Kukwe kwe mikata gare

¡Nire tä “käre mä ken” ye kwin krubäte!

Lois Didur tä mike gare

Ruäre ngwane nita kukwe den ja käne ye bitikäre ni töta nemen tuainmetreta. Ti abokän tä sribire Jehová kräke kä gre ketebu biti kwäjätä köbö täte aune tikwe kukwe keta kabre diani ja käne rabakäre niara ken yebätä ja ñaka ruin ulire tie. Ñobätä tita ye niere ye ti bike mike gare munye.

TI DÄREBARE kä 1939 ye ngwane aune kä Saskatchewan (Canadá) yekänti ti ririabare ti eteba nibäkä aune ti ngwai iti yebe. Jondron ngüba nämene ti rünkwe yekänti nun nämene nüne kä jutobiti. Bati, nitre testiko Jehovakwe rükaba ti rün känti ye ngwane tikwe kukwe ngwantariba ietre Ngöbö kä yebätä. Salmo 83:18 yekänti Ngöbö kädekata ño mikaba gare nunye ye ngwane, ti törbaba ja kitai bäri Ngöbö aune Kukwe kwe yebätä.

Kä ye ngwane, monsotre nünanka kä yekänti nämene niken kwelate salón keteitibe te nememe kä nämene nemen 13 biti ye ngwane. Yebätä, monsotre nämene kite mente mädäbiti o gürere. Nitre nünanka yete nämene ni dirikä dimike. Bati, dirikä kädeka nämene John Didur rükaba kä yekänti, aune ti rünkwe ka ngäbitiba ja gwirete.

Monso bati ye töi nämene Ngöbö Kukwei yebätä, ye ñan nämene gare tie. Jondron nikwe o ngwian nikwe ye biandre nitre jökrä ie yebätä gobrantre nämene kukwe ükete ye nämene tuin kwin ti rün ie, aune bati ti nämä blite kwin kukwe yebätä ye ngwane töi jämebiti John nieba tie: “Ni kä tibienbätä ñan raba ni ja erebe gobraine. Ngöbö aibe raba nuainne”. Kukwe nieba kwe yekwe nun mikaba blite kukwe keta kabrebätä.

Niara därebare kä 1931, yebätä rü nuainbare ye ngwane dre nakaninkä ye kukwe nuani kwe. Niarakwe ngwantaribare nitre ji ngwanka iglesiate yei, nitre Corea rü nuainbare kä 1950 ye ngwane, ñobätä niaratre nämene ja mike rü yete. Ni kristiano kürü diandre ni mada murie ketakäre ye ñaka käme niebare kwetre ie. Kukwe ye arabe niarakwe ngwantaribare nitre testiko Jehovakwe yei, angwane nitre kristiano kena ja ngwani ño ye niaratre mikani gare Biblia yebiti ie. Kä 1955 ye ngwane John ja ngökabare ñöte,  aune kä 1956 tikwe nuainba. Nun törbaba sribidi ja di tätebiti Jehová kräke (Sal. 37:3, 4). Julio kä 1957 nunkwe ja mäkäteba.

Köbö te nunkwe ja mäkäteba ye nämene mate käre gätä kri köbö mä nuain nämene yebe. Nitre kwati nämene ja mika gure metre ye mike ütiäte jai yebe nun nämene ye nämene kä mike juto nunbätä. Kä 1958 ye ngwane nun kwanba kena gätä kri nuainba juta madakänti yebätä. Saskatchewan yekänti nun nirike rikaba karote nemen Nueva York. Rare nun nämä näin karote aune deu nun nämä kübien tienda campaña yete, nunkwe nänba bämän krati. Ja mräkä rababa gare nuen Bethlehem (Pensilvania) yekwe nun nübaiba kübien ja gwirete köbö mrä deu yete, nun ñan nämä ye ngübare abokän rababa bare nunbätä. Niarakwe ye nuainba töi kwinbiti köböire nun rükaba Nueva York ja ükaninte mrebe aune kwin. Gätä kri yekwe mikaba gare nuen sribidre Jehová kräke ye tä kä mike juto nibätä. Salmista kukwe tikani erere, “nire tä käre mä ken yebätä kätä juto” (Sal. 16:11).

NUNKWE SRIBI PREKURSOR KÖMIKABA

Kä 1959 ye ngwane, nun nämene sribi prekursor ye nuainne, Saskatchewan yekänti ju chi nämene ngüdrebiti kwin, yete nun nämene nüne. Nun nämene nüne yekänti kä ere nämene tuin mente nuen, kä ye jökrä känti nunkwe kukwe driedre.

