Nikwe Jehová mikadre täte jankunu ja brukwä tätebiti
Nikwe Jehová mikadre täte jankunu ja brukwä tätebiti
“Monso tikwe, mäkwe Ngöbö mä rünkwe ye mika gare jai aune mäkwe mika täte ja brukwä tätebiti” (1 CRÓ. 28:9).
KUKWE NGWANTARITA NE ANI MIKE GARE:
¿Ni brukwä üaire ye dre gärätä?
¿Ni brukwä tä ño ye mikakäre gare jai dre käkwe ni dimikai?
¿Ni raba Jehová mike täte ño jankunu ja brukwä tätebiti?
1, 2. a) ¿Ni ngrabare meden abokän kädekateta bäri Bibliabätä akwa kukwe ja üaire yebiti? b) ¿Ni brukwä ye dre gärätä ye ñobätä ütiäte nikwe mikadre nüke gare jai?
KÄRE Biblia tä blite ni ngrabare ruäre yebätä akwa kukwe ja üaire yebiti. Ñodre, Job niebare: “Ti kise tikwe yebiti ti ñaka ni mada nuainne tare”. Rei Salomón tikabare: “Kukwe kwin mikata gare ye tä ni krä mike köte”. Jehová mikani gare Ezequiel ie: “Diamante bäri ribi pedernal kräke, ye kwrere tikwe mä küben mikani”. Aune apóstol Pablo ie niebare: “Jondron jene mätä niere nun olote” (Job 16:17; Pro. 15:30; Eze. 3:9; Hech. 17:20, Kuke Kuin, (tärä okwä ükaninte)).
2 Bibliabätä blitata krubäte ni brukwä yebätä. Ana, meri Ngöbö mikaka metre täte yekwe orabare ngwane, blitabare kwe brukwä yebätä akwa kukwe ja üaire yebiti: “Jehová ye käi juto ti brukwäbätä” (1 Sam. 2:1). Kukwe brukwä ye tä tikani mil krati näre Bibliabätä aune käre bämikata kukwe ja üaire yebiti. Ni brukwä ye dre gärätä mikadre nüke gare jai ye ütiäte krubäte ni kräke, ñobätä ñan aune Ngöbö Kukwei tä mike gare, ni rabadre ngübarebiti o kriemike (ñäkädre Proverbios 4:23 yebätä).
NI BRUKWÄ YEBITI DRE BÄMIKATA
3. ¿Nikwe dre nuaindre ne kwe kukwe brukwä kädekateta Bibliabätä ye rükadre gare nie aune bämika raba drebätä?
3 Erametre ni brukwä ye abokän dre gärätä Biblia ñaka tä mike gare nie kukwe mikata gare diccionario yebiti kwrere, akwa ye dre dre bämikata abokän tä mike nüke gare nie. ¿Tä nuainne ño? Kukwe ye bämikakäre, ani töbike ju yebätä. Nikwe nikradre jerekäbe ju yebiti ta aune ki yebätä angwane, ju ye bä ño erametre ye ñaka raba nemen gare nie. Akwa nikwe nändrete mento ju ye mikakäre ñärärä bäri kwin angwane, ju bä ño ye raba nemen gare täte nie. Ye erere arato, kukwe “brukwä” nieta ye abokän dre gärätä erametre ye mikakäre nüke gare jökrä jai, texto keta kabre känti kukwe ye kädekateta ye ni rabadre mike nüke gare kwin jai. ¿Biblia tä blite brukwä yebätä angwane tä bämike ño?
4. a) ¿Ni brukwä ye dre gärätä? b) ¿Jesús kukwe niebare Mateo 22:37 ye dre gärätä?
4 Bibliabätä brukwä nieta ye abokän ni brukwä ño, ni tö drei ja kräke, ni töi, nita ja ngwen ño, sribi meden nuain gare nie, ñokäre nita jondron nuainne aune ni tö dre nuaindi ye gärätä (ñäkädre Deuteronomio 15:7; Proverbios 16:9 bätä Hechos 2:26 yebätä). Tärä kukwe mikakäre gare jai ye tä ni brukwä ja üaire ye bämike “ni brukwä ño yebätä”. Akwa, ruäre ngwane ye bämikata metrere kukwe braibebiti. Ñodre, Jesús mikani gare: “Mäkwe Jehová Ngöbö mäkwe taredre ja brukwä tätebiti, töi tätebiti, ja nire tätebiti” (Mat. 22:37, NM). Texto nebätä, brukwä ye bämikata, ja ruin ño nie aune ni tö dre ie ja kräke yebätä. Jesukwe metrere “brukwä”, “ja nire” aune “töi” niebare ye ngwane nämene mike gare, ni töita Ngöbö tarebätä ye nikwe ñaka bämikadre ja ruin ño nie ye aibebiti, ñakare aune nita dre nuainne ja nire nikwe aune ni töi yebiti ye ni rabadre bämike arato (Juan 17:3; Efe. 6:6). Akwa, kukwe brukwä ye tä tikani kaibe angwane, ye tä blite dreta ni brukwäte yebätä.
