Jehová tä monsoitre ükökrö

“Ti tö ribei krörö munye [...] Üai Deme köböire munta ja mäke ni itibe kwrere, ye kwrere munkwe nünandre janknu.” (EFE. 4:1, 3)

¿MÄ RABA MIKE GARE?

¿Ñokäre Ngöbökwe kukwe ükaninte?

¿‘Üai deme köböire nünandre jäme jabe kwärikwäri’ ye dre gärätä?

¿Dre ni dimikai bäri ‘ja moto mike kwin jakrä kwärikwäri’?

1, 2. ¿Jehová töita ño nitre aune Kä tibien kräke?

NI JA MRÄKÄRE. ¿Kukwe ne nieta angwane dreta nüke mä töite? ¿Mä töi nemen ja tare aune nüna kä jutobiti yebätä? ¿Sribi gwairebe ni mräkäbe jondron ruäre mikakäre nemen jakwe yebätä mä töi nemen? ¿Mä töi nemen nünanbätä kä jäme yekänti ririakäre, ja tötikakäre aune mä töita ño ye erere niekäre? Mä mräkätre tä ja tarere kwärikwäri angwane erametre kukwe nebätä mätä töbike. Jehovakwe ni ja mräkäre sribebare (Efe. 3:14, 15). Nitre üaire nünanka kä kwinbiti o nitre nünanka Kä tibienbätä ye jökrä nünandre jäme, rabadre tö ngwen jai kwärikwäri aune erametre rabadre nüne keteitibe jabe ie niara tö namani.

² Adán aune Eva ja mikani ngite ye ngwane, nitre kä tibienbätä ñaka namanina Ngöbö monsoitre jökrä ye ngätäite. Akwa Jehovakwe ja töi mikani dre nuainne kena yebätä niara ñaka ja töi kwite. Adán aune Eva monsoi rabadre kwati krubäte nünankäre Kä tibien kwitai bä nuäre yete niara mikai gare kwin jai (Gén. 1:28; Isa. 45:18). Ye nuainkäre niarakwe kukwe ükaninante, kukwe keta kabre ükaninte ye mikata gare tärä tikani nitre Efeso ie yekänti, yete blitata metrere nüna keteitibe jabe yebätä. Bersikulo ruäre yebätä ani ja tötike aune Jehová tö ni sribebare kwe ye tuai nüne keteitibe jabe, ye mikakäre nemen bare nikwe dre nuaindre ye ani mike gare jai arato.

KUKWE ÜKANINTE NGÖBÖKWE AUNE SRIBI NUAINTA KWE

3. ¿Kukwe ükaninte Ngöbökwe nieta Efesios 1:10 ye dre gärätä, aune ñongwane kömikani?

³ Jondron nuainta Jehovakwe ye käre tä nuainne töita dre nuainbätä ye erere. Ye medenbätä, “kä kitani nuäi [...] abko erere käi nükani angwane”, Ngöbökwe “kukwe mikanintbe [o ükaninte]”, ye abokän niarakwe kukwe  ükaninte nitre üaire kä kwinbiti aune nitre kä tibienbätä mikakäre nüne keteitibe jabe ni ja mräkäre kwrere (ñäkädre Efesios 1:8-10 yebätä). Kukwe ükaninte ye kukwe ketebu mikai nemen bare. Kena, nitre braibe dianinkä nänkäre kä kwinbiti ye ükateta nünankäre kä kwinbiti Jesukristo ben, niara ye rabai metrere Ji ngwanka ja üaire niaratre kräke. Kukwe ne kömikani Pentecostés kä 33 yete, ye ngwane Jehová jatani nitre ükökrö gobrankäre Kristo ben kä kwinbiti (Hech. 2:1-4). Kristo ja nire biani ye köböire nitre braibe dianinkä nänkäre kä kwinbiti ye kädekata deme aune niaratre nünain kärekäre. Ye medenbätä, niaratre niena “Ngöbö monsoitre” ye gare kwin ietre (Rom. 3:23, 24; 5:1; 8:15-17).

4, 5. ¿Kukwe ükaninte ketebukäre kädrieta Efesios 1:10 yete dre nuainta?

