Ja töi jeñebiti nikanintre sribire Ecuador

MONSO bati nünanka Italia kädekata Bruno ye käne kukwe ketebu namani. Niara ngedianinkä colegiote nota bäri kwin yebiti, aisete mräkätre kwe bätä nitre dirikä namani töi mike niken ja tötike kwela krite. Ja ngökani ñöte kwe ni testiko Jehovakwe erere angwane ja töi mikani kwe sribi Ngöbökwe mike käne ¿Niarakwe dre nuainbare? Niarata niere: “Tikwe ja kukwei kitaninkä Jehovai, ye erere tikwe nünain aune käre tikwe sribi kwe mikai käne ye tikwe nieba orasionte ie. Ti ñan törbaba sribi keteitibe nuain käre. Ti törbaba sribi jene jene nuain kräke tikwe nieba ie arato”.

 Kä nikani ta ye bitikäre, Bruno nikani Sudamérica, juta Ecuador yekänti. ¿Ja namani ruin ño ie? Niarakwe niebare: “Tikwe jondron ribebare Jehovai orasionte ye mikani nemen bare biti ta kwe ti kräke”. Niara namani juta Ecuador ye ngwane nitre kä ja närebiti abokän nikani sribi Jehovakwe nuainne kä yekänti ye namani gare ie arato.

JEHOVATA KUKWE NIERE YE JA MRÄKÄTRE BATI TÄ NUAINNE

Jehovata niere: “Munkwe ye erere nuain aune rabai gare munye, tikwe jukwe tikadi aune erametre jondron kwin keta kabre biain krubäte munye”, kukwe ye Bruno aune monsotre kwati kä jökräbiti tibien käkwe nuainbare (Mal. 3:10). Jehová tare kwetre yebätä tätre niken Gobran Ngöbökwe kukwei driere ja di tätebiti bätä jondron kwetre yebiti nitre kukwe driekä ñaka krubäte yekänti.

Nitre kukwe driekä tä nemen kä känti kukwe driei kwetre ye ngwane, tä nemen gare ietre “nura nena biare kabre ötadre [...] akwa sribikä ñakare bökän” (Mat. 9:37). Ñodre, Jaqueline niara käi Alemania, kä jutobiti kukwe ne tikani kwe sukursal Ecuador ie: “Kä kubu biti bäri tita sribire nete, tita nitre nijätä biti nimä tötike Bibliabätä aune nibokä tä käre ja ükökrö gätäbätä. ¡Kätä juto krubäte tibätä!”. Chantal niara käi Canadá tä niere: “Kä 2008 ye ngwane ti rikaba nüne kä nemenkä mren bäre Ecuador yete, aune konkrekasion keteitibe nämä kä yekänti. Kä nengwane konkrekasion tä ketamä kä yekänti aune ni gre biti nijätä bäri tätre sribi prekursor ye nuainne. ¡Nitre kwati  tä nirien kukwebätä ye kwin krubäte! Bitinkä tikwe ja kwitaba juta nemenkä kä kädekata cordillera de los Andes yete, ye abokän 2.700 metros [9.000 pies] näre. Nitre 75.000 biti bäri tä nüne yete, aune konkrekasion keteitibe tä arato. Kukwe drieta ye nitre tä kain ngäbiti kwin aune sribi Ngöbökwe nuainta tikwe ye tä kä mike juto tibätä”.

JA TUANI KWETRE KUKWE NEBE

Nita niken kukwe driere juta madakänti ye abokän ñaka nuäre. Ja mräkätre ruäre bati jämi niken juta madate ye känenkri tätre ja tuin kukwe ruäre ben. Ñodre, Kayla niara käi Estados Unidos kätä kukwe ne mike gare: “Ja mräkätre ruäre nämene kukwe niere tie ye nämene ti ngwen di nekä. Ñobätä ti tö nämene näin kukwe driere köbö täte juta madate ye ñaka nämene nüke gare ietre. Kukwe nie nämene kwetre yebätä ti nämene nemen nütüre ti ñaka nämene ji kwin den ja käne”. Kukwe yebiti ta Kayla nikani nüne juta madate. Dre käkwe dimikani ye niarata mike gare: “Tikwe oraba krubäte aune ja ngwaitre aune ja etebatre ünä kukwe ja üairebiti yebe tikwe blitaba, yekänti rababa gare tie nire tä juto sribi Jehovakwe nuainkäre ye kräke tä kukwe kwin mike nemen bare”.