ÑOBÄTÄ NIKWE JA BRUKWÄ KRIE MIKADRE
5. ¿Ñobätä ni rabadre ja di ngwen Jehová mike täte ja brukwä tätebiti?
5 Rei David mäträbare krörö Salomón yebätä: “Monso tikwe, mäkwe Ngöbö mä rünkwe ye mika gare jai aune mäkwe mika täte ja brukwä tätebiti aune kä jutobiti; ñobätä ñan aune Jehová tä ni jökrä brukwä ye mike gare jai” (1 Cró. 28:9). Jän, Ngöböta ni aune nitre jökrä ye brukwä mike gare jai (Pro. 17:3; 21:2). Nita ja mäke kwin Jehovabe aune dre kwin tä ni kräke ja känenkäre ye abokän nita dre nuainne niara tä mike ñärärä ye köböire. Ye medenbätä, David mäträbare ye nikwe mikadre täte aune nikwe ja di ngwandre Jehová mike täte ja brukwä tätebiti.
6. ¿Ni töita Jehová mikabätä täte yebätä ni rabadre kukwe meden mike gare jai?
6 Nita kukwe driere kä jutobiti ye tä mike gare, ni töita sribibätä Jehová kräke ja brukwä tätebiti. Akwa ni rabadre ngwen törö jai, nitre töi käme gobrainta Satanakwe tä kukwe nuainne aune ni töi nierara ja mikabätä ngite ye raba ni töi mike ñaka kukwe ye nuainne jankunu (Jer. 17:9; Efe. 2:2). Ye medenbätä, ni töita kwatibe Ngöbö mikabätä täte ye ñaka rabadre dinekä yekäre, ni brukwä tä ño ye ni rabadre mike gare jankunu jai. ¿Nuain raba ño?
7. ¿Ni brukwä tä ño ye ñokänti raba nemen gare?
7 Kri brukwä ñaka tuin ye erere dreta ni brukwäte ye ñaka raba tuin arato. Akwa, Kukwe Kädriebare Jesukwe Ngudrebiti ye ngwane niebare kwe, kri tä kwin o ñakare ye abokän ngokwä tä mike gare ye erere arato sribi meden nuainta nikwe ye tä bämike ni brukwä tä kwin o ñakare (Mat. 7:17-20). Sribi meden ye ani mike gare jai.
NIKWE JA BRUKWÄ MIKADRE GARE KWIN JAI
8. Mateo 6:33 tä niere ye erere, ¿dre tä ni brukwäte ye bämika raba ño?
8 Kukwe Kädriebare Jesukwe Ngudrebiti ye ngwane, blitabare kwe sribi keteitibätä nitre niara kukwe nuaka yebe, abokänbiti niaratre rabadre bämike töi nämene sribibätä ja brukwä tätebiti Jehová kräke o ñakare. Jesús niebare: “Munkwe Gobran Ngöbökwe känä jankunu käne aune kukwe metre Ngöbökwe bätä jondron jökrä mada ye biandi munye” (Mat. 6:33, NM). Jondron meden mikata nuaindre käne jai ye tä mike gare, ni tö drei ja kräke, ni töi aune ni tö dre nuaindi. Dre dre mikata nuaindre käne nikwe jai yebätä töbikadre ye raba ni dimike nita sribire ja brukwä tätebiti Ngöbö kräke o ñakare ye nikwe mikadre nüke gare jai.
9. ¿Jesukwe nitre brare ruäre nübaibare dre nuainkäre aune kukwe niebare kwetre yebiti dre mikani gare kwetre?
