KUKWE JA TÖTIKARA 36
KANTIKO 89 Jehová mikadre täte ye kwin krubäte
‘Ngöbö Kukwei kwin ye munkwe mika täte’
“Ngöbö Kukwei kuin ye abko ñan munkwe kukwei nuadre jirekäbe, [ . . . ] munkwe mika täte” (SANT. 1:22).
KUKWE NEBÄTÄ JA TÖTIKAI
Kukwe ja tötikara ne käkwe ni dimikai ñan ñäke jerekäbe Bibliabätä, ñakare aune töbiketaribätä aune ni dimikai ja di ngwen drebätä ñäkäta nikwe ye mike täte.
1, 2. ¿Ñobätä kä juto ni Jehová mikaka täte yebätä? (Santiago 1:22-25).
JEHOVÁ aune Monso kwe tö kä tuai juto nibätä. Ni Salmo 119:2 tikaka käkwe niebare: “Brukwä tätebiti nireta Jehová kukwei känene aune mike täte yebätä kä juto”. Arato Jesukwe niebare: “Nire nire tä Ngöbö Kukwei nuen amne tä mike täte, ni ye abko Ngöbö diebti käta neme bäri nuäre btä” (Luc. 11:28).
2 Ni Jehová mikaka täte yebätä kä juto. ¿Ñobätä? Kukwe keta kabre köböire kä juto nibätä. Keteiti bäri ütiäte ye abokän käre nita ñäke Ngöbö Kukweibätä aune dre nüke gare nie ye nita ja di ngwen nuainne (ñäkädre Santiago 1:22-25 yebätä).
3. ¿Nita Ngöbö Kukwei mike täte ye köböire kukwe kwin meden tä nemen nikwe?
3 Ngöbö kukwei ‘mikai täte’ ngwane kukwe meden kwin tä nemen nikwe? Keteiti ye abokän nita Jehová mike täte gare nie yebätä kätä nemen juto nibätä (Ecl. 12:13). Ne madakäre Ngöbö kukwei tä mäträre nibätä ye nita mike täte ngwane tä ni dimike ja mäke kwin ni mräkätre ben aune ja kete bäri kwin ja mräkätre konkrekasionte ben aune kukwe ne metre namanina bare mäbätä ruin nunye. Ne madakäre nitre ñan Jehová mike täte tä ja tuin kukwe keta kabre ñan nuäre ben yebätä nita nemen kwäre. Jehovata lei aune kukwe ükete mikakäre täte niebare Davidkwe ye bitikäre kansion ne ükaninte kwe: Nire tä mike täte yekwe “jondron kwin krubäte rabai” (Sal. 19:7-11).
4. ¿Ñobätä ñan nemen nuäre ni kräke Ngöbö Kukwei mikakäre täte käre?
4 Ngöbö kukwei mikadre täte käre ye ñan nuäre ni kräke ye nüke gare nie. Kukwe keta kabre tä nuaindre nie yebiti ta nikwe kä diandrekä jai ja tötikakäre aune ñäkäkäre Bibliabätä. Ye erere ngwane Jehovata dre ribere nie ye rükai gare nie. Ye medenbätä kukwe ja tötikara nekänti kukwe ruäre mikata gare abokän rabai ni dimike ñäke käre Bibliabätä. Ne madakäre nita ñäke Bibliabätä ngwane dre käkwe ni dimikai töbiketaribätä aune mike täte ye rabai gare nie kukwe ja tötikara nekänti.
KÄ DENKÄ JAI ÑÄKÄKÄRE NGÖBÖ KUKWEIBÄTÄ
5. ¿Sribi meden meden tä nuaindre nie?
5 Ni Jehová mikaka täte ie kä ñan nemente. Kä diankata krubäte jai kukwe ütiäte ütiäte nieta Bibliabätä ye nuainkäre. Ñodre, nitre kwati tä sribire ja kräke aune mräkätre kräke (1 Tim. 5:8). Ja mräkätre kwati tä mräkätre bren o mräkätre niena umbre ye ngübare aune tätre ja ngübakäre akwle. Arato sribi konkrekasionte ye tä nuainne. Keteiti bäri ütiäte ye abokän käre kukwe driere. Kukwe keta kabre tä nuaindre nie yebätä ni raba kite kukwe ne ngwentari jai: “¿Ti raba dre nuainne kä diankakäre jai ñäkäkäre käre Bibliabätä, töbikatarikärebätä aune mikakäre täte?”.
