikani käre tärä yebätä yekäre nikwe ja di ngwandre ne kwe Jehovakwe tikadre plumabiti yekäre.
4 Ni tärä kukwe ne ngwentari jai raba ruin nie. Nitre kä tä tikani aune nitre kä ñaka tikani tärä ja nire kräkebätä, ¿yebätä Biblia tä dre mike gare? ¿Aune ja nire kärekäre ye rabai ñongwane kwetre? ¿Aune nitre ie Jehová ñaka namani gare yebätä dre rabai bare? ¿Niaratre kä ye tä tikani tärä ja nire käre yebätä? Kukwe ne rabai gare nie kukwe ja tötikara ne aune ja känenkärebätä.
¿NIRE NIRE KÄ TÄ TIKANI TÄRÄ JA NIRE KRÄKE YEBÄTÄ?
5, 6. a) Filipenses 4:3 tä niere erere, ¿nire käta tikani tärä ja nire kräke yebätä? b) ¿Ñongwane kä tikai kärekäre tärä yebätä?
5 ¿Nire kä tä tikani tärä bämikata yebätä? Kukwe ne mikakäre gare jai, blitai grupo ketarikebätä. Nitre ruäre ne kä tä tikani tärä ja nire käre yebätä aune ruäre ñakare.
6 Grupo kena ye abokän nitre dianinkä gobrankäre Kristobe kä kwinbiti. ¿Niaratre ye kä niena tikani tärä ja nire kräke yebätä? Jän. Pablokwe mikani gare nitre Filipo ie, nitre dianinkä gobrankäre kä kwinbiti Jesube ye kä niena tikani tärä ja nire kräke yebätä (ñäkädre Filipenses 4:3 yebätä). Niaratre käta tikani tärä bämikata yebätä aune ñaka diandrekä yekäre, rabadre ja ngwen metre jankunu. Sello mrä mikai bätätre krütadre ye känenkri o ja tare nika kri ye känenkri ngwane, niaratre kä rabaira tikani kärekäre tärä ja nire kräke yebätä (Apoc. 7:3).
7. Ñongwane nitre kwati krubäte oveja mada mada ye kä rabai tikani kärekäre tärä ja nire kräke yebätä, ¿ye Apocalipsis 7:16, 17 tä ni dimike ño mike nüke gare jai?
7 Grupo ketebukäre ye abokän nitre kwati krubäte, oveja mada. ¿Niaratre ye kä tä tikani tärä ja nire kräke yebätä? Jän. ¿Rü Armagedón ye bitikäre niaratre kä täi tikani tärä ja nire kräke yebätä? Jän (Apoc. 7:14). Niaratre yekwe ja nire käre rabai mikani gare Jesukwe (Mat. 25:46, TNM). Akwa nire rabadite kwäre rü Armagedón yete ye bitikäre, ye kä täi tikani lapibiti ye kwrere nie raba. Kä mil krati ye ngwane, “ñö ni mikaka nüne kärekäre, ye känti näin niaratre ngwena”. Nire käkwe ja tuainmetre jie ngwandre Jesús ie ye ngwane, mrä niaratre kä rabai tikani kärekäre tärä ja nire kräke yebätä (ñäkädre Apocalipsis 7:16, 17 yebätä).
8. ¿Nire kä ñan tä tikani tärä ja nire kräke yebätä aune dre rabai bare bätätre?
8 Grupo ketamäkäre ye abokän cabra, niaratre ye gaite Armagedón yete. Aune niaratre kä ñaka tä tikani tärä ja nire kräke yebätä. Jesukwe niebare “niaratre näin gata kärekäre kokwäre” (Mat. 25:46, TNM). Üai deme köböire Pablokwe niebare niaratre “juandi ngwarbe kärekäre” (2 Tes. 1:9; 2 Ped. 2:9). Ye erere nie raba, nitre tä kirabe nükebe kä nengwane ja mike ngite üai deme rüere yebätä. Niaratre ye gaite kärekäre aune ñan ja nire käre biain ietre. Niaratre ñan gaikröta nemen gare metre kukwe nebiti (Mat. 12:32; Mar. 3:28, 29; Heb. 6:4-6). Grupo ketebu gaikröta nünankäre kä tibienbätä, yebätä ani kukwe mike gare bäri jai.
