“¿Mä raba nun bä denkä?”

Gätä kri köböbu ye bitikäre, Josué, sribikä Betel México, ye nikani basare nitre Testiko mada ben juta Querétaro yekänti. Javier bätä Maru, niaratre gure, nünanka Colombia nämene basare, yekwe ja bä dianka mananbare ietre. Josué aune ja ketamuko kwe nämene ja ngwä kitani kwin aune nämene solapa ngwen jabätä, ye medenbätä nitre gure käkwe ngwanintari ietre, niaratre ngedianinkä kwelate o köbö ütiäte te nämene. Josué mikani gare ietre, niaratre nämene gätä kri nitre testiko Jehovakwe yebätä aune niaratre nübaibare kwe gätä dominkote yebätä.

Nitre gure yei ja ñaka rabai ruin kwin kä yekänti niebare kwe, ñobätä ñan aune niaratre ñaka nämene dän kwin ngwen jai. Akwa yebiti ta, Josué ja kä biani ietre aune número teléfono Betel yekänti biani kwe ietre.

Sö nikani kräbokä ta angwane, Javier bätä Maru —nämene nüne juta México yete— käkwe ñäkäbare teléfono yete Josué ie, niaratre janamane gätä kri yebätä ye mikakäre gare ie. Aune niaratre tö namani nitre Testiko tuai ja tuinbiti. Jötrö ngwarbe niaratre tötikani Bibliabätä, aune jatani nemen gätäbätä. Sö nikani kräjätä ta angwane kädekani kukwe driekä. Ye bitikäre, niaratre nikani nüne Toronto (Canadá), kä yekänti niaratre namani jankunu ja tötike aune ja ngökani ñöte kwetre.

Ye bitikäre kä nikani raire ta angwane, Javier tärä tikani Josué ie, känti mikani gare kwe ñobätä niarakwe ja töi mikani kukwe metre ye kain ngäbiti. Niarakwe tikabare: “Gätä kri ye känenkri, ti muko aune ti, nun nämä ni ribere jai ja dimikakäre kukwe ja üaire yebiti. Mun nämä ja ngwä kitani kwin krubäte, aisete gätäbätä mun janamane ye gätä kwin krubäte rababa ruin nunye. Gätä kri yete nun töi rababa ñan krütare, ñobätä ñan aune nitre ja ükaninkrö ye jökrä ja ngwen kwin aune nun dimikaba kwetre täkärä känene bätä texto känene Bibliabätä. Nitre kä mada känti tä nüke basare kätä ja ngwäkite ye kwrere nun nämä ja ngwä kitani akwa yebätä niaratre ñan ja töi mikaba blo.”

Rei Salomón kukwe niebare ne namani bare metre Josué kräke: “Mäkwe nura nöka dekä aune nememe dere, ñaka ja kise mika nemen kwekebe; medente ririai kwin ye ñaka gare mäi, nete o sete o kä ketebu yekänti raba nirien” (Ecl. 11:6). Mäkwe ni mada nübaidi gätä kri nuain ja känenkäre ye kräke o kukwe kädriei ni jökrä kräke gätäte yebätä angwane, mäkwe nura ja üaire ye nökai arato. Jehová raba ni denkä nitre mada tö kukwe ja üaire mikai gare jai, ñodre Javier aune Maru ye erere dimikakäre (Isa. 55:1).

[Jondron üai bämikani página 32]

Kise ngebere yekri nememe kise ruinkri: Alejandro Voeguelin, Maru Pineda, Alejandro Pineda, Javier Pineda bätä Josué Ramírez sukursal México yekänti.