Nitre reire aune sacerdote ye ni jökrä kä nebätä dimikai
“Akwa mun abrä ‘nitre deani jai, sacerdotetre bökän, angwane nitre kä deme te, angwane mun abrä nitre Ngöbökwe’” (1 PED. 2:9, NGT).
1. ¿Ñobätä “ni Dänkien mröbare” ye kädekata arato Kristo ja nire biani Ngwanta Törö?
KÖBÖ deu 14 nisán kä 33 yete, Jesukristo bätä nitre apóstol nijätä biti nibu käkwe Pascua ye nuainbare mrä. Judas Iscariote juanintari kwe ye bitikäre, kukwe mada mrä käi ngwani juto kwe jabätä, ye abokän kädekani “ni Dänkien mröbare” (1 Cor. 11:20, NM). Köbö deu yete bobu Jesukwe niebare: “Munkwe ne nuaindre ti mikakäre törö jai [käre]”, ye medenbätä kukwe mrä käi ngwani juto jabätä, ye kädekata arato, Kristo ja nire biani Ngwanta Törö (1 Cor. 11:24, 25, NGT). Kukwe biani nuaindre Jesukwe ye ererebätä, nitre testiko Jehovakwe kä jökräbiti tä käi ngwen juto jabätä kä kwatire kwatire te. Juebe 5 abril kä 2012 yete, köbö 14 nisán kalendario nitre Judea kwe ye kömikai Ñänä näin nekä ye bitikäre.
2. ¿Jesukwe dre niebare ban aune bino yebätä?
2 Lucas, ni ja tötikaka Jesube, tä bersikulo ketebubiti kukwe niebare aune nuainbare Jesukwe köbö ye näire ye kädriere: “Biti ban diani kisete kwe, käkwe kwin niebare Ngöbö ie. Biti ban ötaninkä kwe; dräibare kwe nitrebiti. Käkwe niebare ietre: ‘Ne brä ti ngätä biandi mun ütiäre. Ne nuain munkwe ti mikakäre törö jai käre’. Mröbare ünä kwetre, angwane siämä [copa] dianinta kwe kisete, biti niebare kwe ietre: ‘Siämä [copa] ne medendre kukwe mrä ti däriebiti; ne brä niandi [o ribiainte] tibien mun ütiäre’” (Luc. 22: 19, 20, NGT). ¿Dre nükani gare nitre apóstol ie kukwe nebätä?
3. ¿Ban aune bino yebätä dre nükani gare nitre apóstol yei?
3 Nitre apóstol ye nitre Judea, ye medenbätä nitre sacerdote nämene jondron nire kukwe Ngöböi templo Jerusalén yete, ye nämene gare kwin niaratre yei. Kukwe ye nuain nämene ne kwe Jehovakwe niaratre kadre ngäbiti aune käre nuain nämene ne kwe Ngöbökwe ngite juandre ta niaratre yebiti (Lev. 1:4; 22:17-29). Ye medenbätä, Jesús ngätä biandi aune därie ribiainte niaratre kräke niebare kwe, ye abokän niarakwe ja ngrabare ngite ñakare biandi Ngöböi gäräbare kwe ye nükani gare kwin niaratre yei. Niarakwe ja nire biandi ye abokän rabadi bäri ütiäte krubäte jondron nire bian nämene kukwadre ye kräke.
4. Jesukwe niebare “Siämä [copa] ne medendre kukwe mrä ti däriebiti”, ¿ye ngwane dre gäräbare kwe?
4 Aune Jesukwe niebare: “Siämä [copa] ne medendre kukwe mrä ti däriebiti”, ¿ye abokän nükani gare ño ietre? Kukwe mrä ükaite niebare tä Jeremías 31:31-33 ye nämene gare nitre apóstol yei (ñäkädrebätä). Jesukwe kukwe niebare ye tä mike gare kä ye näire kukwe mrä ükaninte, abokän rabai Jehovakwe Kukwe ükaninte Moisés yebiti nitre Israel ben ye täte. ¿Kukwe ketebu ükaninte ye nämene kukwe ja erebe mike gare?