9 “Munkwe Gobran Ngöbökwe känä jankunu käne” niebare Jesukwe nitre ja tötikaka niarabe ie, ye bitikäre kukwe keteiti namani bare abokän kätä bämike dre mikata nuaindre käne nikwe jai ye tä mike gare dreta erametre ni brukwäte. Tärä Lucas tä kukwe namani bare ye niere krörö, Jesús “ja töi mikani kwatibe nikenta Jerusalén”. Erametre, niarakwe ja tuai kukwe tare ben kä yekänti nämene gare ie akwa ja töi mikani kwatibe nikenta kwe. Biti, niara aune nitre apóstol kwe nämene näin “ji ngrabare” angwane, ni brare ngätäni bentre abokän Jesús nübaibare krörö: “Brän tibe”. Ni ye tö namani näin akwa, kukwe ne niebare kwe: “Ti tuemetre nikenta ken ja gwiriete, [...] ti rün [...] doboi mik[e]”. Kukwe ye arabe niebare kwe ni madai aune ni yekwe niebare ie: Ti Dänkien, ti tö rikai mabe akwa, ti ngämi niken känenkri ti tö rikai ja tuaita niere ti mräkäye” (Luc. 9:51, 57-61). Jesús ja töi mikani nikenta kwatibe aune täte ye ñaka ja erebe nitre mada töi namani jondron kwetre nuaindi käne yebe. Niaratre ja töi mikani jondron kwetre nuainne käne aune ñaka ja töi mikani kwetre sribi Ngöbökwe nuainne, yebiti bämikani kwetre niaratre töi ñaka nämene sribibätä ja brukwä tätebiti Ngöbö kräke.
10. a) ¿Jesukwe ni nübaibare ye nikwe kani ngäbiti ño? b) ¿Jesukwe dre niebare Lucas 9:62 yekänti?
10 Nitre ye ñaka ja töi mikani rabakäre ja tötikaka Jesube akwa ni abokän käkwe nuainbare aune nita sribire mantre jetebe Jehová kräke. Yebiti nita bämike ni töita ño niara kräke. Akwa, nita sribi konkrekasionte ye nuainne angwane, nikwe ja brukwä ye ngübadrebiti kukwe tare ñaka tuin nie yebätä. ¿Kukwe meden? Tärä Lucas yebätä Jesukwe kukwe ne mikani gare: “Ni sribikä tä niken dobro tikekä aradorebti akwa tä nikrenta ja jiebti [...] ni ye [...] ñakare kuin sribikä kä gobrankrä Ngöbökwebtä” (Luc. 9:62). ¿Kukwe ne tä dre mike gare nie?
“MUNKWE KUKWE KWIN YE KETATE DIME”
11. Ni sribikä tirete kädriebare Jesukwe ye sribi nuainbare, ¿akwa dre namani bare sribi yebätä aune ñobätä?
11 Kukwe drieta Lucas 9:62 ye rükadre gare nie yekäre, ani kukwe nieta bersikulo nekänti ye mike nüke gare kwin aune täte jai. Ni sribikä tirete ye tä dobro ye tikekä. Niara tä sribi ye nuainne angwane, töita jankunu ju kwe, mräkätre aune ja ketamuko kwe tätre mröre kritäni kötare kwärä aune musika kukwe nuin yebätä. ¡Niara töita krubäte ja tuai yete siba! Dobro tikairaka ere kwe ye bitikäre, töi rabaita “jändrän mda mda [tuanimetre kwe ye] jiebti”. Aune mrä nikraita ja jiebiti kwe. Kä täi ükadrete krubäte ie nura nöka köböi ye känenkri, akwa ni sribikä tirete ye ja töi mikai jondron mada jiebiti aune ye köböite sribi ye ñan rabadi bare ie. Aune niara töi ñaka sribibätä jankunu ye käkwe ni sribi bökänkä ye mikai ulire.
12. ¿Ni sribikä tirete kädrieta Lucas 9:62 ye erere ni kristiano kä nengwane raba ja ngwen ño?
12 Ani kukwe namani bare ye kete kukwe nemen bare kä nengwane yebätä. Ni sribikä tirete ye erere ni kristiano ruäre raba ja ngwen, raba sribire krubäte konkrekasionte, akwa brukwä kwe abokän tä kukwe tare te. Tä kukwe driere käre aune näin gätäbätä, akwa töita käre jondron ruäre kä nebätä tuin kwin ie ja kräke yebätä. Erametre tä jondron ye ribere krubäte ja brukwäte. Mrä mada, sribi nuainbare kwe metre Ngöbö kräke kä kwati krubäte te, akwa nitre kä nebätä tä jondron driere ie yebätä töita krubäte aune “jändrän mda mda [tuanimetre kwe ye] jiebti” tä ja töi miketa. Kukwe Ngöbökwe tä driedre krubäte, akwa niara ñaka niena “Ngöbö kukwei kuin käta ni mike nüne kärekäre” ye ketete dime, aisete ñaka niena sribi Ngöbökwe ye nuainne jankunu (Fili. 2:16). ¡Nikwe ñaka sribidre jankunu angwane, nikwe “sribi Bkänkä” Jehová mikai ulire! (Luc. 10:2).
