Jehová rabadre gare nie ye kwin ni kräke

¿KUKWE ütiäte jämi nemen bare nibätä ruin nie? Kukwe ñaka gare krubäte nie Ngöböta ngwane, kukwe ütiäte jämi nemen bare nibätä. ¿Ñobätä? Nitre millón kwati ie namanina gare erere, Ngöbö kädrieta Bibliakwe rabadre gare nie ye tä kukwe kwin mike bare ni kräke, nengwane aune kärekäre.

Jehová ja töi mikaka Bibliabätä, ye rabadre gare nie ie niara tö. Salmista käkwe tikani: “Rabadre gare nitre jökrä ie , mä kä Jehová, mä aibe ngöräbe kri kä kwinbiti kä tibien ye jökräbiti ta”. Nikwe Ngöbö mikadre gare jai ye bäri kwin ni kräke ye gare kwin ie. “Ti, Jehová, Ngöbö mäkwe, tita mä tötike ne kwe kukwe kwin rabadre mäkwe, ji medenbiti mäkwe nändre yebiti tita mä jie ngwen”. ¿Nikwe Jehová kri kä kwinbiti mikadre gare jai ye köböire dre rabai nikwe? (Salmo 83:18; Isaías 48:17).

Tä ni jie ngwen ja tuakäre kukwe kri ben mantre jetebe, ye kukwe kwin bianta kwe nie. Tä ni mike tö ngwen kukwe kwin ja känenkäre ie aune tä ni töi mike jäme. Ne madakäre, niara mikadre gare kwin jai ye köböire kukwe keta kabre nakainkä käbiti tibien ye jutuai bä jene nie, ¿kukwe meden gärätä nikwe?

¿Kukwe ütiäte aune kwin tärä ni kräke?

Jondron töbätä keta kabre sribebarera nüke ne ngwane akwa, nitre kä nengwane täbe kukwe arabe ütiäte ngwentari jai: ¿Ñobätä nita nete? ¿Medenkwäre nita näin? ¿Drekäre nita nüne? Kukwe ne mika ñaka gare metre ta nie ngwane, nita ngwarbe tä nemen ruin nie. ¿Kukwe ne nüke gare ni kwati ie ya? Kä 1997 ye ngrabare kukwe ngwanintari nitre kwati ie Alemania, nitre ie kukwe ngwanintari ye bäsi ötare käkwe niebare, dre kräke tä nüne ye ruäre ngwane o ñaka nämäne töbikebätä niebare kwetre. Ne erere ni ruäre nünanka mä käite tä nütüre arato.

Nita jerekäbe nüne ngwane dre mikadre nuaindre jai ja känenkäre ye ñaka tä nemen gare. Nitre kwati tä ja töi mike ja tötike kwela krite o ngwian ganainne ere jai, akwa yebiti ta tä jondron keteiti ribere jai ruin ietre. Drekäre nita nüne ñaka gare nitre kwati ie ye tä töi mike ja murie kete. Ne erere namani bare meri iti bati aune bä nuärebätä, niara ririabare “ni jondron aune ngwian bäkäne ngätäite” nieta tärä international Herald tribute yebätä. Jondron jökrä ütiäte nämäne kwe, akwa ja nämäne nemen ruin kaibe ie aune kukwe kwin ñaka nämä kwen ie ja kräke, yebätä kräkä barbitúricos ñani kwe aune ja murie ketani kwe. Nitre ruäre ie ja namanina ruin kaibe aune ja murie ketani kwe ye nane kädriebarera mun olote.

