Mä ja mikani gure metre ye mä mika dite

“Nitre tärä ja mäkäninte, nebrä ie ti tä niere. Akwa ne ñan tita niere mun ie, nebrä Ji dokwäte kri tä niere” (1 COR. 7:10, NGT).

¿MÄ RABA MIKE GARE?

¿Ño Ngöböta ni gure metre ye mike ni itibe kwrere?

¿Ni kristiano kisete kukwe kri tä muko kwe ben, ye nitre umbre konkrekasionte raba dimike ño?

¿Ja mika gure metre ye nikwe mikadre tuin ño jai?

1. ¿Nitre kristiano yei ja mika gure metre tuin ño, aune ñobätä?

NI KRISTIANO tä ja mike gure angwane, tä ja kukwei kitekä jai kwärikwäri Ngöbö okwäkänti, yebätä sribi dianta nuaindre kwe jai ye erere rabadre nuainne (Ecl. 5:4-6). Nire nire tä gure metre ye Jehovakwe “mikani ni itibe kwrere”, ñobätä ñan aune niarakwe kukwe ye ükaninte kena (Mar. 10:9). Gobran kä nebätä tä kukwe meden meden ükete ja mika gure yebätä akwa yebiti ta Ngöbö okwäkänti ni gure ye tä ni itibe kwrere. Aune ni kristiano ja mäkäninte jämi nemen kukwebätä känenkri o namanina kukwebätä ye ngwane, akwa kukwe ye tuin ño Jehovai ye erere rabadre mike tuin jai.

2. ¿Kukwe meden meden ngwantarita abokän mikai gare jai kukwe ja tötikara nekänti?

² Ja mika gure metre ye tä kä mike juto krubäte nibätä. Akwa, ¿nitre gure metre ñaka nüne kwin jabe ye ngwane rabadre dre nuainne? Nitre gure metre kisete kukwe kri tä, ¿ye raba nünenta kwin jabe? ¿Nitre gure metre ye ñaka tä nüne kwin jabe rabadre ruin ietre angwane, dre raba dimike?

¿KÄ MIKAI JUTO KWE NIBÄTÄ O NI MIKAI JA TARE NIKE KWE?

3, 4. ¿Ja töi mikadre ni dianbätä ja mukore ye ñaka nuaindre kwin angwane, dre raba nemen bare?

³ Ni kristiano gure metre tä nüne kwin jabe angwane, tä nüne kä jutobiti aune tä Jehová mike ütiäte. Akwa ñaka nüne kwin jabe ye ngwane, tä mike ulire krubäte. Ni kristiano töita ja mikabätä gure yekwe Ngöbö tuainmetre ja jie ngwen angwane, kukwe kwin nuaindi kwe kena. Ne madakäre, ja töi mikadre ni dianbätä ja mukore ye ñaka nuaindre kwin angwane, ja ñaka raba nemen ruin kwin nie aune ni raba ja tare nike. Ñodre, ni gure metre kisete sribita ye kräke monsotre bati ruäre jämi juto akwa tätre ja kukwe muko känene. Nitre ruäre abokän ie ja kukwe muko tä kwen internet yete aune tä ja mike gure jötrö ngwarbe biti ñaka tä nüne kwin jabe. Aune nitre mada abokän tä krire ja kukwe mukore ye ngwane tä  nemen gore jabe biti tätre ja mike gure metre, akwa tätre ja mike gure ye ngwane ruäre ñaka tä ja mike ütiäte jai kwärikwäri.

⁴ “Ni tödekaka Jesubti aibe ben ja mikadreta gure” ye nitre kristiano ruäre ñaka tä mike täte ye köböite tä nüne muko ñaka kukwe ja erebe mike täte niarabe yebe aune yebätä tä ja tare nike (1 Cor. 7:39). Ye erere namani bare mäbätä angwane, ngite juandre ta mäbiti mäkwe kärä Ngöböi aune mäkwe ja di kärä ie. Kukwe käme nuainbare kirabe yebätä niara ñaka tä ni mike kwäre, akwa nitre tä ja töi kwite kukwe käme yebätä ye niara tä dimike ja tuakäre kukwe yebe (Sal. 130:1-4). Mäkwe ja di ngwan brukwä tätebiti kä ngwen juto Ngöböbätä kä nengwane aune kärekäre, bätä “Jehová tä kä mike juto m[ä]bätä köböire [mä rabai] dite” (Neh. 8:10).

