Nun ja töi mikani sribi Ngöbökwe nuainne köböire jondron kwin tä nunkwe

James A. Thompson tä mike gare

Ti däreba mötörikri (sur) Estados Unidos kä 1928, kukwe ükaninte gobrankwe nitre kwata ngwen aune kwata drüne ñäkäbitikäre nuain nämä kä ye näire. Kukwe ükaninte ye nitre ñaka nämä mike täte angwane kita nämä ngite o mika nämä bäri ja tare nike.

KÄ YE näire, kä ruäre juta Estados Unidos yete, nitre testiko Jehovakwe kwe konkrekasion, sirkuito aune distrito nämene, yete nitre kwata bä jene nämene ñäkäninbiti. Kä 1937 näire, ti rün nämä sribire siervo de compañia erere (nengwane kädekata ni gätä nitre umbrekwe köböikitaka) konkrekasion ni kwata drüne Chattanooga (Tennessee) yete. Henry Nichols nämene sribire siervo de compañia erere ni kwata ngwen kräke.

Ti nämä chi ye ngwane, deu ti nämä täke ti rün aune ja mräkä Nichols ben kä sribebare täkärä ju trökri yekänti bätä ti nämä niaratre kukwe nuin ye törö kwin tie. Niaratre nämä blite ye ñaka nämä nüke gare tie, akwa kukwe driedre ño kukwe tare näire ye tata aune Nichols nämä kädriere jabe, ye kukwe nuakäre ti tö nämä rabai niaratre ken.

Kä 1930 ye känenkri, nun mräkätre käkwe ja tuani kukwe tare ben. Kä nämene 20 ti meye yebiti angwane krütani, ti ngwai Doris —yebiti kä nämene kobokä— aune tibiti —kä nämene kubu— aune nun rün ie nun namani ngübadre. Ti rün ja ngökani ñöte ye ngwane kä jämi niken raire tabiti, akwa ririabare krubäte ja üaire.

Kukwe kwin bämikani käkwe ti dimikani

Kä 1933 ye näire, ja ngwai bä nuäre kädeka nämene Lillie Mae Gwendolyn Thomas ben ja kwani tatai, ye bitikäre kä braibe te niaratre ja mikani gure. Niaratre Jehová mikani täte metre yebiti kukwe kwin bämikani kwetre Doris aune ti kräke.

Kä 1938 ye näire konkrekasion nitre testiko Jehovakwe yei ribebare, kukwe ükaninte ye  niaratre kadre ngäbiti: nitre umbre konkrekasion ketare ketare te ye ñaka kädeka rabaira konkrekasion yebiti, ñakare aune kädeka rabai ji ngwankäre obisina bäri kri, Brooklyn (Nueva York) yebiti. Kä Chattanooga yekänti ja mräkätre ruäre ñaka tö namani juta Ngöbökwe kukwe ükaninte ye kain ngäbiti, akwa tata nieba niarakwe kukwe ye nuaindi ja töi kwinbiti. Kukwe ükaninte ye tata aune mama mikani täte, ye ti dimikani nükebe kä ne näire.

Ja ngöka ñöte aune sribi köbö täte

Kä 1940 ye näire, nitre kwati konkrekasion nunkwe yete käkwe bus känänbare nänkäre gätä kri yebätä kä Detroit (Michigan) yekänti. Gätä yete nitre ruäre konkrekasion nunkwe te käkwe ja ngökaba ñöte. Kä nämä kwärike tibiti ye ngwane ti rababara kukwe driere aune käre ti nämä nuainne yebätä nitre ruäre yei ñaka rükaba gare, ñobätä tikwe ñan ja ngökaba ñöte.

Ngwantariba tie aune tikwe nieba, dre nuaindre tikwe ja ngökakäre ñöte ye ñaka nämä nüke gare kwin tie. Tikwe kukwe nieba yekwe tata töi mikaba ñan krütare; kä ye ngwane ja känenkäre niarakwe ja di ngwanba kukwe ye mike gare tie aune ñobätä ütiäte tikwe ja ngökadre ñöte ye mikaba gare kwe tie. Ye bitikäre sö rikaba kräbokä ta aune, 1 octubre 1940 ye näire, kä Chattanooga yekänti jubäre ñö tibo nämä ketaninkä cinc yebiti te tikwe ja ngökaba ñöte.

