¡Kukwe mrä mikani täräkwata ja tötikara yebätä!

REPRODUCIR EN

¡Kukwe mrä mikani täräkwata ja tötikara yebätä!

Matare ja känenkäre, täräkwata Ni Mikaka Mokre ja tötikara ye ükaninte bä nuäre, ne kwe Kukwe Ngöbökwe ütiäte yebätä ja tötikadre bäri kwin (Sal. 1:2; 119:97).

Kä kobokä nikanina ta yete täräkwata Ni Mikaka Mokre sribebare ketebu jene jene: nitre jökrä kräke aune keteiti ni testiko Jehovakwe bätä nitre ja tötikaka Bibliabätä tö ririai kukwe ja üairebiti kräke.

Ja mräkä tä mekerabe kukwebätä käkwe kukwe krörö tikani nuen: “‘¡Täräkwata ja tötikara kukwe metrebätä ye kwin krubäte!’. Täräkwata Ni Mikaka Mokre yebätä tikwe ja tötikaba angwane ti töi rababa ye erere. Kukwe ja üaire ñaka nuäre rükadre gare ye abokän mikata gare nuäre kwe ye tä mate ti brukwäbätä. Tä debe krubäte jondron ütiäte nebätä”. Ja mräkä mada käkwe tikabare: “Ti tö ora diainkä bäri jai ja tötikakäre kaibe täräkwata nebätä Biblia con referencias yebiti”. Mäkwe ja töi mikadre ne erere arato ie nun tö.

¿Täräkwata Ni Mikaka Mokre ye sribe jatani ñongwane gare mäi? ¡Kä 1879 yete ja känenkäre! Erametre, kukwe kwin ne jökrä tä nemen bare Jehová üai ye aibe köböire (Zac. 4:6). Kä 133 nikanina ta yete, täräkwata Ni Mikaka Mokre kwata ye kwitabarera bä kabre kä jene jene te. Kä 2012 ja känenkäre, täräkwata keteitire keteitire yebätä jondron üai bä nuäre tädi mikani sribi Ngöbökwe nuainta ye ererebätä. Ne käkwe ngwandi törö nie, käre nikwe kukwe Gobran Jehovakwe yebätä mikadre gare täte kä jökräbiti (Hech. 28:23). Página ketebukäre yekänti jondron üai bä nuäre ye tädi mikani arato, ye bitikäre kä meden känti jondron üai ye dianinkä mikadi gare kukwe braibebiti. Ni Jehová mikaka täte tä kukwe kwin driere “kä ngöi jökrä ta” ye ngwandi törö kwe nie sö kratire kratire (Mat. 24:14, NGT).

Akwa kukwe mada mada mrä kwandi mäi täräkwata yebätä arato. Ñodre, kukwe ja tötikara jene jene yebätä mäkwe ja tötikai angwane, kukwe ngwantarita kukwe ütiäte ngwankäre törö ye tädi mikani página kena yekänti. Ye köböire kukwe meden bäri ütiäte ye rabadi gare käne mäi aune mäkwe Ja Tötikadre Ni Mikaka Mokre yebätä angwane mäkwe kukwe ye känändre. Nuainta käre ye erere, ja tötika mikai krüte ye bitikäre kukwe ngwaintari kukwe ütiäte ngwankäre törö. Ne madakäre, página jene jene aune párrafo keteitire keteitire ye tuin bäri kwin aune kä ñäi mikaninte bäri kri tärä okwä ketare ketare ye kräke.

Kukwe ketebu mrä mikani täräkwata yebätä ye rabai gare mäi arato. Keteiti kädekata “Kukwe kira mikata gare”

aune täräkwata ne arabe tä mike gare, ye abokän kukwe bäri ütiäte namani bare kirabe nitre testiko Jehovakwe yebätä ngwankäre törö nie. Ne madakäre, kukwe kädekata “Ja töi mikani sribire kwe Ngöbö kräke töi kwinbiti” ye tädi mikani arato, nitre kukwe gobran Ngöbökwe driekä ribeta käi yekänti nitre kristiano kä nengwane tä sribire abokänbätä kukwe kwin tä nemen bare ye mikai nane nane täräkwata nebätä.

Mäkwe kä diainkä jai ja tötikakäre Kukwe Ngöbökwe yebätä angwane, täräkwata ne käkwe mä dimikadre ja tötike bäri kwin ie nun tö.

Nitre sribekä