Bati, sukursal tärä juanba nuen. Jonh nämä tractor ükete, yekänti ti rikaba betekä. Tärä juani yebiti nun nübaiba sribire prekursor especial Red Lake (Ontario) yekänti. Kä ye medente ñaka nämä gare nuen, yebätä nunkwe drekebe ngwarbe mapa dianba kä ye känänkäre.

¡Kä känti nun juanba ye ñan nämene ja erebe nun nämene nüne käne yebe! Kä yekänti, kri nämä krubäte aune sribi nämene oro diankakäre ye ken nitre nämä nüne. Köbö kena yete nun nämä ju känene nünankäre nun nämä niere meri madai, ye ngwane monso chi merire nun kukwe nuaba. Monso chi ye rikaba betekä kukwe ye niere meye kwe yei, aune meye kwe töi kwinbiti nieba nuen nunkwe ja dükadre köbö yete niara gwirete. Ju kwe täni jän nämä, akwa bä nämä tuin jerekä kämäkä kwrere. Köbö rikaba köböiti ta ju sribebare kribiti kwanba nuen, yete cuarto krobu nämä, ñö ñaka nämä, jondron mada ñaka nämä aune ñukwä käi kratibe nämä ja mikakäre krube. Jondron ñaka mrä akwa nunkwe kökaba tiendate aune yebiti ja rababa ruin kwin nuen.

Konkrekasion bäri känime ye nemenkä 200 kilómetros (130 millas). Nitre kwati nämä sribire oro diankakäre ye käi Europa, aune nitre ye rababa Biblia kukwe kwetre yebiti kärere nuen. Kä rikaba braibe ta nunbiti angwane nun rababa nitre grebiti ni jätä tötike Bibliabätä, nitre ye nämä nirien jankunu kukwe ja üaire yebiti, aune kä rikaba sö krä ti ta angwane konkrekasion mrä rababa ükaninte abokän te nitre braibe jataba ja ükökrö.

Bati, meri nämä ja tötike nunbe, muko kwe ñäkäbare telefonobiti ni ji ngwanka iglesiate yei, ne kwe jatadre muko kwe dimike “töbiketa kwin”. Ni ji ngwanka käkwe nieba nun rabadre Ngöbö ye ni nimä ngöböre itibe driere. Meri ja tötikaka nunbe käkwe Biblia católica dianba aune kukwe ye nämä tikani medente ye ni ji ngwanka käkwe mikadre gare ie nieba kwe ie. Ni ji ngwanka ye rababa rubun aune Biblia kitakaba mesabiti ta kwe aune drekäre törbaba kukwe ye mikai gare jai nieba kwe ie. Ni ji ngwanka ye rikaba mento, aune kukwe ucraniano yebiti nieba kwe niaratre rabadre nun juentari mento aune ñaka nun tuandremetre näinta jire chi kwetre jakänti. ¡Kukwe ucraniano ye ñaka nämä gare Jonh ie nütüba kwe!

Ye bitikäre, kä Red Lake rababa nuen, ñobätä ñan aune John nübaiba ja tötike sribi ni ni tuabitikä ye nuainkäre. Kä rikaba kwati ta angwane gätä kri köbömä yete John nämä kukwe kädriere nitre ja ngökaka ñöte kräke, aune meri tötika nämene nunkwe muko kwe nämä nitre ja ngökaka ñöte ye ngätäite  siba. Ni ji ngwanka iglesiate kukwe nuainbare yekwe mikani töbike aune ja töi mikani akwle kwe kukwe Bibliabätä mike gare jai.

SRIBIBARE KWE NI NI TUABITIKÄ ERERE

Ti muko nämä konkrekasion tuinbiti ye ngwane nunkwe ja dükaba ja mräkätre jene jene gwirete, ye rababa ütiäte nun kräke. Ja mräkätre nämä blite nunbe aune nun kain ngäbiti ja gwirete ye nämä nemen ja ketamuko kwin nunkwe. Bati, nun rababa eteba umbre gwirete aune nun nämä ja düke ju yete kwin aune kä nämene nemen tibo krubäte. Kä ye näire ñü nämene näkäin tibien, aune kä nämene kite ngwen dekä ye ngwane eteba ye nämä niken käbube käteri ñukwä bukete. Biti, nämä nikenta ñö ngire ngwena nuen, ne kwe nunkwe jübadre te. Eteba ye töi jäme aune kwin yekwe kukwe kwin driebare tie ja töi kräke.

