Kukwe kwe mikata gare

Jehovakwe ti tötikaba niara kukwei mikakäre täte

Max Lloyd tä mike gare

Kä 1955 ti aune misionero mada nämä kukwe driere Paraguay, ye ngwane nitre kwati rükaba deu rubune nun känti käkwe nun ketakaba aune rababa ngrente: “¡Ngöbö nunkwe tö däri ñain, aune tö gringo däriei!”. “Gringo” ye abokän nun ara gäräbare kwetre. Akwa ¿ñokänti nun nükani yete?

TI NÄMÄ juta tikwe Australia yekänti ngwane Jehovakwe ti tötikaba niara kukwei mikakäre täte. Tata aune mama töi ñan nämä nemen kwin pastor kwetre kräke, ñobätä ñan aune nämä niere kukwe ruäre Bibliabätä ye abokän ñaka metre. Kä 1938 ti rün käkwe tärä Enemigos tikani inglere ka ngäbitiba ni Testiko Jehovakwe ie. Kä rikaba kwati ta angwane ti rün aune ti meye ja ngökaba ñöte Jehová mikakäre täte. Yete ja käne nun ja mräkäre jatani Ngöbö kukwei mike nuaindre käne jai. Biti, ti ngwai Lesley nämä kä ngwen kwärike ti käne ja ngökaba ñöte. Kä 1940 tikwe ja ngökaba ñöte, aune kä nämä kwä ökän tibiti.

Rü kri nuainbare bobukäre, ye bitikäre nitre testiko Jehovakwe nämä tärä sribere aune döräire ye ñäkäibare ietre juta Australia yekänti. Aisete, ti nämene chi ti jatani kukwe mika nämene täte tikwe ye mike gare Bibliabiti. Ñobätä ti ñaka nämä bandera mike tuin ütiäte jai aune ja mike rükäre siba, kukwe ye mikakäre gare ti nämä niken Biblia ngwena kwelate jai (Éxo. 20:4, 5; Mat. 4:10; Juan 17:16; 1 Juan 5:21).

Monsotre nänkä kwelate ñaka nämä ja kete tibe, ñobätä ñan aune niaratre nämä nütüre ti abokän Alemania ni kä tuabitikä. Kä ye ngwane, película mika nämä tuare monsotre kwelate yei, akwa ye känenkri mika nämä nünaninkä krö kantakäre bandera ie. Ti nämä nemen täkäni tibien, ye medenbätä monso nibu o nimä nämä ti kain dokwäbiti ti mikakäre krö. Kukwe mika nämä täte tikwe yebätä ti kitakaba kwelate, akwa tärä juan nämä correo yete tie ye köböire tikwe ja tötikaba jankunu.

KUKWE NAMANI TIKWE

Tikwe nieba jai, kä rükai 14 tibiti angwane tikwe sribi köbö täte Jehovakwe diain ja käne. Akwa, ti rün aune ti meye nieba tie käne tikwe sribi känändre jai. ¡Ti rababa ulire krubäte! Tikwe kwarto ütiä biandre ietre rababa ribere tie, kä rabadre 18 tibiti angwane tikwe ja mikadre prekursor nieba kwetre tie. Käre nun nämä blite ngwian ganain nämä tikwe yebätä. Ti nämä niere ietre ti tö nämä ngwian ye ükaikrö sribi prekursor nuainkäre, akwa niaratre nämä denkä tikän.

 Tikwe ja mikaba prekursor ye ngwane niaratre blitaba tibe aune mikaba gare kwetre tie ti nämä ngwian bien ietre ye nämä ükökrö. Ngwian ye bianbata tie ne kwe tikwe dän aune jondron ribe nämä tikwe kukwe driekäre ye tikwe kökadre jai. Kukwe yebiti mikaba gare kwetre tie ti rabadre ja ngübare akwle aune ni mada ñan nuaindre ti kräke. ¡Kukwe ye rababa ja töi kräke tie!

