¿Mätä mäträre ño ni madabätä?

¿Nitre tärä ja di kärere mäi kukwe ruärebätä? Ruäre ngwane kukwe ne erere ngwantari tärä mäi: “¿Tikwe dre nuaindre?”, “¿Ti raba niken bieta yebätä?”, “¿Ti raba ja tötike kukwe ne kräke?”, “¿Ti raba kä kite jai blitakäre ni yebe?”.

Ruäre ngwane, ni mada raba töi kwinbiti ja di kärere mäi ne kwe mäkwe dimikadre kukwe ruäre nuainne, kukwe ye abokän raba mate kwin o blo ja ketamuko kwe yebätä, mräkätre kwe o Jehová yebätä. ¿Drebiti mäkwe kukwe ye mikai gare ie? ¿Mätä mäträre ni madabätä ye ngwane mätä dre nuainne? Kukwe ye ütiäte o ñakare akwa, Proverbios 15:28 tä niere: ‘Ni kukwe kwin nuainkä ye tä töbike kwin ja brukwäte blitakäre’. Kukwe ketarike nieta Bibliabätä ni jie ngwankäre abokän raba ni dimike mäträkäre ni madabätä ye ani mike gare jai.

1 Dre nakainkä metrere ye mäkwe mika gare jai.

“Ni ruäre jämi ni mada kukwe nuin känenkri tä blite ye ngwane, ni ye töi ñakare aune kukwe ye tä mike ja gaire” (PRO. 18:13).

Nitre tä ja di kärere nie ye ngwane nikwe töbikadre kukwe meden tä nakainkäbätä aune töita ño ye nikwe mikadre gare jai, ne kwe kukwe kwin erere niedre ietre. Ani bämike: ni mada käkwe ñäkädre telefonote mäi, ji meden bäri metre nänkäre mä gwirete ye ngwantarikäre mäi. ¿Mäkwe dre mikadre gare jai dimikakäre? ¿Ni ye tädre medente ñaka gare mäi angwane mä raba ji meden metre ye mike gare ie? Ñakare. Ye erere arato, nikwe mäträdre kwin ni madabätä, yekäre “niara tädre medente” ye abokän, kukwe meden tä kisete aune töita ño ye nikwe mikadre gare käne jai. ¿Kukwe ruäre abokän raba ni mike kukwe niere bä jene? Dre tä nakainkä ye ñaka gare kwin nie angwane, nikwe mäträdre ni madabätä ye ngwane ni raba töi gainte bäri (Luc. 6:39).

Kukwe ketabe känänbarera ni yekwe mäkwe mika gare jai. Nikwe kukwe ngwandretari ni ja di käräkä nie yei ye kwin krubäte, ñodre: “¿Kukwe meden nieta Bibliabätä ni jie ngwankäre abokän raba mä dimike kukwe nebätä raba ruin mäi?”, “¿Mä töita dre dre nuainbätä ye meden raba mä dimike o meden ñaka raba mä dimike raba ruin mäi?”, “¿Kukwe ketabe mäkwe känänbarera?”, “¿Nitre umbre konkrekasionte, mä rün aune mä meye o ja mräkä ja tötikaka Bibliabätä mäbe aune nitre mada ye käkwe mä dimikanina ño?”.

Kukwe niedre kwe mäi yebiti, ja di ngwanina nuäi kwe kukwe ye ükete, o ni mada käkwe dimikanina ño ye rabai gare mäi. Ne madakäre, niara tö kukwe meden kukwe nuai ye erere niedre ie yekäre tä kukwe ngwentari ye rükai gare mäi arato (2 Tim. 4:3).

  2 Mäkwe ñaka kukwe mika gare jötrö ngwarbe.

“Ni jökrä käkwe ja mikadre juto jötrö ngwarbe ni kukwe nuara; akwa ni jökrä käkwe ñakare ja kada mikadre juto blitakäre jötrö ngwarbe” (SANT. 1:19, NGT).

Ni töta nemen kukwe niei töi kwinbiti, akwa nikwe ñaka kukwe mikadre gare jötrö ngwarbe, metre ni jämi kukwe ye känene kwin ye ngwane. Proverbios 29:20 tä niere: “¿Mä tärä ni mada tuin blite drekebe ngwarbe okwä kware? Ni töi ñaka ye täi bäri kwin ni ye kräke”.

