Jesús tä juto biare rün mikakäre gare nie
Jesús tä juto biare rün mikakäre gare nie
“Ti Rün abko gare ñakare ni mda mdaye, akwa ti niara Odei ne aibe ie niara gare amne ti tö [...] mikai gare nire nireye, ye erere ie rabadi gare” (LUC. 10:22).
¿MÄ RABA MIKE GARE?
¿Ñobätä Jesús aibe nämene Rün töi ño ye mikakäre gare?
¿Jesukwe Rün ye mikani gare ño?
¿Jesukwe Rün mikani gare ye erere ni raba nuainne ño?
1, 2. ¿Kukwe meden ngwantarita abokän nitre kwati tö mikai gare jai, aune ñobätä?
¿NIRE abokän Ngöbö? Kukwe ngwantarita ne nitre kwati tö mikai gare jai. Ñodre, nitre jökrä bäsi tä ja bien kristiano ye tätre nütüre ni tärä Nimä Ngöböre itibe, akwa niaratre jökrä bäsi ie gare arato, kukwe ne ñaka nuäre rükadre gare. Ni nänkä kukwebätä käkwe kukwe ne tikabare tärä sribebare kwe yebätä: “Kukwe drieta ye ñaka raba nüke gare jire nie. Ni kä nebätä töi yebiti ta bäri kukwe |ye tä aune ñaka raba nüke gare metre jire”. Ne madakäre, nitre jökrä bäsi tä jondron nire jatani nikwite jatäri drieta mike täte, ye tätre nütüre Ngöbö ñaka jire. Jondron jökrä sribebare kwin krubäte ye abokän nükani ja töbiti tätre nütüre. Erametre ni raba niere, Charles Darwin ñaka niebare Ngöbö ye abokän ñaka jire, ñakare aune niebare kwe: “Raba ruin tie, kukwe meden metre ye ñaka raba nüke gare jire ni kä nebätä yei”.
2 Nitre tä ñaka kukwe ja erebe mike täte, akwa kä ruäre ngwane nitre ye jökrä bäsi tä Ngöbö ye tärä o ñakare ye ngwentari jai. Nitre töta nemen kukwe mikai gare jai ye erere ñaka tä nüke gare ietre angwane, ñaka töta nemen ja di ngwain jankunu mikakäre gare jai. Erametre, Satana “kätä nitre ñan Ngöbö mike era jai töi gainte” (2 Cor. 4:4, NGT). Ye medenbätä, nitre jökrä bäsi ie ñaka nüke gare jire nire abokän ni Rün metre kä kwinta Sribekä (Isa. 45:18).
3. a) ¿Nirekwe Ngöbö töi ño ye mikani gare nie? b) ¿Kukwe meden ngwantarita abokän nikwe mikai gare jai?
3 Akwa, ütiäte krubäte nitre kukwe metre mikadre gare jai Ngöböbätä. ¿Ñobätä? Ñobätä ñan aune nire nire käkwe “Jehová [kädekaite]” ye aibe rabai kwäre (Rom. 10:13, NM). Akwa Jehová kä ye kädekatekäre, ütiäte krubäte kukwe mikadre gare jai niara yebätä aune kukwe ye erere Jesukwe driebare nitre ja tötikaka ben yei, abokän känti Rün töi ño ye mikani gare kwe (ñäkädre Lucas 10:22 yebätä). ¿Ñobätä niara aibe käkwe nuainbare bäri kwin? ¿Nuainbare ño kwe? ¿Aune ni raba ja töi mike ño niara erere ni tädre nitre mada dimike Ngöbö töi ño mike nüke gare jai ye ngwane? Kukwe ngwantarita ne ani mike gare jai.
NI MADA ÑAKA TÖTIKANI JESUKRISTO ERERE
4, 5. ¿Ñobätä Jesús aibe nämene Rün töi ño ye mike gare?
