Mäkwe ñaka bren yei kä juto diankamana jakän

TÖBIKE kukwe nebätä, mä rükadre ngwäte dekä angwane, mä törbadre jötrö kä tuai nemen de. Köbö mada te mäkwe ja tare nikadre aune töbikata mä kisete yebe mäkwe ja tuadreta. Ja rabadre ruin Job erere mäi, niarakwe niebare: “¡Bäri kwin ti krütadre tikwe ja tare nikadre ye känenkri!” (Job 7:15, Serafín de Ausejo, 1975). Akwa, mäkwe ja tare nikadre kä kwati krubäte te angwane, ¿mäkwe dre nuaindre?

Ye erere namani bare Mefibóset, Jonatán monsoi yebätä. Kä nämene kwärike niara yebiti angwane, “betaninkä timon aune ngüre nötaninbätä” (2 Sam. 4:4). Kä nikani raire ta angwane, niara biani blite ngwarbe rei rüere aune jondron nämene niarakwe dianinkä kän, yebätä namani ulire aune namani bäri bren. Niarakwe ja tuani bren, kukwe ngwarbe niebare rüere aune ngökabare yebe akwa niarakwe ñaka kukwe ye mikani kä juto denkä jakän, yebiti kukwe kwin bämikani kwe (2 Sam. 9:6-10; 16:1-4; 19:24-30).

Apóstol Pablo kukwe kwin bämikani arato. Bati, niarakwe kukwe tikabare “kri tukwä, ye kwrere jire tä nebe ruen [...] ti ngrabare tie”, kukwe yebe niarakwe ja tuani (2 Cor. 12:7). Kri tukwä ye abokän bren nämene käre niarabätä o niara nämene sribire apóstol erere ye rüere nitre namani kukwe niere ye gäräbare kwe raba ruin. Ye erere o ñakare akwa, niarakwe ja tare nikabare jankunu, aune niarakwe käre ja tare nikabare ja ngätärete o töbika yebe (2 Cor. 12:9, 10).

Bren tare krubäte tä kärekäre nibätä abokän tä ni mike dinekä o ni töi mike ulire krubäte yebe nitre Ngöbö mikaka täte tä ja tuin kä nengwane arato. Kä nämene 18 Magdalena yebiti angwane, bren lupus eritematoso sistémico ye kwani niarabätä, ye jondron ni ngrabare kriemikakäre bren yebätä akwa arabe näin ni ngrabare miketa bren. “Kä jürä rababa krubäte tibätä —niebare kwe—. Biti kä rikaba raire ta angwane ti rababa bäri bren, ti rababa mröre tare, kada bren aune roro bren”. Bren nämene Izabela yebätä ye abokän ñaka ja erebe bren nämene niarabätä yebe. Izabela tä niere: “Ti nämene chi nükebe kä nengwane käre tita ulire krubäte. Ye tä kä jürä mike krubäte tibätä, ti mike murie jäke tare aune bule nikrenkä. Käre tä ti mike nainte krubäte”.

Dre dre nuain raba yebätä töbikadre

Nita bren aune ni ñaka raba sribi nuainne ye raba ni mike ñaka nüne kwin. Ye erere angwane, bäri kwin ni raba dre dre nuainne yebätä töbikadre kwin. Ni ñaka  raba sribi nuainne ye ruäre ngwane ñaka tä nemen nuäre kadre ngäbiti ni kräke. Magdalena tä niere: “Tita nemen bäri bren jankunu. Käre tita nemen nainte krubäte yebätä ñaka tä nemen nuäre rükadre krö jänbiti ti kräke. Aune ñongwane bren ye rükai tibätä ye ñaka tä nemen gare tie yebätä ñaka tä nemen nuäre ja ükatekäre ti kräke bren ye känenkri. Ti nämene sribire Jehová kräke ye erere ti ñaka niena nuainne ye tä ti mike bäri ulire”.