5. Kukwe ükaninte biani Moisei, ¿ye käkwe dre mikani nitre Israel ye käne?
5 Erametre kukwe ketebu ükaninte ye nämene kukwe ja erebe mike gare. Jehovakwe Kukwe ükaninte biani Moisei ye ngwane, niebare kwe nitre Israel yei: “Tita kukwe niere ye erere munkwe mikai täte bätä kukwe ükaninte tikwe ye munkwe mikai täte metre angwane, erametre mun rabai juta jeñe tikwe nitre jökrä juta madate yebiti ta, ñobätä ñan aune kä tibien jökrä ye tikwe. Aune mun arabe rabai ti kräke sacerdotere gobranka aune juta deme” (Éxo. 19:5, 6). ¿Kukwe ye dre mikani gare nitre Israel yei?
SACERDOTETRE BÖKÄN KÄBÄMIKANI
6. ¿Dre käbämikani abokän Kukwe ükaninte biani Moisei ye mikani nemen bare?
6 Kukwe ükaninte ye abokän dre gärätä ye nämene gare kwin nitre Israel yei, ñobätä ñan aune kukwe ye erere Jehovakwe ükaninte Noé bätä Abrahán yebe arato (Gén. 6:18; 9:8-17; 15:18; 17:1-9). Jehovakwe kukwe ükaninte Abrahán yebe ngwane, käbämikani kwe: “Ma mräkä köböire ni kä jökräbti temen kä nebtä, ie tikwe ja di biandi” (Gén. 22:18, JK). Kukwe ükaninte biani Moisei ye käkwe kukwe ye mikani nemen bare. Kukwe ye köböire, Israel rabadi “juta jeñe [Jehovakwe] nitre jökrä juta madate yebiti ta”. ¿Ñokäre? Ne kwe rabadre “sacerdotere gobranka” Jehová kräke.
7. ¿Kukwe “sacerdotere gobranka” ye tä dre mike gare?
7 Nitre reire aune sacerdote kädrie nämene ye nitre Israel kukwe nuabare, akwa ni kirabe, Melquisedec, aibe käkwe sribi ketebu ye nuainbare ngwairebe Jehová diebiti (Gén. 14:18). Jehovakwe juta ye mikani nitre mada denkä “sacerdotere gobranka”. Nitre kukwe Bibliabätä tikaka käkwe kukwe niebare ye mikani gare, nitre reire ye arabe rabadi sacerdote arato o sacerdotetre bökän (1 Ped. 2:9).
8. ¿Sacerdote dianka nämene Ngöbökwe ye nämene sribi meden nuainne?
8 Ni reire ye abokän ni gobranka gärätä. Akwa, ¿sribi meden tä ni sacerdote ye kisete? Hebreos 5:1 (NGT) tä mike gare: “Sacerdote bäri kri [...] dean näin nitre kä tibienbätä ngätäite, ne mika näin sribire Ngöbökwe nitre ütiäre ja ngwärekri; abokän kwe jändrän mikadre kwe aune jändrän kämikadre kwe Ngöbö ngwärekri, ngite ütiäre”. Ye medenbätä, sacerdote dianinkä Jehovakwe ye nämene blite nitre ngite ütiäre Ngöböbe aune kukwe ükaninte jondron kukwadre kräke ye ererebätä niaratre nämene orasion nuainne Ngöböi nitre ye ütiäre. Ne madakäre, niaratre nämene kukwe Ngöbökwe driere nitre yei arato Jehová kräke (Lev. 10:8-11; Mal. 2:7). Sacerdote dianka nämene Ngöbökwe ye nämene nitre miketa ja mäke kwin Ngöböbe sribi nuain nämene kwetre yebiti.
