Ni mräkätre ñaka kukwebätä yebe ni raba nüne kä jutobiti

“¿Mäkwe ñaka mä muko mikai kwäre ye ñokänti gare mäi?” (1 COR. 7:16, NM).

MÄKWE KUKWE NE KÄNÄ:

¿Mä mräkätre ñaka kukwebätä akwa ño mä raba nüne jäme bentre ja gwirete?

¿Mäkwe dre nuaindre ne kwe mä mräkätre törbadre kukwe metre ye mikai gare jai?

¿Ja mräkätre tä nüne mräkätre ñaka Testiko yebe ye ni jökrä raba dimike ño?

1. Nire käkwe Gobran Ngöbökwe kukwei kadre ngäbiti angwane, ¿mräkätre raba dre nuainne?

JESUKWE nitre ja tötikaka kwe juani kukwe ne driere: “Ngöbö kebera nüke gobrane nibti” (Mat. 10:1, 7). Nire nire kukwe kwin kadre ngäbiti ye nünandre jäme aune kä jutobiti. Akwa, nitre kwati rabai ja mike Gobran Ngöbökwe kukwei driedi ye rüere niebare Jesukwe apóstol kwe yei (Mat. 10:16-23). Ruäre ngwane, niaratre mräkätre arabe ja mikai rüere niebare kwe ietre, ye abokän tare krubäte (ñäkädre Mateo 10:34-36 yebätä).

2. Kukwe mikata täte nikwe ye ni mräkätre ñaka kain ngäbiti akwa, ¿ñobätä ni raba nüne kä jutobiti?

² Nitre testiko Jehovakwe tä kukwe mike täte ye mräkätre nünanka ben ñaka kain ngäbiti, ¿yebätä niaratre ñaka raba nüne kä jutobiti? ¡Ñakare! Ruäre rüeta nemen krubäte, akwa jökräbätä ñaka nemen bare ye erere. Ne madakäre, kukwe ye ñaka täi käre. Yebätä, ni mräkätre tä ja mike ni rüere o ñaka tä ja töi mike kwin ni kräke ye ngwane, ¿dre tä kämike juto nibätä? Metrere, nita ja töi mike ño kukwe yebätä o niaratre kräke ye raba ni dimike. Ruäre kukwe kwin ñaka nemen bare ni kräke, akwa nikwe Jehová mikadre täte metre angwane, niara jondron kwin nuaindi ni kräke aune kä mikai juto kwe nibätä. Ni bike mike gare jai ye erere, kukwe ketebu raba ni kristiano dimike bäri nüne kä jutobiti: 1) ja di ngwandre nüne jäme ja gwirete aune 2) ni mräkätre dimikadre jankunu ne kwe ja mikadre kukwe metre yebätä kwetre.

MÄKWE JA TÖI MIKA NÜNE JÄME JA GWIRETE

3. ¿Ñobätä nikwe ja di ngwandre nüne jäme ja gwirete?

³ Kukwe metre ye ririadre ni mräkätre brukwäte yekäre, nünandre jäme ni mräkätre yebe ja gwirete (ñäkädre Santiago 3:18 yebätä). Ne madakäre, ni mräkätre  jämi ja mike kukwe metre yebätä nibe angwane, nikwe ja di ngwandre nüne jäme. ¿Ni raba nuainne ño?

4. ¿Ni raba ja töi ngübare ño jäme?

⁴ Ni kristiano rabadre ja töi ngübare jäme. Yekäre, nikwe oradre ja di ngöibiti, ye köböire “kä jäme Ngöbökwe” ye rabai nikwe (Fili. 4:6, 7). Nita ja tötike Jehovabätä aune kukwe Bibliabätä nuainne mantre jetebe ye köböire ni töita nemen jäme aune kätä nemen juto nibätä arato (Isa. 54:13). Ye erere tä nemen bare arato, nita nemen käre gätäte aune kukwe driere ye ngwane. Nire nire tä nüne mräkätre ñaka kukwebätä ben ye tätre kukwe ükete kwin jai sribi Ngöbökwe ye nuainkäre. Enza, * muko kwe tä ja mike kukwe metre ye rüere krubäte, niara tä sribi ja gwirete ye nuainne jökrä biti tä niken kukwe Bibliabätä driere ni madai. Niara tä niere: “Jehová tä ti dimike, ye köböire tita ja di ngwen kukwe driere ye ngwane kukwe kwin tä nemen bare ti kräke”. Yebätä niara brukwä tä jäme, kä jutobätä aune ja ruin kwin krubäte ie.