4 Jesús nämene tötikani kwin krubäte Rün mikakäre gare. ¿Ñobätä? Ñobätä ñan aune niara ye sribebare kena; niara jatadre kä tibienbätä ye känenkri nämene nüne ni üaire erere kä kwinbiti, nämene “Ngöbö Monsoi itibe” (Juan 1:14; 3:18, NGT). ¡Kukwe kwin krubäte nämene kwe! Jondron mada sribe jäme jire ye känenkri, Rün nämenena niara tarere aune ja kete ben bätä rün töi ño aune ja ngwen ño ye nämene mike gare jai arato. Erametre, Jesús aune Rün ye blitabare metre jabe kwärikwäri kä kwati krubäte te aune ja namani tare krubäte kwetre (Juan 5:20; 14:31). ¡Jesús ie Rün töi ño ye namani gare täte! (Ñäkädre Colosenses 1:15-17 yebätä).
5 Ngöbökwe Jesús dianinkä ja kukwei mikakäre gare nitre ie, yebätä kädekata “Ngöbö Kukwei” (Apoc. 19:13). Jesús ye aibe raba Rün mike gare o kukwe driere niara yebätä. Ye medenbätä Juankwe Tärä tikani yete, niebare kwe “Kukwe” ye nämene “Rün mäträräbätä” (Juan 1:1, 18, Kuke Koin, (tärä okwä ükaninte)). Kukwe ne tä mike gare, kirabe nitre nübai nämene mröre ye nämene täke ja ken ni nübaikä yebe, aune ye köböire nämene dokwä mike ni nübaikä ye ken blitakäre kaibe ben. Ye erere arato, Jesús nämene ja ken Rünbe ye köböire nämene blite kukwe ütiätebätä jabe.
6, 7. ¿Ngöbö namani ja mäke ño bäri kwin Monsoi yebe?
6 Niaratre namani ja mäke bäri kwin ye ngwane, Rün namani ‘[Monsoi] tarere bäri köbö kwatire kwatire teʼ (ñäkädre Proverbios 8:22, 23, 30, 31 yebätä). Nemen bare käre ye erere, Jesús namani sribire gwairebe Rün kwe yebe aune töi ño ye erere niara namani ja töi mike, ye köböire niaratre namani ja tarere bäri kwin kwärikwäri. Jehová namani nitre üaire töbätä itire itire sribere aune namani mike tuin ño jai ye niara nämene mike ñärärä angwane, Ngöbö töi ye namani bäri ütiäte kräke.
7 Jehová ñaka gobranka kwin niebare Satanakwe ye ngwane, Ngöbö ni tarekä, kukwe ükete metre, töbätä aune dite bämikani ño kwe kukwe tare näire ye niarakwe tuani. Kukwe ye niara töi ükaninte ja tuakäre kukwe tare ben rükadre Kä tibienbätä ye ngwane (Juan 5:19).
8. Tärä ketabokä Bibliabätä känti Jesukwe kukwe driebare ño kädrieta, ¿ye tä ni dimike ño Rün töi ye mike nüke gare bäri kwin jai?
8 Jesús nämene ja mäke kwin krubäte Jehovabe ye köböire, niara aibe käkwe Rün töi ño ye mikani gare bäri kwin. Ye medenbätä, Jesús käkwe dre dre nuainbare aune dre niebare ye nikwe mikai gare jai angwane, ye aibe köböire Rün ye rükadi gare nie. Ani kukwe ye bämike. Kukwe ja tare ye nikwe känändre diccionario ye aibebätä angwane, ñaka rükadre gare kwin täte nie. Akwa, Tärä ketabokä Bibliabätä abokän känti Jesukwe kukwe driebare ño aune niara töi namani ño nitre mada kräke kädrieta yebätä nita töbiketari angwane, kukwe “Ngöbö abko ni tarekä” ye tä nüke gare bäri kwin nie (1 Juan 4:8, 16). Aune ye erere nemen bare arato Ngöbö töi mada mada kwin bämikani Kristokwe nitre ja tötikaka niarabe ie yebätä.
JESUKWE RÜN TÖI ÑO YE MIKANI GARE
9. a) ¿Kukwe meden ketebubiti Jesukwe Rün ye mikani gare nitre ja tötikaka ben yei? b) Jesukwe kukwe driebare ye ngwane kukwe meden bämikani kwe Rün mikakäre gare ye mä raba niere.