Kä rababa 14 tibiti ye ngwane, tikwe sribi prekursor nuainba kä morente kwela bian ñaka nämä ye ngwane. Juta chi Tennessee aune Georgia yekänti ti nämä kukwe driere, juta ye nämä ja ken. Ti nämä nüke dekä krö, mrö sribere chi kwetadre ñänä ruäre jai aune 6 dekä ti nämä niken bus o tren yete kä kukwe driekäre yekänti. Ti nämä nüketa 6 dere. Ti nämä niken mrö ngwena kwetadre jai ye käre ti nämä kwete ñänä ruäre känenkri, aune mrö nämä nemen jankunu tie. Ngwian nämäna mrö mada kökakäre tie, akwa ti kwata drüne yebätä ti tuanmetre ñaka nämä nemen kä mrö kökara yekänti. Bati ti törbaba helado kökai jai akwa tikwe kä mikadrekä nieba tie. Ye ngwane meri kwata ngwen käkwe töi kwinbiti helado känänba kwati ti kräke aune rikaba ngwena jubäre tie.

Ti rikaba ja tötike colegiote ngwane, nitre nünanka mötörikri kä Estados Unidos ye jökrä kräke kukwe ükate nämä. Nitre Braibe dianinkä Estados Unidos kukwe ükatekäre Nitre Kwata drüne dimikakäre (tikani tärä okwä inglere NAACP) nämä monsotre ja tötikaka kwelate töi mike aune nübaire ja mike kukwe ükaninte rüere. Kwela kabre nitre kwata drüne kräke aune kwela känti ti nämä yekwe monsotre kwelate jökrä töi mikaba ja mike nitre yekri. Niaratre ti töi mikaba ja dibiti ja mike nitre kwata ti erere yekri, akwa tikwe ñaka nuainba. Tikwe mikaba gare niaratre yei, Ngöbö tä nitre kwata jene jene ye jökrä kain ngäbiti, aune niarakwe kukwe ye ükaite tikwe nieba ietre (Juan 17:14; Hech. 10:34, 35).

Ti ngediankaba kwelate ye bitikäre kä rikaba braibe ta angwane, tikwe ja töi mikaba niken nüne Nueva York. Ti rikaba juta yekänti angwane ti ja mikateba ji ngrabare juta Filadelfia (Pensilvania) yete rabakäre ja ketamuko rababa gare tie gätä krite yebe. Konkrekasion niaratrekwe ñaka nämä ja ñäkäninbiti känti ti rikaba gätäbätä, ti nämä yete angwane ni ni tuabitikä nämä konkrekasion ye tuinbiti. Bati niara rikaba ti ngwena kaibe mentokwäre aune nieba kwe tie, kukwe biandi kädriedre kwe tie gätä mada nuaindi kräke. Ye ti töi mikaba nemen kä yekänti.

Ja ketamuko rababa tikwe kä Filadelfia yekänti ngätäite ja ngwai bati kä Geraldine White nämä, ye bitikäre tikwe niara kädekaba Gerri. Kukwe Bibliabätä nämä gare kwin ie, aune kukwe drie nämä gare kwin ju ju te ie. Ne madakäre, niara töi nämä ti erere sribi prekursor nuainkäre, aune ye rababa ütiäte krubäte ti kräke. Nunkwe ja mikaba gure 23 abril kä 1949 yete.

 Nun nübaiba Galaad

Käre nun töi nämä nänkäre Kwela Galaad aune sribire misionero juta madate. Kä jutobiti nunkwe ja töi kwitaba kukwe ruäre nuain nämä nunkwe yebätä ne kwe kukwe ribeta nänkäre Galaad ye nun rabadre nuainne. Kä rikaba braibe ta angwane, nun rikadre nüne Lawnside (Nueva Jersey), biti Chester (Pensilvania) aune Atlantic City (Nueva Jersey) ribeba nuen. Nun nämä yete angwane, nunkwe ja mikani gure ye käi rikaba kubu ta nunbiti aune ye ngwane nunkwe täräkwata juanba kwela ye kräke. Akwa nun ñaka nübaiba bengwairebe. ¿Ñobätä?

