Jehovai juta kwe mika gare kwäre

“[Jehová] ie, ni[tre] kwin [...] mika gare kwäre” (2 PED. 2:9, NGT).

¿ÑOBÄTÄ KUKWE NE RABADRE METRE NI KRÄKE?

Köbö medente kukwe rabai bare jatäri yekwe Jehová töi mikai nemen bare ye gare kwin ie.

Jehovakwe ja die yebiti juta kwe mikai kwäre.

Kukwe bäri ütiäte rabai bare ño jatäri ye gare kwin Jehovai.

1. ¿Dre dre rabai nakainkä “ja tare nikadi kri krubäte” ye näire?

NGÖBÖKWE kukwe ükaite nitre gobrainta Satanakwe yebe angwane, nuaindi drekebe ngwarbe kwe (1 Tes. 5:2, 3). “Köbö kri Jehovakwe” näire, kukwe rabai nakainkä yebätä dre nuaindre ñaka rabai gare nitre kä nebätä ie (Sof. 1:14-17). Mantre jetebe ja tare nika rabai krubäte aune jondron ñaka rabai nikwe. Ne madakäre, “kä dätebare kena angwane ja tare nika ñakare [...] abko erere ja tare nikadi kri krubäte” (ñäkädre Mateo 24:21, 22 yebätä).

2, 3. a) ¿“Ja tare nikadi kri krubäte” näire juta Ngöbökwe yekwe ja tuai kukwe medenbe? b) ¿Dre käkwe ni dimikai ja tuakäre kukwe tare tä ja känenkäre yebe?

² “Ja tare nikadi kri krubäte” ye rabaira krüte angwane, “Gog kä Magog yekänti” käkwe nitre niarakri ye jökrä ben rüdi juta Ngöbökwe rüere. Erametre, “nitre rükä kwati krubäte [...] muta kwrere juta yebiti” (Eze. 38:2, 14-16). Köbö ye ngwane nitre kä nebätä dianinkä ni dimikakäre yekwe ñaka ni mikai kwäre. Ngöbö aibe köböire ni rabaite kwäre. Nitre gaite ye nikwe tuadi metre ja okwä jeñebiti ye ngwane, ¿nikwe dre nuaindi?

³ Ni jökrä Jehová mikaka täte rabadre ngwentari jai: “¿Niarakwe ni mikai kwäre kukwe tare näire ye metre ti kräke?”. Apóstol Pedrokwe kukwe niebare ne nikwe ngwandre törö jai: “[Jehová] ie, ni[tre] kwin [...] mika gare kwäre [...]; angwane nitre käme abrä niara näin kite ngite tö diandre jai, kukwe ükaite näire” (2 Ped. 2:9, NGT). Nikwe töbikadretari Jehovakwe nitre mikani kwäre kira yebätä angwane, ye käkwe ni mikai bäri dite ja tuakäre kukwe tare tä ja känenkäre yebe. Ani kukwe ketamä mike gare jai abokän raba ni dimike tödeke metre Jehovai, niara aibe die tärä krubäte juta kwe mikakäre kwäre.

 NIARATRE NAMANINTE NIRE ÑÜ KRI NÄIRE

4. ¿Köbö nuäi te Ñü Kri räkändre tibien ye ñobätä namani bäri ütiäte?

⁴ Ani töbike käne Ñü Kri nänkäni yebätä. Kä ye ngwane, köbö nuäi te Ngöbö töi mikadre nemen bare ye namani ütiäte krubäte. Ñü kri jämi näkäin ye känenkri, arka namani sribedre aune yete jondron nire namani ükadre. Tärä Génesis ye ñaka niere jire Jehovakwe arka ye sribe manabare käne biti ja töi mikani kwe köbö ükatekäre ñü räkäin ñongwane tibien ye kräke. Ñakare aune, Noekwe arka sribedre niebare kwe ye känenkri, Ñü kri räkäin tibien ye köböi kitanina kwe. Niarakwe ñaka ja töi mikani köbö ye mike niken raire ta ne kwe arka ye rabadre bare täte. ¿Ñokänti ye gare nie?