⁴ Ketebukäre, nitre nünain Kä bä nuäre te kä tibienbätä ye ükateta Ngöbökwe. Niaratre yebiti Gobran Jesukwe rabai gobrane. Nitre “kwati krubäte” ye nünain kena Kä bä nuäre yete (Apoc. 7:9, 13-17; 21:1-5). Jesukwe Gobrandi kä Mil krati te ye ngwane nitre kwati gaikröta yekwe nünandi yete arato (Apoc. 20:12, 13). ¡Kä rabai kwin krubäte nie nünankäre bäri keteitibe nitre gaikröta yebe! Kä mil krati rabaira krüte ye näire, “jändrän [...] kä temenbtä” ye töi nuaite mrä, aune niaratre meden meden ja ngwandi metre ye rabai “Ngöbö monsoitre” kwrere nünankäre kä tibienbätä (Rom. 8:21; Apoc. 20:7, 8).

⁵ Kä nengwane, Jehová tä nitre dianinkä nünankäre kä kwinbiti aune nitre nünanka kä tibienbätä ye ükete bäri nünankäre kä bä nuäre te. ¿Akwa Ngöbökwe kukwe ükaninte ye dimikakäre ni itire itire dre nuaindre?

“ÜAI DEME KÖBÖIRE [...] NÜNA JÄME JABE KWÄRIKWÄRI” YE NIKWE NUAINDRE

6. ¿Nitre kristiano rabadre ja ükökrö ye Biblia tä mike gare ño?

⁶ Biblia tä mike gare nitre kristiano ye rabadre ja ükökrö metre (1 Cor. 14:23; Heb. 10:24, 25). Ye abokän ñaka kä diankata ruäre ngwane jai rabakäre keteitibe jakänti ye kwrere, ñodre, kä jondron rürübäin käi o jadaka käi känti nita niken ye kwrere. Nünandre keteitibe erametre ye kräke kukwe mada nuaindre bäri. Kukwe nieta Jehovakwe mikata täte aune ja tuanmetreta jie ngwandre üai deme ie ye ngwane nünanta erametre keteitibe.

7. ¿‘Üai deme köböire nünandre jäme jabe kwärikwäri’ ye dre gärätä?

⁷ Kristo ja nire biani ni diantarikäre yebiti, Jehová tä nitre dianinkä nänkäre kä kwinbiti ye kädeke deme monsotre kwe ye kwrere aune tä obeja mada ja ketamuko kwetre ye kädeke töi metre. Akwa, kä krüte ne näire ni täibe nire angwane, ruäre ngwane ni töi ñaka rabai jäme ja kräke kwärikwäri (Rom. 5:9; Sant. 2:23). Kukwe ne erere ñaka nemen bare akräke “munkwe ja ka ngäbti kwärikwäri” niebare Bibliabätä ne ñaka rabadre ütiäte. ¿Ño ni raba nüne keteitibe ja mräkätre kukwebätä yebe? Ni rabadre “ñan bik[e] kri, [...] munkwe bika tidrä era metre ni mda mdabtä”. Ne madakäre, Pablo tä ni nübaire ja di ngwen “Üai Deme köböire [...] nün[e] jäme jabe kwärikwäri” (ñäkädre Efesios 4:1-3 yebätä). Kukwe ne nuainkäre ni rabadre ja tuenmetre jie ngwandre üai deme Ngöbökwe ie aune tuanemetre ja töi mike kwin. Kukwe käme tä ni ñäkebiti, akwa kukwe meden raba ni ñäkebiti ye abokän üai deme tä ükete.

8. ¿Kukwe käme nuainta ye tä nitre denkä ño mento?

⁸ “Kukwe käme nuainta” ye tä ni denkä jene jene ni madabätä (ñäkädre Gálatas 5:19-21 yebätä). Ñodre, nitre tä ja mike gure bati bati ye tä kämikekä Jehová aune konkrekasion yebätä, aune ni tärä gure akwa nemen ni madabe ye raba monsotre denkä mento rünbätä aune meri denkä mento muko kwe yebätä. Nitre kukwe käme nuainkä ye ñaka raba ja kete kwin Ngöböbe aune mräkätre yebe. Ni raba bämike jondron ketakata pegamento yebiti kwrere: jondron  ye tädre kwin ne kwe reketadrekä dime jabätä. Nire nire tä ñaka ja ngwen kwin ye ñaka tä kukwe kwin ükaninte Ngöbökwe ye mike ütiäte jai. Aune kukwe mada mada käme nuainta ye tä nitre denkä mento ni mada yebätä aune Ngöböbätä arato. Kukwe ne jökrä tä Jehová töi ye rüere.

