Kukwe käbämikani nie ye ani käi ngwen juto jabätä

“Ngöbö abrä ñan ni ngökö, käkwe ja nire [...] käre [...] käbämikani nie, kä ne jämi nüke känenkri” (TITO 1:2, NGT).

ANI NGWENTA TÖRÖ JAI

Nitre dianinkä nänkäre kä kwinbiti tä Ngöbö mike metre täte nememe tä krüte ye ngwane käita nemen juto krubäte kä kwinbiti, ¿ye ñokänti gare nie?

¿Jondron käbämikani ie obeja mada aune nitre braibe dianinkä nänkäre kä kwinbiti tä tö ngwen ye ja erebe?

¿Ni “ja ngwen kwin deme” aune “kukwe Ngöbökwe erere nuaindre” ye nuain raba ño, ne kwe jondron käbämikani ie tö ngwanta ye rabadre nikwe?

1. ¿Jehová tä jondron käbämike ie tö ngwanta ye raba ni dimike ño kä ngwen nüke jai kukwe tare yebätä?

APÓSTOL Pablo tikabare: “Ngöbö tödekakrä nikwe ye käkwe kä mika bäri nuäre munbtä amne mun mika nüne jäme kwe, munta tödeke bti ye ngwane. Erere arato, Ngöbökwe jändrän kuin nuendre mda munkrä, yebtä munkwe ja töi mika ngibiare bätäre Ngöbö Üai Deme di kri ye köböire” (Rom. 15:13). Kukwe käbämikani Jehovakwe ie nita tö ngwen angwane, ni töi rabai jäme aune kä rabai juto ni brukwäbätä, bätä ni rabai kä ngwen nüke jai kukwe tare yebätä. Ni dianinkä nänkäre kä kwinbätä o ñakare akwa Ngöbökwe jondron käbämikani nie ie nita tödeke ye abokän “jä doboko ye kwrere, [...] abko käta ni mike nünenkä dite jabtä” (Heb. 6:18, 19). Erametre, kukwe rabadre bare nibätä ye ngwane nikwe ja ketadrete kukwe käbämikani yebätä, ne kwe tö ngwan ñaka metre aune tödeka ñaka nikwe ye ñaka rabadre ni mike kämikekä Ngöböbätä (ñäkädre Hebreos 2:1 aune 6:11 yebätä).

2. Ni kristiano tä nüne kä krüte te, ¿ye tä tö ngwen jondron meden ketebu käbämikani ie aune jondron käbämikani nitre dianinkä nänkäre kä kwinbätä ie ye ñobätä ütiäte nitre obeja mada kräke?

² Nitre kristiano tä nüne kä krüte te, ye tä tö ngwen jondron ketebu käbämikani ie. Nitre “obeja braibe” dianinkä Ngöbökwe abokän täbe nüne Kä tibienbätä ye töita nänbätä kä kwinbiti, yete niaratre ñaka krütai jire aune sribidi gwaire kwetre Kristo ben Gobran kwe yete nitre reire bätä sacerdote kwrere (Luc. 12:32, NM; Apoc. 5:9, 10). Aune “nitre kwati” krubäte ye abokän “obeja mada”, tö nünain kärekäre Gobran Jesukwe Kä tibien kwitai bä nuäre yete (Apoc. 7:9, 10; Juan 10:16). Nitre obeja mada ye ñaka rabadre käi kwitekä jabiti, niaratre rabadre Kristo “mräkätre” ye dimike jankunu ne kwe rabadrete kwäre (Mat. 25:34-40). Jondron käbämikani ye rabai metre nitre dianinkä nänkäre kä kwinbätä yekwe aune ye erere rabai bare metre obeja mada ye kräke arato (ñäkädre Hebreos 11:39, 40 yebätä). Nitre dianinkä  nänkäre kä kwinbiti ie jondron käbämikani ye ani mika gare käne jai.

NITRE NÄIN KÄ KWINBITI TÄ TÖDEKE METRE JONDRON KÄBÄMIKANI YEI

3, 4. Nitre dianinkä nänkäre kä kwinbiti, ¿ye tä ño “därereta btin” aune jondron meden käbämikani ie tätre “tödeke kwatibe era metre”?