¿Ciencia ye raba kukwe jökrä mike gare nie ja nire yebätä ye nie tärä mun olote? Semanario alemán Die Woche tä mike gare: “Ciencia tä kukwe niere metre ta, akwa kukwe ja üaire yebätä ñaka dite. Jondron nire jatani nikwite jatäri mikata gare kwetre ye ñan jondron krubäre aune física cuántica, ye raba kukwe keta kabre mike gare akwa ñaka raba ni töi mike jäme aune ni krie mike”. Nitre científico ye köböire jondron keta kabre ye nüke gare aune nemen ño jatäri ye tä mike gare. Akwa, ñokänti ni nire aune dre rakaikä nibätä ye ciencia ñaka raba mike gare metre nie. Ni tädre tö ngwen ciencia ye aibe ie ngwane, kukwe kwin tärä ni kräke nita ngwentari jai ye ñaka rabai gare nie. Ye medenbätä tärä Süddeutsche Zeitung, tä niere erere “ni jökrä jie ngwandre ye ribeta jai”.

¿Nire raba ni tötike bäri kwin ni jondron jökrä dätekä yebiti ta? Niarakwe ni mikani nüne kä tibienbätä, yebätä gare kwin ie ñobätä nita nete. Biblia tä mike gare, Jehovakwe ni nire sribebare ne kwe nünandre kä jökräbiti tibien aune kä ye ngübakäre. Ngöbö töi ño ye erere ni kä tibienbätä rabadre ja ngwen ñodre, rabadre kukwe metre nuainne, ja ngwen töbätä, ja tarere. Ñokäre Jehovakwe ni sribebare tä nüke gare nie ngwane, ñobätä nita nete tä nemen gare metre nie (Génesis 1:26-28).

¿Mä raba dre nuainne?

¿Ñobätä nita nete? ¿Medenkwäre nita näin? ¿Drekäre nita nüne? Ye mika ñaka gare mäi ngwane, mäkwe Jehová mikadre gare kwin jai nieta Bibliakwe, ye raba mä dimike kukwe jökrä ye mike gare jai. Ye erere Jesukwe niebare: “Ja nire kärekäre ye abokän ne gärätä: mä rabadre gare ietre, mä aibe Ngöbö metre aune ni juani mäkwe, Jesukristo ye rabadre gare ietre”. Arato nieta, ja töi mikadre kwin ñodre ja taredre aune ja töi mikadre nüne gobran Ngöbökwe köböra nemen kä tibienbätä yete. Ye köböire mätä drekäre kä tibienbätä rabai gare mäi aune jondron kwin ja känenkäre ie mä rabai tö ngwen. Aune kukwe ütiäte mä tö nämäne mikai gare jai ye rabai gare metre mäi (Juan 17:3, TNM; Eclesiastés 12:13).

¿Nekänti kukwe tä nemen tuin bä jene nie mada? Hans ie kukwe ne gare. a Kä nikani kabre tä Ngöbö ñaka nämäne gare kwin ie, kukwe nämäne gare ie ye erere ñaka nämäne nüne. Kukwe blo blo ñodre, ja mika gure ngwarbe, go, droga aune nändre motobiti ye aibe nämä nuainne. “Ti ñan nämä nüne kwin, jondron ñaka nikwe kwrere ja nämä nemen ruin tie”, nieta kwe. Kä nämäne 25 biti näre ngwane, Hans käkwe ñäkäbare kwin Bibliabätä, köböire Ngöbö mikani gare kwe jai ja töi jeñebiti. Ja mäkäbare kwin kwe Jehovabe aune nükani gare ie ñokäre nämäne nüne, yebätä ja töi kwitani kwe aune ja ngökani ñöte kwe rabakäre testiko Jehovakwe. Kä nikanina kä kwä jata biti ta tä sribire köbö täte. Tä niere: “Jehová mikadre täte ye köböire nünanta bäri kwin. Keta ñan raba jondron madabätä. Jehová namani gare tie ye köböire tita nüne kwin nengwane”.

Metre, nita nüne ño ye ñan aibebätä ni kwati tä töbike. Ñakare aune kukwe kri kite nakainkä kä jökräbiti tibien, ye köböite töbika kukwei kite bäri krubäte aune ni kwati tä töbike kukwe madabätä.

¿Ñobätä namani bäre?