Mäkwe kä dianka jai töbikakäre kwin ne kwe Ngöbö töita ño ye erere mäkwe ja töi mika arato. Mäkwe ngwantari jai: “¿‘Üai kä nebätä’ aune nitre kä nebätä töita ño ye erere ti töita nemen mäträkäre?” (1 Cor. 2:12, 13). Ni töta nemen kukwe niei töi kwinbiti ye ñan aibe ngörä mäkwe ngwan törö jai. Kukwe tare rakaikä Jesubätä ye kräke juani ye namani gare apóstol Pedro ie angwane, niebare kwe ie: “¡Ti Dänkien, Ngöbö se okwäbti kukwe kore ñan rakadrekä jire chi mabtä näre!”. Pedro ja ngwani ño ye tä mike gare nie ni ruäre töbätä tä blite bökän, akwa ñaka töbike kwin kukwe niekäre angwane, ñaka raba ja töi mike ‘Ngöbö töiʼ ye erere, ñakare aune raba ja töi mike ‘ni kä nebätäʼ töi ye erere (Mat. 16:21-23). ¡Töbikadre käne blitakäre ye ütiäte krubäte! Ngöbö bäri töbätä kri aune ni abokän töi braibe ye nikwe ñaka käikwitadrekä jabiti (Job 38:1-4; Pro. 11:2).

3 Kukwe Ngöbökwe tä dre niere ye erere mäkwe nie töi bobrebiti.

“Tita jändrän nuene ñakare ja töi jenbti, akwa ti Rün käkwe dre diribare tie, ye erere tita nuene” (JUAN 8:28).

¿Ni kukwe ngwantarikä mäi yei mäkwe niedi: “Ti mä akräke...”? Ruäre ngwane, kukwe ye nuäre ükadrete rabadre tuin nie, akwa nikwe ja töi mikadre bobre aune töbikadre kwin Jesukwe nuainbare ye erere. Niara bäri töbätä aune kukwe nämene gare bäri krubäte ie ni mada ye jökräbiti ta; akwa niebare kwe: “Tita blite, ye abko ñan tita niere ja töi jenbti, akwa ti Rün tikwe käkwe ti juani ye abko tä dre niemna tie abko erere tita dirire munye” (Juan 12:49, 50). Jesús Rün töi nämene ño ye ererebätä nämene käre ni mada tötike aune mäträrebätä.

Ñodre, Lucas 22:49 yekänti mikata gare niara mika köböra ngite ye känenkri, nitre ja tötikaka kwe raba ja mete niara dokwäre kriemikakäre ye ngwanintari kwetre ie. Ni ja tötikaka iti kwe käkwe ngitra diani ja metakäre. Kukwe ye erere mikata gare Mateo 26:52-54 yekänti, kukwe ñaka nuäre namani Jesús kisete akwa yebiti ta, niarakwe kä dianinkä jai blitakäre Jehová töi nämene ño ye mikakäre gare nitre ja tötikaka kwe yei. Kukwe nieta Bibliabätä ja jie ngwankäre tä Génesis 9:6 aune kukwe rabai bare niebare Ngöbökwe Salmo 22 bätä Isaías 53 ye nämene gare Jesús ie. Ye medenbätä niarakwe mäträbare kwin ni madabätä ye köböire niaratre namanintre kwäre aune ye matani kwin Jehovabätä.

  4 Tärä keta kabre tä Jehová kukwei mike gare yebätä mäkwe ja tötika.

“¿Nire sribikä kwin metre angwane tö tärä, ye meden dre ni Ji dokwäte, käkwe mikadrete ja täte krare nitre sribi muko kwe yebiti, abokän kwe mrö biandre kwetadre nitre ye ie gäre?” (MAT. 24:45, NGT).

Jesukwe nitre sribikä kwin metre ye kädekani mrö ja üaire ribeta nikwe ye biankäre nie. Mäkwe mäträdre ni madabätä aune jie ngwandre kukwe ütiätebätä ye ngwane, ¿mätä kä denkä jai ja tötikakäre kwin tärä keta kabre tä kukwe Bibliabätä mike gare yebätä?

Índice de las publicaciones Watch Tower aune Watchtower Library * ye tä kukwe keta kabre mike gare merebe nie aune ye abokän raba kwen nuäre nie. Nikwe ñaka ja tötikadrebätä angwane nita kukwe ütiäte krubäte juen ja bäre. Kukwe keta kabre krubäte aune jene jene mikata gare yebiti ni raba nitre tä ja di ribere ye dimike. ¿Ni mada dimika gare mäi kukwe nieta Bibliabätä ni jie ngwankäre ye känene aune blite metre ben Kukwe Ngöbökwe yebätä? Nita nünaninkä medente aune ji meden raba niken ni ngwena metre ni tö näin yekänti, ye mapa raba ni dimike mike gare jai. Ye erere arato, nita nünaninkä medente aune ji metre näin ni ngwena ja nire kokwäre yebiti nikwe nändre ño jankunu ye tärä keta kabre tä ni dimike mike gare jai.

