Nitre tä kukwe ngwentari

¿Ni üai butiere tuabätä krubäte ni kristiano kitaka raba kukwebätä konkrekasionte?

▪ Jän, ye erere raba nemen bare. Kukwe ne tä mike gare, ni üai butiere mikata tuare täräkwatabätä, películas, videos o Internet aune mensaje yete ye ñaka tuadre jire chi.

Ni üai butiere mikata tuadre ye nuain nibira kä jökrä känti. Internet yebiti kukwe ye mikata tuare aune nitre umbre bätä monsotre töi juanta ngwarbe kukwe käme yekwe. Nitre ruäre töi ñaka kukwe ye tuabätä akwa tä kwen ietre. Akwa nitre ruäre abokän tä tuin nierara, ja gwirete o obisina yekänti, kä medenkänti raba tuin o raba ñäke kukwe yebätä ye erere känti tä nike tuin kaibe. Ni kristiano rabadre ja ngübarebiti kukwe nebätä. ¿Ñobätä?

Metrere kukwe keteiti bäri ütiätebätä Jesús kukwe ne niebare: “Nire nire käkwe meri tuadre ja käne amne tö rabadre ie jakrä, ni ye käkwe meri ye mirira ja ken ja töite” (Mat. 5:28). Erametre, nitre tä ja mikani gure metre tä nemen jabe ye ñaka käme, ñobätä ñan aune yebiti jata nemen ruin kwin ietre (Pro. 5:15-19; 1 Cor. 7:2-5). Akwa ni üai butiere mikata tuare yete, ni brare aune meri tä nemen jabe mikata tuare, ye raba ni töi mike kukwe käme ñäkäibare Jesukwe ye nuainne. Ni raba niere metre, kukwe tikata ni üai butiere yebätä nire käkwe ñäkädre o tuadre angwane, kukwe nieta ne niara ñaka tä mike täte: “Kukwe kämekäme mdei tä munye, ye kite jökrä temen munkwe abko krörö: munkwe ñan ja mika gure bati bati ni mda mdabe amne, mun merire brare käkwe ñan kukwe nuen kämekäme jabtä kwärikwäri. Mun tö rabai bäri ni mda mike jabe, ye  munkwe kita temen. Erere arato, kukwe kämekäme tä mun töibtä amne mdeita nebe krübäte munye, ye munkwe kita temen, ñobtä ñan angwane ni tö jändränye kabre kore abko käta jändrän ye mike ngöböre jae Ngöbö täte aisete” (Col. 3:5).

¿Ni kristiano ni üai butiere mikata tuare ye tuanina bati o bobu angwane, ¿niara ye tä ño? Niara tä ja mike kukwe tare te Asaf ye erere, niarakwe niebare: “Ti abokän, ngötö bäsi rikaba ji madabiti, bäsi ti ngötö niakaba”. Mätä ni brare o meri üai butiere mikata tuare ye tuin o ni gure tä nemen jabe üai tuata mäkwe arato angwane mä töi ñaka rabai jäme aune mä ñaka rabai ja mäke kwin Ngöböbe. Ja rabai ruin Asaf ye erere mäi: “Aune ti rababa ja tare nike mantre jetebe aune köbö kwatire kwatire ti töi ükate nämä” (Sal. 73:2, 14).

Ni kristiano tärä ja mike ngite ye erere angwane, ütiäte krubäte rabadre ja ngwen mokre aune tä ja di ribere kukwe ja üaire yebiti ye rabadre nüke gare ie. Biblia tä mike gare ye raba kwen konkrekasionte nie: “[Ni] tödekaka Jesubti käkwe ja mika ngite, ye ga munkwe angwane, mun mden mden käta kä bien Ngöbö Üaiye mun jie ngwena metre ye käkwe mun mräkä die mika, niara rikadreta ji metrebti abkokäre. Akwa munkwe die mika ja moto jämenbti angwane, makwe ja ngibia kuin” (Gál. 6:1). Ni umbre iti o nibu raba niara dimike, abokän känti oradre kwetre ben aune Jehovakwe niara tä bren ja üaire ye “mikaita kwin” aune “ngite ne niandi niarabiti ta” yei niaratre rabai tö ngwen arato. (Sant. 5:13-15, NGT). Nire nire tä ja di kärere ni üai butiere tuata kwe ye tuanmetrekäre yei ja ruin Asaf erere, niarakwe niebare: ‘Krötadre Ngöbö ken ye bäri kwin ti kräkeʼ (Sal. 73:28).