6. ¿Ti raba dre nuainne ñäkäkäre käre Bibliabätä? (Üai mikadre ñärärä).
6 Ñäkädre Bibliabätä ye “bäri ütiäte” yebätä ni kristiano rabadre nuainne (Filip. 1:10). Tärä Salmos kömikata kukwe nebiti, nirebätä kätä juto ye abokän “Jehovakwe kukwe biani ye käi jutobätä; dibire rare tä ñäkebätä aune töbiketaribätä” (Sal. 1:1, 2). Käre nikwe kä diandrekä jai ñäkäkäre Bibliabätä ye gare metre nie. Akwa ¿hora nuäibätä nuaindre? Ye tä gare ni itire itire ie. Akwa bäri kwin nikwe kä ükadrete kwin jai ne kwe käre ni tädre ñäkebätä ye bäri ütiäte. Ja mräkä kädekata Víctor tä niere: “Ñäkädre dekä ngwarbe Bibliabätä ye tuin kwin tie. Ti rükadre dekä ngwarbe krö ye ñan nuäre ti kräke akwa hora ye ngwane kätä kwekebe ti ñan nainte aune tita ja tötike bäri kwin ye nüke gare tie”. ¿Víctor tä kukwe niere ye erere tärä nemen bare mäbätä? Töbike kukwe nebätä: “¿Hora nuäi bäri kwin ti kräke ñäkäkäre Bibliabätä?”.
¿Hora nuäi kwin mä kräke ñäkäkäre käre Bibliabätä? (Párrafo 6 mikadre ñärärä)
DREBÄTÄ MÄTA ÑÄKE YEBÄTÄ TÖBIKE
7, 8. Nita ñäke Bibliabätä ngwane, ¿ñaka dre nuaindre ye bämike kukwe keteitibiti?
7 Ñongwane nikwe ñäkädre Bibliabätä ye rabadrera gare nie akwa nikwe ja ngübadrebiti ne kwe ñaka ñäkädre jerekäbebätä. Käre köbö kwatire kwatire drebätä nita ñäke ye bitikäre käita nikwitekä nibiti. ¡Nita ñäke Bibliabätä ngwane ye erere raba nemen bare nibätä ye ñan kwin! Nita kä denkä jai köbö kwatire kwatire ñäkäkäre kapitulo ruärebätä ye kwin, ja töi mikadre nemen bare ye kwin (1 Cor. 9:26). Akwa nita ñäke Bibliabätä ngwane kömikata kwin. Aune ni tö rabadre ja kitai kwinbätä ngwane ni rabadre kukwe mada nuainne.
8 Töbike kukwe nebätä. Ñü tä näkäin tibien ye kwin krubäte kri mu kräke, akwa tä näkäin jobe tibien ngwane tä kri mu kämike yebätä ñüta näkäin krubäte tibien ye ñaka kwin. Ñü ñan räkändre jobe tibien ye bäri kwin ne kwe kri mu ririadre. Ye erere arato, nita ñäke jötrö krubäte Bibliabätä ngwane drebätä ñäkäta aune mikadre ño täte ye ñan tä nemen gare nie (Sant. 1:24).
Kri mu tä ñü ribere bätärekä bätärekä jai ririakäre, ye erere arato nita ñäke Bibliabätä ngwane nita kä ribere jai töbikatarikärebätä aune mikakäre täte (Párrafo 8 mikadre ñärärä)
9. ¿Nita ñäke jötrö ngwarbe Bibliabätä ngwane nikwe dre nuaindre?
9 Mätä ñäke Bibliabätä ngwane mätä nuainne jötrö rükadre gare jabätä ngwane, ¿mä raba dre nuainne? Mäkwe ñaka ñäkä jötröbätä ne kwe drebätä mä ñäri yebätä mä raba töbiketari. Töbikadretari ye ñan nuäre mä kräke ngwane mä ñan ja töibika. Ye abokän nita ñäke Bibliabätä ngwane ni rabadre nünenkä aune drebätä ñäkäta yebätä töbikata. Ne nuain raba: 1) Mäkwe kä dianinkä bäri jai ja tötikakäre aune töbikatarikäre o 2) mäkwe ñäkä bersikulo ruärebätä ne kwe drebätä mäkwe ñäkädre yebätä mäkwe töbikadretari. Víctor kädrite párrafo 6 känti, ye tä niere: “Dekä ngwarbe tita ñäke Bibliabätä yebätä rare tita töbiketaribätä”. Ñäkädre kapitulo kabrebätä ye ñan ai ütiäte, ñakare aune ñäkädre bätärekä aune drebätä mäta ñäke ye rabadrete mä töite aune töbikadretaribätä ye bäri ütiäte (Sal. 119:97; recuadro “ Kukwe ngwantarita abokän raba mä mike töbiketari” mikadre ñärärä).