NI GURE METRE TÖI RABADRE JA TUAMETREBÄTÄ

5. ¿Ni gure metre ñaka nüne kwin jabe ye ngwane, ñaka raba ja töi mike drebätä?

⁵ Nitre gure metre ñaka nüne kwin jabe ye raba kukwe ne ngwentari jai: “¿Nun ñaka tä nüne kwin jabe ne ti raba miketa dite ne kwe nunkwe nünandre kwin jabe? ¡Ti raba nementa kaibe ti nämene käne ye erere angwane, biti tikwe ja mikadreta gure ni madabe!”. Tä ja töi mike ja tuametrebätä aune raba niere jai: “¡Ye ngwane ti rabadreta kaibe! ¿Ñobätä ti ñan ja tuenmetre ti muko ben? Biblia ñaka tä kukwe ye erere nuainmana akwa, ¿ñobätä ti ñan ja denkä mento aune ti rabadreta kä ngwen juto jabätä ti nämene kaibe kena ye erere?”. Ni kristiano ñaka ja töi mikadre kukwe ngwarbe yebätä, ñakare aune rabadre ja jie ngwamana Ngöböi aune rabadre ja di ngwen nuainkäre bäri.

6. Mateo 19:9 yekänti Jesús kukwe niebare ye mä raba mike gare.

⁶ Ni kristiano ja tuanemetre angwane, raba ja miketa gure o ñakare Biblia tä niere ye erere. Jesús niebare: “Meri ja mike ngite ñakare brare mda mdabe, akwa brare kwe käkwe tuadremetre, bti ja mikadre gure meri mdabe kwe, ye ngwane ni brare ye tä ja mike ngite [...] meri käne kwe rüere” (Mat. 19:9). Nete, kukwe fornicación ye abokän nitre tärä gure metre akwa nemen ni madabe aune kukwe mada käme nuainta rabakäre jabe ye meden gärätä. Yebätä, ni brare o merire gure metre ye ñaka ja mike ngite ja mika gure ngwarbe yebiti akwa tö rabadre ja tuainmetre ye ngwane, ütiäte krubäte rabadre orasion nuainne aune töbike kwin käne.

7. ¿Ni kristiano gure metre tä ja tuenmetre ye ngwane nitre mada tä kukwe ye tuin raba töbike ño?

⁷ Nitre gure metre tä ja tuenmetre ye ngwane niaratre ñaka tä kwin kukwe ja üaire yebiti mikata gare kwetre. Apóstol Pablo kukwe ne niebare: “Ni ie mräkä jie tika gare ñakare kuin käkwe ñan nitre jen Ngöbökwe gätäkä Jesu käbti ngibiadre kuin” (1 Tim. 3:5). Nitre nibu tä ja bien kristiano, akwa ñaka nüne kwin jabe, nitre kukwe ye tuaka raba töbike niaratre yebätä, erametre tätre kukwe  driere ju ju te akwa tä kukwe mada bä jene nuainne (Rom. 2:21-24).

8. ¿Ni brare aune meri gure metre jabe töita ja tuametrebätä angwane, ye tä dre mike gare?

⁸ Ni kristiano brare aune merire gure metre jabe ye töita ja tuametrebätä kukwe nieta Bibliabätä ye ñan aibätä angwane, tä bämike ñaka tä kwin kukwe ja üaire yebiti. Ye erere angwane, niaratre ye iti o nibu gwairebe ñaka tä kukwe nieta Bibliabätä erere nuainne. Erametre tätre tö ngwen Jehovai “ja brukwä tätebiti” angwane, ñaka raba nütüre tätre gure metre ye rabai niken ngwarbe (ñäkädre Proverbios 3:5, 6 yebätä).

9. ¿Nitre kristiano ruäre gure metre kisete kukweta yebätä tä kä ngwen nüke jai köböire dre kwin tä nemen kwetre?