5. ¿Kukwe niebare Ngöbökwe Génesis 6:3 yekwe dre mikani gare, aune ñongwane namani bare?

⁵ Biblia tä mike gare, Jehovakwe kukwe ükaninte kä kwinbiti ye abokän tä tikani Génesis 6:3 (JK): “Ti üai nin tädi käre [ni kä tibienbätä yebe], tikwe ñan tuenmetre nüne raire kä nebtä amne, tikwe kä biandi kä siento krati bti kwä gre ietre nünankrä kä temenbtä”. ¿Ni kä tibienbätä nünain köbö kwäbe te ye nie nämene kwe? Ñakare. Köbö kwäbe te niarakwe kä tibien jökrä yete kukwe käme diainkä, ye mika nämene gare kwe. * Kä 2370, kä 1 känenkri Ñü Kri ye nänkäni tibien, yebätä raba nüke gare metre nie Ngöbökwe kukwe ne niebare kä 2490 yete. Köbö ye ngwane Noé yebiti kä namanina 480 (Gén. 7:6). Kä kwä gre nikani ta ye bitikäre, kä 2470 ye ngwane monso kena kwe ye därebare (Gén. 5: 32). Kä nämene siento krati ja käne angwane Ñü Kri ye rükadre, aune Noé ye köböire ni kä tibienbätä rabaite kwäre ye Jehovakwe ñaka mikani gare biare ie. ¿Kä nikani nuäi ta angwane niebare kwe ie?

6. ¿Ñongwane Jehovakwe arka sribe manabare Noeye?

⁶ Kukwe ne jökrä tä mike gare Ngöbökwe dre nuaindi ye ñaka nämene gare Noé ie, ñakare aune kä nikani kwati ta ye ngwane namani gare ie. ¿Drebiti ni raba kukwe ye mike gare metre? Kukwe tikabare yebiti ni raba mike gare, yekänti mikata gare, niarakwe arka sribedre niebare ie ye ngwane ngäbriäntre namanina umbre aune mukobe. Jehová niebare ie: “Ma ngäbriänkätre, ma jüdekäntre btä meri makwe, ye abko näin mabe rute. Abti tikwe ja kukwei ütiäte ükadite mabe” (Gén. 6:9-18, JK). Ye medenbätä, Noekwe arka sribedre niebare ie ye ngwane kä namani gre ketebu o gre ketebu biti kwäjätä ne kwe Ñü Kri ye räkändre tibien.

7. a) ¿Noé aune mräkätre käkwe tödeka ye bämikani ño? b) ¿Köbö medente metrere Ñü Kri räkäin tibien ye ñongwane Ngöbökwe mikani gare Noé ie?

⁷ Niaratre nämene arka sribere ye ngwane, Ngöbö töi ye rabai bare ño aune ñongwane Ñü Kri räkäin tibien, ye Noé aune mräkä kwe nämene ngwentari jai raba ruin nie. Kukwe rabai bare ño jatäri ye ñaka nämene gare ie, akwa namani arka ye sribere jankunu mikakäre nemen bare. Biblia tä niere: “Ngöbökwe dre dre nuemna Noeye, erere nuenbare täte jökrä kwe” (Gén. 6:22, JK). Kä rikadre ñöte ye köböi namanina köbö kükü aibe, köbö yete Noé aune mräkätre käkwe jondron nire juandre arkate, ye ngwane köbö medente metrere Ñü Kri räkäin tibien ye Jehovakwe mikani gare. Ye köböire, jondron jökrä namanina juto biare, “kä namani siento krä ti (600) Noeye [...] sö krobu angwane, köbö jätäbti köbö kükü”, köbö ye ngwane “dobo mkä ngitianinkä” (Gén. 7:1-5, 11, JK).

8. Kukwe nieta Ñü Kri näkäni tibien Noé näire yebätä, ¿ye raba ni dimike ño tö ngwen Jehovakwe nitre niara mikaka täte mikai kwäre yei?