Arato, blitadre kukwe madabiti ye ñaka nuäre nitre ruäre kräke. Siobhan niara käi Irlanda tä niere: “Ja ñaka nämä törö tie blitakäre kukwe madabiti. Tikwe ñaka ja di ngwanba nekä, aune tikwe ja töi mikaba ja tötike blitakäre kukwe madabiti, bätä ti ñaka nämene kukwe niere kwin ye ngwane ti nämene ja kötaireta akwle”. Anna niara käi Estonia tä niere: “Tikwe nändre kä ngirete, kä mününente aune jübadre ñö tibote ye ñaka rbaba ribi ti kräke, akwa blitadre kukwe suliarebiti yebe tikwe ja tuaba. Bati bobu ti töi rababa näinta ja käite. Kukwe nämä nüke gare kiakia tie yebätä ti nämä ja töi mike, aune kukwe meden ti ñaka nämä niere kwin yebätä ti ñaka nämä töbike krubäte”.

Ne madakäre, ja mräkätre ruäre ie jata nemen ruin ulire. Jonathan niara käi Estados Unidos tä niere krörö: “Kä känti tikwe kukwe driedre yekänti ti rükaba angwane ja rababa ruin mente tie ti mräkätre aune ja ketamuko tikwe yebätä. Akwa, ti nämä kukwe driere mantre jetebe aune ti nämä ja tötike Bibliabätä käre ye käkwe ti dimikaba ñaka nemen ulire krubäte. Kukwe kwin nämä nemen bare tibätä kukwe driebätä, aune ja ketamuko kwanba tie konkrekasionte ye käkwe kä mikaba juto tibätä”.

Ñaka nünanta ja erebe kä madakänti, yebe ja mräkätre tä ja tuin arato. Ja mräkä Beau käi Canadá tä  mike gare: “Nita ja käite ye ngwane ni ñaka töbike ñö aune ñotra mikani gwita yebätä, akwa nete jondron ye ñaka tä käre”. Juta känti ngwian ñaka krubäte yekänti nünanta bobre, karo kwin ñakare aune nitre kwati yei ñäkä ñaka gare kwin täräbätä. Ines niara käi Austria käkwe ja töi mikani nitre nünanka kä yekänti töi ño yebätä aune ye käkwe dimikani. Niara tä niere: “Nitre ye tä nitre kain ngäbiti kwin, töi kwin ni mada kräke, tätre juto biare sribikäre ni mada kräke, töi bobre bätä tö kukwe Ngöbökwe mikai gare jai.”

“JONDRON KWIN KETA KABRE BIAIN KRUBÄTE MUNYE”

Ja mräkätre jondron ruäre tuanimetre rikakäre kukwe driere Ecuador. “Nita jändrän kärere Ngöböye amne, jändrän btä ni töita ñakare, yebti ta abko Ngöböta jändrän bien bäri kri krübäte nie”, kukwe ye erere namani bare niaratre yebätä (Efe. 3:20). Ngöböta niere “jondron kwin keta kabre biain krubäte” nie ye erere tä nemen bare niaratre yebätä (Mal. 3:10). Kukwe drieta kwetre yebätä ja nemen ruin ño ietre ye ani mike gare jai.

Bruno: “Ti rükaba Ecuador ye ngwane kä kädekata amazónica yekänti ti rababa kukwe driere. Ye bitikäre, ti rikaba sribire siba sukursal sribekäre bäri kri, kä nengwane tita sribire yete. Ti nämä Italia ye ngwane tikwe ja töi mikaba Jehová mike käne, ti törbaba nünain kä jutobiti aune sribi keta kabre nuainne kräke ye erere mikaba nemen bare tibätä”.