9. ¿Ni kristiano niena ja di ngwen ‘nünankäre jäme jabe’ ye rabadre gare ie gäre rabadre kukwe meden ngwentari jai?

⁹ Ye medenbätä, ni itire itire rabadre ngwentari jai: “¿‘Üai deme köböire nünandre jäme jabe kwärikwäri’ ye kräke tita ja di ngwen nuäi? ¿Kukwe nakainkä jabätä tie ni madabe ye ngwane ti töita nemen ño? ¿Tita kukwe ye mike gare ja ketamuko tikwe ie ne kwe ti dimikadre kwe? ¿Tita ja di ngwen kukwe ye ükatekäre? O ¿tita jerekäbe nitre umbre konkrekasionte tuenmetre kukwe ye ükete ja kräke? ¿Tita kämikekä ni mada yebätä ne kwe kukweta jabätä nuen ye ñaka rabadre törö ie?”. Erametre, Ngöbö tö ni jökrä ükaikrö nünankäre keteitibe Kristo köböire ye rüere nitre töi ye erere tä ja mike.

10, 11. a) ¿Ni tädre jäme ja mräkätre ben ye ñobätä ütiäte krubäte? b) ¿Nikwe nünandre jäme aune ni ririadre kukwe ja üairebiti yekäre nikwe dre nuaindre?

¹⁰ Jesukwe niebare: “Ma rika jändrän ngwena kukwadre Ngöböye [...] ja ngite ütiäre ju blitakrä Ngöböbe känti ne ngwane, [...] ma mräkä iti romon makrä, ye rükata töre mae, ne ngwane jändrän ye makwe mikate ñukwä grä ken yete, abti ma jana ja mäketa käne ma mräkäbe, bti ma jatata, käkwe jändrän ye bian kukwadre Ngöböye. Mdakäre [...] makwe kukwe ükate ben” (Mat. 5:23-25). Aune Santiago tikabare: “Ni nünanka jäme, käta ni mda mda die mike nüne jäme, ni ye abko tä nüne metre” (Sant. 3:17, 18). Ye medenbätä, ni ñaka nüne jäme angwane ni ñaka raba ja ngwen kwin metre.

¹¹ Ani bämike. Juta ruäre känti rü nuainta yekänti nitre ñaka raba nüra nökö ñobätä ñan aune bomba ye tä doboi mikani nguse. Bomba kwatire kwatire ye tä ngetrete ye ngwane nitre nünanka kä yekänti ye tä kämikekä, jondron nünankäre ietre ye tä niken ngwarbe kän aune jondron kwetadre ye ñaka tä nemen krubäte juta yekänti. Ye erere arato, ni ñaka ja ngwen kwin köböite ja mräkätre ñaka nüne jäme angwane ni ñaka raba nirien kukwe ja üaire yebiti. Nikwe ngite juain ta jötrö ngwarbe ni madabiti aune töbikai kukwe kwin nuainne ni mada kräke ye köböire ni ririai kukwe ja üaire yebiti.

12. ¿Nitre umbre konkrekasionte ye tä ni dimike ño nüne keteitibe?

¹² Ne madakäre, nitre brare kädekata ni umbre kwrere ye raba ni töi mike nüne keteitibe jabe. Niaratre töita ni dimikakäre “tödeke gwaire” (Efe. 4:8, 13). Nitre umbre ji ngwanka tä niken kukwe driere nibe aune tätre kukwe Bibliabätä niere nie ye ngwane, tätre ni dimike  ja töi mike kwin jankunu (Efe. 4:22-24). Kukwe nieta kwetre nie mäträkäre nibätä yebiti Jehová tä ni ükete nünankäre kä mrä yete ye erere nikwe mikadre tuin jai. Nitre umbre ji ngwanka, ¿mätä mäträre ja mräkätre yebätä angwane mä töita kukwe ye ererebätä? (Gál. 6:1.)

“JA MOTO MIKADRE KUIN JAKRÄ KWÄRIKWÄRI”

13. ¿Kukwe nieta Efesios 4:25-32 ye nikwe ñaka mikadre täte angwane dre raba nemen bare?