Akwa, Apóstol Pablo mikani gare, nitre ruäre “käkwe ja mikani ngite, ye abko käi nikani raire ta, akwa [...] [ñaka] kukwe käme ye kit[ani] temen” kwetre (2 Cor. 12:21). * Kukwe griekore abokän kwitata suliare “inmundicia” ye “jondron bäri käme krubäte nuainta” meden gärätä, ye ni ja tötikaka diccionario sribekäre kädekata Marvin R. Vincent käkwe mikani gare. Akwa nitre üai butiere mikata tuare o ni brare aune meri tä nemen gore jabe ye ñan aibe üai mikata tuare. Ruäre ngwane kukwe käme krubäte nuainta, ñodre nitre brare ruäre tä nemen jabe, nitre kwati tä nemen gwairebe jabe kwärikwäri, jondron nire mikata jabe, monso kia butiere üai diankata, aune ni mada mikata ja dibiti jabe gwairebe, meritre nuainta tare tare aune nitre tä meritre mike jabe aune tä mike ja tare nike krubäte o küdrerebätä. Pablo mikani gare ye erere, nitre ruäre nämene “kä ikote” aune “kukwe kämekäme bätäkä ngwarbe meribe amne brarebe, jiebti [...] [nämene] nakwen amne, [...] [nämene] ja gaire ñakare, käta kukwe kämekäme nuene jökrä, akwa kukwe käme ye mdei tä neme bäri janknu ietre” (Efe. 4:18, 19).

“Kukwe kämekäme” ye Pablo mikani gare Gálatas 5:19. Ni ja tötikaka jondron sribebare yebätä kä Gran Bretaña yekänti käkwe mikani gare: “Kukwe ye abokän metrere kukwe jökrä käme medeita nemen nie ye gärätä”. Erametre ni kristiano jökrä ie rabadre gare kukwe käme nuainta kädrite käne ye “kukwe käme krubäte medeita nemen nie”, jondron yaidre aune ni töi juanka ngwarbe ye kwrere. Gálatas 5:19-21 (NM) yekänti apóstol Pablo mikani gare metre, nire nire kätä kukwe käme käme ne nuainne yekwe “gobran Ngöbökwe ñaka rabai”. Yebätä, ni üai butiere käme krubäte mikata tuare ye ni kristiano tä tuin krubäte angwane, ¿dre raba nemen bare? Niarakwe ñaka ja töi kwitadre aune ñaka kukwe käme ye tuanemetre kwe angwane, kitadrekä kukwebätä ne kwe konkrekasionte tädre kwin kukwe ja üaire yebiti bätä kukwe kwin ye aibe nuain tädre (1 Cor. 5:5, 11).

Nitre ruäre nämene ni üai butiere tuin aune ja di käräbare kwe nitre umbre ie aune ja töi kwitani jötrö ngwarbe kwetre kukwe yebätä, mikadre gare jai ye kwin krubäte. Nitre kristiano Sardis yei Jesukwe mikani gare: “Jändrän nemenkä, niena juto gatakäre, ye mika dite mäkwe; [...] Kukwe kani ngäbiti mäkwe, aune kukwe kukwe nuani mäkwe, ne mike törö jai, aune mäkwe ngüba ja kräke, angwane mäkwe ja töi kwita. Mä ñakare ngwäte kwete jabiti ngwane, [...] ti rükai mä känti ñänän okwä kräbe, ñakare gadi mäkwe” (Apoc. 3:2, 3 NGT). Erametre, ni raba ja töi kwite aune ngitie ni üai butiere mikata tuare abokän “ñukwä” jutra kwrere yebätä (Jud. 22, 23).

Akwa, bäri kwin ni itire itire käkwe ja töi mikadre kwatibe ñaka ja mike kukwe ne erere te. Yebätä, ¡nikwe ñaka ja töi mikadre ni üai butiere mikata tuare bä jene jene ye tuin jire!

[Nota]

[Kukwe nieta página 30]

Ni kristiano kukwe käme nuaindre angwane, ütiäte krubäte niara rabadre okwä ngente aune niara tä ja di ribere kukwe ja üaire yebiti ye rabadre mike nüke gare jai