Ti rün aune ti meye nämä nitre prekursor nübaire rabakäre nun gwirete, Lesley bätä ti, nun tö nämä kukwe driei bentre. Bämän krüte yebätä nun nämä niken kukwe driere ju ju te aune ji ngrabare, bätä nitre tötike Bibliabätä. Kä ye ngwane nitre kukwe driekä ora nuaindre 60 sö kratire kratire te. Ti meye nämä kukwe kwin bämike nun käne, ora ye nämä nemen bare ie.

TIKWE SRIBI PREKURSOR NUAINBA TASMANIA

Ngutuä mrente kädekata Tasmania nemenkä juta Australia, yekänti ti juanba kena prekursor erere, ti ngwai aune muko kwe nämä yete. Ye bitikäre, niaratre nübaibare Kwela Galaad nuainba bä jätäbiti bärikekäre yete. Kä jürä nämä nemen tibätä aune ti ñaka nämä kämikekä ti mräkätrebätä, ye medenbätä nitre namani niere sö krämä aibe te kä rükai tie. Kä 1950 ye ngwane ti kädekaba siervo de compañía, nengwane gätä nitre umbrekwe köböikitaka nieta. Ye bitikäre, ti juanba sribi prekursor especial nuainne ja mräkä bati ben.

Kä känti nitre nämä cobre denkä aune ni Testiko ñaka nämä, yekänti nun juanba. Kä yekänti nun rükaba bute dere aune hotel ñaka mrä yete nunkwe kübiaba. Jetebe se kwrere, nun rikaba kukwe driere ye ngwane nun nämä ngwentari nitrei medente ju nämä tökare rabakäre te. Kä jataba dere nunbiti ye ngwane ni iti käkwe nieba nuen ju nämä kwati tökare iglesia presbiteriana ye ken, ju ye bökänkä nämä ji ngwen iglesiate. Ni ye käkwe kukwe nieba nuen ye erere nunkwe nuainba, nunkwe blitaba diácono ben aune töi kwinbiti ju drieba kwe nuen. Ni ji ngwanka kukwe madabätä jue yekänti nun nämä niken mentokwäre kukwe driere ju ju te yebätä ja nämä nemen ruin jene nunye.

Kä yekänti nitre kwati tö nämä nun kukwe nuai aune nämä ja tötika Bibliabätä kain ngäbiti. Nun nämä yete rababa gare nitre ji ngwanka iglesiate yei, ye medenbätä niaratre niebare diácono ie rabadre nun juentari ju kwe ye bäre mento. ¡Bobukäre nun rababata ngwarbe näin ji ngrabare!

Jetebe se kwrere nukwe kukwe drieba dekäkri, derekri mada nun rikaba ju känene jai. Täkärä mikani kä ja dakakäre känti ye aibe rababa tuin kwin nuen, ye medenbätä nunkwe tribe ükaba yete aune nun rikaba kukwe driere jankunu. Kä jatabara iko, akwa nunkwe ja töi mikaba kukwe driere mrä ju mada yekänti. Ju kwati yekänti ni iti abokän kwe ju mada chi nämä kä kwe yete aune kwarto nämä kubu te, yete nun nübaiba kwe nemen.

NI NI TUABITIKÄ AUNE KWELA GALAAD

Kä rababara tibiti sö krä kwä yete, angwane sukursal Australia käkwe ti nübaiba sribire ni ni tuabitikä konkrekasionte erere. Kä nämä 20 tibiti  yebätä ti ñan nämä sribi ye ngübare jai. Ti tötikaba käne, ye bitikäre ti rikaba konkrekasion tuinbiti dimikakäre. Ti nämä bäri bati ja mräkätre kräke, akwa niaratre nämä ti mike tuin ütiäte jai aune sribi nuain nämä tikwe ye nämä kain ngäbiti.

Ti nämä niken ru jene jene te konkrekasion tuinbiti, ñodre, tikwe nänba bute, trente, karote aune ruäre ngwane tikwe nänba ni madabe motobiti, ti nämä tribe tikwe ngwen kise krati yebiti aune maletín kukwe driekäre ti nämä ngwen kise kwäräkri. Ti nämä nemen ja mräkätre gwirete ye nämä kä mike juto tibätä. Ni kädekani siervo de compañía nämä krire ju kwe sribere, akwa törbaba ti tuai nemen ja gwirete. Bämän yebätä tikwe kübiaba jondron mikani jubakäre yete, akwa yebiti ta kukwe ja üaire yebiti nunkwe ja dimikaba kwärikwäri.