NITRE NE GAIKRÖTA
9. ¿Grupo ketebu meden gaikröta kä tibienbätä aune ñobätä ñaka ja erebe? (Hechos 24:15).
9 Biblia tä blite grupo ketebubätä abokän gaikröta nünankäre kä tibienbätä: “nitre kukwe metre nuainkä” aune “nitre ñaka kukwe metre nuainkä” (ñäkädre Hechos 24:15 yebätä). d “Nitre kukwe metre nuainkä” ye abokän käkwe ja ngwanbare metre Jehovai nämäne nire ye ngwane. Aune “nitre ñaka kukwe metre nuainkä” ye abokän käkwe ñaka Jehová mikani täte krütadre ye känenkri. Ne madakäre, ja ngwanbare ño kwetre yebiti kukwe ükaninte Jehovakwe mikakäre täte ye ñan mikani täte kwetre. Grupo ketebubätä blitata ne gaikröta, ¿akwa niaratre ye kä tä tikani tärä ja nire kräke yebätä? Kukwe ngwantarita ye mikakäre gare jai kukwe kiakia mikata gare grupo ketebu nebätä ye ani mike gare jai.
10. ¿Ñobätä nitre kukwe metre nuainkä ye gaikröta aune ruäre yekwe kukwe meden ütiäte rabai? (Sección “Nitre tä kukwe ngwentari” tä täräkwata nebätä yete blitata nitre gaikröta kä tibienbätä yebätä ye mikadre ñärärä).
10 Grupo ketabokäkärebätä blitata ye abokän “nitre kukwe metre nuainkä”. Aune niaratre krütadre ye känenkri kä nämänena tikani tärä ja nire kräke yebätä. ¿Akwa niaratre krütani ye bitikäre kä dianinkä tärä yebätä? Ñakare, ñan ñobätä aune niaratre tä nire Jehová töibätä. “Ngöbö abrä ñakare ni ngwaka Ngöböi, akwa Ngöbö ni nirekwe. Niara abrä kräke ni jökrä tä nire” (Luc. 20:38, NGT). Nitre kukwe metre nuainkä gaikröta ngwane, kä täi tikani tärä ja nire kräke yebätä. Akwa niaratre kä täi tikani lapibiti ye kwrere nie raba (Luc. 14:14). Nitre ruäre gaikröta ye rabai “ji ngwanka kä jökräbiti tibien” (Sal. 45:16).
11. Nitre ñaka kukwe metre nuainkä ye kä tikadre tärä ja nire kräke yebätä, ¿yekäre drebätä ja kitadre kwetre?
11 Mrä ani blite grupo ketarikekäre yebätä: “nitre ñaka kukwe metre nuainkä”. Kukwe metre Jehovakwe ye ñan nämäne gare ietre, yebätä ñan nämäne ja ngwen metre krütadre ye känenkri raba ruin nie. Ye medenbätä, niaratre kä ñan tä tikani tärä ja nire kräke yebätä. Akwa Ngöbökwe gaikröta ngwane, kä biain kwe ie ne kwe kä rabadre tikani siba tärä ja nire kräke yebätä. Nitre ñaka kukwe metre nuainkä ye ja di ribedi krubäte. Ruäre käkwe kukwe käme dikaro krütadre ye känenkri. Ye aisete, kukwe ükaninte Jehovakwe mikakäre täte ye ererebätä niaratre ja kitadre mikakäre täte arato. Niaratre jökrä ye dimikakäre Gobran Ngöbökwe käkwe kukwe ükaite kri nitre tötikakäre ñan nuainbare jire kä nebätä erere.