9. a)¿Nitre Israel dre nuaindre ne kwe nitre “sacerdotere gobranka” diandrekä käbämikani ye rabadre bare ietre? b) ¿Ñobätä Jehovakwe nitre braibe dianinkä sacerdotere nitre Israel ye kräke? c) ¿Ñobätä nitre Israel ñaka nitre mada dianinkä “sacerdotere gobranka” Ngöbökwe Kukwe ükaninte biani Moisei köböire?
9 Kukwe ükaninte biani Moisei ye nitre Israel mikani sacerdotetre bökän denkä ne kwe jondron kwin nuaindre kwetre “nitre jökrä juta madate” ye kräke. Akwa kukwe kwin nämene niaratre kräke ye rabadi niaratre yekwe, kukwe niebare Jehovakwe ne mikadi täte kwetre ngwane: “Tita kukwe niere ye erere munkwe mikai täte bätä kukwe ükaninte tikwe ye munkwe mikai täte metre”. ¿Jehovakwe kukwe niebare ye erere nitre Israel mikani täte? Kukwe ruäre mikani täte kwetre. Akwa, ¿niaratre töi nämene kukwe ye jökrä nuainkäre täte? Ñakare (Rom. 3:19, 20). Ye medenbätä, kä ye ngwane Jehovakwe nitre braibe dianinkä sacerdotere nitre Israel ye kräke, aune nitre ye ñan nämene sribire gobranbe, ñakare aune niaratre nämene jondron nire ye aibe kukwe nitre Israel nämene ja mike ngite ye kräke (Lev. 4:1–6:7). Nitre sacerdote nämene ja mike ngite ye kräke arato (Heb. 5:1-3; 8:3). Jondron nire bian nämene kukwadre ye Jehová nämene kain ngäbiti, akwa ye ñaka nämene ngite denkä täte nitre nämene jondron bien ja ütiäre yebiti, ñobätä ñan aune nämene nemen umbre jankunu aune krüte. Kukwe ükaninte biani Moisei abokän sacerdotetre nämene mike täte akwa ñaka nämene ja mäketa kwin täte Ngöböbe aune ñaka nämene nitre Israel Ngöbö mikaka täte metre ye miketa ja mäke täte Ngöböbe arato. Apóstol Pablo mikani gare ye erere: “Nbi kwane [o nidan] därie amne chibo därie ye abko ñan raba ni ngite denkä jire chi mento nibtä” (Heb. 10:1-4). Ngöbökwe Kukwe ükaninte biani Moisei ye nitre Israel ñaka mikani täte yebätä kukwe tare ñäkäbare niaratre kräke (Gál. 3:10). Ye medenbätä, ñaka namani nuäre niaratre kräke rabakäre sacerdotere gobranka aune ni jökrä kä tibienbätä dimikakäre.
10. ¿Ngöbökwe Kukwe ükaninte biani Moisei ye köböire dre namani bare?
10 Nitre Israel käkwe nitre “sacerdotere gobranka” diandrekä käbämikani Jehovakwe, ¿ye ñaka namanina ütiäte? Ñakare. Niaratre käkwe ja di ngwandre Ngöbö kukwei mike täte angwane, rabadre nuainne akwa ñaka Ngöbökwe kukwe ükaninte biani Moisei ye köböire. ¿Ñobätä? (Ñäkädre Gálatas 3:19-25 yebätä). Kukwe ükaninte Ngöbökwe ye nitre mikani täte metre, köböire namani kriemikani kukwe ngwarbe mika nämene täte yebätä. Kukwe ye köböire nitre Judea yei nükani gare niaratre ngite aune sacerdote bäri kri nämene jondron bien yebiti ta jondron bäri ütiäte biandre ngite juankäre ta ye nükani gare ietre arato. Kukwe ye namani niaratre jie ngwankäre Kristo o Mesías yei, ye abokän “ni Dianinkä” gärätä. Akwa, Mesías rükadre ye ngwane, kukwe mrä ükaite niebare Jeremías käkwe yete niaratre rabadre arato. Nire nire käkwe Kristo kani ngäbiti ye nübaibare ja mike kukwe mrä ükaninte yete aune nemen erametre “sacerdotere gobranka”. Namani bare ño ye ani mike gare jai.