³ Apóstol Pedro tärä tikani ketebu nitre kristiano nänkä kä kwinbiti yei, niaratre kädekani kwe nitre “dianinkä” (1 Ped. 1:1). Yete jondron kwin tä obeja braibe kräke mikani gare ruäre kwe. Ñodre, tärä kena yebätä tikabare kwe: “Ari Ngöbö käikitekä. Niara abko ni Dänkien Jesukristo Rün. Jesukristo krütani, akwa Ngöbökwe mikaninta nire, ye köböire ni mikaninta därereta btin bobuta kwe, ñobtä ñan angwane niarakwe ni ngwiani ruentari tare kri jae. Ne aisete nikwe nünandi kärekäre [...], yebti ni raba tödeke kwatibe era metre. Amne jändrän kuin niken ngwarbe ñakare, jübente ñakare amne bä nikwite ñakare tä ükani Ngöbökwe kä käinbti nikrä, ye abko biandi kwe munye. Erere arato, munta tödeke Ngöböbti, ye köböire abko Ngöböta mun ngibiare ja di kribti, yebti [...] mun rabadi dianintari ünän täte. Ye abko [...] rabadi mikani gare kä mrä [...]. Yebtä käta nebe bäri nuäre munbtä” (1 Ped. 1:3-6).

⁴ Jehová nitre kristiano dianinkä gobrankäre Kristobe kä kwinbiti, ye tä “därereta btin”. Niaratre diankata üai deme yebiti aune tä nemen monso Jehovakwe rabakäre reire aune sacerdotere Kristobe (Apoc. 20:6). Pedro tä mike gare ye erere, niaratre tä “därereta btin” ye köböire tä “tödeke kwatibe era metre” jondron käbämikani yei, aune “jändrän kuin niken ngwarbe ñakare, jübente ñakare amne bä nikwite ñakare” tä niaratre kräke “kä käinbti”. ¡Yebätä, “käta nebe bäri nuäre” niaratrebätä! Akwa, jondron käbämikani ietre ye rabadre kwetre gäre rabadre Ngöbö mike metre täte.

5, 6. ¿Ñobätä nitre dianinkä nänkäre kä kwinbiti ye rabadre ja di ngwen ne kwe “käräbarera [...] amne [...] dianinkära” ye rabadre kwetre?

⁵ Pedro tärä tikabare ketebukäre yete mäträbare kwe nitre dianinkä nänkäre kä kwinbiti yebätä: “Ngöbökwe mun käräbarera jakrä amne mun dianinkära jenena jakrä [...] ye jiebti mun rankwa kisere janknu” (2 Ped. 1:10). Niaratre rabadre ja di ngwen ja ngwankäre kwin ni kristiano erere, ñodre rabadre tödeke, ja tarere, Ngöbö mike metre täte aune ja mräkätre kukwebätä tarere. Pedro mikani gare: “Munkwe nünandre kore bäri mda köbö kwatirekwatire, ye ngwane [...] munkwe jändrän kuin nuendi amne munkwe ñan nünandre ngwarbe” (ñäkädre 2 Pedro 1:5-8 yebätä).

⁶ Kristo ganinkröta käkwe kukwe ne juani nitre dianinkä nänkäre kä kwinbiti nämene konkrekasion Filadelfia (Asia Menor) yekänti ie: “Munkwe nünandrekä dite jabtä, tikwe nieba, erere munkwe mikani täte jökrä. Ye mden kisete, Ngöbökwe kukwe juandi kri ni jökrä kä nebtä nünanka Ngöbö rüere ye rüere, [...] akwa mun abko käkwe ti kukwei mikani täte abko ütiäre tikwe mun ngibiadi ja tare nika ye ngäniene. Ti abko jatadita jötrö ngwarbe, aisete munta nüne metre ti ngwärekri, [...] korona [...], ye ni mda mda käkwe ñan diandrekäta munkän, abkokäre munkwe ja ngibia janknu” (Apoc. 3:10, 11). Ni kristiano dianinkä nänkäre kä kwinbiti yekwe ñaka Ngöbö mikadre metre täte angwane, ¿dre raba nemen barebätä? “Korona [...] ñan rikadi ngwarbe jire chi” ye ñaka raba nemen kwe, ñobätä ñan aune nitre dianinkä nänkäre kä kwinbiti Ngöbö mikaka metre täte nememe krüte, ye aibe ie jondron ne käbämikani (1 Ped. 5:4; Apoc. 2:10).

KÄ NÄNKÄRE GOBRAN NGÖBÖKWE YETE

7. ¿Kukwe meden kwin käbämikani abokän Judas niebare tärä tikabare kwe yebätä?