⁸ Kukwe mikata gare Ñü Kri yebätä ye ñan aibe tä ni mike tödeke Jehová köbö Dänkien ie, ñakare aune niara ni mikaka kwäre yei nita tödeke arato. Nitre ñaka Ngöbö mike täte gaite ye köböi tä bäri nökrö ja ken aune kukwe käbämikani Ngöbökwe  ye jökrä rabai bare köbö ükaninte ye näre te, “köbö mdente amne ñänä okwä nuäi” ükaninte ye erere näire rabai bare (Mat. 24:36; ñäkädre Habacuc 2:3 yebätä).

MIKANI KWÄRE MREN TAIN YETE

9, 10. ¿Jehovakwe juta kwe yebiti, gwa tä kötü kwete ye kwrere nitre Egipto rükä ye mikani nakain ño kö okwäte?

⁹ Kukwe kena nekänti nikwe miri gare jai, köbö medente kukwe rabadre bare Jehová töi mikakäre nemen bare ye abokän niara aibe ie gare kwin. Kukwe ketebukäre ne käkwe mikai gare nie, niarakwe juta kwe mikai kwäre yei nikwe tö ngwandre: niarakwe ja die yebiti töi ye mikai nemen bare metre. Jehovai nitre niara mikaka täte ye mika gare kwäre. Tä nemen bare metre ie yebätä, ruäre ngwane tä nitre niara mikaka täte ye mike nitre niara rüe ye kisete töi mikakäre rüre niaratre rüere ne kwe niara rüe ye rakadre kö okwäte ie. Nitre Israel nämene klabore Egipto mikani kwäre kwe angwane, ye erere nuainbare kwe.

¹⁰ Nitre Israel millón krämä tuanimetre kämikekä Egipto. Jehová kukwe niebare nuaindre ye ererebätä, Moisés niaratre jie ngwani abokän köböire Faraón nütübare niaratre nämene näin ni nianinte kwrere (ñäkädre Éxodo 14:1-4 yebätä). Faraón ñaka kä ngwani nüke jai, yebätä gwa tä kötü kwete ye kwrere nakani kö okwäte aune nitre Israel nämene klabore niarai ye jiebiti nikani bätä ketaninkä kwe mren Tain ye kräbätä, kä yekänti gitia käi ñaka namani nitre yei namani tuin ietre (Éxo. 14:5-10). Akwa erametre nitre Israel yei gitia käi nämene. ¿Ñobätä gitia käi nämene niaratre yei? Ñobätä ñan aune Ngöbökwe ja mikani juta kwe ye mikakäre kwäre.

11, 12. a) ¿Jehovakwe dre nuainbare juta kwe mikakäre kwäre? b) ¿Ye bitikäre dre namani bare, aune kukwe ye tä dre driere nie Jehová yebätä?

¹¹ Nitre Israel rikadre ji medenbiti mikakäre gare ietre “muta” nämene näin känenkri, ye mikani niaratre jiebitikäre ne kwe nitre rükä Faraonkwe ñaka rüdre niaratre rüere aune kä ñaka namani tuin ietre. Akwa nitre Israel abokän ie kä namani tuin (ñäkädre Éxodo 14:19, 20 yebätä). Ye ngwane Jehovakwe murie kädrikri mikani mate dite mren ye ñäkäbitikäre ne kwe “mren  yekänti kä rabadre nöta”. Kä nikani raire ta raba ruin nie, ñobätä ñan aune Biblia tä mike gare murie namani mate dibire nükebe kä ngwen aune “mrä nitre Israel nikani mren yete ta kä nötare yebiti”. Nitre rükä Faraonkwe ye nämene näin karo rükäre kwetre yete, akwa nitre Israel abokän nämene näin bätäre gürere. Metrere, “nitre rükä Egipto ye töi kwitani ja rüere kwärikwäri kwe. Aune yanta mikani ngedenkä kwe karo kwetre yebätä aune ñaka namani nuäre ngwandre niaratre kräke” (Éxo. 14:21-25).