¹³ Efesios 4:25-29 tä mäträre nibätä ne kwe ñaka ja ngwandre käme. Ñodre, ni ngöka, ni nemen rubun, kren aune kukwe nieta abokän tä ni mada mike di nekä aune ñaka dimike. Kukwe ne mika ñaka täte angwane, üai deme Ngöbökwe tä nemen ulire ñobätä ñan aune di ye tä ni mike nüne keteitibe (Efe. 4:30). Nünankäre jäme aune keteitibe ütiäte krubäte kukwe tikabare jatäri Pablokwe ne mikadre täte arato: “Mun mätä ni mdabtä amne mun moto romon jakrä kwärikwäri, erere arato mun moto ngadaen jötrö amne munta ngrente krikri romone amne munta ñäke ngwarbe taretare ni mda mdaye amne munta ñäke kämekäme bätäkä ngwarbe ni mda mda rüere, ye munkwe kitaka jökrä mento jabtä. Amne munkwe ja moto mika kuin jakrä kwärikwäri amne ja raba ruentari tare kwärikwäri munye amne, Ngöbökwe ni ngite dianinkä ño nibtä Kristo köböire, ye kwrere munkwe ja ngite dian jabti ta kwärikwäri arato” (Efe. 4:31, 32).

14. a) ¿“Munkwe ja moto mika kuin jakrä kwärikwäri” niebare ye tä dre mike gare nie? b) ¿Dre ni dimikai ja töi mike kwin ni mada kräke?

¹⁴ “Munkwe ja moto mika kuin jakrä kwärikwäri” niebare ne tä mike gare, ni jämi nuainne angwane ni rabadre nuainne bäri kwin. ¡Nitre mada ie ja ruin ño ye käre nikwe mikadre ütiäte jai ye bäri kwin! (Fili. 2:4.) Kukwe kötai bä ni törbadre niedi o kukwe ye raba ni bämike ni töbätä ye kwrere, akwa ¿nikwe niedre ye kwin? Nikwe töbikai käne kukwe yebätä ye käkwe ni dimikai kukwe niebare Pablokwe ne mike täte.

NITRE JA MRÄKÄRE JA TAREDRE AUNE JA MIKADRE ÜTIÄTE

15. ¿Kristo töita ño konkrekasion kräke ye Pablo mikani gare ño Efesios 5:28 yekänti?

¹⁵ Nitre gure metre tä ja mäke kwin jabe ye erere Biblia tä Kristo aune konkrekasion bämike. Ne tä mike gare ni brare rabadre muko kwe jie ngwen, tarere aune ngübare kwin, aune ni merire rabadre muko kwe mike täte (Efe. 5:22-33). Pablokwe kukwe ne tikani: “Ni brare brare käkwe meri kwe taredre. Amne niara tä ja ngrabare tarere au, ye kwrere meri kwe taredre” (Efe. 5:28). ¿“Ye kwrere” niebare Pablokwe ye dre gäräbare kwe? Kukwe ye känenkri niebare kwe “Kristo käkwe nitre tödekaka bti tarebare, käkwe ja biani müre ketadre kräke [...] ni mikakäre merebe amne deme [...] munkwe tödekani niarabiti munkwe niebare abko munkwe bämikani jabtä”. Jehová tö jondron jökrä ükaiteta kwin aune ye rabai bare Kristo köböire; ni brare töita kukwe ye ererebätä angwane rabadre mräkätre kwe dimike kukwe ja üairebiti.

16. ¿Biblia tä kukwe niere nitre rüne kräke ye tätre mike täte angwane dre kwin tä nemen bare?

¹⁶ Jehovakwe sribi mikani nitre rüne kisete ye ñaka käi kwitadrekä jabiti kwetre. Akwa, kä nengwane nitre kwati ñaka “rabadi ni mda mda tarere jire chi” (2 Tim. 3:1, 3). Ni brare kwati ñaka monsotre kwe ngübare aune ye köböite kukwe tare tä nemen bare monsotre yebätä. Pablokwe kukwe ne niebare nitre brare kukwebätä kräke: “Ñaka ngra ngra monso munkwe yebiti, ñakare aune munkwe töi ükate aune tötika jankunu Jehová kukwei yebiti” (Efe. 6:4, NM). Ja taredre aune ni mada mikadre ütiäte ye driedre gwi monsotre kia yei. Ye medenbätä, nitre rüne tä monsotre töi mike kukwe kwin nuainne ye ngwane tätre ja ngwen kukwe ükaninte Jehovakwe ye ererebätä. Ja gwirete ni ñaka ñäke rubune jai ye ngwane nita driere monsotre nikwe yei ütiäte krubäte niaratre rabadre ni mada tarere aune ni ji ngwanka  niaratre käne mike ütiäte jai. Ye käkwe niaratre dimikai nünankäre kä mrä Ngöböta käbämike yete.