Zbigniew tä mike gare: “Kätä niken kwatire kwatire ta ye ngwane, bren artritis reumatoide, ye tä ti mike dinekä, aune tä ti ngrabare jökrä mike nikrenkä jatäri. Ruäre ngwane, ti nemen nüen krubäte, sribi kiakia ye ñaka tä nemen nuäre nuaindre ti kräke. Ye tä ti mike ulire krubäte”.

Kä nikani ruäre ta yete, bren tumor cerebral nirien jankunu ye kwani Barbara jisabätä. “Ti ngrabare ye tä nemen nikwite jötrö ngwarbe —nieta kwe—. Ti di ñaka tä nemen jire, käre ti dokwä tare aune ñaka tä nemen nuäre ti kräke ja töi mikakäre kukwe keteitibebätä. Ti bren krubäte rükaba gare tie angwane, tikwe dre nuaindi jakänenkäre yebätä tikwe ja töi mikaba”.

Nitre bren kädrite ye abokän nitre Ngöbö mikaka täte, niaratre ye kräke sribi Ngöbökwe nuaindre ye bäri ütiäte. Niaratre jökrä tä tö ngwen täte Ngöböi aune Ngöböta niaratre dimike (Pro. 3:5, 6).

¿Jehová tä ni dimike ño?

Bren ruäre kisete nita ja tare nike ye ngwane, Ngöbö ñaka tä ni kain ngäbiti ni ñaka rabadre nütüre (Lam. 3:33). Job käkwe ‘ñaka ja mikani ngite jire aune ja ngwani metre kwe’, akwa ja tuabare kwe kukwe tare keta kabre ben (Job 1:8). Ngöbö ñaka ni jire iti nuinte kukwe käme yebiti (Sant. 1:13). Bren jökrä —bren kärekäre aune bren tä ni töi mike ulire— ye ni rüe abokän ni rün kena Adán bätä Eva köböite namani (Rom. 5:12).

 Akwa, Jehová aune Jesús, käkwe nitre kukwe kwin nuainkä ye dimikai (Sal. 34:15). Metrere nita ja tuin kukwe tare ben ye ngwane, tä nemen gare metre nie, Ngöbö abokän ni ‘kriemikaka aune [ni] dimikaka’ (Sal. 91:2). Yebätä, bren tare kräkäi ñaka ye rabadre nibätä angwane, ¿dre raba ni dimike kä ngwen juto jankunu jabätä?

Orasion: Nitre Ngöbö mikaka täte metre kirabe ye erere, nikwe ja tare nika ye mikadre gare Jehovai orasion yebiti (Sal. 55:22). Ye erere nikwe nuaindi angwane, “Ngöbökwe kä jäme jakwe mikadi” ni brukwäbätä. Kä jäme ni brukwäbätä ye käkwe ni “moto amne [...] töi ngibiadibti kuin” (Fili. 4:6, 7). Magdalena nämene orasion nuainne aune tö ngwen täte Ngöböi ye köböire ja tuabare kwe bren nämene niara ngwen dinekä yebe. Niara tä niere: “Tita blite Jehovabe ye tä ti miketa kwin aune kä miketa juto tibätä. Nengwane nüke gare metre tie, ñobätä nikwe ja di kärädre mantre jetebe Ngöböi” (2 Cor. 1:3, 4).

Orasion nuainta nikwe ye ererebätä, Jehová raba ni dimike üai deme yebiti, niara Kukwei bätä ja mräkätre tä kukwebätä nibe yebiti. Nita nemen bren ye ngwane Jehovakwe gwäune ni mikadreta kwin ie ni törbadre ye ñaka kwin; akwa niara raba ni mike töbätä aune ni dimike ja tuakäre kukwe tare jökrä ben (Pro. 2:7). Biblia tä niere erere, niarakwe “di bäri kri” ye biandi nie (2 Cor. 4:7).