Kukwe tare tä nakainkä ngwane, ni ja tare nikaka tä nemen ngwentari jai: ¿Ñobätä namani bare? Kukwe ne täi gare nie ngwane ni töi tädi biare ja tuakäre kukwe yebe. Kukwe ne mika ñaka gare metre ngwane ni ja tare nikaka täi ja tare nike jankunu aune raba nemen rubun. Ñodre, kukwe ne namani bare ni meyere kä Bruni yebätä.

“Kä nikanina ruäre tä yete ti ngängän chi Susane krütani. Ti nämä Ngöbö mike era jai, yebätä ti rikaba sacerdote känti ne kwe ti töi mikadre jäme kwe. Nieba kwe tie Ngöbö nikani ngwena kä kwinbiti angelere jakrä. Ti ngängän krütaba ye ñan aibebätä ti rababa ulire krubäte, ñakare aune ti brukwä rababa Ngöbö kräke jänikani kwe yebätä”. Kä raire te krubäte Bruninkwe ja tare nikabare. “Biti ñobätä ni brukwä ñan rabadre Ngöbö kräke ye ni testiko Jehovakwe iti käkwe mikaba gare tie Bibliabiti. Jehová ñan nikani Susane ngwena kä kwinbiti, aune kwitani kwe angelere. Bren nika nämäne kwe ye abokän ni töi ñaka metre yebätä. Ti ngängän krütani ye tä nita ja dükani ye kwrere, Jehovakwe gaikröta ye tä ngübare. Arato rababa gare tie Jehovakwe ni nire sribebare nünankäre kä bä nuäre te kärekäre, kukwe ye köböra nemen bare. Jehová ye nire metrere jataba nüke gare tie ngwane, ja rababa ruin bäri ken tie aune ti ñan jatabara ja tare nike krubäte” (Salmo 37:29; Hechos 24:15; Romanos 5:12).

Nitre millón kwati tä ja tare nike kukwe bätäkä yebätä: Ñodre kukwe tare tä nemen bare nibätä, rü, mrö nika aune kukwe kri ta nemen bare käbiti tibien. Kukwe tare tä nemen bare yebätä Jehová ñaka ngite ye Biblia mikani gare bruni ie ngwane töi namaninta jäme, Ngöbö ñaka tö namani ni tuai ja tare nike aune köböra kukwe blo ye denkä. Kukwe tare kite nirien bäri kä jökrä biti tibien ye tä mike gare, “nita nüne kä krüte te”. Nüna kwin ni jökrä tä ngübare ye köböra nüke (2 Timoteo 3:1-5; Mateo 24:7, 8).

¿Ni raba Ngöbö mike gare ño jai?

Hans aune Bruni nämäne töbike käne ye erere ñaka namanina töbike Ngöböbätä, nämänentre mike era jai, akwa niara ñaka nämäne gare kwin ietre. Kä dianinkä krubäte kwetre jai ja tötikakäre metre Jehovabätä, ja di ngwani kwe ye ütiäre kukwe kwin namani kwetre. Kukwe ütiäte ngwantarita jai kä nengwane ye namani gare ietre, ye käkwe töi mikani jäme aune namani tö ngwen kukwe ja känenkäre ie. Nitre millón kwati Jehová mikaka täte käkwe ja tuanina kukwe ne arabe ben.

Jehová rabadre gare nie, yekäre ja tötikadre bäre bäre Bibliabätä, tärä ne tä blite niarabätä aune tö dre ie ye tä mike gare nie. Siklo kena yete nitre ruäre käkwe ne nuainbare. Ni kukwe kira niekä aune ni kräkäi mikaka Lucas käkwe niebare nitre konkrekasion Berea (Grecias) yebätä. Pablo aune Silas käkwe kukwe driebare ye käi namani nuäre btätre kare ngäbti, akwa “ye abko era ya abko tö namanintre gai, aisete köbö kwatirekwatire namani ja töitike Ngöbö Kukweibtä” (Hechos 17:10, 11).