KUKWE MRÄ ÜKANINTE KÖBÖIRE SACERDOTETRE BÖKÄN DIANINKÄ
11. ¿Dre käkwe Jesús mikani metrere sacerdotetre bökän dänkiene?
11 Kä 29 yete Mesías nükani, ye abokän Jesús Nazaret. Jesubiti kä nämene 30 näre angwane ja ngökabare ñöte kwe, niara ja töi mikani sribi ütiäte Jehovakwe nuainne ye bämikakäre. Jehová niebare niara yebätä: “Nebrä ti ngobo taredre kri tikwe”. Ne madakäre, dianinkä, üai deme yebiti aune ñaka seite yebiti (Mat. 3:13-17, NGT; Hech. 10:38). Jesús dianinkä ye köböire kädekani Sacerdote Bäri kri aune Reire ja känenkäre nitre kä tibienbätä Ngöbö mikaka täte ye jökrä kräke (Heb. 1:8, 9; 5:5, 6). Niara namani metrere sacerdotetre bökän dänkiene.
12. ¿Jesús ja nire biani ye köböire dre kwin tä ni kräke?
12 Jesús Sacerdote Bäri kri ye käkwe, ¿dre biani ne kwe ngite diandrekä täte nitre Ngöbö mikaka täte yebiti? Niarakwe ja nire biandi ngwandreta törö abokän kräke kukwe ükaninte kwe ye ngwane, ja nire ñakare ngite biandi kwe abokän nämene mike gare (ñäkädre Hebreos 9:11, 12 yebätä). Kä 29 yete Jesukwe ja ngökabare ñöte ye ngwane, kädekani Sacerdote Bäri kri, yete ja känenkäre ja tare nikabare kwe bätä töi ükaninte nememe murie ketani ye ngwane (Heb. 4:15; 5:7-10). Jesús ganinkröta ye bitikäre, nikaninta kä kwinbiti aune ja nire biani kwe ye ütiä mikani gare kwe Jehovai (Heb. 9:24). Ye bitikäre, Jesús ja nire biani ie nitre nämene tödeke, ye ütiäre Jesús nämene blite Jehovabe aune nämene nitre ye dimike Ngöbö mike täte ne kwe ja nire käre rabadre kwetre ja känenkäre (Heb. 7:25). Ne madakäre, Jesukwe ja nire biani ye köböire kukwe mrä ükaninte ye namani ütiäte (Heb. 8:6; 9:15).
13. ¿Nitre braibe nübaibare kukwe mrä ükaninte yete ye kräke dre nämene?
13 Kukwe mrä ükaninte yete nitre nübaibare ye dianinkä üai deme yebiti (2 Cor. 1:21). Käne nitre Judea Ngöbö mikaka täte metre nübaibare biti nitre ñaka Judea ye nübaibare (Efe. 3:5, 6). ¿Drekäre niaratre nübaibare? Ne kwe ngite juandre täte ta niaratre yebiti. Jehová käbämikani: “Tikwe ngite juain ta mäbiti aune tikwe ñaka ngite mäkwe ngwain törö jire jai” (Jer. 31:34). Ngite juandre täte ta niaratre yebiti angwane rabadre “sacerdotere gobranka”. Pedro kukwe tikani nitre kristiano dianinkä nänkäre kä kwinbiti yei: “Akwa mun abrä nitre diani jai, sacerdotetre bökän, angwane nitre kä deme te, angwane mun abrä nitre Ngöbökwe; abokän kwe munkwe jondron bä nuäre Ngöbökwe driedre gäre. Mun nämäne kä iko te, Ngöbökwe mun käräbare ñukwä jutra jakwe bä nuäre käi” yekänti (1 Ped. 2:9, NGT). Jehová Kukwe ükaninte biani Moisei yete kukwe niebare nitre Israel ie, ye abokän Pedro niebare nitre kristiano nämene kukwe mrä ükaninte yete yei (Éxo. 19:5, 6).
