Tö ngwandre Ngöbö Jehová “ora aune köbö” ükatekä ie

“Ora aune köbö ye niara tä kwite, tä nitre reire ye denkä mento, tä nitre ükete reire” (DAN. 2:21).

¿NI RABA MIKE GARE ÑO?

¿Jondron sribebare aune kukwe rabai bare niebare abokän namanina bare metre ye tä Jehová köbö Däkien ye bämike ño nie?

¿Jehová ye abokän Ngöbö “ora aune köbö” ükatekä nüke gare nie ye tä mate ño nibätä?

Kukwe tare tä nakainkä käbiti tibien aune ni kä nebätä tä kukwe ükete nuaindre, akwa yebiti ta, ¿ñobätä Jehová töita kwatibe köbö ükaninte kwe kukwe nuainkäre ye mikakäre nemen bare metre?

1, 2. ¿Jehová ie köbö nüke gare metre ye ñokänti gare nie?

NI KÄ tibienbätä sribe jämi känenkri, Jehovakwe ora täindre ño ye kräke kukwe ükaninte. Köbö köböbokäkäre te Jehová jondron sribebare ye ngwane, niebare kwe: “Kä trä raba käinta, ne käkwe kä iko btä kä ngwen mika jene jene. Ne arabe raba kä töre, kä ñüre, köbö kwatirekwatire, kä kwatirekwatire mike jene jene” (Gén. 1:14, 19, 26, JK). Ngöbö töi nämene ye erere aune namani bare metre.

² Akwa, kä nengwane nitre ja tötikaka kri yei ora ye abokän dre gärätä jämi nüke gare. Enciclopedia ruäre tä mike gare: “Ora ye abokän dre gärätä metrere ye ñaka nüke gare ni kä tibienbätä ie. Ni jökrä ie ye dre gärätä metrere ñaka gare jire”. Akwa Jehová, “kä kwinta Sribekä [...], [aune] dobro [...] Sribebare kwe” yei kukwe ye nüke gare metre. Niara abokän tä, “kukwe jämi nakainkä ye känenkri mike gare aune jondron jämi nemen bare ye tä mike gare kä kwati krubäte te” (Isa. 45:18; 46:10). Ja känenkäre ni bike ja tötike jondron sribebare Jehovakwe ye ruärebätä aune kukwe keta kabre rabai bare niebare abokän namanina bare yebätä arato. Kukwe mika bike gare nikwe jai ne käkwe ni dimikai tödeke bäri, Jehová Ora Däkien aune niara Kukwei Biblia yei.

JONDRON SRIBEBARE TÄ NI MIKE TÖDEKE ORA DÄKIEN IE

3. ¿Jondron sribebare ye abokän meden tä sribire metre sribebare ye ererebätä?

³ Jondron sribebare kä tibienbätä ye jökrä tä sribire metre sribebare ño ye ererebätä. Ñodre, kä kwinta, kä tibien aune muke ye tä sribire metre ora ükaninte kräke ye ererebätä. Relojes sribebare kwin krubäte, ye medenbätä segundo kratibe tä niken ngwarbe, kä 80 millones ketare ketare tä niken ta yete. Kä tibien, jondron mada kä tibien kwrere aune  muke ye tä näin bäri metre ta. Jondron sribebare kä kwinbiti tä ükaninte ño ye raba nemen gare metre, aune yebiti ni raba ja jie ngwen nänkäre kä mada känti bätä kä kwatire kwatire niken ta yete köbö medente kä käme aune kä moren ye raba nemen gare nie. Erametre, ni jondron kä kwinbätä “relojes” kwrere Sribekä ye abokän “dite krubäte”, yebätä nikwe käi kitadrekä (ñäkädre Isaías 40:26 yebätä).

4. ¿Ni nire aune jondron nire sribebare ye ererebätä tä sribire ye tä Jehová töbätä bämike ño?

⁴ Ni nire aune jondron nire sribebare ye tä sribire metre sribebare ye ererebätä arato. Ñodre, jondron nire keta kabre aune kri yekwe relojes tärä arato aune ye ererebätä tä sribire. Nukwä kwati krubäte sribebare nierare ja jie ngwankäre ye tä mike gare ie ñongwane rabadre niken kä mada känti (Jer. 8:7). Ni nire yekwe reloj tärä arato, abokän tä sribire nibätä dibire aune rare. Ñodre, nita niken avionte ora kabre ye ngwane, köbö kabre tä niken ta ye bitikäre ni ngrabare ye tä sribireta “ora” ükaninte kräke ye ererebätä. Erametre, jondron sribebare tä sribire metre ükaninte ye ererebätä abokän kätä bämike, Jehová, Ngöbö “ora aune köbö” ükatekä, ye töbätä aune die ye kärekäre (ñäkädre Salmo 104:24 yebätä). Ye medenbätä, Köbö Däkien töi ye rabai bare metre ie nikwe tö ngwandre.