12. a) ¿Nirekwe nitre ñaka kukwe metre nuainkä ye tötikai? b) Nitre tötikai ye ñan kai ngäbiti kwe ngwane, ¿dre rabai bare bätätre?
12 ¿Nitre ñaka kukwe metre nuainkä ye nirekwe tötikai? Nitre kwati krubäte aune nitre kukwe metre nuainkä gaikröta ye käkwe nuaindi. Nitre ñaka kukwe metre nuainkä ye kä rabadre tikani tärä ja nire kräke yebätä yei tö rabai ngwane, ¿rabadre dre nuainne? Rabadre ja kete Jehovabe aune ja denkä mento sribikäre niara kräke. Jesús aune nitre dianinkä gobrankäre ben, kötärä sribi ni kukwe ükatekä ye kwrere täi, nitre ñaka kukwe metre nuainkä ye jatai nirien ño ye niaratre täi miketari ñärärä (Apoc. 20:4). Nire dimikai ye ñaka kai ngäbiti kwe ngwane, gaite kä rabaira 100 biti yebiti ta (Is. 65:20). Dreta ni brukwäte ye tuin Jehová aune Jesús ie aune ni iti törbai kukwe tare nuaindi ye niaratre ñan tuainmetre nuainne (Is. 11:9; 60:18; 65:25; Juan 2:25).
NITRE GAIKRÖTA NÜNANKÄRE AUNE NITRE GAIKRÖTA KUKWE ÜKATEKÄRE BENTRE
13, 14. a) ¿Jesukwe kukwe niebare Juan 5:29 ye nämäne nüke gare ño käne nie? b) Kukwe niebare yebätä nita ñäke ngwane, ¿kukwe kiakia meden ni rabadre mike ñärärä?
13 Nitre gaikröta kä tibienbätä yebätä blitabare Jesukwe arato. Ñodre, niebare kwe: “Kä rükai näre nitre jökrä tä dobote yei niara kukwei juruai aune jataita kä merebiti: nitre käkwe jondron kwin nuainbare, ye gaikröta nünankäre aune nitre käkwe jondron käme nuainbare, ye gaikröta kukwe ükatekäre bentre” (Juan 5:28, 29, TNM). ¿Dre gäräbare Jesukwe?
14 Nitre gaikröta ye bitikäre kukwe ruäre nuaindi kwe yebätä Jesús nämäne blite ni nämä nütüre käne. Ye abokän, nitre gaikröta ye ngwane ruäre käkwe kukwe kwin nuaindi aune ruäre käkwe kukwe käme nuaindi. Akwa töbike Jesukwe kukwe niebare nebätä, niarakwe ñan niebare nirekwe kukwe kwin nuaindi aune nirekwe kukwe käme nuain. Ñakare aune kukwe nikanina ta ye kwrerebätä blitabare kwe, “nitre käkwe jondron kwin nuainbare” aune “nitre käkwe jondron käme nuainbare”. Ye abokän, nitre käkwe kukwe nuainbare krütadre ye känenkri meden gärätä. Aune ye metre, ¿ñan ererea? Ñan ñobätä aune kä bä nuäre yete nitre ñaka tuainmetre jire kukwe käme nuainne. Nitre ñaka kukwe metre nuainkä ye käkwe kukwe käme nuainbare krütadre ye känenkri. Nitre “gaikröta nünankäre” aune nitre “gaikröta kukwe ükatekäre bentre” yebätä Jesús nämäne blite ngwane, ¿dre mika tö namani gare kwe?
15. ¿Nire “gaikröta nünankäre” aune ñobätä?