⁷ Kä 65 ye näire, Judas —Jesús etebakrä— tärä tikabare keteiti nitre “käräbarera”, o nitre dianinkä nänkäre kä kwinbiti yei (Jud. 1; aune Hebreos 3:1 mikadre ñärärä). Niara töi nämene metrere blitai nitre dianinkä nänkäre kä kwinbiti mikai kwäre käbämikani yebätä, kukwe käbämikani ye nitre dianinkä Gobrankäre kä kwinbiti  kräke (Jud. 3). Niarakwe kukwe mada bäri ütiäte tikabare braibe, akwa kukwe tikabare mrä kwe yekänti kukwe kwin käbämikani ne mikani gare kwe: “Niara abrä dite mun ketadekrä, abokän kwe mun ñan tärä gitiakäntikä, angwane niara raba mun mike ja bä nuäre ngwärekri; ngite tibie ñakare rabadre munbätä, aune kä rabadre nuäre munbätä. Niara abrä Ngöbö itibe aune töbätä; ni Mikaka kwäre. Ja bä ngrabe, ja kri, ja di, aune ja dite kri rabadre niarakwe ne ngwane, angwane käre” (Jud. 24, 25, NGT).

8. Judas 24 tä niere ye erere, nitre dianinkä nänkäre kä kwinbiti tä ja ngwen metre nememe tä krüte ngwane käita nemen juto krubäte kä kwinbiti, ¿ye ñokänti gare nie?

⁸ Nitre dianinkä nänkäre kä kwinbiti ye itire itere tä ja di ngwen Ngöbö mike metre täte aune tä ja ngübarebiti ja mika ngite yebätä ne kwe niaratre ñaka gadrete. Kukwe käbämikani tä Bibliabätä ie niaratre tä tö ngwen, ye abokän Jesukwe gadrekröta ni üaire metre kwrere aune rabai metre Ngöbö ngwärekri ye käi rabai juto bätätre. Ni dianinkä nänkäre kä kwinbiti ye tä Ngöbö mike metre täte nememe tä krüte angwane, gakröta “ni ngätä niken ngwarbe ñakare jire chi” kwrere, “mikata nire [...] bä nuäre ngrabare” aune “ngrabare kä käinbtikri [üaire] bian[ta]” ie (1 Cor. 15:42-44). ¿Kukwe ye tä mate ño nitre mada üaire yebätä? Ani töbike kukwe nebätä: “ni iti kukwe kämekäme nuenkä [...] käta ja töi kwite”, ye ngwane kätä nemen juto krubäte angeletre kä kwinbiti yebätä, ¡ye erere, Kristo mräkätre üaire tä Ngöbö mike metre täte nememe tä krüte angwane, käita nemen juto krubäte! (Luc. 15:7). Nitre dianinkä nänkäre kä kwinbiti tä niken kä kwinbiti ye ngwane kätä nemen “nuäre” krubäte Jehová aune angeletre yebätä kä kwinbiti (ñäkädre 1 Juan 3:2 yebätä).

9. ¿Nitre dianinkä nänkäre kä kwinbiti yei “Ngöbökwe kä mikaite” ño Gobrankäre aune niaratre mräkä täbe nüne Kä tibienbätä, yebätä kukwe ye tä mate ño?

⁹ Nitre dianinkä nänkäre kä kwinbiti tä ja ngwen metre yebätä dre rabai bare ye Pedro mikani gare arato: “Ngöbökwe kä mikaite [...] nänkrä ta mun ie kä Gobran kri Jesukwe te. Jesu ne abrä Ji dokwäte kri nikwe, aune ni Mikaka kwäre” (2 Ped. 1:10, 11). ¿“Ngöbökwe kä mikaite” ño niaratre ie nänkäre kä kwinbiti? Kukwe ne tä mike gare, niaratre yei kä mikaite nänkäre kä kwinbiti ye rabai ütiäte krubäte, ñobätä ñan aune niaratre töi kwin krubäte ni kristiano  erere ye bämikai kwetre. Arato, nire nire kwe ja nire käre rabai ye kräke Ngöbökwe kukwe kwin keta kabre nuaindi. Niaratre ja ngwani metre Ngöböi kä jutobiti aune debe biankäre Ngöböi yebätä rabai töbiketa. Erametre, Ngöbökwe jondron käbämikani ne tä nitre dianinkä nänkäre kä kwinbiti ye töi mike “töbik[e] kuin ja käne” sribi nuainkäre tätre nüne Kä tibienbätä ye ngwane (1 Ped. 1:13).