9 Nitre ja tötikaka kena Jesukwe aune nitre mada rabai ja känenkäre nänkä niara jiebiti yei, ¿Jesukwe rün ye mikani gare ño? Metrere, kukwe ketebubiti: kukwe driebare kwe aune kukwe nuainbare kwe yebiti. Kukwe driebare kwe yebätä nikwe töbikadretari angwane, Jehová töi ño aune ja ngwen ño aune ja ruin ño ie ye nükani gare kwin niarai ye raba nüke gare nie arato. Ñodre, Rün ye ketabare kwe ni obeja ngübaka kwin yebätä, abokän rikadre obeja krati riadrete ye känene aune kwandreta ie ye ngwane, “obeja kratibe ye abko bäri käi rabadre nuäre btä obeja gre ketabkä bti krä jätäbti krä ökän yebti ta”. ¿Kukwe bämikani kwe ye mikani gare ño kwe? Niebare kwe: “Ye kwrere arato, mun Rün tä kä käinbti sete abko ñan tö nitre tödekaka tibti [...] tuai nente jire iti jakän” (Mat. 18:12-14). ¿Kukwe ne tä dre mike gare nie ja töi kräke? Ruäre ngwane ja rabadre ruin ñaka ütiäte nie o ni käi kwitakata jabiti rabadre ruin nie, akwa ni Rün kä kwinbiti ye töita krubäte nibätä, ñobätä ñan aune nita “nitre braibe” niebare Jesukwe ye ngätäite arato.
10. ¿Jesukwe kukwe nuainbare yebiti Rün töi ye mikani gare ño kwe?
10 Jesukwe Rün ye mikani gare nitre ja tötikaka ben yei kukwe nuainbare kwe yebiti, ye abokän kukwe ketebukäre. Ye medenbätä, ni Rün mike tuadre nunye niebare Felipekwe niarai ye ngwane, niebare kwe: “Nire tä ti tuin, kätä ti Rün tuin arato” (Juan 14:8, 9, NGT). Kukwe keta kabre känti Jesukwe Ngöbö töi kwin mikani gare ye ani mike gare jai. Ni “bren lebra kisete” tö namani niara tuai ja kräkäimike ye ngwane, niarakwe kise mikanibätä aune niebare kwe ie: “Ma rabata kuinta, ie ti tö nibi”. Jesukwe kukwe nuainbare ye Jehová köböire nükani gare ni bren lepra kisete ie (Luc. 5:12, 13). Lázaro krütani ye ngwane, Jesús “namani ulire krubäte”, bätä töi ñaka namani jäme aune “muabare” kwe, ye köböire Rün ni mike tuin bobre jai ye nükani gare nitre ja tötikaka niarabe yei. Niarakwe mikaita nire ye nämenena gare ie akwa Lázaro mräkä aune ja ketamuko kwe namani tare nike ye käkwe niara mikani ulire (Juan 11:32-35, 40-43). Erametre, kukwe namani bare kira kädrieta Bibliabätä ye tärä gare kwin nie, abokän känti ni Rün kä kwinbiti ni mike tuin bobre jai ye nüke gare nie Jesukwe kukwe nuainbare yebiti.
11. a) Nitre jondron nire rürübäinkä juanintari jubäre Jesukwe templo yete, ¿yebiti tä dre mike gare nie Rün yebätä? b) ¿Ñobätä kukwe namani bare ye kwin krubäte?
11 Ne madakäre, köbö mada ngwane, nitre nämene nibi aune obeja rürübäine templo yete juanintari Kristokwe. Kö krä kia kwitani kwe ye bitikäre, ngwian nämene mikani mesabiti ye kwitaninkä kwe aune ngwian ye kitani burere kwe (Juan 2:13-17). ¿Kukwe ne tä dre driere? Jesukwe kukwe nuainbare ye käkwe kukwe niebare Davidkwe ye ngwani törö nitre ja tötikaka ben yei: “Tita ju mäkwe tarere ye tä ñukwä kwrere tibätä” (Sal. 69:9). Jesukwe ja töi mikani kwatibe kukwe ye nuainne, yebiti bämikani kwe niara töi nämene kwatibe ja mikakäre kukwe metre yekri. ¿Kukwe yekänti niarakwe Rün töi bämikani ño ye nü gare nie? Kukwe namani bare ne tä Ngöbö die tärä krubäte kukwe käme diankakäre Kä tibienbätä ye ñan aibe ngwen törö nie, ñakare aune niara töita krubäte nuainbätä ye mikata gare kwe arato. Nitre kä nebätä töita bäri käme, yebätä ja ruin ño Jehovai kä nengwane ye bämikani Jesukwe kukwe nuainbare kwe yebiti. Nita ja tuin gwärere kukwe käme ben ye ngwane, ¡nikwe kukwe kwin krubäte ne ngwandre törö jai!