10. Ñäkätä Bibliabätä ye ngwane dre nuain raba mikakäre täte ye bämike kukwe keteitibiti (1 Tesalonicenses 5:17, 18).
10 Mäkwe kä diandrekä nuäi jai o ñongwane mäkwe ñäkäi Bibliabätä ye ñan bäri ütiäte ñakare aune dre nemen gare mäi mäkwe mikadre täte ye bäri ütiäte. Mäta ñäke Bibliabätä ngwane kukwe ne ngwantari mäkwe jai: ¿Ti raba kukwe ne mike täte ño nengwane aune ja känenkäre? Ñodre, mäkwe ñäri 1 Tesalonicenses 5: 17, 18 ye bämike ja töite (ñäkädrebätä). Ye bitikäre nünenkä orasion nuainta mäkwe yebätä töbike. ¿Mäta orare nguseta aune bäbe mätä orare? ¿Kukwe ketamäbätä mäta debe bien Jehovai ye raba nüke mä töite? Mäkwe kä dianka jai minuto ruäre te aibe töbikatarikäre. Ye ngwane mä ñan täi Ngöbö Kukwei nuin jerekäbe, ñakare aune mä rabaira mike täte. Köbö kwatire kwatire mäta ñäke Bibliabätä ye ngwane ne erere mäkwe nuaindi ye köböire ja känenkäre mä rabai Jehová mike täte bäri kwin. Akwa kukwe keta kabrebätä mä rabadre ja töi ükete rabadre gare mäi ngwane, ¿mäkwe dre nuaindre?
MÄ RABA DRE NUAINNE YE MÄKWE MIKA NUAINDRE JAI
11. ¿Ñäkätä Bibliabätä ye ngwane ñobätä ruäre ngwane ni raba nemen di nekä? Bämike keteiti.
11 Mäta ñäke Bibliabätä ye ngwane, kukwe ruärebätä mä rabadre ja töi ükete rabadre gare mäi yebätä mä raba nemen di nekä. Töbike kukwe nebätä: bati mäta ñäke bersikulo ruärebätä ye ngwane ni kitadrete ye ñan kwin rabadre gare mäi (Sant. 2:1-8). Mäta ni mada mike tuin ño jai yebätä mä rabadre ja töi ükete nemen gare mäi ye kwin krubäte. Bitikäre köbö madate mäta ñäke bersikulo ruärebätä ngwane, ja tidrä gobraindre ye rabadre gare mäi (Sant. 3:1-12). Ruäre ngwane mä ñan blite töi kwinbiti nemen gare mäi. Aisete mäta ja töi mike bäri blitakäre kwin aune ni mada dimikakäre. Köbömäkäre mäta ñäke Bibliabätä ye ngwane nemen gare mäi, mä ñaka ja ngwandre ni kä nebätä ye erere (Sant. 4:4-12). Ye ngwane mä rabadre ja ngübarebiti película ño tuata mäkwe aune musika meden kukwe nuata mäkwe yebätä tä nemen gare mäi. Köbö bokäkäre nemen gare mäi kukwe keta kabrebätä mä rabadre ja töi kwite yebätä mä raba nemen di nekä.
12. Mäta ñäke Bibliabätä ngwane kukwe ruärebätä mäkwe ja töi kwitadre rabadre gare mäi ngwane ¿Ñobätä mä ñan ja di ngwandre nekä? (Nota mikadre ñärärä).
12 Kukwe ruärebätä tädre ja töi kwitadre mäi ngwane, mäkwe ñan ja di ngwan nekä. Ye erere nemen bare mäbätä ngwane, mäta ñäke töi bökänbiti aune töi bobrebiti Bibliabätä, aune mäta ja ngwen metre jabe ye mätä bämike. a Ne madakäre ja di ngwandre käre ja ngwankäre “ni btin kwrere” ye mäkwe ngwan törö jai (Col. 3:10). ¿Dre käkwe mä dimikai Kukwe Ngöbökwe ye mikakäre täte jankunu?