5. ¿Nitre tä nüne mräkätre ñaka kristiano ben ye tätre ja tuin kukwe meden ben, aune dre raba dimike?

⁵ Ütiäte krubäte nikwe ja di ngwandre nüne jäme ni mräkätre ñaka kristiano yebe. Ruäre ñaka rabai nuäre ni kräke, ñobätä ñan aune niaratre törbai ni tuai kukwe ñäkäita Bibliakwe ye nuainne. Ni ñaka ja di ngwen nekä yebätä niaratre ruäre raba nemen rubun krubäte; akwa nikwe ja di ngwain jankunu ye köböire, ja känenkäre ni raba nüne jäme bentre. Akwa, jondron ribeta kwetre nie ye ñaka Ngöbö kukwei mike ngwarbe angwane, ni raba nuainne ne kwe niaratre töi tädre jäme ni kräke (ñäkädre Proverbios 16:7 yebätä). Kukwe ñaka nuäre rabadre ni kisete angwane, nikwe ja di kärädre nitre umbre ji ngwanka yei aune ‘nitre sribikä täte metre aune töbätäʼ tä kukwe niere täräbätä ye nikwe mikadre gare jai (Pro. 11:14).

6, 7. a) ¿Ñobätä nitre ruäre ñaka tö mräkätre kwe tuai ja tötike Bibliabätä nitre testiko Jehovakwe yebe? b) ¿Ni ja tötikaka Bibliabätä o ni Testiko ja töi mikadre ño mräkätre kwe tätre ja mike kukwe mikata täte kwetre rüere ngwane?

⁶ Nünankäre jäme ja gwirete nikwe tö ngwandre Jehovai aune ni mräkätre ñaka kukwebätä ye töi ño ye nikwe mikadre nüke gare jai (Pro. 16:20). Nitre tä krire ja tötike nitre testiko Jehovakwe ben yekwe ja töi mikadre ye erere arato. Nitre ruäre muko kwe käkwe ja tötikadre Bibliabätä ye ñaka tuin blo ietre, aune nemen tuin kwin mräkätre kwe kräke ietre arato. Akwa, nitre ruäre tä nemen rubun krubäte. Esther abokän niena testiko Jehovakwe kä nengwane, tä niere “namani rubun krubäte” muko kwe jatani ja tötike Bibliabätä nitre testiko Jehovakwe ben ye ngwane. Niara tä niere: “Tikwe tärä kwe ye kitakaba kän, aune mada abokän tikwe kukwaba kän”. Howard, ñaka tö namani muko kwe tuai ja tötike Bibliabätä, tä niere: “Nitre brare kwati ie tä nemen ruin muko kwe yei kukwe ngwarbe drieta. Kukwe yebätä dre nuaindre kwetre ye ñaka tä nemen gare ietre ye tä mike rubun krubäte”.

⁷ Ni ja tötikaka Bibliabätä muko kwe tädre ja mike rüere ye ngwane, ¿ni raba dimike ño? Ñaka rabadre ja tötika Bibliabätä ye tuenmetre ye nikwe mikadre gare ie. Niarakwe ja töi mikadre kwin muko kwe ye kräke aune mikadre tuin ütiäte kwe jai angwane muko kwe raba ja töi kwite (1 Ped. 3:15). Howard tä niere: “Ti muko nämene ja töi mike jäme aune ñaka nämene nemen rubun yebätä tita debe bien ie”. Howard muko tä niere: “Tikwe ñaka ja tötikadre Bibliabätä nieba kwe tie. Ti töi kwita nämene nämä niere. Tikwe ja di ngwanba ñaka ñäke ben jai aune niara ñaka nämä kukwe ngwarbe niere, akwa ñaka nämä tuin ye erere tie tikwe nieba ie. Ti nämä ja tötike täräbätä yebätä  ñäkädre kwe tikwe ribeba ie. Nuainba kwe angwane, kukwe ñan kwanba ie niedre tie aune töi rababa ñan krütare”. Arato nitre gure muko kwe ñaka kukwebätä yei ja raba nemen ruin kaibe aune raba nemen mokre, muko kwe tä niken sribi Ngöbökwe nuainne ye ngwane. Ni kukwebätä ye rabadre kukwe kwin aune nuäre niere muko kwe yei töi mikakäre jäme.

