Ñaka kä jürä ngwani jabätä kwetre Kukwe Ngöbökwe driekäre

Nitre kristiano erametre rüeta nakainkä ye ngwane ñaka kä jürä ngwen jabätä, ye erere mikata gare tärä “Testimonio cabal” del Reino de Dios bätä Los testigos de Jehová, proclamadores del Reino de Dios yebätä. Nitre kristiano siklo kena nämene tödeke ye erere, nita üai deme kärere Jehovai aune ja di kärere ie ne kwe ñaka kä jürä rabadre nibätä blitakäre Kukwe kwe yebätä (Hech. 4:23-31).

Rübare kri kena ye näire kukwe driebare yebätä, ja mräkä kukwe krörö tikani: “Nitre Ngöbö mikaka täte nämä kä jutobiti aune töi kwatibebiti tärä The Finished Mystery (El misterio terminado) ye döräire, tärä Estudios de las Escrituras ye volumen kükükäre döräibare kwati krubäte. Täräkwata Kingdom News (Noticias del Reino) número 1 ye sribebare 1918. Ye bitikäre Kingdom News número 2 ye sribebare, ye mikani gare ñobätä gobrantre käkwe tärä The Finished Mystery ye ñäkäibare. Aune biti Kingdom News número 3 ye sribebare. Nitre Ngöbö mikaka metre täte dianinkä nänkäre kä kwinbiti käkwe döräibare ere krubäte, akwa tödeka ribe nämene jai täräkwata ye döräikäre aune ñaka kä jürä ngwandre jabätä”.

Kä nengwane, nitre Gobran Ngöbökwe kukwei driekä mrä ye tötikata sribi ye nuainkäre, akwa ye erere ñaka nemen bare käre. Ja mräkä Polonia nämene nüne Estados Unidos, kä 1922 yete, käkwe kukwe driebare kena ye tä niere: “Täräkwata driedre ño ye ñaka nämä gare tie aune ti ñaka nämä blite kwin inglere, akwa ti nämä kaibe ju sribikäre doctor ie yekänti angwane tikwe ñäkäba gwäkäre. Meri ni bren ngübaka jukwe tikaba. Kukwe rababa bare ye ñaka käi nikwitekä tibiti, ñobätä ñan aune kä rababa juto krubäte tibätä akwa kä jürä rababa tibätä arato. Tikwe maletín tikaba angwane, jondron jökrä nämä teri ye betakaba timon meri ni bren ngübaka ye ngoto känti. Tikwe dre nieba ye ñaka törö tie, akwa niarakwe tärä kan ngäbitiba tie. Ti rikaba mento yete angwane, Jehovakwe jondron kwin nuainba ti kräke rababa ruin tie aune ja rababa ruin dite tie. Köbö yete tikwe täräkwata mikateba krubäte kä jondron rübäinkäre yekänti”.

Ja ngwai iti tä niere: “Mekerabe kä 1933 ye ngwane ja mräkätre nämä kukwe driere karobiti aune kukwe grababare mika nämä kukwe nuadre bosina yete”. Bati, niara aune ja ngwai iti bätä muko kwe nämene kukwe driere kä tokwäre kä California (Estados Unidos) yekänti. Niara tä niere: “Ja ngwai rikaba karo yete kä tokwäre yebiti kwin aune nun abokän rababa jutate. Kukwe grababare ye kukwe jataba ruin angwane, ngö rababa ruin kä kwinbiti ye kwrere. Nitre nünanka juta yete käkwe ja ngwai ye känänba kä jökrä känti akwa ñaka kwanba ietre. Kukwe grababare ye krütaba angwane, nun rikaba nitre ye gwirete aune nunkwe blitaba bentre. Kukwe grababare yebiti tikwe kukwe drieba karo mada krobubiti, akwa ti raba niere, nitre jökrä bäsi ñaka törbaba kukwe nuai jire. Kukwe drie nämä ye nitre ñaka tö nämä kukwe  nuai akwa ñaka nämä nemen dre kräketre, ñobätä ñan aune kukwe grababare ye kukwe nämä nemen ruin kwin gwirete. Kukwe ye nuainkäre ñaka kä jürä ngwandre jabätä, akwa ye köböire kukwe ütiäte nämä nemen bare aune Jehová kä ye käikitaka nämä. Drebiti kukwe driedre aune kä meden ngwane nuaindre ye erere Jehová nämä nun tuenmetre nuainne, ye rababa gare nunye”.

