Jehová tä ni kriemike ne kwe ni rabadre kwäre

“Ngöbö tä mun ngibiare ja dibiti, mun tä tö deke niarabiti [ye]bätä. Mun mikai kwäre niarakwe, ne mikai tuadre kwe mun ie kä mrä näire” (1 PED. 1:4, 5, NGT).

¿NI RABA KUKWE NE MIKE GARE ÑO?

¿Jehová dre nuainbare ne kwe nikwe kukwe metre mikadre täte?

¿Nita ja tuenmetre ño jie ngwandre Jehovai kukwe nieta kwe yebiti?

¿Jehová tä ni dimike ño?

1, 2. a) ¿Jehovakwe ni dimikai ne kwe nikwe ja ngwandre metre ye dre tä mike gare nie? b) ¿Dre dre gare nibätä Jehovai?

“NIREKWE [...] [kä ngwandi nüke jai] nebe kä mrä näire, nebrä abokän rabai [...] kwäre” (Mat. 24:13, NGT). Jesukwe kukwe ne niebare angwane, mikani gare metre kwe ni rabadre ja ngwen metre Ngöböi nememe kä krüte te, ne kwe niara Rün jatai kukwe tare ngwena nitre gobrainta Satanakwe gatekäre ye näire ni rabadrete kwäre. Ne ñaka tä mike gare, Jehovakwe ni tuainmetre kä ngwen nüke jai ja di jeñebiti aune ja töi jeñebiti. Biblia tä kukwe ne käbämike: “Ngöböta ja kukwei mike täte amne, tä juto biare mun die mike, aisete kukwe bäri tare käkwe mun nötadre temen, ye ngäniene munkwe kwäräbedre” (1 Cor. 10:13). ¿Dre gärätä kukwe nebiti?

² Erametre dre dre tä nakainkä nibätä ye gare jökrä Jehovai —ja tare nikata nikwe, nita ja ngwen ño aune dre drebätä kä raba nüke nie—, ye aibe köböire rabai gare ie kukwe meden tare ben ni raba kä ngwen nüke jai ye tuainmetre kwe ni nuatekäre. Akwa ¿erametre ni gare kwin ie? Jän. Biblia tä mike gare, kukwe bäri kia ye gare jökrä ie ni itire itire yebätä. Nita nüne ño aune dre dre nuainta käre nikwe ye jökrä tuin ie. Akwa ye ñan aibe, dre tä ni töite ye gare ie aune ni töita dre nuainbätä ye nüke gare ie arato (ñäkädre Salmo 139:1-6 yebätä).

3, 4. a) ¿Jehová töita ni itire itire yebätä ye kukwe kwin namani Davidkwe tä mike gare ño? b) ¿Sribi meden ñan tuabare nuainta Jehovakwe kä nengwane?

³ Ni kä nebätä ñaka ütiäte akwa Ngöbö töita krubätebätä ye ñaka nuäre rükadre gare, ¿ñan ererea? Kukwe ne arabe David ngwanintari jai, niebare kwe Jehovai: “Kä kwinta, sö aune muke sribebare mäkwe ye tita tuin angwane, ¿ñobätä ni ñaka ütiäte ye mätä ngwen törö jai[?]” (Sal. 8:3, 4). Niarakwe kukwe ne ngwanintari  angwane niara nämene töbike kukwe kwin namani kwe yebätä raba ruin. Niara ye Jesé monsoi bäri bati akwa, namani “ni kwin” kwrere Jehová kräke aune niarakwe “dianinkä” ne kwe “rabadre juta [kwe] Israel jie ngwanka” (1 Sam. 13:14; 2 Sam. 7:8). David ni obeja ngübaka nämene töbiketari yebätä Ngöbö namani okwä mike nükani gare ie ye ngwane, ja namani ruin ño ie yebätä ni raba töbike.

⁴ Ye erere ja nemen ruin nie arato, Jehová töita krubäte nibätä kä nengwane nüke gare nie yebätä. Kukwe metre mikata täte yebiti tä “jondron kwin juta jökrä te” ükökrö aune tä nitre dimike ne kwe rabadre ja ngwen metre sribi kwe nuainkäre (Ageo 2:7). Jehová tä ni dimike ño ja ngwankäre metre ye rükadre gare bäri kwin nie gäre, niara tä nitre mike nökrö ño kukwe metre kokwäre ye ani mike gare käne jai.

NGÖBÖ NI TÖI MIKANI NÖKRÖ MONSO KWE YE KEN

5. ¿Jehová tä ño nitre mike nökrö Monso kwe ken? Mike gare kukwe keteitibiti.