Nitre ja mräkäre: Ni ja mräkäre nüne jabe ye tä ja tarere aune ja mike tuin bobre jai kwärikwäri ye tätre ja dimike kä ngwankäre nüke jai bren yebe. Ni bren ye tä ja tuin kukwe bäri tare ben ye ngwane mräkätre tä niara dimikakäre akwa, niara rabadre ngwen törö jai mräkätre ye tä ja tare nike aune niara ye erere dimikaka ñaka nemen ruin ie arato. Niaratre orasion nuaindre gwaire jabe yekwe töi mikai jäme (Pro. 14:30).

Barbara tä niere ngängän yebätä: “Niara tä käre ti dimike kukwe driekäre. Kä juto  niarabätä ye tä kä mike juto ti brukwäbätä”. Zbigniew dimikata mukokwe ye ütiäte krubäte kräke. “Sribi nuaindre gwi ye bäsi jökrä ti muko tä nuainne —nieta kwe—. Arato tä ti dimike ja ngwä kite aune nunta niken gätäbätä aune kukwe driere ye ngwane tä niken maletín ngwena ti kräke.”

Ja mräkätre kukwebätä: Ja mräkätre konkrekasionte tä nibe ye tä ni dimike aune ni töi mike jäme. Akwa, ja mräkä iti bren yebätä ñaka raba nemen gätäbätä ye ngwane, ¿dre nuainta? Magdalena tä niere: “Kukwe kädrieta gätäte ye ja mräkätre tä grabare kukwe nuadre tie. Ti dimikakäre, ja mräkätre kukwebätä tä basare tie. Arato tätre tärä tike biti juen tie ti dimikakäre. Niaratre tä ti ngwen törö jai aune töita tibätä ye tä ti dimike kä ngwen nüke jai”.

Dre tä Izabela dimike ne kwe ñaka rabadre ulire krubäte ye tä mike gare: “Konkrekasionte ti rün aune ti meye tä kwati krubäte, niaratre tä ti kukwe nuin aune ja ruin ño tie ye mike nüke gare jai. Nitre konkrekasionte ye ti mräkä, aune yete ti töita nemen jäme bätä kätä nemen juto tibätä”.

Nire nire tä ja tare nike ye ñaka rabadre ja denkä kaibe mento; ñakare aune, rabadre käre ja ükökrö gätäte ja mräkätre konkrekasionte yebe (Pro. 18:1). Ye erere nuaindre kwe angwane, raba ni mada dimike krubäte. Nitre bren ye tä dre ribere jai ye ñaka tä ben ngwairebe niere ja mräkätre kukwebätä yei. Akwa, niara blitai metre ja mräkätre yebe angwane debe biain kwetre ie, ñobätä ñan aune niaratre käkwe niara “tare[i] era metre” (1 Pedro 1:22). Kukwe ye erere ben mätä ja tuin angwane, ¿ñobätä mä ñaka mike gare ja mräkätre ie, mä tö niaratre tuai ja ngwen gätäbätä, kukwe driei bentre o mä tö blitai bentre ja driekäre ietre? Ye erere nikwe nuaindre akwa, ni ñaka rabadre ja di ribere krubäte ja mräkätre ie, ñakare aune niaratre ni dimikadre yebätä nikwe debe biandre ietre.

Nikwe töbikadre metre: Bren tare tä kärekäre nibätä yebe nikwe ja tuadre akwa nikwe ñaka tuanemetre kä juto ye denkä jakän, ye tä gare nie. Nita ulire krubäte aune ja ñaka rabadre ruin ütiäte nie ye raba ni mike töbike ñaka metre. Biblia tä niere: ni  iti töi tä kwatibe jondron nuainkäre ye raba ja tuin bren tare ben, akwa ni iti töi ñaka tä kwatibe jondron nuainkäre, yei ñaka nuäre kä ngwankäre nüke jai (Pro. 18:14).

