Ni Jehová mikaka täte kwe jondron ütiäte üaire tä krubäte, ye tä mikani tärä sribeta yebätä, akwa ye ñan aibe ngörä, ni üai aune jondron mada üai, tärä tikani, kukwe namani bare kirabe nitre Ngöbö mikaka tätebätä tikani, kukwe driebare, aune kukwe namani bare kirabe ye jökrä tä nikwe. Akwa, ¿ñobätä jondron kirabe ne jökrä mikadre ngwäte aune ja tötikadrebätä? Kirabe, Kukwe Ngöbökwe bätä Ngöbö nämene jondron kwin nuainne ye nitre Israel nämene mike gare monsoitre yei ne kwe niaratre käkwe “tö ngwandre Ngöböi” arato (Sal. 78:1-7).

Kukwe kirabe mikani ngwäte yete kukwe känänta köböire Jehová tö dre dre nuain ye mikata nemen bare. Ñodre, nitre juta Ngöbökwe rüe ñaka tö namani nitre Israel tuai templo Jerusalén yekänti sribereta, akwa kukwe kä Ecbátana juta Madían yebätä nämene mikani ngwäte yete kukwe känänbare aune rei Ciro käkwe ju ye sribe manabareta kwani (Esd. 6:1-4, 12). Sribi ye nuainbare jankunu Ngöbö tö namani ie ye erere. Lucas, Ngöbö kukwei tikaka käkwe kukwe nämene mikani ngwäte niara näire yebätä kukwe känänbare “jondron nakaninkä ño metre jökrä [...] kena” ye mikakäre gare jai (Luc. 1:1-4, Kuke Koin (tärä okwä ükaninte)).

Kä nengwane, nitre Braibe konkrekasion jökrä Ngübabitikä töita krubäte kukwe jökrä nuainta nikwe Ngöbö mikakäre täte yebätä. Kukwe mikadre ngwäte, tikadre aune jondron ütiäte üaire tä nikwe mikadre gare ni madai ye ütiäte krubäte, yebätä nitre Braibe konkrekasion jökrä Ngübabitikä iti käkwe niebare: “Nita näin  kä meden kokwäre ye rabadre gare nie gäre, ni jatani medenkri tädre gare nie”. Yekäre, obisina bäri kri tä Brooklyn (Nueva York), yekänti kä ükaninte nitre Braibe Kukwe Tikaka tä Kukwe Tike ye mikakäre Ngwäte, niaratre arabe käkwe jie ngwandi.

“FOTO NGWÄ” AUNE JONDRON MADA KIRA ÜTIÄTE TÄ NIKWE

Kä kwatire kwatire niken ta, yebätä ni töta nemen kukwe ruäre ütiäte ni kräke aune ni mräkä üai ye mikai ngwäte, ¿ñan ererea? Ye erere, Kukwe tikabare Mikai Ngwäte ye kräke sribita ja dibiti, jondron ütiäte üaire tä krubäte nikwe ngübakäre kwin aune tikakäre. Ni üai aune jondron mada üai mikai ngwäte ye rabai “foto nikwe ngwä”. Jondron mada ütiäte mikata ngwäte ye ngätäite tärä, täräkwata sribebare kena ye tä mikani, kukwe namani bare ja mräkätrebätä tikani, kukwe mada nuäre nuäre nakaninkä niaratrebätä tä mikani arato. Kukwe kira tä mikani ngwäte ye jökrä tä ni dimike jondron ütiäte üaire tä nikwe ye mikakäre gare jai aune ni mräkätre kukwebätä rabai ño ja känenkäre yebätä töbike metre.

Nunta mä “nübaire” Kukwe tikata Mikai ngwäte ye mike ñärärä aune dre dre tä yete ye mike gare kwin jai. Täräkwata Ni Mikaka Mokre ja tötikara, yebätä kukwe mikani mrä kädekata “Kukwe kira mikata gare”

ye jatai nane nane. Täräkwata Ni Mikaka Mokre mada sribedi yebätä nun tö kukwe krörö ngwantarita ne mikai: ¿Dre abokän “auroramóvil”? ¿Nire nire nämene ngwen? ¿Ñongwane sribi nuain jatanibiti aune ñokäre?