⁵ Jesús niebare: “Ti Rün käkwe ti juani, ye ñan jatadre ni ngwena tie angwane, ni ñan jatadre jire iti ja töi jenbti tie” (Juan 6:44). Kukwe ne tä mike gare, Ngöbökwe ni dimikadre ye nita ribere jai ne kwe ni rabadre ja tötikaka Kristobe. Akwa, ¿Jehová tä ño nitre jäme obeja kwrere ye mike nökrö Monso kwe ken? Nitre kristiano tä kukwe driere yebiti aune üai deme yebiti. Ñodre, Pablo bätä nitre mada kukwe driekä käkwe juta Filipos ye tuaninbiti angwane, meri iti kädeka nämene Lidia ye kwani ietre aune niaratre kukwe kwin Ngöböbätä mikani gare ie. Kukwe tikabare Ngöbö üai yebiti tä mike gare: “Meri ne brukwä tikani [...] [Jehovakwe], abokän kwe Pablo nämäne blite, ye kukwe nuadre kwe gäre”. Mikata gare ne erere, Ngöbökwe ja üai biani ie ne kwe kukwe drie nämene ye rükadre gare ie, köböire niara aune mräkätre nünanka ben gwi yekwe ja ngökani ñöte (Hech. 16:13-15, NGT).

6. ¿Jehová jatani ño ni ngwena kukwe metre ye kokwäre?

⁶ ¿Lidia ye aibebätä kukwe ye erere namani bare? Ñakare. Ni niena kristiano angwane, nikwe ja dianinkä Jehová kräke, niara ye erere Ngöbökwe ni mikani nökrö kukwe metre mikata täte ye kokwäre. Lidia brukwä kwin jutuabare ni Rün kä kwinbiti ie ye erere ni tuin ie arato. Kukwe kwin Ngöbökwe ye jatani tuin ütiäte nie angwane, Jehovakwe ni dimikani üai deme kwe yebiti kukwe kwe ye mike nüke gare jai (1 Cor. 2:11, 12). Kukwe Ngöbökwe jatani nüke gare nie ye ererebätä nikwe ja di ngwani Ngöbö töi nuainne ye köböire jondron kwin namani nikwe. Aune nikwe ja dianinkä niara kräke ye käi namani juto krubäte niarabätä. Erametre, nikwe ji ja nire kräke ye diani ja käne ye ngwane ja känenkäre, niara tä ni itire itire ben ni dimikakäre kä jökrä ngwane.

7. ¿Jehová ni dimikai ja ngwen metre ye ñokänti gare nie?

⁷ Jehová tä ni dimike kukwe kena nuainne ye bitikäre, ñaka ni tuenmetre jire. Gare ie, ni ñaka nükani kukwe metre yebätä ja töi jeñebiti ye erere arato ni ñaka raba näin jankunu ja töi jeñebiti kukwe metre yebätä. Apóstol Pedro kukwe ne mikani gare nitre dianinkä nänkä kä kwinbätä yei: “Ngöbö tä mun ngibiare ja dibiti, mun tä tödeke niarabiti [ye]bätä. Mun mikai kwäre niarakwe, ne mikai tuare kwe mun ie kä mrä näire” (1 Ped. 1:4, 5, NGT). Kukwe niebare ne ni kristiano jökrä kräke aune ni itire itire kä  nengwane kräke kukwe ne rabadre ütiäte. ¿Ñobätä? Ñobätä ñan aune nita ja di ribere Ngöböi ja ngwankäre metre ie.

NGÖBÖTA NI KRIEMIKE NE KWE NIKWE ÑAKA JA MIKADRE NGITE

8. ¿Ñobätä ni rabadre ja di ngwen ne kwe nikwe ñaka ja mikadre ngite?

⁸ Kä blo te nita nüne aune ni ngite ye raba ni töi mike ñaka kukwe ja üaire ye mike tuin ütiäte jai. Yebätä ni raba ja mike ngite aune ni ñaka raba gain jabätä (ñäkädre Gálatas 6:1 yebätä). Kukwe ne erere raba nemen bare nibätä ye kukwe namani bare David yebätä tä bämike ño ye ani mike gare jai.

9, 10. ¿Jehová dre nuainbare ne kwe David ñaka ja mikadre ngite aune tä ni dimike ño kä nengwane?