MÄKWE DIMIKA JA MIKE KUKWE METRE YEBÄTÄ

8. ¿Ni kristiano gure muko ñaka kukwebätä yei Pablokwe dre niebare?

⁸ Apóstol Pablo niebare, ni kristiano ñaka rabadre muko kwe ñaka kukwebätä ye tuenmetre (ñäkädre 1 Corintios 7:12-16 yebätä). * Ne madakäre, ni kristiano muko ñaka kukwebätä ye raba kukwe metre ye kain ngäbiti, ye abokän raba dimike nüne kä jutobiti niebare kwe arato. Ni muko ñaka kukwebätä yekwe kukwe Bibliabätä kukwe nuadre yei ni töta nemen, akwa nikwe töbikadre kwin. Ye erere namani bare ani mike gare jai.

9. Nikwe blitadre Bibliabätä ni mräkätre ñaka kukwebätä yebe angwane, ¿dre ngwandre törö jai?

⁹ Nitre ja tötikaka Bibliabätä yei kukwe metre tä nemen gare angwane, käita nemen juto krubäte bätätre yebätä töta nemen blitai kukwe nüke gare ietre ye aibebätä aune töta nemen mräkätre tuai kukwe Gobran Ngöbökwe yebätä ye kain ngäbiti drekebe ngwarbe. Ye erere namani bare Fred yebätä, niara tä niere: “¡Ti törbaba niedi ni jökrä ie!”. Akwa, nitre jökrä ñaka tä kukwe ye kain ngäbiti ni töta nemen ie ye erere. Ñodre, Fred muko tä niere: “Ti nämä nemen nainte niara kukwei käne”. Meri iti muko käkwe kukwe metre kani ngäbiti ye bitikäre kä nikani kwäjätä biti kwäkwä ta ye ngwane niarakwe kukwe metre ye kani ngäbiti. Meri ye tä niere: “Ti törbaba kukwe ye mikai gare bätärekä jai”. Nita ni mada tötike Bibliabätä akwa muko kwe ñaka tö ja mikai kukwe metre yebätä angwane, ¿ni raba niara dimike ne kwe kukwe mikata täte kwe ye mikadre gare kwe töi kwinbiti? Moisés niebare: ‘Ñü tä näkäin tibien ye erere tita kukwe niere ye rabai, ñü burei tä näkäinkä ye erere ti kukwei ye rabai, ñü burei tä näkäin kriäkäbiti aune ñü jobe tä näkäin käbiti tibien ye erere ti kukwei rabai’ (Deu. 32:2). Ye erere, kukwe metre mikadre gare kia kia ye bäri raba mate nitre mada brukwäte aune ñaka mikadre gare jökrä bengwairebe ietre.

10-12. a) ¿Nitre kristiano muko ñaka kukwebätä yei Pedrokwe dre niebare? b) ¿Kukwe nieta 1 Pedro 3:1, 2 ye nuaindre ño ye ñokänti nükani gare meri ja tötikaka Bibliabätä yei?

¹⁰ Meritre nämene gure ni ñaka kukwebätä ben yei apóstol Pedro kukwe ne tikabare Ngöbö üai deme yebiti: “Mun merire gure  gure käkwe ni brare munkwe kukwei mikadre ütiäte, ñobtä ñan angwane nane ni brare ruäre abko ñan tä tödeke Jesubti, [...] ne ngwane ñan munta blite Jesubtä ben abtä tödekadre bti kwe akwa munta nüne kuin ye köböire jatadi tödeke bti, ñobtä ñan angwane Ngöbö käikitarekä kwärä munta nüne kuin deme ni brare munkwe okwäbti, ye köböire jatadi tödeke Jesubti” (1 Ped. 3:1, 2). Erametre, meri muko ñaka kukwebätä yekwe ñaka ja töi mikadre kwin kräke aune ñaka rabadre tarere, akwa niarakwe muko kwe ye mikai ütiäte jai ye ngwane, muko kwe ye raba kukwe metre ye kain ngäbiti. Ye erere arato, ni kristiano muko kwe ñaka kukwebätä aune kukwe mikata täte kwe ye rüere rabadre ja mike akwa niara rabadre tarere (1 Ped. 3:7-9).