15 Nitre kukwe metre nuainkä ye abokän käkwe kukwe kwin nuainbare krütadre ye känenkri niaratre ye “gaikröta nünankäre” ñan ñobätä aune kä täira tikani tärä ja nire kräke yebätä. Ye tä mike gare “nitre käkwe jondron kwin nuainbare” gaikröta mikata gare Juan 5:29 aune “nitre kukwe metre nuainkä” gaikröta nieta Hechos 24:15 yekänti, ye kukwe arabebätä blitata. Aune kukwe mikata gare ne tä Romanos 6:7, (NGT) ye ererebätä, känti nieta: “Nire ngatanina, yebrä niena kwäre ngite kän”. Nitre kukwe metre nuainkä tä krüte ngwane, ngite diankata tätebätä, akwa nitre kukwe metre nuainkä käkwe ja ngwanbare metre Jehovai nämäne nire ye ngwane, ye Jehová ñaka käi kwitekä jabiti (Heb. 6:10). Bäkänä, nitre kukwe metre nuainkä ye gaikröta, akwa rabadre ja ngwen metre jankunu Jehovai ne kwe kä ñan rabadre dianinkä tärä ja nire kräke yebätä.
16. ¿Nitre gaikröta kukwe ükatekäre bentre ye dre gärätä?
16 Nitre käkwe kukwe käme nuainbare krütadre ye känenkri, ¿yebätä dre nie raba? Niaratre krütani ngwane ngite dianinkä bätätre, akwa nämäne nire ngwane ñan Jehová mikani täte kwetre. Ye medenbätä, niaratre kä ñan tä tärä ja nire kräke yebätä. Ye aisete, “nitre käkwe jondron käme nuainbare” gaikröta ye arabe nitre ñaka kukwe metre nuainkä mikata gare Hechos 24:15 yete. Niaratre “gaikröta kukwe ükatekäre bentre”. e Nitre ñaka kukwe metre nuainkä ye gaikröta kukwe ükatekäre bentre ye abokän, mikatarikäre ñärärä (Luc. 22:30). Niaratre kä rabadre tikani tärä ja nire kräke yebätä, yekäre kä näin ruäre ta. Nitre ñaka kukwe metre nuainkä ye nämäne ja ngwen ño käne ye rabadre tuenmetre aune ja denkä mento Jehová kräke.
17, 18. Nitre gaikröta nünankäre kä tibienbätä ye käkwe dre nuaindre aune “dre nuainbare”, ¿abokänbätä blitata Apocalipsis 20:12, 13 yete?
17 Nitre kukwe metre nuainbare o nitre ñaka kukwe metre nuainbare krütadre ye känenkri, akwa kukwe mrä biandi rollobätä, ye metaite kä 1,000 te ye ngwane ye nitre gaikröta käkwe mikadre täte. Kukwe mikani tuare apóstol Juan ie yete dre jutuabare ie mikata gare kwe: “Ni kri kia ngatani nämä nünaninkä krö Ngöbö ngwärekri, tikwe tuaba. Angwane tärä metateba ruäre; aune arato tärä mada metateba, tärä ne abrä ja nire kräke kwe. Angwane nitre ngatani ne ben kukwe ükateba, jondron nuainbare kwetre nämä tikani täräbätä, yebätä” (Apoc. 20:12, 13, NGT).
18 ¿“Dre nuainbare” nitre gaikröta yekwe yebätä kukwe ükaite bentre? ¿Dre nuainbare kwetre krütadre känenkri yebätä? Ñakare. Niaratre krütani ngwane, namani kwäre ngite yebätä ye nikwe ngwandre törö jai. Ye medenbätä, “jondron meden nuainbare kwetre” nieta nete ye abokän kukwe nuainbare kwetre krütadre känenkri ye ñan ai gärätä. Ñakare aune kukwe driei kä mrä yete ye kai ngäbiti ño kwetre ye meden gärätä. Nitre käkwe tödekani ñodre, Noé, Samuel, David aune Daniel ye ie rabai ja kitadre Jesubätä aune ja nire biani kwe ni ütiäre ye ie tödeke. ¡Aune nitre ñaka kukwe metre nuainkä ye ie rabai nuaindre bäri!