JONDRON KWIN KÄBÄMIKANI OBEJA MADA YEI

10, 11. a) ¿Kukwe meden käbämikani abokän ie obeja mada tä tö ngwen? b) ¿Kristo köböire nitre kä tibienbätä kräke kukwe käbämikani rabai bare aune “Ngöbö monsoitre mikadi gare” ye ja erebe?

¹⁰ Apóstol Pablo tikani, “Ngöbö monsoitre” dianinkä Ngöbökwe ja kräke üai demebiti, abokän kwe “jondron kwin rabai gwaire [...] Kristobe”. Akwa obeja mada kwati ye kräke jondron kwin krubäte tä Jehovakwe niebare kwe arato: “Ngöbö monsoitre mikadi gare ye abokän ni [kä tibienbätä] sribebare ye tä ngübare krubäte. Ni sribebare ye mikani ñaka ütiäte, ñan niaratre tö namani ie ye ererebätä, ñakare aune niarakwe mikani ñaka ütiäte, kukwe käbämikani ie tö ngwanta ye ererebätä nuainbare kwe, ni sribebare tä klabore kukwe käme kisete yebätä mikadi kwäre aune Ngöbö monsoitre yekwe mikadi kwäre” (Rom 8:14-21, NM).

¹¹ ‘Monso’ käkwe ni kä nebätä mikai kwäre Satana “kulebra kira” yebätä käbämikani Jehovakwe ye ngwane, ni kä nebätä namani tö ngwen “kukwe käbämikani [...] ye ererebätä” (Gén. 3:15; Apoc. 12:9). ‘Monso’ ye metrere Jesukristo (Gál. 3:16). Niara krütani aune ganinkröta ye köböire ni kä tibienbätä diaintari ngite aune gata yebätä ie tö ngwanta. Jondron käbämikani rabai bare ne köböire “Ngöbö monsoitre mikadi gare”. ¿Ñongwane ne “mikadi gare”? Nitre dianinkä nänkäre kä kwinbiti —“Ngöbö monsoitre” ketebukäre— gaikröta yekwe Kristobe nitre gobrainta Satanakwe gaite ye ngwane rabai bare (Apoc. 2:26, 27). Kukwe rabai bare ne köböire obeja mada ye rabai kwäre aune kukwe tare krubäte rabai bare yete niaratre rabaite nire (Apoc. 7:9, 10, 14).

12. ¿“Ngöbö monsoitre mikadi gare” ye köböire kukwe meden kwin nuaindi ni kä tibienbätä kräke?

¹² Kristo Gobrandi Kä Mil krati ye ngwane, ni kä tibienbätä “sribebare” yei ja rabadi ruin kwin krubäte. Kä ye näire “Ngöbö monsoitre mikadi gare” ye rabai bare, ye abokän: niaratre rabai sribire Kristo ben sacerdotere ye ngwane, kukwe kwin nuaindi kwetre ni kä tibienbätä kräke Jesús ja nire biani ni kökatarikäre ye köböire. Gobran kä kwinbiti köböire, ni kä tibienbätä Ngöbö mikaka täte ye ñaka rabaira ja mike ngite aune krüte. Bätärekä ja täri niaratre “tä klabore kukwe käme kisete yebätä” mikadi kwäre. Kä mil krati yete niaratre ja ngwain metre Jehovai bätä kä ngwain nüke kwetre jai kukwe tare yebätä angwane, niaratre kä rabai tikani kärekäre “tärä [...] ja nirekrä” yebätä aune “Ngöbö monsoitre yekwe mikadi kwäre” (Apoc. 20:7, 8, 11, 12). ¡Kukwe kwin krubäte käbämikani ie tö ngwanta!

KUKWE KÄBÄMIKANI YEI NIKWE TÖ NGWANDRE METRE

13. ¿Dre köböire nita tö ngwen jondron käbämikani yei aune ñongwane “Jesukristo ja mikai gare”?

¹³ Pedro tärä tikani ketebu Ngöbö diebiti ye tä nitre dianinkä nänkäre kä kwinbiti aune obeja mada ye dimike krubäte tö ngwen metre jondron käbämikani yei. Pedro mikani gare jondron ne ñan tä nemen ja töbiti nikwe, ñakare aune jondron kwin ñaka nuain bä ni kräke Jehová tä nuainne ni kräke, ye köböire tä nikwe: “Munkwe ja töi mika dite sribikäre, munkwe ja töi mika kwin jankunu; kukwe kwin ñaka nuain bä ni kräke akwa nuaindi ni kräke yei munkwe tö ngwan kwatibe Jesukristo ja mikai gare ye ngwane” (1 Ped. 1:13). ¿Ñongwane “Jesukristo ja mikai gare”? Ja mikai tuadre kwe ye ngwane jondron kwin nuaindi kwe nitre ja tötikaka metre niarabe ye kräke aune Jehová diebiti nitre käme gaite kwe (ñäkädre 2 Tesalonicenses 1:6-10 yebätä).

