Nita ja mike juto ja tötikakäre bibliabätä ye ngwane, ni raba nemen kukwe ne erere ngwentari jai: “¿Ti tö dre mikai gare jai?”. Dre rabai gare nie ye ni tärä bämike ja töite akwa kukwe mada mrä Jehová tö mikai gare o driei nie ye ni tädre juto biarebe mikakäre gare jai ye ütiäte krubäte. ¿Akwa kukwe mada mrä Jehová tö mikai gare nie ye raba nemen gare ño nie?

Jehovakwe mä mikadre töbätä mä ribe ie. Kukwe garera mai ye ñan aibe ben mä raba (Prov. 3:​5, 6). Jehová tö dre mikai gare mai gwäune ye rükadre gare mai ye mäkwe ribe ie (Sant. 1:5).

Ngöbö kukwei dite ye tuenmetre ja jie ngwen. “Ngöbö Kukwei abko nire” (Heb. 4:12). Nita juto kukwe mrä mrä mikakäre gare jai ye aibe ngwane, kukwe mrä raba nemen gare nie ñäkäta Bibliabätä nikwe ngwane aune raba ni dimike kukwe jene jenebätä.

Jehovata mrö bänänte bien nie ye kadre ngäbiti. Kukwe jökrä drieta Jehovakwe nie ye abokän “mrö bänänte” kwrere (Is. 25:6). Kukwebätä ni ñan tö ñäkäi yebätä ja di ngwandre ñäke, ñan ñobätä aune ye rabai kwin ni ara kräke aune ni tö rabai ñäkäi jankunu bätä.