Ni mräkätre üai mikata ngwäte ye erere, Kukwe tikani Mikata ngwäte yekänti jondron keta kabre tä mikani, ye tä blite nibätä aune ñongwane ja mräkätre jatani Ngöbö mike täte yebätä arato: ja mräkätre käkwe nünanbare ni känenkri ye tödekabare ño, ñobätä ñaka kä jürä ngwani kwetre jabätä, ñaka namani nuäre Ngöbö mikakäre täte niaratre kräke, kä namani juto niaratre yebätä aune Ngöböta juta kwe jie ngwen bätä dimike ño jankunu ye mikata gare kwe nie (Deu. 33:27). Kukwe jökrä nuainta nikwe Ngöbö mikakäre täte ye mikakäre ngwäte sribi nuainta, yebätä Jehovakwe kukwe kwin mikai nemen bare ie nunta tö ngwen, aune ne tä ni mike nüne keteitibe aune ni mike dite sribi Ngöbökwe nuainkäre.

[Jondron üai bämikani aune rekwadro página 31]

Kukwe mikata gare bäri jondron nikwe yebätä

Ja mikata juto tärä sribekäre, DVD aune täräkwata mada mada sribekäre ye ngwane, nitre kukwe tikaka, nitre jondron üai jükaka, nitre kukwe känänkä aune nitre mada mada tä kukwe kirabe mikani ngwäte ye känene. Jondron keta kabre kirabe abokänbiti sribibare ye sukursal jene jene, obisina jene jene Betel yekänti, konkrekasion keta kabre, aune gobrantre bätä nitre ruäre tä bien, ye nitre sribikä Kukwe tikani Mikata ngwäte käikänti tä ükökrö mikadre ngwäte aune ngübakäre kwin. Niaratre tä dre dre nuainne ye ani mike gare jai:

Ñokänti jondron ye nemen nikwe aune mikata gare jai. Jondron keta kabre ye ükakröta jankunu. Jondron ye bianta ken sribikäre töi kwinbiti, nitre ruäre mräkätre sribibarera mekerabe metre Jehová kräke tä jondron ye bien. Jondron yebätä kukwe mikata gare jai köböire dre dre namani bare kira nibätä aune nire nire käkwe kukwe namani bare ye tuani raba nemen gare bäri nie.

Jondron ye ño. Jondron ere krubäte tä ükaninkrö, jondron ruäre yebiti kä niena 100 biti bäri. Jondron keta kabre aune kia bätä kri aune bä jene jene arato, ye mikadre kwin ngwäte ne kwe ja känenkäre ni raba mike ñärärä.

Ükateta aune ngübata kwin. Tärä keta kabre aune jondron därebe raba niken ngwarbe ye ükateta bätä ngübata kwin aune ye nuainta makina jondron ükatekäre yebiti. Täräkwata, ni üai, kukwe periódico yebätä tikakata, película, aune kukwe grababare mikata computadora yete. Ye nuainta ne kwe mikadre ñärärä computadora ye aibe te aune ñakare kisemikadre bökän yebätä.

Jondron ükakröta aune känäntarita. Jondron sribi kräke ükakröta kwin jatäri ne kwe ñaka rikadre ngwarbe ñänä trä aune kä tibo yebätä. Programa sribeta keteiti jondron kirabe ütiäte nikwe ye mikakäre computadora yete ne kwe raba kwen jötrö ngwarbe nie aune kukwe ye riadrete angwane raba kwenta jötrö arato.

[Jondron üai bämikani página 32]

1) “Foto-Drama de la Creación” yebätä kukwe mikani gare. 2) Täräkwata ribe nämene. 3) Karobiti bosina mika nämene kukwe mikadre. 4) The Watch Tower 15 abril 1912 ye kwata. 5) J. F. Rutherford kitai ngite mikani gare. 6) Micrófono WBBR yekwe. 7) Fonógrafo. 8) Maletín tärä ngwankäre. 9) Kukwe jeñe tikani. 10) Kukwe tikabare J. F. Rutherford ie teléfono yete