⁹ Nitre kwati gure metre ye nämene nüne ñaka kwin jabe akwa kukwe ye ükaninte kwetre köböire tä nüne kwin jabe kä nengwane. Nitre kristiano ñaka tä ja töi mike ja tuenmetre jötrö ngwarbe köböire kukwe kwin tä nemen kwetre. Ni gure metre ye ñaka tädre kukwe ja erebe mike täte muko kwe yebe akwa raba nüne kwin jabe. Apóstol Pedro tikabare: “Mun merire tä ja mäkäninte ni brare ben, käkwe ja kwäräi mikadre kri ja kräke, abokän kwe nitre ruäre ñan Ngöbö kukwei mike täte, ne ganain raba mun merirekwe, ja mikata kwin munkwe yebiti; aune ñakare ganaindre munkwe ja kukweibiti; mun tä ja mike kwin deme, aune mun tä ni brare jakwe mike täte, nitre brare munkwe, käkwe tuadi” (1 Ped. 3:1, 2, NGT). Erametre nitre gure muko tä ja ngwen metre, ye köböire muko ñaka kukwebätä ye raba kukwe metre ye kain ngäbiti. Ni brare o meri gure metre tä kä ngwen nüke jai ja tuakäre kukweta kisete yebe bätä tä nüne jankunu jabe angwane, tä Ngöbö mike ütiäte jai aune ye köböire kä raba nemen juto krubäte niaratrebätä aune monso kwe yebätä.

10, 11. ¿Nitre gure metre yebätä dre raba nemen bare, akwa kukwe meden ie rabadre tö ngwen?

¹⁰ Nitre kristiano tä kaibe ye jökrä bäsi tö Ngöbö mikai täte, yebätä tä ni kukwebätä niaratre ben ye känene ja mukore. Akwa yebiti ta, kukwe kri raba nemen kisete. Ruäre ngwane, ni gure metre ye kisete töbika raba nemen krubäte. Aune brare o merire ye raba kukwe drieta ye tuenmetre täte. Ñodre, ja ngwai Linda, * ye nämene dite ja üaire akwa muko kwe jatani bätärekä jatäri kukwe metre ye tuenmetre biti kitaninkä kukwebätä. Ja ngwai Linda ye monsoi tärä. Ni kristiano tä gure metre kisete kukwe kri tädre aune ja tuainmetre kwetre rabadre ruin ietre ye ngwane, ¿dre nuaindre kwetre?

¹¹ Mä rabadre ngwentari jai: “¿Dre dre raba nakainkä akwa yebiti ta ti rabadre ja di ngwen jankunu ne kwe tita gure metre ye ñaka rikadre ngwarbe?”. Ni mada ñaka raba ja töi mike kukwe ye nuainne mä kräke. Ni gure rabadre ñaka nüne kwin jabe, akwa yebiti ta rabadre ñaka ja di ngwen nekä. Nire nire gure metre tä ja di ngwen ja tuakäre kukwe kri keta kabre ben ye ütiäte krubäte Jehová kräke (ñäkädre 1 Pedro 2:19, 20 yebätä). Ni kristiano gure metre tä ja di ngwen brukwä tätebiti nünankäre kwin muko kwe ben ye Jehová tä dimike Kukwe kwe yebiti aune üai deme yebiti.

NIARATRE TÄ JUTO BIARE NI DIMIKAKÄRE

12. ¿Ni gure käkwe ja di käräi nitre umbre konkrekasionte yei angwane, töi rabai ño nibätä?

¹² Mä ñaka nüne kwin mä muko ben angwane, mäkwe ja di kärä nitre kristiano ünä kukwe ja  üairebiti yei. Nitre umbre konkrekasionte ye tä ni obeja ngübaka ye kwrere aune töi kwinbiti mäträi kwe mäbätä Biblia yebiti (Hech. 20:28; Sant. 5:14, 15). Mäkwe ja di käräi ietre aune kukwe kri tä mä kisete mä muko ben mäkwe mikai gare ietre ye ngwane, niaratre ñaka mä aune mä muko mikai ütiäte jai ye mä ñaka raba nütüre. Mun tö Ngöbö mikai täte metre rabai tuin ietre angwane, tö rabai bäri mun dimikai aune mun tarere.

13. ¿Kukwe meden kwin nieta nie 1 Corintios 7:10-16 yebätä?

¹³ Nitre kristiano gure metre tä nüne mräkä ñaka kukwebätä ben yebätä tä ja di kärere nitre umbre konkrekasionte yei angwane, apóstol Pablo kukwe tikabare ne ererebiti tä mäträre niaratre yebätä: “Akwa nitre tärä ja mäkäninte, nebrä ie tita niere. Akwa ne ñan tita niere mun ie, nebrä Ji dokwäte kri tä niere: Meri ñan tärä ja tuametrekä brare ben. Akwa merikwe ja tuadremetre brare ben ngwane, tädre kaibe gwi. Ñakare ngwane rabadrera jäme, rikadreta brare kwe känti. Arato ni brare ñan tärä meri kwe tuametrekä [...] ¿ño köböire gare mäi, meri, mä ñan raba mä kwäräi brare mike kwäre? ¿Arato, ño köböire gare mäi, ni brare, mä ñan raba mä kwäräi merire mike kwäre?” (1 Cor. 7:10-16, NGT). ¡Ni gure metre ye muko brare o merire ñan kukwebätä käkwe kukwe metre kadre ngäbiti ye kwin krubäte!