19. ¿Nitre tötikai ye ñaka kai ngäbiti kwe yebätä dre rakaikä?
19 ¿Nitre dimikai ye ñaka kai ngäbiti kwe yebätä dre rabai bare? Apocalipsis 20:15, (NGT) tä niere: “Ni ñokwa kä ñakare kwama tärä ja nirekräkwebätä, ne kitaba ñukwä jutra okwä krite”. Niaratre ye gaite täte kärekäre. ¡Tärä ja nire kräke yebätä ni kä tädre tikani aune tädre käre yebätä nikwe ja di ngwandre ye ütiäte krubäte!
Kukwe ükaite kri nitre tötikakäre yebätä ja mräkä iti tä sribire siba nitre tötikakäre kä mil krati ye ngwane (Párrafo 20 mikadre ñärärä)
20. ¿Sribi meden ütiäte krubäte nuaindi Gobrandi kä mil te yete? (Üai kena täräkwatabätä mikadre ñärärä).
20 Gobrain kä mil te yete kä rabai juto krubäte nibätä. Ñan ñobätä aune nitre tötikabare ñan namani bare kä nebätä erere nuaindi kä bä nuäre yete. Ye ngwane, nitre kukwe metre nuainkä aune nitre ñaka kukwe metre nuainkä ye täi ja ngwen ño ye mikai ñärärä (Is. 26:9; Hech. 17:31). ¿Ni tötikai Bibliabätä ye nuaindi ño? Kukwe ja tötikara mada ye käkwe mikai gare nie aune ni dimikai kwe mike bäri ütiäte jai.
KANTIKO 147 Ngöböta ja nire käre käbämike nie
a “Nitre gaikröta nünankäre” aune “nitre gaikröta kukwe ükatekäre bentre” niebare Jesukwe Juan 5:28, 29 yete, yebiti tö namani dre mikai gare ye mikai gare bäri mrebe kukwe ja tötikara nekänti. Aune nitre gaikröta ketebu nieta ye dre gärätä aune ye ngätäite nire nire täi siba ye mikai gare jai arato.
b Tärä ne tikata “kä dätebare kena ye ngwane”. Kä tibien ye abokän nitre meden gärätä, abokän mika raba kwäre ngite yebätä (Mat. 25:34; Apoc. 17:8, TNM). Ye medenbätä, ni ja ngwanka metre Abel ye kä tikani kena tärä ja nire kräke yebätä.
c Malaquías 3:16: “Kä ye ngwane nitre nämäne Jehová jürä ngwen jabätä ye namani blite jabe kwärikwäri, itire itire namani blite ja ketamuko kwetre yebe aune Jehová namani niaratre kukwe nuin kwin jankunu. Aune niara okwäbiti tärä tikani nire nämäne Jehová jürä ngwen jabätä aune nire nämene töbiketari niara kä yebätä ye ngwankäre törö jai”.
d Hechos 24:15, (TNM): “Aune tita tö ngwen Ngöböi, kukwe ie tita tö ngwen ne arabe ie nitre ne tä tö ngwen arato, nitre kukwe metre nuainkä aune nitre ñaka kukwe metre nuainkä krütani ye gaikröta”.
e Käne kukwe “ükaite” yebätä ni nämä blite ngwane, kukwe ñan kwin ükaite rüere o kukwe ükaite mikakäre ja ngie nuin ni nämä mike gare. Metrere kukwe ye kwita raba ye erere. Akwa Jesukwe blitabare kukwe ükaite yebätä ngwane, tö namani kukwe mikai gare bäri kukwe yebätä, ye abokän nitre mikatarikäre ñärärä aune töi gakäre. Diccionario griego bíblico tä mike gare ye abokän “nita ja ngwen ño mikatarikäre ñärärä”.