KUKWE NIEBARE NEMEN BARE METRE TÄ NI MIKE TÖDEKE

5. a) ¿Ni kä tibienbätä kräke dreta ja känenkäre ye dre aibe köböire raba nemen gare nie? b) ¿Dre rabai bare aune ñongwane ye ñobätä Jehová aibe raba mike gare?

⁵ Jondron sribebare ye tä “jondron [...] tuin ñakare” Jehovabätä ye mike gare krubäte nie, akwa kukwe bäri ütiäte ngwantarita, ñodre ni kä tibienbätä kräke dreta ja känenkäre ye ñaka tä mike gare nie (Rom. 1:20, NGT). Ngöbökwe kukwe mikani gare Bibliabätä ye nikwe känändre mikakäre gare jai. Yete kukwe keta kabre rabai bare niebare abokän namanina bare metre, ye raba kwen nie. ¿Kukwe rabai bare ye ñobätä Jehová raba mike gare? Kena, ñobätä ñan aune dre rabai bare ja känenkäre ye gare metre ie. Ne madakäre, niara raba kukwe ye mike nemen bare töi aune köbö ükaninte kwe kräke ye erere te.

6. ¿Kukwe rabai bare niebare Bibliabätä abokän rükadre gare nie ie Jehová tö ye ñokänti gare nie?

⁶ Kukwe rabai bare niebare Bibliabätä ye rükadre gare ni Jehová mikaka täte yei aune rabadre dimike ie niara tö. Köbö täinta nikwe ye erere Jehová ñaka täine, akwa kukwe rabai bare köbö medente metrere tä mike gare ye ngwane, tä nuainne kukwe nuäre rükadre gare nie yebiti (ñäkädre Salmo 90:4 yebätä). Ñodre, tärä Apocalipsis tä blite “ñänä okwä nuäi, köbö mden te amne sö mdenbtä amne kä mdenbtä angele nibkä ye rabadre tikaninte” yebätä, köbö ketare ketare kädekateta jatäri ye gare kwin nie (Apoc. 9:14, 15). Köbö medente kukwe rabai bare niebare Jehovakwe ye erere namani bare ye ani mike gare ruäre jai. Kukwe namani bare metre mikadre gare jai yekwe ni mikai tödeke bäri, Ngöbö “ora aune köbö” ükatekä bätä Kukwei Biblia yei.

7. ¿Kukwe rabai bare juta Jerusalén aune Judá yebätä niebare Jeremías käkwe abokän namani bare metre ye kätä bämike ño, Jehová ye abokän Köbö Däkien?

⁷ Siklo VII kä 1 ye känenkri kukwe mikani gare ye ani mike gare jai. “Kä kobokä te Jehoiaquim, Josías monsoi, nämene reire kä Judá yekänti” ye ngwane, Jehová kukwe mikani gare “Jeremías ie nitre nünanka Judá yebätä” (Jer. 25:1). Köbö Däkien käkwe mikani gare, juta Jerusalén ye juain ngwarbe aune nitre nünanka Judá ye jänrikai Babilonia, kä yekänti niaratre rabai “sribire rei Babilonia kräke kä 70 te”. Kä 607, kä 1 ye känenkri nitre rükä Babilonia käkwe Jerusalén juani ngwarbe aune erametre nitre nünanka Judá ye jänikani Babilonia. ¿Dre namani bare kä 70 ye bitikäre? Jeremías käkwe mikani gare: “Jehovakwe kukwe ne niebare: ‘Kä 70 te munkwe nünain Babilonia ye bitikäre tikwe mun ngwainta törö jai aune erametre tikwe kukwe kwin ükaite mun kräke ne kwe mun jatadreta kä nekänti’” (Jer. 25:11, 12; 29:10). Kukwe rabai bare köbö medente niebare ye erere  namani bare: kä 537, kä 1 ye känenkri, nitre nünanka medo aune persa yekwe nitre Judá mikani kwäre Babilonia ye ngwane namani bare.

8, 9. ¿Ñongwane Ni Dianinkä rabai gobrane aune Gobran Ngöbökwe rabai ükaninte kä kwinbätä yebätä kukwe niebare Danielkwe ye kätä bämike ño, Jehová ye abokän Ngöbö “ora aune köbö” ükatekä?