¹² Nitre Israel namani kwäre mren kwäräkri ye ngwane, kukwe ne niebare nuaindre Moisés ie: “Ja kise ngököte mrenbiti ta, ne kwe mren ye jatadreta nitre Egipto, karo rükäre kwetre aune nitre rükä kwetre tä näin mädäbiti yebiti”. Ñö jatani nen ye ngänikaire nitre Egipto tö namani gitiai akwa, “Jehovakwe [...] kitani mrente gatekäre”. Ñaka namani nuäre gitiadre niaratre kräke. “Ñaka namaninte nire jire iti” (Éxo. 14:26-28). Yebiti, Ngöbökwe mikani gare niara die tärä juta kwe ye mikakäre kwäre kukwe tare ye jökräbätä.

JERUSALÉN GANINTE YE NGWANE NIARATRE NGITIANI

13. ¿Jesukwe dre niebare nitre nänkä ben yei, aune niaratre yekwe kukwe meden ngwanintari jai?

¹³ Kukwe rabai bare ño jatäri Jehová töi mikakäre nemen bare ye gare metre ie. Kukwe ne ütiäte krubäte, kukwe ketamäkäre namani bare abokänbätä ni bike ja tötike ye bike mike gare: siklo kena yete Jerusalén ketaninkä rüe yekwe. Jehovakwe Monso kwe yebiti kukwe mikani gare nitre kristiano Jerusalén aune Judea ie ne kwe juta gadrete ye ngwane niaratre gitiadre, kukwe ye namani bare kä 70 yete. Jesukwe niebare: “Profeta Daniel käkwe tärä tikani jondron käme krubätebätä. Jondron käme nebrä käkwe jondron kwin dikainte jökrä. Jondron ne tuadi Ngöbö juete kä deme käteri yekänti [...] angwane nitre tä Judea, ye näre gitiadre ngutuäbätä” (Mat. 24:15, 16, NGT). ¿Kukwe niebare ye erere namanina nemen bare ye ñokänti namani gare nitre nänkä Jesube yei?

14. ¿Kukwe namani bare jatäri yekwe Jesús kukwei mikani gare ño?

¹⁴ Dre niebare Jesukwe ye kukwe namani bare metre jatäri käkwe mikani gare. Kä 66 ye ngwane nitre Roma rükä jie ngwan nämene Cestio Galo yekwe nükani Jerusalén, nitre nünanka Judea ye gatekäre. Nitre ñaka ni mada mike ütiäte jai, ye abokän nämene gare nitre guardia ye kwrere, ye ngitiani kä gitia käi templote yekänti aune nitre Roma namani ki ye dikente niaratre yebiti. Nitre kristiano ja ngwani mokre yei kukwe namani bare yekwe dre bämikani ye nükani gare metre ietre: “jondron käme nebrä käkwe jondron kwin dikainte jökrä Ngöbökwe mikadi ngwarbe jai” (nitre rükä ñaka Ngöbö mike täte aune jondron üai ngwarbe sribebare mikaka Ngöböre jai) ye nükani “kä deme” (ki templo) yekänti. Köbö yete kä namani “gitiadre ngutuäbätä” nitre ja tötikaka Kristokwe ie. Akwa, ¿juta nämene ketaninkä yekänti ño niaratre rabadre ngitie?  Kä namanina braibe kukwe ñan tuabare mikakäre nemen bare.

15, 16. a) ¿Jesukwe kukwe meden metre niebare nuaindre, aune ñobätä ütiäte nitre ja tötikaka niarabe käkwe mikadre täte? b) ¿Dre köböire ni rabaite kwäre?

¹⁵ Cestio Galo bätä nitre rükä kwe ye kämikaninkä aune guardiatre nikani jiebiti. Batibe, nitre rükä ye namani Jerusalén bäre mento angwane, kä namani gitiakäre nitre nänkä Kristobe yei. Jesukwe niebare metre ietre, niaratre käkwe jondron kwetre ye tuanemetre aune kämikadrekä jötrö ngwarbe kwetre (ñäkädre Mateo 24:17, 18 yebätä). ¿Ye nuaindre jötrö kwetre? Jän, ye erere namani bare. Köbö nikani braibe ta yete, guardiatre nükaninta aune namani nitre nünanka Jerusalén aune Judea ye mike ja dibiti ja mike niaratre yekri. Nitre nämene rüre jabe kwärikwäri ja mikakäre ütiäte ye ngwane, nitre nünanka jutate ye namani ja tare nike. Ñaka namani nuäre gitiakäre, nitre Roma nükaninta kä 70 ye ngwane bäri ñaka namani nuäre gitiakäre kräketre. (Luc. 19:43). Nitre ñaka ngitiani jötrö ye nakani kukwe tare yei. Akwa nitre kristiano käkwe Jesús kukwei mikani täte aune ngitiani ngutuä kokwäre ye namaninte nire. Jehovai nitre niara mikaka täte ye mika gare kwäre nükani gare metre niaratre itire itire yei. ¿Kukwe ne tä dre driere ja töi kräke nie?