13. ¿Dre nuaindre Jehová mikakäre täte ja brukwä tätebiti?
13 Kukwe metre mikata gare nie. Nändre gätäbätä konkrekasionte aune kukwe driedre käre bätä sribi mada Ngöbökwe nuaindre ye kwin krubäte. Akwa sribidre ja brukwä tätebiti Ngöbö kräke ye tä kukwe mada mike gare (2 Cró. 25:1, 2, 27). Ni kristiano tädre ja töi mike jankunu “jändrän mda mda [tuanimetre kwe ye] jiebti”, ye abokän nitre kä nebätä tä nüne ño ye erere nämene nüne, akwa täbe kukwe ye tarere angwane, Jehová ñaka raba niara kain ngäbiti (Luc. 17:32). Ni rabadre “kuin sribikä kä gobrankrä Ngöbökwebtä”, yekäre ütiäte krubäte kukwe nieta ne nikwe mikadre täte: “Munkwe ja brukwä mika kukwe käme ye kräke; munkwe kukwe kwin ye ketate dime” (Luc. 9:62; Rom. 12:9, NM). Ye erere, nitre gobrainta Satanakwe kätä jondron driere nie, ye raba nemen tuin kwin aune ütiäte nie, akwa ni jökrä rabadre ja ngübarebiti kukwe yebätä, ne kwe nikwe Jehová mikadre täte jankunu brukwä tätebiti (2 Cor. 11:14; ñäkädre Filipenses 3:13, 14 yebätä).
NIKWE JA NGWANDRE MOKRE
14, 15. a) ¿Drebiti Diablu tä ni brukwä juen ngwarbe? b) Kukwe bämikata párrafo känti ye erere Satana tä ni ngökö ño kukwe kämebiti?
14 Jehová tare nikwe ye ni töi mikani ja denkä mento niara mikakäre täte. Kä kwati te ni jökrä käkwe bämikanina, ni töita kwatibe sribibätä jankunu Jehová kräke ja brukwä tätebiti. Ye medenbätä Satana ñaka ja di ngwen nekä ni brukwä juankäre ngwarbe (Efe. 6:12). Nikwe ñaka Jehová tuainmetre jötrö ngwarbe ye niena gare ie. Akwa niara raba ni mike di nekä bätärekä jatäri ne kwe nikwe ñaka Jehová mikadre täte kä jutobiti ye gare ie, aune raba nuainne “jändrän kä nebtä” yebiti (ñäkädre Marcos 4:18, 19 yebätä). ¿Ñobätä kukwe ne erere tä nemen bare ie?
15 Kukwe ngwantarita ne mikakäre gare, ani töbike kukwe nebätä: Aro tädre sako krati mäkwe. Mä rikadre tirete ye ngwane, ni iti käkwe aro ye diandre kise kwati jai. ¿Mäkwe gadre? Ñakare. Jetebe se kwrere, ni mada käkwe aro ye diandre kise kwati jai arato. ¿Mäkwe gadre? Ñakare. ¿Ñobätä mäkwe ñaka gadre jire? Ñobätä ñan aune aro ye diankata ño aune tä nökröte ño sakote bätärekä jatäri ye ñaka tuin jire mäi. Ye erere arato, nitre gobrainta Satanakwe tä kukwe nuainne ye tä bätärekä jatäri ni töi mike ñaka sribire kä jutobiti Jehová kräke. Ni kristiano ñaka ja ngwen mokre angwane, ñongwane Diablukwe töi kwitadre kukwe ja üaire yebätä ye ñaka gadre jire kwe (Mat. 24:42; 1 Ped. 5:8).
ORADRE YE ÜTIÄTE KRUBÄTE
16. ¿Dre käkwe ni dimikai ja kriemike kö okwä käme krubäte Satanakwe yebätä?
16 Ye erere ngwane, ¿dre käkwe ni dimikai ja kriemike kö okwä käme krubäte Satanakwe yebätä aune sribire jankunu ja brukwä tätebiti Jehová kräke? (2 Cor. 2:11). Orasion ye ütiäte krubäte. Apóstol Pablo niebare nitre ja mräkätre kukwebätä yei, niaratre “rabadre nünenkä dite jabtä diablu rüere”. Aune ye bitikäre mäträbare kwe: “Munkwe blita kärekäre Ngöböbe” (Efe. 6:11, 18; 1 Ped. 4:7).
17. ¿Ni raba dre mike gare jai Jesús orabare yebätä?