Kä 1950 ye näire monsotre kwati krubäte kärä rababa ja kitakäre rübätä aune nänkäre rübätä juta Corea yekänti. Aune obisina Filadelfia nitre nübaikäre ja kite rübätä yekänti nitre brukwä nämä krubäte nitre testiko Jehovakwe kräke ñaka ja mike rüte yebätä. Akwa ni iti kukwe ükatekä käkwe mikaba gare tie nitre sribikä FBI ye käkwe kukwe mikani gare jai tibätä, ye ngwane nükani gare ie ti ñaka ja mike rüte. Yebätä, 11 enero kä 1952 ye ngwane, tärä okwä 4-D yebiti ti diankaba nitre kukwebätä ye erere.

Agosto kä ye näire, Gerri aune ti nübaiba kwela Galaad bä grekäre nuainba kräke septiembre yebätä. Kwela nuain nämä ye ngwane nun töi nämä krubäte nun juandre kukwe driekäre juta madate yebätä. Ti ngwai Doris ye ngedianinkä kwela nuainbare bäjätä biti bämäkäre yete aune niara nämä sribire misionera Brasil. ¡Gerri aune ti kädekaba sribikäre ye käi rababa juto krubäte nunbätä! Nun kädekaba konkrekasion nitre kwata drüne kräke ye tuinbiti mötörikri kä Alabama yekänti. Yekwe nun mikaba ulire, ñobätä ñan aune nun töi nämä sribikäre juta madate.

Konkrekasion tuabitiba kena nunkwe ye nämä kä Huntsville yekänti. Nun rababa kä yekänti angwane, nun rikaba ja ngwai iti ju bianba rabakäre nuen yekänti aune nun nämä tribe den timon ye ngwane nunkwe niara kukwe nuaba niere teléfono yete: “Monsotre kia nüra”. Erametre, kä nämä 24 aibe nunbiti aune nun nämä tuin bati krubäte. Nun nämä sribire sirkuito yete angwane Monsotre kia nie nämä nuen.

Mötörikri kä Estados Unidos, kädeka nämene inglere Cinturón de la Biblia yekänti, nitre nämä Biblia ye mike ütiäte krubäte jai. Yebätä, nunkwe ja töi mikaba blite kukwe ketamä nebätä:

1) Nünanta ño kä jökräbiti tibien yebätä kukwe nieta.

2) Kukwe ye ükaite ño Biblia tä mike gare.

3) Nikwe dre nuaindre nieta Bibliabätä.

Ye bitikäre tärä meden kwin ja tötikakäre Bibliabätä ye nun nämä driere. Nun nämä kukwe driere ye erere nitre madai köböire kukwe kwin namani nunkwe, yebätä gätä kri “Sociedad del Nuevo Mundo” nuainba kä 1953 juta Nueva York yete nun nübaiba kukwe ye bämike.

Kä 1953 ye näire, kä morente, ti nübaiba sirkuito ja mräkätre kwata drüne kräke tuinbiti kä mötörikri yekänti akwa ni distrito tuabitikä erere. Kä keta kabre nämä tuadrebiti nuen: Virginia nemen Florida aune kä nendrinkri (oeste) yekänti nemen Alabama bätä Tennessee. Erametre, nun ja mräkätre tuabitikä ye nämä ja di ngwen nünankäre nitre kä yekänti erere. Ñodre, ju te nun nämä ja düke yekänti ñö nen tibien ye ñaka nämä, kä mrö  riakäre kwäräkri ñö nämä ketaninkä cinbiti abokän te nun nämä jüben. Kä yekänti, kä nämä nemen krube gwi.