¹¹ Pedro kukwe niebare ye ütiäte krubäte nükanina gare nitre kristiano kwati ni näire ie. Ani blite Selma yebätä. Muko kwe, Steve, namani rubun krubäte niara jatani ja tötike nitre Testiko ben ye ngwane. Steve tä niere, niara “namani rubun, mokrere aune dre nuaindre kwe ye ñaka namani gare ie”. Selma tä niere: “Kukwe metre jämi gare tie, ye känenkri ñaka nämene nemen nuäre ti kräke nünankäre ben. Tikwe ñaka dre niedre o dre nuaindre okwäbiti, ñobätä ñan aune jötrö ngwarbe nämä nemen rubun. Ti jataba ja tötike Bibliabätä angwane bäri jataba rubun krubäte”. ¿Selma dre nuainbare ja tuakäre kukwe yebe?

¹² Ja ngwai nämene niara tötike Bibliabätä kukwe niebare ie ye namaninkä niara töite: “Bati ti ñan tö rababa ja tötikai. Köbö ye känenkri deu tikwe ñäkäba jai Steve ben, aune niara rababa rubun krubäte ti kräke yebätä ti rababa ulire aune ja rababa ruin käme tie. Tikwe kukwe ye jökrä nieba ti eteba ti tötikaka Bibliabätä yei, aune ti mikaba ñäke kwe 1 Corintios 13:4-7 yebätä. Tikwe nieba: ‘Steve ñaka ti tarere jire chi nieta nete ne erere’. Ti mikakäre töbike niara ngwantariba tie: ‘Aune mä, ¿mätä niara tarere nieta nete ne erere?’. Ñakare tikwe nieba ie, niara rubun krubäte yebätä ñaka nämä nemen nuäre ti kräke tikwe nieba ie. Töi kwinbiti niarakwe nieba tie: ‘Selma, ¿nireta ja tötike ja mikakäre kristiano? ¿Mä o Steve?’. Yete rükaba gare tie, tikwe ja töi kwitadre. Tikwe ja di käräba Jehovai ti muko tarekäre bäri. Bätärekä bätärekä, nun jataba nüne kwin jabe”. Kä rikaba kwäjätä biti kwä kükü ta angwane, Steve kukwe metre ye ka ngäbitiba.

NI ABOKÄN RABA DRE NUAINNE

13, 14. ¿Ño ni jökrä raba nitre kristiano tä nüne mräkätre ñaka kukwebätä ben ye dimike?

¹³ Ñü burei tä kä tibien mike niere ye köböire kri tä nire, ye erere ni itire itire konkrekasionte tä jondron kwin nuainne, ye köböire nitre tä nüne mräkätre ñaka Testiko ben yebätä kä raba nemen juto. Elvina nünanka Brasil, tä niere: “Ti mräkätre kukwebätä tä ti tarere ye köböire tita dite kukwe metre yebätä”.

 ¹⁴ Akwa nikwe nitre ñaka kukwebätä ye taredre aune jondron kwin nuaindre kräketre ye raba mate kwin niaratre yebätä. Ye erere namani bare ja mräkä nünanka Nigeria yebätä, muko kwe käkwe kukwe metre kani ngäbiti ye bitikäre kä nikani kwäjätä biti komä ta angwane, niarakwe kukwe metre ye kani ngäbiti. Niara tä niere: “Bati ti rikaba ni testiko Jehovakwe ben. Karo kwe rikaba ngwarbe, aune niara rikaba ni Testiko mada känene ja bäre kä yekänti. Nun gare mekerabe ietre ye kwrere nun kan ngäbitiba kwetre ja gwirete. ¡Ja tare ye arabätä ti muko nämä käre blite tibe!”. Meri kä Inglaterra yekänti, muko kwe ja mikani kukwebätä ye bitikäre kä nikani kwäjätä biti kwäkwä ta angwane, niarakwe ja mikani kukwebätä kätä niere: “Nitre Testiko nämä nun nübaire käre mröre. Niaratre nämä ti kain ngäbiti kwin krubäte”. Kä ye arabe känti kukwe ye erere namani bare ni mada brarebätä, abokän käkwe ja mikani Testiko muko kwe ye erere: “Ja mräkätre nämä nüke basare nunye aune nämä nun nübaire ja gwirete. Nun ütiäte kräketre bämikani kwetre nunye, metrere ti nämä hospital ye ngwane kwati janama ti tuin känti”. Erametre, ni jökrä raba jondron kwin nuainne ja mräkätre mräkä ñaka Testiko ye dimikakäre.