Kä 1930 nememe kä 1940 ye ngwane, kukwe driebare fonógrafo yebiti aune kukwe Bibliabätä kädriebare mika nämene kukwe nuadre. Ja ngwai iti käkwe niebare: “Monso merire bati, nämene kukwe driere fonógrafo yebiti. CD ye mikani kukwe nuadre kwe ni iti gwirete angwane, ni ye namani rubun krubäte käkwe fonógrafo ye täkäninte jukwete ta akwa CD ye ñaka nikani ngwarbe jire chi. Nitre brare nimä nämene mröre ñänä ruäre camión teri ye okwäbiti kukwe ye namani bare, niaratre ja ngwai nübaibare CD ye mike kukwe nuadre jai aune tärä mada käräbare kwetre ie. Kukwe tare namani bare ja ngwai yebätä akwa ye täte kukwe kwin ne namani bare”. Ñaka kä jürä ngwandre jabätä ja tuakäre kukwe ne erere ben ye ribe nämene jai.

Ja ngwai ye arabe käkwe niebare: “Kä 1940 ye ngwane nun rababa kukwe driere ji ngrabare täräkwata yebiti. Akwa ye känenkri kukwe tikani mika nämene tuare ji ngrabare. Ja mräkätre nämene näin jirere ja jiebiti ji kräbäre täräkwata ngwena abokänbätä ‘Iglesia ye kö okwä kwrere aune ni ngökö’ aune ‘Ngöbö bätä Rei Kristo mikadre täte’ ye nämene tikani. Ye bätäräbe niaratre nämene täräkwata kia bien nitre mada yei. Sribi ne nuainkäre ñaka kä jürä ngwandre jabätä ye ribe nämene, akwa ye köböire Jehová kä ño aune juta kwe ye namani gare nitre ie”.

Ja ngwai mada käkwe niebare: “Täräkwata driedre ji ngrabare juta yete ye ñaka nämä nemen nuäre nuaindre. Kä ye ngwane nitre kwati nämä ja mike nitre Testiko ye rüere [...]. Ñaka kä jürä ngwandre jabätä ribe nämä ja mikatekäre käkräte täräkwata ketatekäre kisete aune kukwe ye niekäre ja dibiti. Akwa, nun ñaka nämä sabado juen jire krati ta kukwe ye nuainkäre. Ruäre ngwane nitre nämä ja töi mike jäme, akwa mada abokän rubun nämä ja ükökrö nun bäre aune ruäre ngwane nun nämä ngitie nitre rubun ye ngänikaire”.

Rü kri nakaninkä ketebukäre kä jökräbiti ye ngwane, nitre testiko Jehovakwe rüe namani krubäte, akwa ñaka kä jürä ngwani jabätä kwetre kukwe driekäre. Köbö 1 diciembre kä 1940 nemen 12 enero 1941, köbö dianinkä kukwe driekäre (Períodos de Testimonio) abokän kädekani “Valor” arato, ye nuainbare köbö gre ketebu biti köbömä te. Ye ngwane, nitre kukwe driekä 50.000 käkwe täräkwata mikaninte bäsi 8 millones kä Estados Unidos yekänti.

Ja mräkätre kwati umbre ie kukwe ruäre namani bare kira ye tä törö, abokän känti niaratre ñaka kä jürä ngwani jabätä. Ja mräkätre ruäre tä niere, kä ye ngwane, ja mräkätre ñaka nämene kä jürä ngwen jabätä kukwe driekäre ye mikani gare kukwe nebiti: “Rüdre nememe jukwebätä”. Nitre blo gate jämi känenkri nikwe kukwe driedi ño ye ñaka gare nie. Akwa, Ngöbö diebiti nikwe Kukwe kwe driedi jankunu tödeka yebiti aune ñaka kä jürä ngwain jabätä.

[Kukwe nieta página 9]

Ñaka kä jürä rabadre nibätä kukwe driekäre ye ribeta käre jai