⁸ Juta Ngöbökwe kirabe yebätä kukwe mada niebare ye ani mike gare jai. Kä namanina kubu nänkäreta mento kä Babilonia yekänti nitre Judá ie ye känenkri, Ngöbökwe mikani gare Daniel ni Ngöbö kukwe niekä yebiti, Jerusalén sribedreta niedre ye bitikäre kä rikadre 483 ta ye ngwane Ni Dianinkä Ngöbökwe ye rükadre. Kukwe niebare Ngöbökwe ye rei medopersa käkwe mikani gare kä 455 kä 1 ye känenkri. Erametre kä 483 ye bitikäre, kä 29 yete, Jesús Nazaret ye dianinkä Ngöbökwe üai deme yebiti aune namani Ni Dianinkä Ngöbökwe (Neh. 2:1, 5-8; Dan. 9:24, 25; Luc. 3:1, 2, 21, 22). *

⁹ Kukwe niebare Gobran Ngöbökwe yebätä ye ani mike gare jai mada. Bibliabätä mikani gare, kä 1914 yete ja känenkäre Mesias rabai Reire kä kwinbiti. Ñodre, Jesús rabaira gobrane ye dre käkwe bämikai tuare niebare ye ngwane mikani gare, Satana juaintari mento kä kwinbiti aune ni Kä tibienbätä rabai ja tare nike krubäte (Mat. 24:3-14; Apoc. 12:9, 12). Ne madakäre, kukwe mada rabai bare niebare Bibliabätä yekänti mikani gare kä 1914 yete metrere “köbö kitani nuäi, ye näre juta Jerusalén [mikadre] ja ngoto täni” aune Gobran Ngöbökwe rabadre ükaninte kä kwinbätä (Luc. 21:24; Dan. 4:10-17). *

10. ¿Kukwe meden rabai bare metre ja känenkäre köbö ükaninte kräke ye erere te?

¹⁰ ¿Dre rabai bare kä ja känenkäre yete? Kena, Jesús mikani gare “ja tare nikadi kri krübäte”. Biti niara rabai Gobrane Kä Mil te. Erametre kukwe ketebu rabai bare niebare abokän kräke köbö ükaninte yete rabai bare metre. Nikwe ngwandre törö jai, ‘köbö aune ora’ nuäi te kukwe niebare rabai bare metre ye Jehovakwe ükaninante Jesús nükani kä tibienbätä ye känenkri (Mat. 24:21, 36; Apoc. 20:6).

“KÖBÖ JÖKRÄ DIANDRE MUNKWE JAI”

11. ¿Erametre nita nüne kä krüte te ye tä mate ño nibätä?

¹¹ ¿Gobran Ngöbökwe niena gobrane metre aune nita nüne “kä krüte te” ye tä mate ño nibätä? (Dan. 12:4). Nitre kwati töita bäri blo ye ni jökrä ie tuin, akwa Bibliakwe kukwe ye erere mikani gare kä krüte yebätä abokän ñaka nüke gare ietre. Nitre ruäre tä nütüre kä ne krütai ñongwane ye ñaka gare, akwa nitre mada abokän tä nütüre ni kä tibienbätä ye käkwe ni mikai nüne “kuin jäme” (1 Tes. 5:3). Akwa, ¿ni abokän tä töbike ño? Nitre tä Satana yekri käne kä nibira krüte köböi te nita nüne ye nüke gare nie angwane, nikwe ja di ngwandre kä denkä jai Ngöbö “ora aune köbö” ükatekä ye mikakäre täte aune ni mada dimikakäre Ngöbö mike gare jai, ¿ñan ererea? (2 Tim. 3:1). Nita kä denkä kwin jai Ngöbö mikakäre täte aune ni mada  dimikakäre, ye ni itire itire rabadre mike gare jai (ñäkädre Efesios 5:15-17 yebätä).

12. ¿Köbö Noé näire yebätä Jesukwe kukwe mikani gare ye tä dre driere ja töi kräke nie?