14, 15. ¿Kukwe medenbätä ni kristiano gure metre ye raba ja töi mike ja denkä mento muko kwe yebe, akwa ñobätä rabadre töbike metre kukwe yebätä aune nuainne orasion yebiti?

¹⁴ Kukwe ruärebätä meri raba kä mikekä muko kwe yebätä. Ñodre, nitre ruäre gure metre ye tä ja töi mike ja diankabätä mento muko kwe yebätä, ñobätä ñan aune ñaka ngübare kwin jondron ribeta kwe jai yebiti aune kukwe ja üaire yebiti o tä nuainne tare krubäte.

¹⁵ Ni gure metre ja töi mikadre ja denkä mento muko kwe yebätä o ñakare ye tä gare niaratre itire itire yei. Akwa, ni gure metre tä kukwebätä ye rabadre ja brukwä tätebiti töbike kukwe yebätä orasion yebiti. Ñodre, niaratre ñaka tä kwin kukwe ja üaire yebiti köböite kukwe kri tä kisete angwane, ¿ni ñaka kukwebätä ye aibe ngite, o ni kukwebätä ye ñaka niena ja tötike Bibliabätä, ja ükökrö gätäte aune ñaka niena kukwe driere yebätä?

16. ¿Dre käkwe ni dimikai ñaka ja töi mike jötrö ngwarbe ja tuenmetre ni muko yebe?

¹⁶ Nita ja mäke Ngöböbe ye ütiäte krubäte ni kräke aune ja mika gure ükaninte Ngöbökwe yebätä nita debe bien ie, yekwe ni dimikai ñaka ja töi mike jötrö ngwarbe ja tuenmetre ni muko yebe. Ni Jehová mikaka täte ye töita krubäte Jehová kä ye mikabätä deme. Yebätä, nikwe ñaka ja töi mikadre jire ja tuametrebätä ni muko yebe aune ja mike gure ni madabe (Jer. 17:9; Mal. 2:13-16).

17. ¿Kukwe meden köböire Ngöbökwe ni gure metre tä kukwebätä ye “käräbare kä nuäre kräke” ni raba niere?

¹⁷ Ni kristiano tä gure metre ni ñaka kukwebätä ben ye rabadre ja di ngwen nüne kwin muko kwe yebe. Niara tädre ja di ngwen brukwä tätebiti nünankäre kwin muko kwe yebe, akwa muko ñaka kukwebätä yekwe ja töi mikadre ja denkä mento niarabätä angwane, ja ñaka rabadre  ruin ngite ie. Pablo tikabare: “Ni ñakare Ngöbö mike täte tö rabadre ni Ngöbö mike täte tuainmetre ngwane, raba ja tuenmetre. Ni eteba aune ni ngwai ja üai[re]biti abrä kräke ñan kukwe tärä, ñobätä ñakare angwane Ngöbökwe ni käräbare kä nuäre kräke” (1 Cor. 7:15, NGT). *

TÖ NGWEN JEHOVAI

18. Ni kristiano tä ja di ngwen ne kwe ñaka ja tuanemetre kwe muko kwe yebe, akwa yebiti ta ja tuanemetre kwetre, ¿tä ja di ngwen ye köböire dre kwin raba nemen kwe?

¹⁸ Kukwe kri tä mä kisete mä muko yebe ye ükadrete mäkwe angwane, mäkwe ja di kärä Jehovai aune käre mäkwe tö ngwan ie (ñäkädre Salmo 27:14 yebätä). Ja ngwai Linda kädirite käne, yekwe kä kwati krubäte te ja di ngwani ne kwe ñaka ja tuanemetre kwetre, akwa yebiti ta ja tuanimetre kwe muko kwe yebe. ¿Niarakwe ja di ngwani ngwarbe ruin ie? “Ñakare, nieta kwe. Nire nire nämene kukwe ye tuin ie kukwe kwin namani gare. Ti töita jäme. Kukwe yekwe nun ngängän dimikani ja töi mike kwatibe ja mikakäre kukwe metre yekri, ja ngökö ñöte aune ja mike metre ni testiko Jehovakwe”.