¹⁶ Ja tare nikadi kri krubäte ye ngwane, kukwe rabai bare niebare ye erere jatai nakainkä jatäri angwane, Ngöbö tä kukwe niere nie Biblia yebiti aune juta kwe yebiti ye erere ni kristiano rabadre mike täte: “[Mun] gitiadre ngutuäbätä”. Kukwe ye erere rabai bare ni näire akwa ni gitiadre ño ye jämi gare nie. * Akwa, kä debe erere te Jehovakwe kukwe ye mikai gare yei nikwe tö ngwandre. Ni rabadrete kwäre yekäre nikwe Ngöbö mikadre täte metre, yebätä ni rabadre kukwe ne ngwandretari jai: “¿Kä nengwane Jehovata nitre niara mikaka täte yebätä mäträre ye tä mate ño tibätä? ¿Tita mike täte jötrö ngwarbe, o tita töbike bati bobu nuainkäre?” (Sant. 3:17).

KUKWE TÄ NÖKRÖ NI KEN YE KRÄKE NGÖBÖTA NI MIKE DITE

17. ¿Habacuc kukwe niebare ye tä dre mike gare juta Ngöbökwe rüe rakaikä yebätä?

¹⁷ Gog käkwe rüdi kädrieni kena yebätä ani töbiketa. Kukwe rabadre bare niebare ye ererebätä, Habacuc niebare: “Kukwe juruaba tie aune ti bule jataba tare; kä ngö yebätä ti kada rababa grükekä; ti krä jataba di nekä; aune ti rababa töbike krubäte, köbö ja tare nikara ye ngübakäre, nänkäre mintokwäre [rükäre Jehovai] nitre yekänti [ye abokän nitre rükä niara rüere], nänkäre nitre ye rüere” (Hab. 3:16). Miri gare nikwe jai ye erere, juta Ngöbökwe rüe rabai ye ngwane dre rabai bare ye namani gare metre Habacuc ni Ngöbö kukwei niekä ie, yebätä niara bule namani nikrenkä, kada kwata namani grükekä aune di namani nekä. Habacuc nikaninkä ye tä mike gare nie, nitre ja mikaka Gog yekri käkwe ja mikai ni rüere ye ngwane kukwe ye ñaka nuäre ükadrete rabai tuin nie. Akwa, ni Ngöbö kukwe niekä ye erere, nikwe tö ngwandre aune kukwe ye ngübadre bätärekä, aune Jehovakwe juta kwe mikai kwäre köbö kri kwe yete ye rabadre metre ni kräke (Hab. 3:18, 19).

18. a) ¿Ni rüe rakaikä ye ñobätä nikwe ñaka jürä ngwandre jabätä? b) ¿Dre mikai gare nikwe jai bämän madabätä?

¹⁸ Kukwe ketamä namani bare nibi gare nie, ye tä mike gare metre Jehová ie juta kwe mika gare kwäre. Kukwe niebare kwe ye jökrä rabai bare metre. Ganandi kwe ye tä gare metre ie. Ne madakäre, ni tö ja tuai ganane niarabe gwaire angwane, nikwe niara mikadre täte metre nememe kä krüte ye ngwane. Akwa, ¿Jehová tä ni dimike ño ja ngwankäre metre kä nengwane? Kukwe ja tötikara ja känenkäre yekänti kukwe ne mikai gare.

[Nota]

[Kukwe ngwantarita]

[Jondron üai bämikani página 24]

¿Erametre nitre rükä Faraonkwe ye namani kukwe tare mikakäre nitre Israel kräke?