15, 16. Nitre kristiano mräkätre ñaka kukwebätä akwa, ¿raba nüne ño kä jutobiti?

¹⁵ Nikwe ngwandre törö jai, kä kwati krubäte te ni kristiano käkwe ja ngwandre kwin aune kukwe driedre mräkätre kwe ñaka kukwebätä yei töi kwinbiti, akwa ni muko, monso nikwe, ni rün, aune ni mräkätre jökrä ñaka raba ja mike kukwe metre yebätä. Ruäre ngwane ñaka törbai kukwe ye mikai gare jai o raba ja mike jankunu rüere (Mat. 10:35-37). Akwa, yebiti ta nikwe ja töi mikadre kwin kräketre ni kristiano erere. Ni brare käkwe ja mikani Testiko muko kwe ye bitikäre tä niere: “Nita ja töi mike kwin ni kristiano erere angwane, ye matai ño nitre muko ñaka kukwebätä ye töite aune brukwäte ye ñaka gare nie. Ni ñaka rabadre ja di ngwen nekä jire chi”.

¹⁶ Ne madakäre, ni mräkätre ñaka ja mike kukwe metre yebätä, akwa ni raba nüne kä jutobiti. Kä niena gre biti kwati ja ngwai iti tä blite muko kwe yebe Gobran Ngöbökwe yebätä, akwa niara ñaka kukwe ye kain ngäbiti. ¿Ja ruin ño ie? “Tita ja di ngwen Jehová mike metre täte aune ja mike dite ja üairebiti yebätä tita nüne kä jutobiti. Tita ja töi mike sribi Ngöbökwe nuainbätä, ñodre, tita ja tötike, näin gätäbätä, kukwe driere aune tita ti mräkätre kukwebätä ye dimike. Ye köböire tita ja brukwä ngübarebiti aune jata ruin bäri Jehová ken tie” (Pro. 4:23).

¡MÄKWE ÑAKA JA DI NGWAN NEKÄ!

17, 18. ¿Ni kristiano mräkätre ñaka Jehová mike täte akwa kä raba nemen juto ño bätätre?

¹⁷ Mätä Jehová mike metre täte, akwa mä mräkätre ñaka nuainne mäbe angwane, ñaka ja di ngwan nekä. ‘Jehová ñaka juta kwe ye tuainmetre, niara kä yebätäʼ ye mäkwe ngwan törö jai (1 Sam. 12:22). Mäkwe ja ketai niarabätä angwane niara täi käre mä ken (ñäkädre 2 Crónicas 15:2 yebätä). Biblia tä kukwe ne niere ye erere mäkwe nuain: ‘Mäkwe Jehová käi ngwan juto krubäte jabätä [...]. Mäkwe jondron jökrä mika Jehová kisete, aune mäkwe ja tuanmetre jie ngwandre ieʼ (Sal. 37:4, 5). Mäkwe orasion nuain käre aune dre dre rakaikä mäbätä akwa mä Rün kä kwinbiti käkwe mä dimikai näin ja käne yei mäkwe tödeka kwatibe (Rom. 12:12).

¹⁸ Mäkwe üai deme ye kärä Jehovai ja töi mikakäre nüne jäme ja gwirete (Heb. 12:14). Ja känenkäre kukwe Ngöbökwe ye raba mate mä mräkätre ye brukwäte. Mäkwe “jondron jökrä nuain Ngöbö käikitakakäre”, ye köböire kä rabai juto mäbätä aune mä töi täi jäme (1 Cor. 10:31, NM). Ja mräkätre kä jökräbiti tibien yekwe mä tare bätä niaratre tä mäbe ye mäkwe ñan käi kwitaka jabiti.

[Nota]

[Kukwe ngwantarita]

[Jondron üai bämikani página 28]

Mäkwe kä debe erere känä kukwe mikata täte mäkwe ye mikakäre gare

[Jondron üai bämikani página 29]

Nitre gure muko ñaka kukwebätä ye nikwe dimikadre