13. ¿Dre raba mä dimike? (Üai mikadre ñärärä).
13 Mäkwe ja töi mika debe näre jabätä aune kukwe jökrä nemen gare Bibliabätä mäi ye mäkwe ñaka mika nuaindre bengwaire jökrä jai ye käkwe mä dimikai (Prov. 11:2). Mä raba kukwe ne erere nuainne: kukwe meden medenbätä tä ja töi kwitadre mäi ye mäkwe tika jatäri jai. Mä raba ja töi mike keteiti o ketebubätä käne aune mada mada ye mä raba mike nuaindre ja känenkäre jai. ¿Dre nuain raba käne mäkwe?
Mäta ñäke Bibliabätä ngwane kukwe nemen gare mäi ye mä ñan tö ngwan mikai täte jökrä bengwairebe, ñakare aune mäkwe ja töi mika kukwe keteiti o ketebu nuainne käne (Párrafo 13 aune 14 mikadre ñärärä)
14. ¿Kukwe keta kabre mikani nuaindre mäkwe jai, akwa mä raba meden nuainne käne?
14 Kukwe meden raba nemen bäri nuäre mä kräke nuainkäre o medenbätä mäkwe ja töi kwitadre yebätä mäkwe ja töi mike käne. Medente mäkwe kömikadre ja käne rabadrera gare mäi, ye bitikäre mäkwe kukwe känä täräkwatabätä ñodre, Watchtower TÄRÄ JÖKRÄ INTERNETE o Tärä ni testiko Jehovakwe jie ngwankäre ja tötike yebätä. Mäkwe ora Jehovai aune mä töi mikadre kwe “biare sribi kwin nuainkäre” ye mäkwe ribe ie (Filip. 2:13). Ye bitikäre dre namani gare mäi ye mäkwe nuain. Kukwe kiakia kite nemen bare jatäri mäi, ye käkwe mä töi mikai bäri mäkwe dre dre mikani nuaindre jai ye nuainkäre. Ne madakäre dre namanina bare mäi ye käkwe mä dimikai, kukwe mada mada tikani mäkwe jai ye mikakäre nemen bare.
MÄKWE KUKWE NGÖBÖKWE TUANMETRE JA JIE NGWEN
15. ¿Nitre kwati ñäkäkä Bibliabätä ye ñobätä ñaka ja erebe ni Jehová mikaka täte yebe? (1 Tesalonicenses 2:13).
15 Nitre ruäre käkwe ñäkäbarera bä kabre Bibliabätä nieta kwetre. Akwa, ¿metrere mikata era kwetre jai? ¿Kukwe drietabätä ye ererebätä tä ja töi kwite? Erametre bä kabre ye erere ñan nemen bare. Akwa, ¡ni Jehová mikaka täte ñaka ja ngwen ye erere! Ñodre, nitre kristiano siklo kena yete käkwe Biblia ye kani ngäbiti “Kukwe Ngöbökwe erametre ye kwrere”. Ye medenbätä nunta ja di ngwen kukwe Bibliabätä mike täte ye nunta bämike (ñäkädre 1 Tesalonicenses 2:13 yebätä).
16. ¿Dre käkwe ni dimikai Ngöbö Kukwei mike täte?
16 Ñäkäkäre Ngöbö Kukweibätä aune mikakäre täte ye ñan nuäre ni kräke o kä ñan tä nemente nie ñäkäkärebätä. Arato nita ñäke jötrö krubäte aisete kukwe ñaka ta nemente ni töite. Kukwe keta kabrebätä mä rabadre ja töi ükete nemen gare mäi yebätä mä raba nemen di nekä. Kukwe ñokwä ben mätä ja tuin akwa Jehovakwe mä dimikai. Aune niara tö mä dimikai ye mä ka ngäbiti aune Kukwe Ngöbökwe ye ñan käi kwitekä jire jabiti ñakare aune mä mika täte. Metrere mä täi ñäke käre Bibliabätä aune mäkwe mikai täte ngwane kä rabai bäri juto mäbätä (Sant. 1:25).
KANTIKO 94 Debe bianta Ngöbö Kukwei yebätä
a Video Monsotre mada tä dre niere: Ñäkädre Bibliabätä tä jw.org ye mikadre ñärärä.