⁹ Rei Saúl tö namani David murie ketai ye ngwane, David ja gobrain bare kwin aune ñaka ja ngie mikani kwe rei bätä ngwanka niarabätä yebe (1 Sam. 24:2-7). Akwa, ye bitikäre kä ñaka nikani raire ta angwane, ngite kwe yekwe ganainbare. Niara aune nitre nänkä niarabe ye nämene jondron ribere jai, yebätä jondron käräbare kwe ja töi kwinbiti ni Israel kädeka nämene Nabal yei. Nabal kukwe tare niebare David ie ye ngwane, namani rubun krubäte aune tö namani ja ngie mikai yebätä ja töi mikani kwe niken nitre Nabal gwirete ye jökrä murie kete. Niarakwe ja töi mikani kukwe nuainne ye köböite rabadre ngite Ngöbö okwä känti yebätä ñaka töbikabare jire kwe. Abigail, Nabal muko ja mikani kukwe yete köböire David ñaka kukwe käme ye nuainbare. Abigail yebiti Ngöbö nämene kukwe ye nuainne ye nükani gare metre David ie, yebätä niebare kwe: “¡Jehová Ngöbö nitre Israelkwe ye käi kitadrekä, niara yekwe mä juni matare ti ngäbiti! Aune mä töbätä krubäte yebätä mä käi kitadrekä, aune matare mäkwe ñaka ti töi miri ja mike ngite aune mä köböire tikwe ja miri kwäre ti kise yebiti” (1 Sam. 25:9-13, 21, 22, 32, 33).

¹⁰ ¿Kukwe namani bare ne tä dre driere nie? Abigail yebiti Jehovakwe ñaka David tuanimetre ja mike ngite. Aune kä nengwane täbe ni kä nebätä yebiti ni dimike. Akwa ni töi rabadre ja mikabätä ngite batire batire ye känenkri niarakwe ni juain ni dimikakäre ne kwe nikwe ñaka ja mikadre ngite ye nikwe ñaka ngübadre. Dre nuaindi kwe kukwe ketare ketare rakaikä ye ngwane o kukwe meden tuainmetre nakainkä kwe niara tö dre nuaindi mikakäre nemen bare ye gare kwin nie, ni ñaka raba nütüre arato (Ecl. 11:5). Akwa, dre tä nemen bare nibätä ye gare Jehovai kä jökrä ngwane aune tä ni dimike ja ngwankäre metre ye gare kwin nie. Niara tä käbämike nie: “[Ti, Jehová] käkwe kukwe mikai nüke gare mäi, aune tikwe mä tötikai ne kwe ji medenbiti mä rikadre ye rabadre gare mäi. Erametre tikwe mäträi mäbätä ti okwä nebiti ti mä [mikai ñärärä]” (Sal. 32:8). Ye erere, ¿Jehová tä mäträre ño nibätä? ¿Ye köböire kukwe meden kwin raba nemen nikwe? ¿Aune kä nengwane Jehová tä juta kwe jie ngwen ye ñobätä ni raba tö ngwen metre ie? Kukwe ngwantarita ne tärä Apocalipsis tä mike gare ye ani ja tötikebätä.

NGÖBÖTA NI KRIEMIKE KUKWE NIETA KWE NIE YEBITI

11. ¿Kukwe tä nakainkä konkrekasionte ye gare jökrä Jehovai?

¹¹ Kukwe tuani köböre nieta Apocalipsis kapitulo 2 aune 3 yebätä tä mike gare, Jesukristo kukwe mikani gare konkrekasion keta kükü kä Asia Menor yekänti ie. Köböbare ye tä mike gare, Kristo ñaka tä ja töi mike kukwe jökrä yebätä ñakare aune tä ja töi mike metrere kukwe bäri ütiäte yebätä. Ruäre ngwane tä nitre kädekete metre aune kä jökrä ngwane tä kukwe niere aune mäträre ni dimikakäre. ¿Kukwe kädrite ye tä dre mike gare nie ja töi kräke? Kukwe tuani köböre ye namani bare kä 1914 yete ja känenkäre. Konkrekasion keta kükü yebiti nitre kristiano braibe dianinkä nänkäre kä kwinbiti bämikata, aune mäträta niaratre yebätä ye nieta konkrekasion kä jökräbiti tibien kräke arato. Ni raba niere metre, Jehová tä Monso kwe  yebiti juta kwe jie ngwen jankunu. ¿Nikwe dre nuaindre ne kwe ni jie ngwandre kwe?

12. ¿Nita ja tuenmetre ño jie ngwandre Jehovai?