14, 15. a) ¿Nikwe dre nuaindre ne kwe jondron käbämikani yei nikwe tö ngwandre metre? b) ¿Pedro mäträbare ye ngwane dre niebare kwe?

¹⁴ Jondron käbämikani yei tö ngwandre metre gäre, nikwe ja ngwandre mokre “ni Dänkien  [Jehová] köböi” rükai yebätä. “Köbö” ye näire “kä käinta” aune “kä temen” gaite, ye abokän gobrantre kä nebätä aune nitre kukwe käme nuainkä ye gaite “jändrän” käme yebe gwaire. Yebätä Pedro niebare: “Munkwe nünandre bäri deme ni Dänkien aibe kräke, käkwe Ngöbö [Jehová] köböi ngibia ngäbti kisere [...]. Köbö ye näire kä käinta se rukwadi jökrä [...] amne jändrän jökrä bti Ngöbökwe kä temen ne dätebare abko güdadite jökrä” (2 Ped. 3:10-12).

¹⁵ Pedro mikani gare, “kä käinta” aune “kä temen” kä nengwane ye kwitai “kä käinta mrä [gobran Kristokwe] aune kä temen mrä [nitre kä tibienbätä kukwe kwin nuainkä]” yebe (2 Ped. 3:13). Ye bitikäre, kä mrä käbämikani ie tö ngwanta yebätä blitabare kwe ye ngwane, niebare kwe: “Ti mräkätre tare tikwe, kukwe rakadikä jökrä kore, ye ngibiare ngäbti kisere kwärä munkwe nüna deme amne munkwe ñan ja mika ngite amne munkwe nüna jäme” (2 Ped. 3:14).

NIKWE NÜNANDRE KUKWE KÄBÄMIKANI NIE YE EREREBÄTÄ

16, 17. a) ¿Ni “ja ngwen kwin deme” aune “kukwe Ngöbökwe erere nuaindre” ye nuain raba ño? b) ¿Dre nuaindre ne kwe jondron käbämikani ie tö ngwanta ye rabadre nikwe?

¹⁶ Nikwe tö ngwandre kwatibe jondron käbämikani yei aune nikwe nünandre ye ererebätä. Pedro niebare ye erere, nita ño kukwe ja üairebiti yebätä nikwe töbikadretari. ¿Ye abokän dre gärätä? Kena, ni “ja ngwen kwin deme” rabadre gare, ye abokän nikwe ja mika gure yebiti ja ngwandre metre aune jondron kwin nuaindre “nitre ie Ngöbö gare ñakare, ye okwäbti” (2 Ped. 3:11; 1 Ped. 2:12). Utiäte krubäte nikwe ja taredre kwärikwäri arato, ye abokän ja di ngwandre ja mäke kwin ja mräkätre kä jökräbiti tibien ben aune konkrekasionte (Juan 13:35). Arato, nikwe “kukwe Ngöbökwe erere nuaindre”: ye abokän, kukwe kwin nuaindre rökrakäre bäri Jehová ken, ñodre, oradre ja brukwä tätebiti, ñäkädre Bibliabätä mantre jetebe, köbö ükadrete jai ja tötikakäre, Ngöbö mikadre täte gwairebe ni mräkäbe aune “kukwe Ngöbö gobrainbätä” driedre kä jutobiti (Mat. 24:14, NGT).

¹⁷ Nitre käme gaite ye ngwane, Jehovakwe nitre kai ngäbiti aune mikai kwäre kwe ye erere ni jökrä tö ja tuai. Ye erere nikwe ja ngwandi angwane, “Ngöbö abrä ñan ni ngökö, käkwe ja nire [...] käre [...] käbämikani nie, kä ne jämi nüke känenkri”, ye nikwe tuai nemen bare (Tito 1:2, NGT).

[Kukwe ngwantarita]

[Jondron üai bämikani página 22]

Nitre kristiano dianinkä nänkäre kä kwinbiti, ye tä “därereta btin” aune jondron käbämikani yei tätre “tödeke kwatibe”

[Jondron üai bämikani página 24]

Nikwe ni mräkä di mikadre tö ngwen kwatibe jondron käbämikani yei