Nitre umbre kwati ji ngwanka konkrekasionte käkwe ja mräkätre kukwe driekä ye dimikanina kukwe känene Índice o Watchtower Library yebiti, aune dimikanina kwetre kukwe Bibliabätä ye erere nuainne. Ye erere, ja mräkätre tö kukwe mikai gare jai tä kukwe ye känene aune tä nemen gare ietre, bätä töta nemen kukwe känäin käre ja tötikakäre aune tö ngwen Jehovai jondron kwin ja üaire yebätä. Ye köböire, “dre dre kuin amne dre dre käme Ngöbö ngwärekri, yebtä ja töitikanina kabre kwetre, aisete tärä nebe gare ietre” (Heb. 5:14).

5 Mäkwe ñaka töbika nitre mada kräke.

“Ni itire itire käkwe töbikadre tribe jen kwe ngwianbtä” (GÁL. 6:5).

Ni itire itire käkwe kukwe meden nuain ye tä gare mrä ie. Jehovakwe ni töi mikani jondron nuainne ja töi jeñebiti yebätä kukwe nieta kwe Bibliabätä ni jie ngwankäre ye nikwe mikai täte o ñakare ye tä gare ni itire itire ie (Deu. 30:19, 20). Kukwe ruäre känti kukwe keta kabre tä Bibliabätä ni jie ngwankäre, akwa ni itire itire käkwe dre nuaindre ye tä gare ie. Kukwe meden ngwandretari mäi o ni ja di käräkä mäi yebiti kä kwäbe, mä raba ngwentari jai: “¿Erametre kukwe ne ükadrete ño ye tä gare tie? Kukwe ruäre mikadrete nitre umbre konkrekasionte ye kisete, o ni ja di käräkä ye monsore angwane, mikadrete rün aune meye kwe ye kisete.

[Nota]

[Jondron üai bämikani aune recuadro página 8]

Kukwe känändre Ja tötikakäre ni Mräkätre yebe

Kukwe meden ngwanintari bitinkä nie ye känändre ja tötikakäre ye kwin krubäte. ¿Ni mada tä kukwe ngwentari ye mikakäre gare ie mä raba kukwe jene jene aune kukwe nieta Bibliabätä ni jie ngwankäre ye känene niara dimikakäre? Ñodre, ja mräkä o ja ngwai tö ja mäkäite ni iti ben, yebe niara raba kä kite jai blitakäre ngwandretari kwe mäi. Käne mä raba kukwe ye känene Índice o Watchtower Library yete, kukwe “Concertar citas” o “Matrimonio” kädrieta yekänti, aune kukwe ütiäte känändre tärä mada yebätä arato. Mätä kukwe meden känene metrere yekänti, “Véase también” nieta angwane mäkwe mika ñärärä, ñobätä ñan aune ye raba mä dimike kukwe ye känene bäri kwin.

[Recuadro página 9]

Jehová tä ni dimike juta kwe yebiti, ye köböire ni raba mäträre kwin ni madabätä aune ni dimika raba arato. Eclesiastés 12:11 tä mike gare: “Nitre töbätä tä kukwe niere ye abokän krimana tu grine ye kwrere, aune klabo metata dime krite ye kwrere nitre töbätä kätä ja töi mike kwatibe ja tötike kukwe keta kabrebätä; ni itibe obeja ngübaka käkwe kukwe ye biani”. “Krimana tu grine” abokänbiti nibi däkäte nämene ne kwe nändre ja käne kwe, ye kwrere nitre töi bökän yei kukwe metre nieta aune töi kwinbiti kukwe nieta ietre, ye abokän tä jie ngwen nänkäre ji metre yebiti. “Klabo metata dime krite” yebiti tä neketete dime jabätä. Ye erere arato, mäträdre kwin ni madabätä ye raba mike dite. Nitre töbätä ye abokän “kätä ja töi mike kwatibe” ja tötike kä jutobiti “kukwe keta kabrebätä” ye abokän Jehová “ni itibe obeja ngübaka” kukwei ye gärätä.

Jehová ni obeja ngübaka tä kukwe niere ye erere nikwe niedre mäträkäre. Ni mada mäträdre nibätä ye nikwe kukwe nuadre kwin aune ni raba nuainne angwane, nikwe kukwe kwin niedre mäträkäre ni madabätä ye ütiäte krubäte arato. Kukwe nieta Bibliabätä ni jie ngwankäre ye erere nikwe mikai gare angwane, ni täi kukwe metre niere aune ye köböire kukwe kwin rabai bare kärekäre ni ni kukwe nuaka ye kräke.