¹² Nikwe ja tötikadre kaibe Bibliabätä ye köböire Jehová raba ni jie ngwen. Nitre sribikä täte metre bätä töbätä tä tärä sribere yebiti, Ngöböta mäträre krubäte nibätä (Mat. 24:45). Ni jie ngwandre kwe ie ni tö angwane, nikwe kä diandrekä jai ja tötikakärebätä aune nuainkäre. Erametre, ja tötikadre kaibe ye köböire Jehová tä ni niara mikaka täte ye kriemike aune “ngibia[re], [...] [ne kwe] ñan rikadre niara bäre mento abkokäre” (Jud. 24). ¿Tärä sribeta ruäre yebätä kukwe keteiti tikani ye ngwane, metrere töbikabare mäbätä nemen ruin ruäre ngwane mäi? Ye erere angwane, mäkwe mika tuin jai Jehová tä mä töi ükete ye kwrere. Ruäre ngwane ja keta muko mäkwe raba mä bäbete kötäbiti kukwe mikakäre gare mäi. Ye erere arato, mä töita ño aune mätä ja ngwen ño ye Jehová raba mike gare mäi üai kwe yebiti ne kwe nitre mada Jehová mikaka täte ye erere mä rabadre ja töi ükete kukwe yebätä. Üai tä ni jie ngwen ye ererebätä nita ja ngwen angwane, nita ja tuenmetre jie ngwandre Jehovai (ñäkädre Salmo 139:23, 24, yebätä). Ye medenbätä, ja tötika ye nuainta ño nikwe yebätä töbikadre.

13. ¿Ja tötika nuainta ño nikwe, ye ñobätä bäri ütiäte nikwe töbikadrebätä?

¹³ Nita kä denkä krubäte jai ja dakakäre angwane, kä ñaka rabaite ja tötikakäre kaibe nie. Ja mräkä iti käkwe kukwe ne niebare: “Ja tötikata kaibe ye tuanmetre raba nuäre kukwe madabätä. Kä nengwane jondron ja näkwitara ye bäri brai aune raba kwen ni jökrä ie. Raba kwen televisión, computadora aune teléfono yebiti nie. Kä jökrä känti raba kwen nie”. Nikwe ñaka ja ngübaibiti angwane, kä ñaka rabaite jire köbö kwatire kwatire ja tötikakäre kaibe nguseta nie (Efe. 5:15-17). Ni jökrä rabadre kukwe ne ngwentari jai: “¿Tita kä denkä jai ja tötikakäre nguseta Kukwe Ngöbökwe yebätä? ¿O tita nuainne kukwe mikata ti kisete kädriedre o kukwe mada tä kädriedre gätäte tie ye aibe ngwane?”. Kukwe ne erere tä nemen bare nibätä angwane, Ja tötikadre ni Mräkätre yebe o nita ja tötike kaibe ye ngwane nikwe nuaindre bäri kwin ne kwe kukwe ütiäte ja üaire Jehová tä bien ere nie ni kriemikakäre aune ni mikakäre kwäre ye nikwe mikadre gare jai (Pro. 2:1-5).

NGÖBÖTA NI DIMIKE YEBITI TÄ NI KRIEMIKE

14. ¿Ja ruin ño nie ye Jehová tä mike ñärärä, Biblia tä mike gare ño?

¹⁴ David ja tuabare kukwe tare keta kabre ben (1 Sam. 30:3-6). Niarakwe kukwe tikani Ngöbö üai yebiti ye tä mike gare, ja nämene ruin ño ie ye Jehová nämene ngwen törö jai (ñäkädre Salmo 34:18 aune 56:8 yebätä). Aune ye erere, ja ruin ño nie ye niara tä ngwen törö jai arato. Ni “brukwä tä ulire” o nita “di nekä” ye ngwane, niara tä nökrö ni ken. Kukwe ne tä ni dimike namani bare Davidbätä ye erere, niarakwe kantabare ye ngwane niebare kwe: “Kä täi juto tibätä aune mätä ti tarere metre ye käi rabai juto tibätä, ñobätä ñan aune tita ulire krubäte ye mätä tuin; tita ja tare nike ye niena gare mäi” (Sal. 31:7). Akwa kukweta ni kisete ye ñan aibe gare Ngöböi, ñakare aune niarata tä ni dimike yebiti tä ni kriemike. Aune gätä nuainta yebiti tä nuainne.

15. ¿Kukwe namani bare Asafbätä ye tä dre driere ja töi kräke nie?