Ne arato, nitre kristiano siklo kena nämäne ja ükekrö konkrekasionte (Hechos 2:41, 42, 46; 1 Corintios 1:1, 2; 2 Tesalonicenses 1:1). Ye erere nemen bare kä nengwane. Nitre testiko Jehovakwe tä ja ükekrö gätä nuainkäre nire tö rökrai Jehová ken aune mikai täte kä jutobiti dimikakäre. Ja ketata nitre testiko Jehovakwe ben ye köböire kukwe mada kwin tä nemen nikwe. Nitre tä Ngöbö meden mike täte ye erere tö ja ngwain, akwa nitre testiko Jehovakwe töi ye erere akwa ñaka täte Ngöbö erere. Ye medenbätä ja ükadrekrö bentre ye tä ni dimike Jehová mike gare bäri kwin jai (Hebreos 10:24, 25).

¿Ni rabadre gare kwin nie yekäre ja di ngwandre? Jän ja di ngwandre krubäte. ¿Jondron keta kabre ni tö tuai jakwe ñan ye kräke ja di ribeta krubäte arato? Nitre tä jakain jadaka bätäkäbätä ye tätre ja di ngwen krubäte ja mikakäre juto kukwe ye kräke, ¿ñan ererea? Ñodre, ni nünanka Francia kä Jean-Claude Killy, käkwe medalla orore olímpico ganainbare jakabätä esquí yebätä. Dre ribeta ganankäre ye nieta kwe: “Kömikadre kä kwäjätä ye känenkri aune kä kwatire kwatire te ja ükadrete kräke bätä töbikadre kukwe yebätä mantre jetebe [...]. Ye abokän sribi ja töibiti aune ngrabarebiti köbö 365 kä kwati te”. ¡Kä diankata krubäte jai aune ja di ngwanta ja gakäre batibe ye tä nuin minuto krä jätä aibe te! Töbike jondron bäri ütiäte rabai nikwe yebätä, Jehová mikata gare jai ye köböire jondron kwin rabai nemen kärekäre nikwe.

Ja ketata bäri kwin

¿Nire ñan tö jondron ütiäte tuai jakwe? Ni jökrä, ¿ñan ererea? Yebätä, mätä drekäre nete aune ñobätä kukwe tare tä nakainkä ye mä tö mikai gare jai ngwane, ja töi mike kwatibe Jehová Ngöbö Biblia bökänkä ye mike gare jai. Mä ja tötikai niara kukwebätä ngwane mäkwe nünain kwin matare aune ja känenkäre.

¿Ja känenkäre ni ñan rabaira ja kite Jehová kukweibätä? Kukwe namani gare ni Jehová mikaka täte kirabe ie kukwe ye täbe tuin kwin ie aune täbe ja tötikebätä. Ni jondron jökrä dätekä ye rükai gare nie ngwane, kä rabai juto nibätä aune ni rökrai bäri ken. Pablo kukwe niebare yebätä ani töbiketari, tikani krörö kwe: “¡Jo! Ngöbö abra kwe jändrän kuinkuin tärä kabre krübäte nikrä, amne Ngöbö abra töbtä kri krübäte, käkwe jändrän kuinkuin mikanintbe ja töi jenbti ni kräke. Ye aisete Ngöböta töbike ño ño, ye ni ñan raba niere jire chi amne Ngöbö töi ji mdenbtä ye ni ñakare jire iti ie rabadre gare. Ne aisete, ¿ni Dänkien töi ño, ye tä gare ni mda mdaye ya? ¡Ñakare! ¿Angwane ni mda mda raba Ngöbö töi tike ya? ¡Ñakare!” (Romanos 11:33, 34).

[Nota]

[Comentario]

Nitre kä nengwane täbe kukwe arabe ütiäte ngwentari jai: ¿Ñobätä nita nete? ¿Meden kokwäre nita näin? ¿Dre kwin tärä ni kräke?

[Comentario]

“Jehová ye nire metrere jataba nüke gare tie ngwane, ja rababa ruin bäri ken tie”

[Comentario]

“Ngöbö mikadre täte ye köböire nünanta bäri kwin. Keta ñan raba jondron madabätä. Jehová namani gare tie ye köböire tita nüne kwin”.