1 Corintios 15:8 yete, Pablokwe niebare: “Mräkäre ja mikani tuadre kwe tie, ño kä täte raire känenkri ni däre kwrere”. Jesús dite ja üairebiti mikani tuare Pablo ie ye ngwane, yebätä nämäne blite nete. Niara mikani därere o ganinkröta nänkäre kä kwinbiti erere, nitre gadrekröta nünankäre kä kwinbiti ye känenkri, ye erere mika nämä gare käne. Akwa ja tötikani nguseta bersikulo nebätä ngwane, kukwe ne mika rabadre gare mrebe nükani gare.

Pablo nämäne ja ngwen ño käne ye erere ñan ja töi mikani nuainne kwe ye ngwane dre namani bare yebätä nämäne blite bäkänä. Akwa, “ño kä täte raire känenkri ni däre kwrere” niebare kwe ngwane, ¿dre gäräbare kwe? Kukwe keta kabrebätä niebare kwe raba ruin nie.

Nämäne ja ngwen ño käne ye erere ñan ja ngwain kwe kukwe ye namani bare drekebe aune ñan ngüba nämäne. Köbö jämi täte känenkri monso tä därere, kukwe ye ñan ngübata tä nemen bare. Saulo, ja känenkäre kädekani Pablo nikani Damasco ja mikakäre ja mräkätre rüere, ye ngwane Jesús ganinkröta mikai tuare ie, ye ñan ngüba nämäne kwe. Pablo nämäne ja ngwen ño käne ye erere ñan ja ngwain kwe aune kukwe ye rabai bare ye ja mräkätre Damasco ñan nämäne ngübare arato. Ne madakäre, kukwe namani bare Pablobätä ye ñan ngüba nämäne kwe, aisete köbö ruäre te kä ngidianinte okwäte (Hech. 9:1-9, 17-19).

Nämäne ja ngwen ño käne kukwe ye ñan ngüba nämäne nitrekwe namani bare. Kukwe griegore “ño kä täte raire känenkri ni däre kwrere” ye kwita raba ne kwrere arato “tä därere ye ñan ngübata ngwane”. Traducción Kadosh Israelita Mesiánica de estudio tä kwite krörö: “Däredre ñan ngüba nämä nitrekwe ye ngwane”. Pablo nämäne ja ngwen ño käne ye erere ñan ja töi mikani ja ngwen kwe ngwane, Jesús nikaninante kä kwinbiti. Nitrebätä blitabare Pablokwe bersikulo känekäne yebätä, ye erere ñan namani barebätä Jesús ganinkröta aune nikaninta kä kwinbiti ye känenkri ñan tuani kwe (1 Cor. 15:4-8). Jesukwe ja mikani tuare Pablo ie, kukwe ye ñan ngüba nämäne kwe, ye köböire Jesús ganinkröta ye bitikäre Jesús tuani kwe. Kukwe ye Pablo ñan nämäne ngübare o nitre mada ñan nämäne ngübare ye ngwane.

Blitabare debe näre kwe jabätä. Nitre ja tötikaka krikri tä niere erere, kukwe niebare Pablokwe bersikulo nekänti yebiti ni ngwarbebätä blitata kwrere, ngö raba nemenkä ni olote. Kukwe yebiti Pablokwe blitabare ngwane, ye kräke Pablokwe kukwe niebare ngwane niara ye ñan rabadre apóstol näre namani ruen ie ni raba niere. Niebare kwe: “Nitre Jesu kukwei ngwianka jökrä, ye ngätäite ti abko bäri ütiäte ñakare. Ti abko Jesu kukwei ngwianka ñan niedre tibtä, ñobtä ñan angwane nitre gätäkä Jesu käbti, jiebti ti nämane näin kisere mikakäre ja tare nike. Akwa tita ño mtare ne abko Ngöbökwe ja moto mikani kuin tikrä abko köböire tita kore” (1 Cor. 15:9, 10).

Ye medenbätä Jesukwe ja mikani tuare drekebe ngwarbe aune ñan ngüba nämäne Pablokwe, yebätä nämäne blite raba ruin nie. Nämäne ja ngwen ño ye erere ñan rabadre ja ngwen mada ye ñan ngüba nämäne kwe o kukwe ütiäte mikani gare ie ye ñan mika bä gare ie namani ruin ie yebätä. Ño erere, akwa kukwe namani bare Pablobätä ye namani ütiäte kräke. Jesús ganinkröta namani gare metre ie. Ye medenbätä nitre gaikröta yebätä nämäne blite nitre ben ngwane, kukwe meden namani barebätä ye käre nämäne niere (Hech. 22:6-11; 26:13-18).