19. Ni gure kisete kukwe kri tädre akwa rabadre ja di ngwen ñaka ja tuenmetre muko ben, ¿köböire dre kwin raba nemen kwetre?

¹⁹ Ja ngwai mada kädekata Marilyn, käkwe tö ngwani Ngöböi aune ja di ngwani kwe, ñaka ja tuenmetre muko kwe ben ye käita jutobätä. Niara tä niere: “Ti muko ñaka nämä ti aune monsotre ngübare kwin aune kukwe ja üairebiti arato. Käne niara nämene sribire ni umbrere konkrekasionte, akwa ye bitikäre ñaka töbikabare kwin kwe sribi ruäre nuainkäre. Ñaka jataba nemen gätäbätä aune nun ñaka rababa blite jabe mada. Nitre tä ni kwati kämike kä jürä ngwankäre ni madabätä ye rababa bare juta nunkwe yekänti käkwe kä jürä mikaba krubäte tibätä köböite tikwe ja diankaba mento nitre jökräbätä. Ye ngwane rükaba gare tie, ti köböite siba nun ñaka nämä nüne kwin jabe. Nunkwe blitabata jabe, ja tötika ni mräkäbe ye nuainbata aune nun jataba näinta käre gätäbätä. Nitre umbre konkrekasionte yekwe ja töi mikaba kwin krubäte nun kräke aune nun dimikaba krubäte kwetre. Ye köböire, nun rababata nüne kwin jabe aune ja känenkäre, ti muko kisete sribi mikabata konkrekasionte. Kukwe kri krubäte ben nunkwe ja tuaba akwa ye bitikäre nun rababata nüne kä jutobiti jabe”.

20, 21. ¿Ja mika gure metre yebätä nikwe ja töi mikadre kwatibe dre nuainne?

²⁰ Ni tä kaibe o ni niena gure, ye rabadre ñaka kä jürä ngwen jabätä aune rabadre tö ngwen Jehovai kä jökrä ngwane. Kukwe kri tä ni kisete ni muko ben angwane, nikwe ja di ngwandre ja brukwä tätebiti kukwe ye ükete aune nikwe ngwandre törö jai, nire nire tä gure metre ye “ñan rabadi ni nibu kwrere mda, akwa rabadi ni itibe kwrere” (Mat. 19:6). Aune nikwe ngwandre törö jai, ni muko ñaka kukwe ja erebe mike täte nibe akwa yebiti ta nikwe jankunu Jehová mikai täte metre angwane, ni muko käkwe kukwe metre kai ngäbiti tuai nikwe ye käi rabai juto nibätä.

²¹ Nita nüne kwin ni muko ben o ñakare akwa, nikwe ja töi mikadre kwatibe ja ngwen kwin ne kwe nitre mada ñaka kukwebätä tä ni mrusaire yekwe blitai kwin nita ja ngwen kwin yebätä. Aune kukwe kri tä ni kisete ni muko ben angwane, nikwe oradre jankunu, nita ja ngwen ño ye nikwe mikadre gare kwin jai, Bibliabätä kukwe nieta mäträkäre nibätä yebätä nikwe töbikadretari kwin aune nikwe ja di kärädre kukwe ja üaire yebiti nitre umbre konkrekasionte yei. Akwa bäri ütiäte, nikwe ja töi mikadre kwatibe kukwe kwin nuainne Jehová okwäkänti aune ja mika gure metre ükaninte Ngöbökwe ye ütiäte ni kräke nikwe bämikadre metre ie.

[Nota]

[Kukwe ngwantarita]

[Kukwe nieta página 10]

Ruäre ngwane, nitre kristiano tä ja di ngwen ñaka ja tuenmetre jötrö ngwarbe muko kwe yebe ye köböire kukwe kwin tä nemen kwetre

[Kukwe nieta página 12]

Mäkwe tö ngwan käre Jehovai aune mäkwe ja di kärä ie

[Jondron üai bämikani página 9]

Nitre kristiano tä ja di ngwen muko kwe ñaka nüne kwin ben dimikakäre ye kräke, Jehová tä kukwe kwin mike nemen bare

[Jondron üai bämikani página 11]

Nitre kristiano konkrekasionte ye tä ni dimikakäre kukwe ja üaire yebiti