Beau: “Juta Ecuador yekänti tita käre kukwe driere ye köböire tita ja mäke bäri kwin Jehovabe. Kukwe keta kabre kwin namani bare tibätä. Arato, ti tö nämä kä mada mikai gare jai aune juta yete kä keta kabre bä nuäre namani gare tie”.

Anna: “Meri kaibe raba kukwe driere misionera erere ye ñaka nämä gare tie. Matare abokän nüke gare tie raba nemen bare. Jehovata kukwe kwin mike nemen bare tibätä, tita nitre tötike, Ju ja Ükarakrö sribere aune ja mräkätre kwati ben ja mäke ye tä kä mike juto tibätä”.

Elke: “Ti nämä Austria ye ngwane ti nämä orare Jehovai, ne kwe ni iti kwandre tie tötikakäre Bibliabätä. Matare abokän tita nitre nijätä biti nirike tötike. Nitre tötikata tikwe tä nirien ja käne kä jutobiti ye tä mate kwin tibätä”.

Joel: “Kä ñaka gare nie yekänti nikwe sribidre Jehová kräke ye kwin krubäte. Nita tö ngwen bäri ie aune tä jondron kwin mike nemen bare ni kräke ye tä mate kwin nibätä. Ti käi Estados Unidos aune kä känti ti rikaba kukwe driere yekänti nitre kukwe driekä ni ti aibe nämä, kä rikaba kwati ta angwane nun rababa ni gre biti iti ja ükökrö, aune Jesús ja nire biani ni ütiäre Ngwaninta Törö jai ye ngwane nitre 110 ja ükakröba nunbe”.

¿MÄ ABOKÄN RABA DRE NUAINNE?

Mä testiko Jehovakwe aune mä raba niken kä madakänti Gobran Ngöbökwe kukwei driere ye ngwane, ¿mäkwe nuaindi? Ni törba ye erere nuain angwane nita kukwe ükete kwin jai, akwa bäri ütiäte ni rabadre Jehová aune nitre mada tarere. Mä töita ye erere, aune kukwe ribeta nänkäre juta madakänti ye mä raba nuainne angwane, mäkwe mika gare orasionte Jehovai. Arato, mä raba blite mä rünbe aune nitre umbre konkrekasionte yebe. Yebiti rabai gare mäi mä raba niken kukwe driere kä madakänti.

[Kukwe nieta página 3]

“Tikwe oraba krubäte aune ja ngwaitre aune ja etebatre ünä kukwe ja üairebiti yebe tikwe blitaba, yekänti rababa gare tie nire tä juto sribi Jehovakwe nuainkäre ye kräke tä kukwe kwin mike nemen bare.” (Kayla käi Estados Unidos)

[Jondron üai bämikani aune recuadro página 6]

Dre nuaindre nänkäre juta madate

• Ja tötikadre käre kukwe Ngöbökwe yebätä

• Sribi Nikwe Ngöbökrä agosto 2011, páginas 4 nemen 6 yebätä ñäkädre

• Ja mräkätre ja namane kukwe driere juta madate yebe blitadre

• Nitre töi ño bätä kukwe meden namani bare juta yete ye mikadre gare jai

• Nitre tötikata blite kukwe madabiti yebätä ja kitadre

[Jondron üai bämikani aune recuadro página 6]

Tätre ngwian ükökrö jai

• Jämi niken juta madate ye känenkri tätre sribire juta kwe yete

• Ju aune jondron mada kwe ye tä mike nitre mada kisete, ne kwe ütiä biandre ietre

• Sribi nuainne Internet yebiti

[Jondron üai bämikani página 4]

1 Jaqueline (Alemania)

2 Bruno (Italia)

3 Beau (Canadá)

4 Siobhan (Irlanda)

5 Joel (Estados Unidos)

6 Jonathan (Estados Unidos)

7 Anna (Estonia)

8 Elke (Austria)

9 Chantal (Canadá)

10 Ines (Austria)