12, 13. ¿Jesukwe nitre ja tötikaka kwe mikani tuin ño jai ye tä dre mike gare nie Jehová yebätä?
12 Jesukwe nitre ja tötikaka kwe mikani tuin ño jai, yebiti kukwe mada bämikani kwe arato. Käre nämene ñäke jai niaratre meden bäri ütiäte yebätä (Mar. 9:33-35; 10:43; Luc. 9:46). Jesukwe nünanbare kirabe Rün yebe, aisete niara töita ño nitre tö bikai kri kräke ye nämene gare kwin niarai (2 Sam. 22:28; Sal. 138:6). Ne madakäre, Satana käkwe dre nuainbare ja mikakäre ütiäte bätä dite kri ye niarakwe tuani. Ye medenbätä, nitre ja tötikaka ben ye niarakwe tötikani bätä dianinkä kwe ne kwe rabadre apóstol erere, ye abokän namani ja töi mike Satana erere yekwe Kristo mikani ulire krubäte. Niaratre käkwe ja töi mikani ye erere arato nememe mrä Jesús murie ketadre ye käi näire (Luc. 22:24-27). Akwa niarakwe ñaka ja di ngwani nekä, mäträbare kwe niaratre yebätä töi kwinbiti, aune ja känenkäre niaratre rabai ja töi mike bobre niara erere ye ie tö ngwani kwe arato (Fili. 2:5-8).
13 Jesukwe mäträbare bätärekä nitre ja tötikaka kwe yebätä, ¿ye köböire Rün töi ño ye nüke gare nie? Ni ja mike ngite bati bobu akwa ni rün kä kwinbiti ye ñaka ni tuenmetre, ye tuin nie Kristo käkwe jondron nuainbare aune kukwe niebare yebiti, ¿ñan ererea? Ngöbö töi kwin yebätä nita töbike angwane, ¿ni töta nemen ja töi kwitai kukwe käme nuainta nikwe yebätä?
JESÚS NÄMENE JUTO BIARE RÜN MIKAKÄRE GARE
14. ¿Jesús nämene juto biare Rün mikakäre gare ye bämikani ño kwe?
14 Gobrantre kwati tä nitre gobrainta kwetre yei ñaka kukwe mike gare jire, kukwe meden metre ye niaratre ñaka töta nemen tuai nemen gare ietre. Akwa Jesús ñaka nuainbare ye erere, niara nämene juto biare kukwe nämene gare krubäte ie Rünbätä ye mikakäre gare (ñäkädre Mateo 11:27 yebätä). Ne madakäre, nitre ja tötikaka niarabe ye iti käkwe niebare erere: “Ngöbö Monsoi nükani; käkwe ja tö biani nie, abokän kwe [...] [kukwe] metre rükadre gare nie” Jehová yebätä (1 Juan 5:20). ¿Ye dre gärätä? Ye abokän niarakwe nitre ye tötikaninkä ne kwe kukwe nie nämene kwe Rünbätä ye rükadre gare ietre. Niarakwe ñaka Jehová ükani jire nitre yebätä aune niara ye ni Nimä Ngöböre itibe ñaka driebare jire kwe arato.