Magdalena tä niere: “Tita ja di ngwen krubäte ñaka töbikakäre bren tikwe yebätä. Tita kä ngwen juto jabätä jata nemen ruin kwin tie ye ngwane. Ja mräkätre tä ja tare nike bren tare yebe akwa yebiti ta tätre jankunu Ngöbö mike täte metre kädrieta täräbätä yebätä tita ñäke angwane tä ti dimike krubäte”. Jehová tä Izabela tarere aune mike ütiäte jai nüke gare ie ye tä niara dimike. Niara tä niere: “Tita sribire Jehová kräke ye niara tä mike ütiäte jai ye gare kwin tie, ni tärä iti kräke tita nüne. Ne madakäre jondron kwin krubäte tä ja känenkäre ti kräke”.

Zbigniew tä niere: “Bren tibätä tä ti dimike ja töi mike bobre aune ni mada kukwei mike täte, kukwe mike nüke gare jai aune töbike kwin metre bätä ngite juen ta ni madabiti brukwä tätebiti. Tikwe Jehová mikadre täte kä jutobiti aune tikwe ñan töbikadre krubäte jabätä ye nüke gare tie; aune ti töita kwatibe nirien jankunu kukwe ja üaire yebiti”.

Kukwe tare ben mätä ja tuin ye jökrä gare Jehovai aune mä tuin bobre ie ye mäkwe ñaka käi kwitaka jabiti. Aune mäkwe ngwan törö jai: “Aune jondron nuainbare munkwe ja tarebiti niara kräke, niara ñan tärä käi kwitakaka jabiti” (Hebreos 6:10, NGT). Nitre jökrä tä niara kukwei mike täte yei niarata kukwe käbämike ye mäkwe ñaka tuanmetre: “Tikwe ñan ma mikadrete jire chi kaibe amne, tikwe ñan kä mikadrekä jire chi mabtä” (Heb. 13:5).

Ruäre ngwane ja raba ruin ulire mäi angwane, nünain kä bä nuäre te ja känenkäre yebätä mäkwe ja töi mika kwatibe. Gwäune Gobran Ngöbökwe jatai jondron kwin ngwena Kä tibien kräke, ye mäkwe tuai ja okwä jeñebiti.

[Jondron üai bämikani aune rekwadro página 28]

Bren kärekäre tä niaratrebätä akwa yebiti ta tätre kukwe driere jankunu

“Ti ñaka niena näin kaibe ji ngrabare, aisete ti muko o ja mräkätre ruäre tä niken tibe kukwe driere. Texto meden aune kukwe medenbätä tikwe blitai ye tita mike gare kwin jai.” (Jerzy, tä ja tare nike kä ñaka tuin ie yebätä.)

“Tita kukwe driere teléfono yebiti akwa nitre ruäre tö kukwe mikai gare jai yei tita tärä tike jankunu arato. Ti bren yebätä ti mikateta hospital ye ngwane, käre tita Biblia aune tärä mike jänbiti ja ken. Ye tä ti dimike bä kabre blita kömike bäri kwin.” (Magdalena yebätä, bren lupus eritematoso sistémico ye kwani.)

“Ti töta nemen kukwe driei ju ju te, akwa ja ñaka tä nemen ruin kwin kukwe driekäre tie ye ngwane, tita nuainne teléfono yebiti.” (Izabela tä ja tare nike, tä nemen ulire krubäte ye kisete.)

“Ti töta nemen krubäte nitre tuaibiti aune ja mräkätre tä nitre tötike Bibliabätä yebe ti töta nemen näin. Köbö te jata nemen ruin kwin tie ye ngwane, tita niken kukwe driere ju ju te.” (Barbara tä bren tumor cerebral kisete.)

“Jondron juto ye aibe te tita täräkwata ngwen. Aune tita kukwe driere jankunu akwa ti nemen bäri bren angwane ti ñaka tä kukwe driere.” (Zbigniew tä bren, artritis reumatoide kisete.)

[Jondron üai bämikani página 30]

Monsotre aune nitre umbre raba ni mada dimike