NITRE REIRE AUNE SACERDOTE YE NI JÖKRÄ KÄ NEBÄTÄ DIMIKAI
14. ¿Sacerdotetre bökän ye käkwe sribidi medente?
14 Nitre tä kukwe mrä ükaninte yete, ¿ye käkwe sribidi medente? Sribidi kwetre Kä tibienbätä, yete nitre braibe erere tätre sribire sacerdotere, niaratre tä jondron bä nuäre Ngöbökwe driere nitre jökrä yei Jehová kräke aune mrö üaire bien (Mat. 24:45; 1 Ped. 2:4, 5). Niaratre tä krüte aune gakröta ye bitikäre sribidi Kristo ben kä kwinbiti reire aune sacerdotere, sribi ketebu tä niaratre kisete ye nuainta täte kwetre (Luc. 22:29; 1 Ped. 1:3-5; Apoc. 1:6). Kukwe ne metre ñobätä ñan aune apóstol Juan käkwe nitre üaire tuani köböre kä kwinbiti kürä gobrankäre Jehovai ken. Niaratre namani “ka btin niere krörö ni Kordero kwrere ie” ye ngwane niebare kwetre: “Ma abko müre ketani [...] amne, ja däriebti makwe ni bätäkä ngwarbe kökanintarita Ngöbökrä. Ye abko, ni kukwe bätäkä ngwarbe amne ni juta kwatirekwatire te amne ni nünanka kä ketareketare temen, te makwe [...] kökanintarita ruäre rabakäre ni jen Ngöbökwe. Amne [...] makwe mikani sribire ni blitaka Ngöböbe ni mda mda diäre kwrere Ngöbö nikwe kräke. Amne niaratre käkwe gobrandi kä nebtä” (Apoc. 5:8-10). Ja känenkäre Juankwe köböbare yete niebare kwe nitre gobranka yebätä: “niaratre rabai gobrane Gobran kri bengwaire kä mili krati” (Apoc. 20:6 NGT). Kristo yebe ngwaire sribidi kwetre sacerdotetre bökän erere nitre jökrä kä nebätä dimikakäre.
15, 16. ¿Sacerdotetre bökän dre dre kwin nuaindi nitre kä tibienbätä kräke?
15 ¿Nitre 144.000 ye dre dre kwin nuaindi Kä tibienbätä? Apocalipsis kapitulo 21 yebätä, Jerusalén Mrä, ye bämikata juta kä kwinbiti erere, kädekata arato “Kordero kwäräi” (Apoc. 21:9, NGT). Bersikulo 2 nemen 4 yebätä mikata gare: “Juta Jerusalén btin kuin deme näma Ngöbö känti kä käinbti abko [...] tikwe tuaba bäsi meri tä ja ükaninte kuin bä nuäre brare ngäbti ja mikakäre gure ben, ye kwrere jire juta ye rababa tuen tie. Angwane btäräbe kürä gobrankrä Ngöbökwe [...] ye känti ni kukwei jaraba kri tie, kä rababa niere krörö: Mtare Ngöböta nüne ni jen kwe ben juta btin nete. Ngöbökwe nünandi bentre amne niaratre rabadi juta jen Ngöbökwe, aisete Ngöbö ara jire tädi bentre Ngöbö jen kwetre kwrere. Angwane Ngöbökwe niaratre okwä ñöi sökadite jökrä ietre amne ni ñan krütadre jire iti mda amne ñan ja müaidre jire chi mda amne ñan ja müaidre ja tare nikabtä, ñobtä ñan angwane kukwe nämane ükaninte ño känekäne, erere nikanina jökrä ta”. Gata ñaka rabaira, ja müai ñaka rabaira, ja tare nika ñaka rabaira, ¡ye jondron kwin krubäte rabai bare! Aune ngite ñaka rabaira nitre Ngöbö mikaka täte metre yebätä, aune rabaita ja mäke kwin Ngöböbe.