Nitre kwata jene jene ñaka nämä nüne keteitibe köböite kukwe kri nämä

Sribikäre mötörikri kä Estados Unidos yekänti, nun nämä ja ngübarebiti aune töbike kwin kukwe driekäre. Ñobätä ñan aune nitre kwata drüne tuanmetre ñaka nämä niken dän ngwena kä dän bätätekäre yekänti. Gerri nämä niken gwä aune nämä niken dän “meri Thompson” yekwe bätete nie nämä kwe, yebätä nitre kwati nämä nütüre niara ye ni sribikä. Nitre distrito tuabitikä ye nämä película La Sociedad del Nuevo Mundo en acción mike tuare angwane, ti nämä blite teléfono yete jondron película tuakäre bäri kri ye kärere aune ti nämä kri kärere “Thompson” kräke. Biti ti nämä niken tuin. Käre nun nämä ja töi mike nitre tarere aune nun nämä kukwe driere ye ngwane kukwe tare ñaka nämä nemen bare nunbätä.

Ne madakäre, nitre kwata drüne rüe nämä nakainkä, aune nitre nünanka ngwitärikri (norte) kä Estados Unidos ye rüe nämä nakainkä arato. Bati, periódico kä yekänti käkwe kukwe mikaba gare känti nieba, James A. Thompson, Jr., sribikä Sociedad Watchtower Bible and Tract of New York yekwe kukwe kädriei gätä kri näire. Nitre ñäkäbare kukwe mikani gare yebätä angwane, namanintre nütüre ti abokän nünanka Nueva York, yebätä ñaka nun tuanmetreba gätä kri köböbu ye nuainne kwela jue käräba nunkwe yete. Ti rikaba nitre ji ngwanka kwelate yekänti aune tikwe ja tötikabare kä mötörikri yekänti, metrere kä Chattanooga yekänti tikwe nieba ietre. Ti nünanka mötörikri rababa gare ietre angwane, nun tuanmetreba kwetre gätä kri ye nuainne.

Kä 1955 ye näire, nitre kwata jene jene ye brukwä rababa bäri ja kräke aune ruäre ngwane niaratre nämä ja nuaine tare. Kä 1954 ye ngwane gätä kri köbömä nuainbare kabre yete nitre Testiko ruäre namani rubun ñobätä ñan aune nitre kukwe kädriekä ye ngätäite nitre kwata drüne ñaka nämene jire. Nun rababa ja mräkätre kwata drüne ye töi mike töbike bätärekä. Gätä kri köbömä nuainba kä mada ja känenkäre yete, tikwe kukwe kädrieba, aune ye ngwane ja känenkäre ja mräkätre kwata drüne ye kwati bäri rababa kukwe kädriere gätä kri te. Ni kristiano erametre käkwe ja töi mikadre töbike bätärekä Jesús erere, niara ja tuabare kukwe tare keta kabre ben.

Kä rikaba raire ta angwane, nitre kwata jene jene nämä ja rüere kä mötörikri Estados Unidos yekänti, ye ñaka rababa ja nuainne tare, aune bätärekä jatäri nitre kwata ngwen aune drüne jataba ja ükökrö keteitibe. Yebätä nitre kukwe driekä kädekadre sribikäre konkrekasion madate, kä diandrekä kukwe driekäre aune sribi meden rabadre nitre umbre kädekani kisete ye rükaba gare nuen. Akwa, ja mräkätre kwata ngwen aune kwata drüne ye ruäre rababa rubun kukwe ükateba yebätä. Akwa nun jökrä bäsi nämä nitre kwata bä jene ye kain ngäbiti, nun Rün kä kwinbiti erere. Aune nitre kwata ñaka nun erere ben nun nämä ja kete kwin. Kä 1930 aune 1940 te ti ngübabare ye näire, ti mräkätre kukwe ye bämikani kwin ti kräke.

Sribi mada mrä

Enero kä 1969 ye ngwane, Gerri aune ti nübaiba kukwe driere juta Guyana yekänti, aune nunkwe kan ngäbitiba kä jutobiti. Käne nun rikaba Brooklyn (Nueva York), yete ti tötikaba kukwe drie ye jie ngwankäre Guyana. Julio 1969 ye ngwane nun rababa kä yekänti. Ñaka rababa nuäre nun kräke nünankäre kä yekänti, ñobätä ñan aune kä kwäjätä biti kwä ti te tikwe sribiba ni ni tuabitikä erere. Ne madakäre, kä jökrä ngwane Gerri nämä kukwe driere misionera erere, aune ti nämä sribire sukursal.