15. Kukwe nämene gare krubäte Jesús ie Rün yebätä, ¿akwa ñobätä ñaka mikani gare jökrä kwe?
15 ¿Kukwe nämene gare Jesús ie Rünbätä ye mikani gare täte jökrä kwe? Ñakare, ñobätä ñan aune kukwe keta kabre Rün yebätä abokän ñaka niebare kwe (ñäkädre Juan 16:12 yebätä). ¿Ñobätä? Ñobätä ye niara arabe käkwe mikaninta gare nitre ja tötikaka kwe yei: “Tikwe niedre jökrä angwane, rabadre bäri tare munkrä”. Akwa, üai deme niaratre “die mikaka” ye rükadi angwane, kukwe keta kabre mikai gare ietre, abokän käkwe niaratre jie ngwandi “kukwe era metre jire jökrä” ye kokwäre niebare kwe ietre (Juan 16:7, 13). Nitre rüne ñaka tä kukwe ruäre mike gare monsotre kwe yei, ñakare aune monsotre kwe ye tä nemen kri aune kukwe ye raba nüke gare ietre tä nemen tuin ie angwane tä mike gare ietre, ye erere Kristo käkwe ñaka kukwe ruäre mikani gare Rün yebätä nitre ja tötikaka kwe yei, niaratre ie kukwe namani nüke gare ye ngwane mikani gare kwe ietre. Niaratre töi nämene braibe ye ngwani törö kwe jai töi kwinbiti.
16, 17. ¿Ñobätä ni raba Rün ye mike gare arato?
16 Ni töi kwin krubäte ye tä nemen gare nie aune tä nemen ütiäte ni kräke angwane, ni töta nemen niara ye kädriei ni madabe, ¿ñan ererea? Ye erere Jesukwe nuainbare nämene Kä tibienbätä ye ngwane: blitabare kwe Rün yebätä (Juan 17:25, 26). Ni tädre nitre mada dimike Jehová mike gare jai ye ngwane, ¿ni raba ja ngwen ño niara ye erere?
17 Nibira gare nie ye erere, Jesús aibe ie Rün ye nämene gare bäri kwin ni mada ye ngwä, aune nämene juto biare mikakäre gare arato. Ne madakäre niarakwe nitre ja tötikaka kwe ye tötikani ne kwe kukwe ñaka nuäre rükadre gare Ngöbö yebätä ye rükadre gare ietre. Kristo ye köböire, nita Jehová mike ütiäte jai nitre jökrä bäsi kä nengwane yebiti ta, aune kukwe driebare kwe bätä jondron nuainbare kwe ye köböire Rün mikani nüke gare kwe nie, yebätä nita debe bien krubäte. Erametre, Ngöbö nükanina gare nie ni raba nütüre (Jer. 9:24; 1 Cor. 1:31). Nita ja di ngwen rökrakäre Jehová ken, yebätä niara tä nökrö ni ken arato (Sant. 4:8). Ye köböire, ni raba kukwe niarabätä ye mike gare. ¿Ni raba nuainne ño?
18, 19. ¿Ni raba Rün ye mike gare ño? Mä raba mike gare.
18 Ütiäte krubäte ni rabadre ja ngwen Jesús ye erere Rün mikakäre gare kukwe nieta nikwe aune jondron nuainta nikwe yebiti. Ni rabadre ngwen törö jai, nitre kwati ie nita kukwe driere yei Ngöbö ñaka gare jire. Kukwe ngwarbe drieta ye tä Ngöbö ye bämike ñaka kwin niaratre kräke. Akwa Ngöbö kädekata ño, aune tö dre dre nuain nitre kä tibienbätä kräke bätä niara ye ño erametre drieta Bibliakwe gare nie ye erere ni raba driere ietre. Ne madakäre, kukwe namani bare kädrieta Bibliabätä, abokän köböire Ngöbö töi ño ye nüke gare bäri kwin nie kä nengwane, ye ni raba kädriere arato ja mräkätre kukwebätä yebe. Ye erere angwane, kukwe kwin rabai nemen niaratre yekwe arato.
19 ¿Aune ni raba ja di ngwen ño ne kwe jondron nuainta nikwe ye rabadre Jesukwe nuainbare ye erere, ne kwe ni rabadre Rün mike gare? Kristo tare nikwe ye nita bämike jondron nuainta nikwe yebiti, ye jutuadi nitre mada ie angwane, töi rabadi Ngöbö aune Jesús ye mikai täte (Efe. 5:1, 2). Apóstol Pablo tä mäträre nibätä: “Kristo käkwe nünabare ño, ye kwrere tita nüne, aisete tita nüne ño, ye kwrere munkwe nüna” (1 Cor. 11:1). Sribi ütiäte krubäte tä ni kisete Jehová töi ño ye mikakäre gare nitre madai jondron nuainta nikwe yebiti. Ye medenbätä, ani jankunu ja ngwen Jesús ye erere aune Rün töi ño ye mike gare nitre madai.
[Kukwe ngwantarita]