17. Nita dre ribere jai ja kriemikakäre Diablu yebätä?

¹⁷ Diablu köböite ni ñaka tä nüne keteitibe aune ni tö rabai kukwe Ngöbökwe mikai täte ye ngwane niarakwe ja mikai ni rüere. Nitre kwati gure metre tätre ja tuenmetre, nitre ruäre nüne jabe akwa ñaka gure metre, arato ni brare o merire ja erebe tä ja mike gure, kukwe ye nuainta bäri kä nengwane. Kukwe nuainta yebiti Satana töi käme ye mikata nemen bare. Akwa nikwe ñaka ja tuanemetre töi kwitadre aune ñaka ja ngwandre nitre tä kukwe käme nuainne ye erere, ñakare aune nikwe ja töi mikadre Kristo erere (Efe. 4:17-21). Ye medenbätä, Biblia tä ni nübaire “jändrän jökrä bianta Ngöbökwe ja ngibiakrä ni rüe ngäniene” yebiti ja kriemike Diablu aune chokalitre yebätä (ñäkädre Efesios 6:10-13 yebätä).

“MUNKWE NI MDA MDA TARE ARATO”

18. ¿Dre köböire ni kristiano tä nüne keteitibe?

¹⁸ Ni tätre keteitibe yekäre nikwe ja taredre kwärikwäri. Nita Jesús tarere, Ngöbö tarere aune ja mräkätre tarere angwane ni töita kwatibe ‘üai deme köböire nüne jäme jabe kwärikwäri’ (Efe. 4:3-6). Jesukwe orabare Rün ie angwane blitabare kwe krörö ja tare yebätä: “Ñan nitre biani tie makwe noko aibe kräke tita ja di kärere mae, akwa niaratre näin kukwe kuin tibtä niere ni mda mdaye, ye abko nire nire käkwe tödekadi tibti niaratre kukwei köböire, nitre ye kräke tita ja di kärere mae arato. Ma ti Rün tikwe töita ketetibe tibe amne tita ketetibe mabe, ye kwrere nitre tödekaka tibti tibti, ye makwe die mika ja töi mike gwaire jökrä nünakäre kuin jabe kwärikwäri [...]. Amne tikwe ma mikanina gare ietre [...] ye köböire abko nita ja tarere kwärikwäri, ye kwrere jire niaratre käkwe ja taredre kwärikwäri arato amne, ti ara jire rabadre nüne niaratrebtä” (Juan 17:20, 21, 26).

19. ¿Ni töita kwatibe dre nuainbätä?

¹⁹ Ni ngite ye köböite ni töita nemen blo, akwa nita ni mada tarere angwane Salmista orasion nuainbare ye erere ni raba nuainne: ‘Ti brukwä ye mike keteitibe ne kwe mä kä ye tikwe jürä ngwandre jabätä’ (Sal. 86:11). Diablu tö ni diainkä mento ni Rün ni tarekä yebätä aune ja mräkätre yebätä, aisete nikwe ja töi mikadre kwatibe ja mike Diablu rüere. Ni mräkätre yebe, konkrekasionte aune kukwe drieta ye ngwane, ja di ngwandre kukwe niebare Pablokwe ne nuainne: “Ngöbö ngäbriänkä amne mun tare kri kwe, aisete munkwe ja töi mika [...] Ngöbö kwrere [...] munkwe ni mda mda tare arato” (Efe. 5:1, 2).

[Kukwe ngwantarita]

[Jondron üai bämikani página 29]

Jondron mäkwe ye mä mikate ñukwä grä ken biti mä rika ja mäketa käne mä mräkäbe

[Jondron üai bämikani página 31]

Nitre rüne, ni mada mikadre ütiäte jai ye munkwe drie monsotre kia munkwe yei