 Ti nämä sribi jökrä nuainne: sotobo tikekä aune konkrekasion grebiti kwä kwä nämä tärä kärere ye ti nämä juen kräke aune obisina kri Brooklyn yekänti kukwe juan nämä tie ye kain ngätibi. Ti nämä sribire ora kräjätä biti kräbokä aune kräjätä biti krärike mantre jetebe. Ñaka nämä nemen nuäre nun kräke, akwa ja rababa ruin kwin sribi ye nuainkäre nuen aune nun nämä nuainne kä jutobiti. Nun rükaba Guyana ye ngwane, nitre kukwe driekä nämä 950, akwa nengwane niena 2.500 biti bäri.

Nun nämä nüne kwin kä Guyana yekänti aune jondron kwetadre bätä kri ngökwä bätäkä ngwarbe ye nämä nemen kwin nun kräke, akwa nitre töi bobre tö nämä kukwe metre mikai gare jai aune Gobran Ngöbökwe kukwei nämä nemen gare ietre yebätä metrere kä nämä juto nunbätä. Gerri nämä nitre gre tötike bämän kratire kratire, aune nitre ja tötikaka kwati nunbe ye ririaba ja üaire aune ja ngökaba ñöte kwetre. Ye bitikäre, niaratre ruäre namani prekursor, ni umbre konkrekasionte aune misionero.

Kukwe mada tare, metrere bren yebätä

Kä 1983 ye näire, ti rün aune ti meye nämä Estados Unidos ye rababa ja di ribere nunye. Doris, Gerri aune ti ja ükakröba dre nuaindi nunkwe kädriekäre. Doris nämä sribire misionera kä grebiti kwäjätä biti kwärike Brasil. Doris ja töi mikaba kiteta Estados Unidos niaratre ngübakäre. Ye nuainkäre niara o ti käkwe sribi misionero ye tuanemetre, rababa niere, akwa Gerri aune ti jatadreta ye ngwane nun nibu käkwe sribi misionero tuanemetre. Ja känenkäre, nun rün aune nun meye krütaba ye ngwane, Doris rababa sribire prekursora especial Chattanooga.

Kä 1995 ye näire cáncer de próstata kwanba tibätä aune nun jatabata Estados Unidos. Nun rababa nüne juta Goldsboro (Carolina del Norte) yekänti, angwane kä (Tennessee) nünankäre ti mräkätre ie aune kä (Pensilvania) nünankäre Gerri mräkätre ie ye rababa bäri nun ken. Cáncer ñaka niena ti nike krubäte, aune kä nengwane Gerri aune ti tä sribire konkrekasion Goldsboro yete prekursor especial, akwa ti täbe bren.

Kä gre ketamä biti kwärike biti bäri te Gerri aune ti sribibare köbö täte yebätä tita töbiketa angwane, Jehová kukwe kwin keta kabre mikani nemen nunkwe yebätä tita debe bien krubäte ie. Nun ja töi mikani sribi Ngöbökwe nuainne köböire jondron kwin tä nunkwe. David kukwe niebare ne, nunkwe tuanina nemen bare metre: “Nitre ja ngwen metre yebe mäkwe [Jehová] ja ngwandi metre” (2 Sam. 22:26).

[Jondron üai bämikani página 3]

Ti rün aune ja mräkä Nichols kukwe kwin bämikani ti käne

[Jondron üai bämikani página 4]

Nun rababara bäsi nänkäre Galaad, Gerri ben (1952)

[Jondron üai bämikani página 5]

Sribi bianba Galaad nunye: sirkuito keteiti nemenkä kä mötörikri Estados Unidos tuabitikäre

[Jondron üai bämikani página 6]

Nitre konkrekasion tuabitikä aune muko kwata ñaka ja erebe tä keteitibe ja mike juto gätä kri köbömä kräke (1966)

[Jondron üai bämikani página 7]

Ti nämä sribire kä jutobiti misionero kwrere Guyana