“Dre nämä ti töite ye tikwe nuainba”

Emilia nämene sribi prekursor nuainne, akwa kä nikanina kwäjätä biti kwärike ta angwane sribi ye namani ie. Nämene sribi ye nuainne angwane kukwe kwin namani kwe yebätä namaninta töbike, aune tö namani sribi prekursor nuainta.

Niara nämene sribire krubäte yebätä kä ñaka nämene nemente ie, aune ja ñaka nämene ruin kwin ie. Bati, Emilia kukwe ne niebare nitre sribikä ben ye olote: “¡Tikwe sribidre ora braibe te näre!”. Jefa ie kukwe ye namani gare angwane, nikani känti nämene blite metre o ñakare ye ngwantarikäre ie. Emilia jän niebare ie. Niarakwe blitadre ni sribi ngübabitikä ben, kukwe ye mikakäre gare ie. Niara nämene sribire yekänti nitre sribikä yei ribe nämene kä diandrekä bäri kwetre jai sribikäre yete. Ye medenbätä, Emilia ja töi mikani blite aune ja di käräbare kwe Jehovai blitakäre töi jämebiti.

Gätä nuainbare ye ngwane Emilia käkwe niebare tö namani sribidi ora braibe te, akwa töbikabare kwin kwe kukwe ye niekäre aune ñaka kä jürä ngwani jabätä kwe. Ni sribi ngübabitikä ie niebare kwe, kä nämene nemente ie yete niara nämene ni mada dimike. Emilia niebare: “Ti abokän testiko Jehovakwe aune tita ni mada dimike kukwe Ngöbökwe yebiti. Kä nengwane, nitre ñaka ja töi mike kwin, ye medenbätä kukwe Bibliabätä mikadre gare ietre ye ütiäte krubäte. Kukwe mada nuainta tikwe sribi täbiti ye ñaka ti mikadre sribire kwin nete ye ti ñaka tö, akwa kä rabadrete tie ni mada dimikakäre ye abokän ti tö nuain. Ye medenbätä, ti tö sribidi ora braibe te.”

Ni sribi ngübabitikä käkwe kukwe nuabare kwin aune tö namani kukwe ye erere nuain niebare kwe ie. Ni ye niebare Emilia ie: “Mäkwe kukwe ye nini tie, aisete ti raba kä bien mäi, raba ruin tie. Akwa, mäkwe ngwian ganaindi bäri chi gare mäi, ¿ñan ererea?” Emilia käkwe dokwä ngrükaninte, aune raba ngwian braibe yebiti nüne niebare kwe ie. Biti niebare kwe: “Ti tö kukwe kwin nuain nitre mada kräke”. Ni sribi ngübabitikä niebare ie: “Nitre tä kä denkä jai nitre mada dimikakäre ye tuin kwin tie”.

Kä nengwane, Emilia tä sribire köbö köböbokä bämän kratire kratire te, kukwe ye erere nuain ñaka nitre sribikä mada yete kräke. Arato, ngwian mada biani ie, aisete nämene ngwian den käne ye erere täbe ganainne matare. Niarata niere: “Dre nämä ti töite ye tikwe nuainba. Tita sribi prekursor nuainenta.”

¿Mä raba kukwe ükete jai sribi prekursor nuainkäre siba?

[Kukwe nieta página 32]

Ni sribi ngübabitikä niebare ie: “Nitre tä kä denkä jai nitre mada dimikakäre ye tuin kwin tie”