¹² Nitre kä nebätä tä jondron driere krubäte ja näkwitara ngätäite nita nüne, yebätä ñaka nuäre “köbö jökrä diandre [...] jai”. Jesukwe kukwe ye mikanina gare: “Kukwe nakaninkä ño ño Noé näire [...], ye kwrere arato ti Ni Kä Nebtä Ngobo ne jatadita”. ¿Noé näire nitre nämene nüne ño? Nitre nünanka kä ye näire jökrä gaite aune nitre kukwe blo nuainkä gaite ñü kri räkäin yebiti mikani gare. Noé abokän nämene kukwe “metre [...] dirire ni mda mdaye” aune Ngöbö kukwei mikani gare kwe nitre nünanka niara näire yei (Mat. 24:37; 2 Ped. 2:5). Akwa niaratre “nämäne mröre, tomanan ñain, ja mäkete, ja monsoi bien ni mada ie mukore. [...] [aune ñaka kukwe mikani täte kwetre nemen ñü jatani ye näire aune ñükwe niaratre ganinte jökrä]”. Ye medenbätä Jesukwe mäträbare krörö: “Munkwe ja mika juto arato, ñobätä ñan angwane mun ñan ni brare Monsoi jibäire näire rükaita” (Mat. 24:38, 39, 44). Ni rabadre ja ngwen Noé erere, aune ñaka nitre blo niara näire erere. ¿Dre käkwe ni dimikai ja mike juto?

13, 14. Ni brare Monsoi rükadre jiebätä nikwe ye ngwane, ¿dre ngwandre törö Jehová yebätä, ja ngwankäre metre?

¹³ Ni ñaka ni brare Monsoi jiebäre ye köböi te rükai, akwa nikwe ngwandre törö jai Jehová abokän Ora Däkien. Kukweta nakainkä kä jökräbiti tibien aune ni kä nebätä tä ja töi mike dre nuainne akwa yebiti ta niara tä ja töi mike kwatibe köbö ükateta kwe dre nuainkäre ye mikakäre nemen bare. Niara töi rabadre bare yekäre, dre rabai bare aune ñongwane ye niara raba ketebätä (ñäkädre Daniel 2:21 yebätä). Ye erere, Proverbios 21:1 tä mike gare: “Rei brukwä ye tä ñö nen kwrere Jehová kisete. Niara tö tuai dre kwin nuainne, ye erere tä töi mike nuainne”.

¹⁴ Erametre, kukweta nakainkä ye Jehová raba ketebätä ne kwe niara töi ye rabadre nemen bare köbö ükaninte kräke ye erere te. Kukwe keta kabre bäri tare namanina bare käbiti tibien ye köböire kukwe rabai bare niebare Bibliabätä ye tä nemen bare, metrere kukwe kwin Gobran Ngöbökwe yebätä driedi niebare ye tä nemen bare. Ñodre, ani töbike kukwe namani bare juta ruäre känti yebätä, gobrantre nämene bike kri nitre nünanka juta yete yebätä aune nitre kukwe ngwarbe driekä nämene arato. Akwa ye bitikäre kä braibe te gobrantre ñaka ja töi mikai käme ye nitre ñaka nämene nütüre. Kirabe kukwe drie ye ñäkäi nämene kä yekänti, akwa kä nengwane gobrantre ye ñaka niena ja töi mike käme köböire juta keta kabre känti kukwe kwin Ngöbökwe ye drieta. Erametre, ütiäte krubäte ni jökrä käkwe köbö diandre jai Ngöbö “ora aune köbö” ükatekä ye mikakäre täte metre.

JEHOVÁ KÖBÖ ÜKATEKÄ METRE IE NIKWE TÖ NGWANDRE

15. ¿Juta Ngöbökwe tä kukwe ükete yei nita tödeke ye ni raba bämike ño?

¹⁵ Kä krüte nete kukwe Gobran Ngöbökwe yebätä drieta ye nikwe nuaindre jankunu yekäre, Jehová ja töi mikai nemen bare kä kitani kwe kräke erere te, ye tädre gare metre nie. Kukwe tare tä nakainkä kä jökräbiti tibien abokän kätä nitre ngwen nikenkä, yebätä nikwe köbö ükadrete jai kukwe driekäre bäri kwin aune ni mada tötikakäre. Ruäre ngwane juta Ngöbökwe ye raba kukwe ükete ni dimikakäre kukwe kwin ye driere bäri kwin. ¿Ngöbö “ora aune köbö” ükatekä ie nita tödeke ye ni raba bämike ño? Juta Ngöbökwe tä kukwe ükete ye ni rabadre kain ngäbiti ja brukwä tätebiti aune ja ngwen metre niara Monsoi, “ji dokwäte nitre ja ükakrökä” kräke yei (Efe. 5:23).

