Ja töi mikadre kwin ni mada töi mikakäre jäme

NITRE nibu testiko Jehovakwe, George aune Manon nünanka Países Bajos, käkwe blitabare kukwe kwin Gobran Ngöbökwe yebätä meri iti umbre ben angwane, meri ye ñaka niaratre kani ngäbiti kwin. Meri yekän muko krütanina nibura aune ngobo iti, aune nämene ja tare nike krubäte artritis kisete ye namani gare ietre. Niaratre nämene blite angwane meri ye ñaka namani blite krubäte, akwa ñaka blitabare jire kwe töi jämebiti.

Akwa George niebare Manon ie niara rikadre kriblu ngwena kräke, ñobätä ñan aune meri umbre yei ja nämene ruin kaibe aune nämene rubun krubäte. Ye erere nuainbare kwetre, aune meri ye kädekata Rie, töi namani ñan krütare kukwe yebätä. Köbö yete kä ñaka namani blitakäre kwin meri yei George aune Manon yebe, ye medenbätä George aune Manon rükadreta niara tuinbiti köbö mada te niebare kwe. Ye erere George aune Manon nükaninta angwane, niara ñaka nämene gwi. Niaratre ye nuainbare bä kabre akwa meri ye ñaka kwani gwi ietre. Meri ye ñaka tö nämene blitai bentre namani nütüre.

Köbö mada te, George ie Rie ye kwani gwi. Niaratre nübaibare kwe ye köböi te ñaka nämene gwi, ñobätä ñan aune köbö yete nämene Hospital, yebätä ngite juandre ta biti niebare kwe. Ye ngwane niebare kwe mada: “Mun rikabata ye ngwane tikwe dre nuainba ye ñaka gare munye. ¡Tikwe ja töi mikaba ñäke Bibliabätä!”. Niarakwe blitabare kwin krubäte ye bitikäre, ja tötika Bibliabätä ye kani ngäbiti kwe.

Rie ja tötikabare jankunu Bibliabätä angwane, jatani ja töi mike jäme ni mada kräke aune kä namani jutobätä aune ñaka namanina rubun. Niara bren yebätä ñaka nämene nemen käre gätäbätä, akwa ja mräkätre nämene niken tuinbiti ye käi nämene nemen jutobätä. Ñaka nämene nuäre dikadrekä kräke, ye medenbätä nitre nämene nüke tuinbiti yei nämene tödeka kwe mike gare. Köbö te kä nikani 82 ta niarabiti ye ngwane, janamene gätä kri köböbu nuainbare yebätä aune niarakwe ja dianinkä Ngöbö mikakäre täte ye bämikakäre ja ngökabare ñöte kwe.

Rie krütani ye bitikäre sö nikani braibe ta angwane poesía tikabare kwe ye kwani. Ni nüne kaibe ni niena umbre ngwane ye ñaka nuäre jire mikani gare kwe täräkwata yebätä aune ja töi mikadre kwin ni mada kräke ye ütiäte krubäte niebare kwe. Manon tä niere: “Poesía tikabare kwe yekwe ti mikaba ulire krubäte aune Jehovakwe nun dimikani ja töi mike kwin kräke ye käi juto krubäte tibätä”.

Erametre, Jehová tä ni töi mike nitre mada tarere aune ja töi mike kwin kräke (Efe. 5:1, 2). Ye medenbätä ni “sribikä Ngöbökwe” tä “ja mike jäme ni jökrä kräke” angwane, kukwe kwin rabai bare kukwe drieta ye ngwane (2 Cor. 6:4, 6, NGT).