16 Sacerdotetre bökän jondron kwin nuaindi ye Apocalipsis 22:1, 2 tä mike gare bäri kwin: “Yebti ñö kri kuin dirare angelekwe mikaba tuare tie. Ñö ye abko ni mikakrä nüne kärekäre amne ñö ye abko kuin merebe jä cristal bä merebe ye kwrere. Erere arato, kürä gobrankrä Ngöbökwe amne kürä gobrankrä ni Kordero kwrere kwe, ye känti ñö ye näma neen. Angwane ji kri juta [Jerusalén Mrä] yete abko ötöbu ta ñö ye tä neen amne kri ni mikakrä nüne kärekäre näma niren ñöbtä kwärikwäri. Kri ye abko ngwä näma nebe sö kratirekratire, aisete kri ye ngwä näma nebe bä jätäbti bobu btä kä kwatirekwatire amne kri ye abko kä näma ni jökrä mikakrä kuinta”. Kukwe üaire nebiti “ni jökrä”, o ni kä tibienbätä abokänbätä Adankwe ngite mikani ye diainkä täte. Erametre kukwe tare ye jökrä näin ta.
SACERDOTETRE BÖKÄN SRIBI MIKAI KRÜTE TÄTE
17. ¿Sacerdotetre bökän dre nuaindi ja känenkäre?
17 Kä mil te sacerdotetre bökän sribi ütiäte nuaindi ye bitikäre, nitre kä tibienbätä mikaita nüne kwin metre kwetre. Kristo, Sacerdote Bäri kri aune Rei, käkwe Jehová okwäkänti nitre kä tibienbätä mikaita nüne kwin metre (ñäkädre 1 Corintios 15:22-26 yebätä). Kä ye ngwane, sacerdotetre bökän käkwe sribi kwetre ye mikai krüte täte.
18. Sacerdotetre bökän käkwe sribi nuaindi täte angwane, ¿Jehovakwe mikai dre nuainne Kristo ben?
18 Ye ngwane ja känenkäre, ¿Jehovakwe nitre sribikä Kristo ben mikai dre nuainne? Apocalipsis 22:5 tä mike gare “niaratre käkwe gobrandi kärekäre”. ¿Nire nirebiti? Biblia ñaka niere. Akwa ja nire namani kwetre aune nitre ngite dimikadre ño namani gare ietre, yekwe dimikai sribire jankunu reire Jehová töi mikakäre nemen bare.
19. Nikwe ja ükaikrö Kristo ja nire biani Ngwainta Törö jai näire ngwane, ¿dre ngwandre törö jai?
19 Nikwe ja ükaikrö 5 abril 2012 yete Kristo ja nire biani Ngwankäre Törö jai angwane, kukwe Bibliabätä drieta ne nikwe ngwandre törö jai. Nitre kristiano dianinkä nänkäre kä kwinbiti nemena braibe Kä tibienbätä ye ban ñaka mritani jondron madabe ye kwetai aune bino tain ñai, ye tä mike gare niaratre tä kukwe ükaninte mrä yete. Jesús ja nire biani bämikata ye ngwain törö ietre niaratre dianinkä nänkäre kä kwinbiti aune sribi ütiäte mikani kisete Ngöbö töi mikakäre nemen bare kärekäre. Ngöbö Jehovakwe sacerdotetre bökän dianinkä ye nitre jökrä kä tibienbätä dimikai, yebätä debe biankäre, ¡ni jökrä rikadre Kristo ja nire biani Ngwainta Törö jai ye näire!
[Kukwe ngwantarita]
[Jondron üai bämikani página 29]
Sacerdotetre bökän jondron kwin mikai nemen kärekäre kä tibienbätä