16. Jehovakwe ni dimikai kä debe näre te, ¿ye ñobätä nita tö ngwen metre ie?

¹⁶ Nita ja di ribere ye ngwane nikwe oradre Jehovai tä ribere nie, aune niarakwe “ni die mikadi” ie nikwe tö ngwandre (Heb. 4:16). Erametre, ni itire itire tare Jehovakwe aune töita nibätä ye tä bämike kukwe yebiti, ¿ñan ererea? (Mat. 6:8; 10:29-31). Käre nikwe ja di kärädre  Ngöböi aune orasion nuainta nikwe bätä Ngöböta ni jie ngwen ye ererebätä nikwe ja ngwandre, yebiti nikwe tödeka nikwe bämikai niarai. Ne madakäre, nikwe oradre ja mräkätre kukwebätä nibe kräke ye nikwe ñaka käi kwitadrekä jabiti.

17, 18. a) ¿Gwäune Jehovakwe dre nuaindi nitre tä ja mike niara rüere yebätä? b) ¿Kukwe meden ñaka metre abokänbätä nikwe ñaka töbikadre?

¹⁷ Kä nengwane nikwe “[tödekadre] bäri” aune tödeka nikwe ye tädre dite bätä metre (Rom. 4:20). Nitre Ngöbö rüe, Satana aune nitre gobrainta kwe, ye kätä ja di ngwen sribi mikaninte Jesukwe ni kisete ye ketebätä (Mat. 28:19, 20). Diablu ye tä ja mike ni rüere, akwa gare kwin nie Jehová abokän “Ngöbö nire [...] ni jökrä mikaka kwäre; niara abrä ni tä näin niara kukweite mikaka kwäre metrere”. Ne madakäre, niarai “ni[tre] kwin [...] mika gare kwäre” (1 Tim. 4:10; 2 Ped. 2:9, NGT).

¹⁸ Gwäune, Jehová nitre blo ye gaite. Nitre Ngöbö rüere ye Kristokwe gaite aune Jehová abokän gobran kri rabai gare. Kukwe ye rabai bare ñongwane aune ño ye ñaka gare metre nie, akwa köbö ükaninte kräke te rabai bare ye gare nie. Ye medenbätä, “köbö ñongwane, kä ñongware” te nita nüne ye nikwe ñaka käi kwitadrekä jabiti. Ni ñaka raba nütüre “kä dätebare ño kena abko erere kä tä ja täritäri [...] nüke mtare” (1 Tes. 5:1; 2 Ped. 3:3, 4).

NIKWE JA TÖI MIKADRE KWATIBE “NGÜBA[RE] NGÄBITI”

19, 20. ¿Ñobätä nikwe ja töi mikadre kwatibe Ngöbö “ngüba[re] ngäbiti”?

¹⁹ Jehová ni kä tibienbätä sribebare ngwane, töi nämene ja nire käre biain nie ne kwe ni rabadre ja kite niarabätä aune jondron sribebare bä nuäre kwe yebätä. Eclesiastés 3:11 tä niere Jehová yebätä: “Jondron jökrä sribebare bä nuäre kwe kä debe näre te. Nüna kärekäre ye mikani kwe nitre nire ye brukwäte arato, ne kwe Ngöbö metre käkwe jondron sribebare kena nememe mrä ye ñaka rükadre gare ni kä tibienbätä ie”.

²⁰ Jehová ja töi mikani dre nuainne ni kä tibienbätä kräke yebätä niara ñaka ja töi kwite gare nie ¡ye käi juto nibätä! (Mal. 3:6). Erametre Ngöbö “ñan tärä nikwite jene, angwane kä trä ñan tärä niara kwidaka jene” (Sant. 1:17, NGT). Jehová ye abokän “[G]obranka kärekäre”, aune niara tä ora ükete köbö ñäkäkäre ye ngwane, ñaka tä nuainne ni kä tibienbätä töi ye erere, ñodre kä tibien tä näin kaibe ta ye kwrere (1 Tim. 1:17). Ye medenbätä, “Ngöbö [ni] diantarikä ye [nikwe] ngüba[dre] ngäbiti” (Miq. 7:7). Kukwe nieta Salmo 31:24 ne nikwe mikadre täte: “Mun jökrä tä Jehová ngübare ngäbiti yekwe, kä ngwan juto jabätä aune ja brukwä mika dite”.

[Nota]

[Kukwe ngwantarita]

[Jondron üai bämikani página 19]

Ngöbö kukwei rabai bare niebare yei Daniel nämene tödeke

[Jondron üai bämikani página 21]

¿Mätä köbö jökrä denkä jai Jehová mikakäre täte?