Kä 1953 ye ngwane ti nübaiba Kwela Galaad nuainba bä grebiti bobu yete. Ye abokän kukwe kwin rababa tikwe. Kä rababa juto tibätä akwa ti rababa ja töibikare arato. ¿Ñobätä? Ti ngwai bätä muko kwe ngedianinkä kwela yebätä 30 julio kä 1950 ye ngwane juani Pakistán. Kä ñaka nikani kwati ta angwane Lesley namani bren aune krütani kä yekänti. Ti ngwai krütaba aune ti rikadre kä madakänti ye ngwane, ¿ja rabadre ruin ño ti rün aune ti meye yei? Niaratre nieba tie: “Jehovata mä juen medente yete mä rika”. Kä 1960 ye känenkri ti rün krütaba yebätä tikwe ñaka ja tuaninta ben.

Ye bitikäre, ti aune ni nirike nünanka Australia, yebe nunkwe nänba bämän krä ti rabakäre juta Nueva York. Nunkwe ja tötikaba, nunkwe ñäkäba Bibliabätä aune kukwe drieba nitre madai barkote. Julio kä 1953 ye ngwane gätä kri känti nitre juta madate nübaita nuainba Estadio de los Yankees, yebätä nun janama siba, nun jämi niken South Lansing (Nueva York) ye känenkri, nitre 165.829 käkwe ja ükakröba yete.

Nun 120 kä jene jene känti yei ja tötika krütaba angwane medente nun juain ye rababa gare nuen. Ye bitikäre, kä rababa nuen angwane nun rikaba betekä tärä ükakröta käi yekänti, juta medente nun juani ye känänkäre. Ti juanba Paraguay aune rababa gare tie juta yete nitre kwati nämene ja mike gobrantre rüere. Kena ti rababa juta yete angwane deu nitre kwati kukwe juruaba tie jubäre. Dekä tikwe ngwantariba ja mräkätre mada misionero yei dre “käi ngwan” nämä juto jabätä, kötare kwärä nieba kwetre tie: “Nitre tä ja mike gobrantre rüere nete ye krire mäkwe kukwe nuri. Nän nikren jukwete”. ¡Nitre rükä nämä nünaninkä ji ngrabare!

KUKWE NAMANI BARE

Bati, ti rikaba ni ni tuabitikä ben konkrekasion mente tuinbiti película La Sociedad del Nuevo Mundo en acción ye mikakäre tuare. Nunkwe nänba bäsi ora krä ökän: kena nun rikaba trente, biti carreta mikani mädäbätä yete aune mrä nun rikaba carreta mikani nibibätä yete, nun nämä jondron película mikara tuare aune máquina ñotra  mikakäre ye ngwen kötärä. Jetebe se kwrere, nun rikaba kukwe driere nitre nämä jondron nire ngübare yekänti aune nunkwe nitre ye nübaiba película ye mike ñärärä köbö deu yete. Nitre nijätä biti nirike rükaba.

Kä rikaba 20 minuto ta nun nämä película tuin angwane, ni mada nieba nuen nun rikadre drekebe ngwarbe käteri aune jondron película mikara tuare ye nunkwe dianba kisete aune nun rikaba gwä. Nitre kwati rikaba ngrente aune kürükwä kite kwinta bätä rababa niere: “¡Ngöbö nunkwe tö däri ñai, aune tö gringo däriei!”. Nun nibu “gringo” aibe nämä yete. Nitre ye törbaba näin gwä, akwa nitre rükaba película mrusaire käkwe ketabätäba. Nitre ye arabe rükabata ora 3 dekäkri, rababata kürükwä kite kwinta aune rababa niere nun rabaita jutate ye ngwane küdrei nunbätä kwetre.

Ja mräkätre blitaba guardia kä ye ngübabitikä ben aune guardia jataba nun tuin mädä krobubiti nun ngwankäre jutate. Nun rikabata ja jiebiti angwane kä mu dube aune kri nämä medente, yekänti guardia ye rababa niken kürü ngwen kisete nikrakäre käne. Ye ngwane rababa gare tie mädä tädre krati nunkwe ye bäri kwin, ye bitikäre tikwe kökaba krati jai.