Sribi yekwe ti mikaba nökrö bäri Jehová ken. Circuito nemenkä Alberta yete, juta nämä mente krubäte känti nitre nämä sribire oro diankäre, juta yete eteba kukwebätä iti nämä nüne. Juta Ngöbökwe nämä ja ngwai ye mike tuin ütiäte jai, yebätä sö nämene niken krä ti ta angwane, käre nun nämene niken bämän krati kukwe driekäre aune gätä nuainkäre eteba yebe, nun nämä konkrekasion krikri tuinbiti jutate erere nun nämene nuainne ben. Nun nämene niken känti ye ngwane nämene nüke törö nuen Jehovata ja tare yebiti ni itire itire ngübarebiti obeja erere.

Ja mräkätre kwati nun mikani ja gwirete yebe nun nämene blite käre. Kaja jükani tuäre abokän täräkwata kukwe tikakäre nämä te ye John bianba kena tie. Ja mräkätre nämä kukwe tike tie ye ngwane kukwe ye nämä nüke törö tie. Nun nämä kukwe tike jai kwärikwäri ja mräkätre ben ye nämä mate kwin nunbätä, kaja ye täbe tikwe jondron ütiäte kwrere.

Circuito nemenkä Toronto, yekänti nun nämä angwane ja mräkä sribikä sukursal Canadá käkwe nun käräba aune nun törba näin sribire Betel ngwantariba kwe nuen. ¿Ñongwane törbaba nun tuai kukwe ye mike gare jai? ¡Nunkwe kukwe ye mikadre gare jetebe se kwrere! Aune ye erere nunkwe nuainba.

NUNKWE SRIBIBA BETEL

Sribi keta kabre nunkwe nuainbare yekwe mikaba gare nuen, ni käre Jehová ken yebätä kätä juto. Kä 1977 nun namani Betel ye ngwane kukwe ye erere namani bare nunbätä. Nitre dianinkä nänkäre kä kwinbiti yebe gwairebe nun nämä sribire köböire niaratre töi ño rababa gare nuen, bätä niaratre nämä Ngöbö Kukwei mike tuin ütiäte jai ye rababa gare nuen arato.

Sribidre betelte ye rababa tuin kwin krubäte nuen. Nun nämä dän ükete dän üka käi yekänti aune ñaka nämä mikani maletate, arato konkrekasion keteiti yekänti nun nämä ja ükökrö. Ti nämä sribi nuainne ye nämene tuin kwin tie aune ti nämä sukursal mike gare nitre basaka ie ye ti nämä nuainne kä jutobiti. Sribi meden meden nuain nämene betelte ye ti nämä mike gare ietre, niaratre nämä kukwe ngwentari tie ye ti nämä kukwe nuin biti ti nämä mike gare ietre.

Kä rikaba jötrö ta, aune kä 1997 John nübaiba Patterson (Nueva York) Kwela nitre ji ngwanka Sukursalte ye kräke. Ye bitikäre, nun raba niken juta Ucrania yete ngwantariba nuen aune nunkwe orasion nuaindre töbikakäre kwin kukwe yebätä nieba nuen. Nunkwe jän niedi ye rababara gare nuen köbö yete.

NUN RIKABA UCRANIA

Kä 1992 yete gätä krikri nuainbare juta San Petersburgo (Rusia) aune 1993 nuainbare Kiev (Ucrania), yebätä nun kwanba siba. Gätä yete ja mräkätre Europa oriental ye rababa tare krubäte nunkwe. Kä Lviv (Ucrania) ju kubu jabiti kwin yete nun nämä nüne mada. Ventanate ta kä jubäre nämä tuin bä nuäre, antlan kri bä tain nämä yete aune kwi nämä kabre arato. Nun nämä nüne kena Saskatchewan ye kwrere rababa tuen nuen. Nun ni jätä biti nibu nämä nüne ju  yete ye nämä niken mantre jetebe dekä sribire Betel.

¿Ja rababa ruin ño nuen Ucrania? Tödeka ja mräkätre kwati yekwe nuaninte, kukwe drie ñäkäibare ietre, kitani ngite akwa yebiti ta ja ngwani dite kwetre yebe nun nämä sribire gwairebe ye nämä tuin ütiäte krubäte nuen. Nun nämä kwin niere ietre ye ngwane niaratre nämä niere nuen: “Jehová köböire nunkwe kä ngwani nüke jai”. Jehová ñaka niaratre tuanimetre kaibe ye nämä gare ietre. Kä nengwane, niaratre tätre kukwe nuainne aune nunta debe bien ietre angwane tätre niere: “Debe biandre Jehovai”. Yebiti tätre mike gare kukwe kwin ye jökrä kite Ngöbökri.