17 Ja ngwankäre dite Diablu ye rüere, ni rabadre ja töi mike Jesús ye erere. Käre niarakwe orabare Rün kwe yei, köböire niara töi nämene sribibätä brukwä tätebiti niara kräke ye bämikani kwe. Ñodre, niara murie ketadre ye känenkri orabare deu kwe ye ani kädriere. Lucas tikabare: “Jesu namani ja tare nike bäri krübäte, akwa bäri namani blite ja dibti Ngöböbe” (Luc. 22:44). Jesús nämene orare ja dibiti krubäte, akwa nengwane niara namanina jerekäbe ja tuakäre kukwe tare krubäte ben Kä tibienbätä. Ye medenbätä “bäri namani blite ja dibti Ngöböbe” aune Rünkwe niara kukwei ye kani ngäbiti. Jesukwe orabare ye tä mike gare orasion ye nuain raba bäri arato. Ni nuate rabadre krubäte aune Satana rabadre kö okwä käme krubäte mike ni jiete ye ngwane, nikwe oradre bäri ja dibiti Jehovai ja di käräkäre ie aune ni kriemikadre kwe ye käräkäre ie.
18. a) ¿Orasion nuainta nikwe yebätä ni raba kukwe meden ngwentari jai aune ñobätä? b) ¿Kukwe meden tä ni brukwä üaire mike kwin aune tä nemen bare ño? ( Recuadro página 16 ye mikadre ñärärä).
18 ¿Nikwe orasion nuaindi ye köböire dre rabadi nikwe? Apóstol Pablo niebare: “Munkwe blita Ngöböbe jakrä amne, kukwe jökrä mik[a] gare ie munkwe amne, ja di käräre kwärä munkwe kuin nie Ngöböye arato. Munkwe nuend[i] kore angwane, Ngöbökwe kä jäme jakwe mikadi mun motobtä [brukwäbätä]” (Fili. 4:6, 7). Jän, oradre käre aune ja dibiti ye ütiäte krubäte ne kwe nikwe Jehová mikadre täte jankunu ja brukwä tätebiti (Luc. 6:12). Ye medenbätä, ni itire itire rabadre ngwentari jai: “¿Käre tita orare aune tita nuainne jankunu?” (Mat. 7:7; Rom. 12:12). Nikwe dre niedi ye käkwe mikai gare töi ñobiti ni tö Ngöbö mikai täte.
19. ¿Mäkwe dre nuaindi Jehová mikakäre täte jankunu ja brukwä tätebiti?
19 Nibira gare nie ye erere, kukwe meden mikata nuaindre nikwe käne jai yekwe mikai gare ni brukwä ye tä ño erametre. Ütiäte krubäte nikwe ja ngwandre ngwäte, ne kwe jondron tuanimetre nikwe o kö okwä Diablukwe ye ñaka ni mikadre di nekä aune ni rabadre Jehová mike täte jankunu ja brukwä tätebiti (ñäkädre Lucas 21:19, 34-36 yebätä). Akwa, David ye erere, ni rabadre ribere jankunu Jehovai, ‘ti brukwä ye mike keteitibe’ (Sal. 86:11).
[Kukwe ngwantarita]
[Recuadro página 16]
Kukwe Ketamäbiti Ni Raba Ja Brukwä Ngübare
Kukwe ruäre nuainta ni brukwä metre ngübabitikäre, ye erere kukwe ruäre nuaindre ni brukwä ja üaire ngübabitikäre. Kukwe ketamä ye mikata gare ja känenkäre.
1 Mrödre. Mrödre kwin ne kwe ni brukwä metre ye tädre kwin. Ni kristiano ja tötikadre kaibe Bibliabätä, töbikadretari aune nändre gätäbätä ye köböire rabadre mrö üaire kwin ye kwete ere (Sal. 1:1, 2; Pro. 15:28; Heb. 10:24, 25).
2 Ejercicio nuaindre. Ni brukwä tädre kwin yekäre, ruäre ngwane mikadre bete bäri jötrö. Ye erere, ni kristiano jökrä käkwe kukwe driedre bäri, o rabadre kä denkä bäri jai nuainkäre, ye köböire brukwä üaire kwe ye tädi kwin (Luc. 13:24; Fili. 3:12).
3 Ñaka töbikadre krubäte. Nitre kristiano tä nüne nitre ñaka Ngöbö mike täte ngätäite aune tätre sribire ben, ye kätä mike töbike krubäte aune brukwä metre kwetre bätä üaire ye tä tare nike. Ja mräkätre kukwebätä töita krubäte nibätä aune tä Jehová mike täte brukwä tätebiti yebe nikwe ja ketadre ne kwe ñaka töbikadre krubäte (Sal. 119:63; Pro. 13:20).
