Kukwe diankata ja tötikakäre yete kukwe kwin rabai nikwe aune kä rabai juto nibätä

Nita kä denkä ja tötikakäre Bibliabätä ye ngwane, ni töta nemen kukwe mikai gare bäri jai aune ye köböire kukwe kwin rabadre nikwe ie ni töta nemen, ¿ñan ererea? Kukwe ketamä nuäre kädekateta ne raba ni dimike nuainkäre.

1 ORADRE. Käne ni rabadre blite Ngöböbe (Sal. 42:8). Ja tötikata Ngöbö Kukweibätä yebiti niara mikata täte. Yebätä, nikwe üai deme ye kärädre ie aune ni dimikadre kwe ja töi mike metre ye ribedre ie arato (Luc. 11:13). Barbara, tä sribire mekerabe misionera, tä niere: “Ti jämi ñäke täräbätä o ja tötike Bibliabätä ye känenkri käre tita orare. Ye ngwane Jehovata ti dimike aune kukwe nuainta tikwe ye nemen kwin niara kräke ye gare tie”. Mrö ja üaire bianta krubäte nie ye kan ngäbitikäre, orasion raba ni dimike ja töi aune ja brukwä ükete.

2 TÖBIKADRETARI. Nitre ruäre tä sribire krubäte, ye medenbätä tätre ñäke jötrö Kukwe Ngöbökwe yebätä aune kukwe kwin ñaka nemen jire kwetre. Carlos, käkwe sribibarera kä 50 biti bäri Jehová kräke, tä niere, kä diandrekä jai töbikatarikäre ye ütiäte krubäte: “Kä nengwane tita ñäke braibe Bibliabätä, köbö kwatire kwatire tita ñäke bersikulo kwati o kububätä, ye köböire drebätä tita ja tötike ye tä nüke gare tie aune kukwe bäri ütiäte ja töi kräke ye tä nemen gare tie” (Sal. 77:12). Ye erere, nikwe kä diainkä jai töbikatarikäre angwane, Ngöbö tö dre dre nuain ye rabai gare nie aune rükai gare bäri kwin nie arato (Col. 1:9-11).

3 NUAINDRE. Jondron ütiäte tä nemen tuin nie ye ngwane, ni töta nemen sribi nuain bäribiti, ye erere nuain raba kukwe ükateta ja tötikakäre nikwe yebätä. Ye erere monso bati kristiano kädekata Gabriel tä mike gare, niara tä niere: “Tita ja tötike Bibliabätä angwane tita nemen bäri juto ja tuakäre kukwe ruäre ben aune nitre mada dimikakäre. Akwa ye nuainkäre, tita ja di ngwen kukwe nüke gare tie ye nuainne” (Deu. 11:18; Jos. 1:8). Erametre, kukwe ja üaire tä keta kabre ni kräke abokän ni rabadre mike gare jai aune nuainne arato (Pro. 2:1-5).

NGWANDRETA TÖRÖ. ¡Ngöbö ni mikaka töbätä Kukwei mikadre gare bäri kwin jai ye ütiäte krubäte! (Rom. 11:33). ¿Dre ni dimikai ja tötike bäri kwin Bibliabätä? Kena, oradre Jehovai ne kwe üai deme biandre kwe nie aune ni dimikadre kwe ja töi mike metre ja tötika ye kräke, ye bitikäre ni raba kä denkä jai töbikatarikäre aune mrä ja di ngwandre kukwe nemen gare nie ye nuainkäre. Kukwe ketamä nuäre ne köböire, kukwe ükateta nikwe jai ja tötikakäre yete kukwe kwin rabai nemen nikwe aune kä rabai juto nibätä.