¹⁵ Kukwe namani bare Asafbätä ye raba ni  dimike mike nüke gare jai, nändre gätäbätä ye köböire kukwe kwin raba nemen nikwe. Sacerdote ne käkwe kukwe blo nuain nämene ye tuani yebätä Ngöbö mika täte ñaka raba ni dimike namani ruin ie aune namani di nekä. Niebare kwe: “Ñobätä ñan aune ti brukwä rababa dime, aune ti momai rababa tare krubäte tie”. Ye köböite Jehová mikadre täte ye bäsi tuanimetre kwe. Akwa ¿drekwe niara dimikani töbiketa kwin? Drekwe dimikani ye niara arabe käkwe mikani gare, nikani “ju Ngöbökwe kwin krubäte yekänti”. Kä yekänti, niara nämene ja mräkätre kukwebätä niarabe ngätäite yekwe dimikani töbiketa kwin metre. Nitre töi käme yekwe kukwe kwin ye tä nemen jötrö aune Jehová tä kukwe ye jökrä ükete nükani gare ie (Sal. 73:2, 13-22). Kukwe ye erere tä nemen bare kä nengwane. Nitre gobrainta Satanakwe tä kukwe blo nuainne yebätä ni raba di nekä. Akwa nita ja ükökrö gätäte ja mräkätre kukwebätä yebe angwane ye tä ni dimike Jehová mikakäre täte jankunu kä jutobiti.

16. ¿Kukwe namani bare Ana yebätä ye raba ni dimike ño?

¹⁶ Akwa, ¿kukwe tärä konkrekasionte abokän ñaka tä ni mike näin gätäbätä? Sribi nämene ni kisete konkrekasionte abokän nikwe tuanimetre yebätä nita jakaire. O kukwe namani bare ja mräkä o ja ngwai ben nie yebätä nita rubun. Ye erere angwane, Ana yebätä kukwe namani bare ye raba ni dimike (ñäkädre 1 Samuel 1:4-8 yebätä). Niara monsoi ñaka nämene nemen yebätä kukwe kri nämene ie jabätä Peniná ben, meri mada Elqanakwe ben. Köbö nämene nüke niaratre ie jondron nire kukwakäre Jehovai templo Siló yekänti angwane, kukwe nämene nemen bäri jabätä ietre. Ana nämene ja tare nike krubäte, nämene “muen bätä ñaka nämene mröre”. Akwa yekwe ñaka niara di mikani nekä Jehová mikabätä täte, niara nämene ja ngwen metre ye Jehovakwe mikani ñärärä aune kukwe kwin mikani nemen bare kwe kräke (1 Sam. 1:11, 20).

17, 18. a) ¿Nita nemen gätäbätä konkrekasionte ye ngwane ni di mikata ño? b) ¿Jehová tä ni ngübare ne kwe ni rabadre kwäre yebätä nita töbiketari angwane ja nemen ruin ño mäi?

¹⁷ Ni kristiano rabadre ja ngwen Ana ye erere kukwe ütiätebätä. Käre nikwe nändre gätäbätä, ñobätä ñan aune gätä yebiti ni dimikata ye gare kwin nie (Heb. 10:24, 25). Nita ja ngätäite ja mräkätre ben aune niaratre tä ni tarere ye tä ni dimike. Kukwe chi niedre kukwe kädrieta yete o blitata gätäte ye raba mate kwin ni brukwäbätä. Gätä ye känenkri o bitikäre ni tädre blite ja mräkä ben angwane raba ni kukwe nuin aune raba kukwe kwin niere nie ni dimikakäre (Pro. 15:23; 17:17). Nita kantare gwairebe Jehovai ye tä ni miketa dite arato. Erametre, ni nemen “töbike krubäte” ye ngwane ni dimikata gätäte ye nita nemen ribere bäri jai. Gätä yete Jehová tä ni dimike “kukwe” kwe yebiti aune tä ni töi mike kwatibe ja ngwankäre metre (Sal. 94:18, 19).

¹⁸ Ngöböta ni ngübare gare kwin nie yebätä ja nemen ruin Asaf ye erere nie, niarakwe kantabare ie: “Mätä ti kani kise ruin yekri. Mäkwe ti jie ngwain mä kukwei yebiti” (Sal. 73:23, 24). Jehová tä ni kriemike ne kwe ni rabadre kwäre ¡yebätä nita debe bien krubäte ie!

[Kukwe ngwantarita]

[Jondron üai bämikani página 28]

Jehová jatani mä ngwena arato

[Jondron üai bämikani página 30]

Ngöbö tä mäträre nibätä ni kriemikakäre

[Jondron üai bämikani página 31]

Kukwe kwin nieta nie ye tä ni dimike