Kä Ucrania yekänti ja mräkätre kwati tätre niken gürere gätäbätä. Nändre ora krati o bäri yebätä kä nemen ie blitakäre aune ja di mikakäre kwärikwäri. Konkrekasion gre ketebu biti kwäjätä biti bäri tä Lviv yekänti, konkrekasion grebiti kwati tä ja ükökrö ju ja ükarakrö kri yete. Nitre Testiko tätre nüke bämänte ju ja ükarakrö yete ye tä nemen tuin nuäre krubäte.

Ja mräkätre ye töi nämene kwin aune tö nämene ni mada dimikabätä yebätä ja nämä nemen ruin kwin nuen. Arato, ti ñaka blite kukwe ucraniano yebiti, aisete niaratre kukwei ñaka nüke gare tie angwane tätre ti dimike bätärekä. Tätre kukwe niere ye tätre bämike ja ngwärebätä.

Nitre Jehová mikaka täte tätre tö ngwen jai kwärikwäri ye tikwe tuaba gätä kri nuainba Kiev yekänti kä 2003 yete. Tren rükaba nünenkä aune nun rankwanba timon, ye ngwane monso chi merire rükaba nun ken aune kukwe tiebebiti nieba kwe nuen: “Ti nete. Ti moloi ñan nibi kwen tie”. Nun nämä solapa ngwen jabätä yekwe mikaba gare ie nun testiko Jehovakwe, yebätä kä jürä ñan nämäbätä aune ñaka nämä muen. Ni ni tuabikä muko, rikaba monso chi ye ngwena jondron nianinte ye käi känti gätä nuain nämene yekänti, aune ye köböire moloi kwanba ie. Monso chi merire nämä nitre kwati ngätäite akwa tö ngwanba kwe nuen ye mataba kwin tibätä.

Mayo 2001 ja mräkätre kwati juta madate rükaba sukursal mrä ye käi ngwen juto jabätä. Dominko dekä kukwe ütiäte kädrieba ye bitikäre ja mräkätre kwati rikaba gürere obisina betelte ye tuin. ¡Kukwe ye ñaka käi nikwitekä tibiti! Ja mräkätre ye rükaba töi jämebiti aune ja ngwen kwin ye käkwe kä mikaba juto tibätä. Nire tä sribire Ngöbö kräke yebätä kätä nemen juto ye rükaba gare bäri tie.

TI MUKO KRÜTABA TIKÄN

Kä 2004 ye ngwane bren cáncer kwanba Jonh yebätä, aisete nun rikabata Canadá ne kwe niarakwe ja kräkäi mikadre. Kena kräkäi mikaba ye ngwane di riakaba krubäte, yebätä bämän kabre te ngübaba. Kä jataba ruintabiti ye ngwane bäsi kukwe ñan rababa ngitie, akwa ja mräkätre nämä nüke niara känti angwane okwä kwe yebiti nämä bämike nämä debe bien ietre.

Niara ñaka rababata räre aune krütaba kä ye rababara krüte näire. Niara krütaba ye ngwane ja rababa ruin ulire krubäte tie, ñobätä ñan aune ti nämene sribire gwairebe Jehová kräke niarabe ye nämene kä mike juto tibätä. ¿Tikwe ja nuaindre mada? Tikwe ja töi mikaba nikenta Ucrania. Ja mräkätre sribikä betelte aune ja mräkätre konkrekasionte tä ti tarere yebätä tita debe bien krubäte ietre.

John aune tikwe kukwe diani ja käne yebätä ja ñaka nämä ruin ulire nuen. Nunkwe kukwe dianba jai yekwe nun mikaba nüne kä jutobiti aune ye köböire ja keta muko kwin kwati tä tikwe. Jehová töi kwin ni kräke aune ye erere ti rabadre nuainne ye gare tie, tikwe sribidre käre kräke ie ti tö, ñobätä ñan aune, tita käre niara ken ye tä metre kä mike juto tibätä.

[Kukwe nieta página 6]

“John aune tikwe kukwe diani ja käne yebätä ja ñaka nämä ruin ulire nuen”

[Jondron üai bämikani página 3]

Tikwe ja mäkäteba John ben

[Jondron üai bämikani página 4]

Ti nämä sribi prekursor especial nuainne Red Lake (Ontario)

[Jondron üai bämikani página 5]

John aune ti nämä juta Ucrania kä (2002)