MISIONERO MADA NÜKANI

Nitre ji ngwanka iglesiate nämä ja mike nun rüere, akwa nun nämä kukwe driere ye nitre nämä kain ngäbiti kwin. Kä 1955 ye ngwane misionero rükaba nirike, Elsie Swanson nämä näin siba, niara käi Canadá, Kwela Galaad nuainbare bä grebiti bärikekäre yete ja tötikani kwe. Niara rün aune meye ñaka nämene kukwebätä, aune ñaka nämene dimike, akwa yebiti ta niarakwe ja töi mikani sribire Jehová kräke. Ti aune Elsie sribibare sukursalte, akwa biti niara juanba kä madakänti. Köbö 31 diciembre kä 1957 nunkwe ja mäkäteba aune nun nibu aibe rikaba nüne ju nitre misionero kräke nemen kä mötörikri juta Paraguay yekänti.

Ñö jübara, ñö gwita, serbisio, lavadora ye ñaka nämä gwi nuen, akwa ñö okwä nämä kwati ju trökri. Nevera ñaka nämä nunkwe ye medenbätä nun nämä ja gota kökö köbö kwatire kwatire te. Nun ñan nämä jondron ribere krubäte jai aune nun nämä ja mräkätre konkrekasionte tarere krubäte, ye medenbätä nun nämä nüne kä jutobiti yete.

Kä 1963 ye ngwane nun rikaba basare ti meye känti. Kä rababa juto krubätebätä, ñobätä ñan  aune kä kwäjätä näre niara ñaka ti tuin, ye bitikäre niara brukwä rababa bren. Nun jataba yäketa Paraguay angwane, töbika rababa krubäte nun kisete: ¿nunkwe ti meye tuanemetre hospitalte ne kwe ni mada käkwe ngübadre aune nun rikadreta kukwe driere Paraguay? Nunkwe oraba krubäte aune nunkwe ja töi mikaba ti meye ngübare. Niara krütaba kä 1966 ye ngwane. Nunkwe niara ngübaba, akwa nunkwe ñaka sribi köbö täte Ngöbö kräke tuametreba.

Tikwe sribibare kä kwati te ni ni tuabitikä konkrekasionte, ni gätä kri köböbu tuabitikä aune nitre umbre tötike Kwela Sribi Ngöbökwe jie ngwankäre juta Australia yekänti, sribi ye rababa ütiäte ti kräke. Akwa, biti ti juanba sribi mada nuainne: ti kädekaba Ji ngwanka Sukursalte juta Australia yete. Ye bitikäre, sukursal mrä sribe törbaba aune ti kädekaba nitre dianinkä ju ja ükarakrö sribekä jie ngwankäre. Ja mräkätre kwati sribibare ja töi kwinbiti ye köböire sukursal sribebare bä nuäre.

Ye bitikäre, ti kädekaba sribire Departamento de Servicio, yekänti sribi Ngöbökwe nuain nämä ye ngübabiti nämä. Sribi mada ütiäte tikwe nuainba arato, ti juanba ni sukursal ruäre tuabitikä ye erere, aune ti nämä niken sukursal juta ruäre känti dimike. Ja mräkätre kitani ngite aune mika nämene ja tare nike krubäte kä kwati te Jehová mikabätä täte, ja mräkätre ye rababa gare tie juta ruäre yekänti. Niaratre kukwe kwin bämikani ye käkwe tödeka tikwe mikaba dite.

KÄ NENGWANE NUNTA BROOKLYN

Kä 2001 yete tikwe sukursal tuabitiba ünä, aune ti nämä nainte ti rükabata ja gwirete, ye ngwane täräkwata kwanba tie yebiti ti nübai nämä sribire Brooklyn (Nueva York) nitre nämä Sukursal Jie ngwen juta Estados Unidos yebe. Ti bätä Elsie oraba Jehovai, nunkwe töbikaba kukwe yebätä aune nunkwe ka ngäbitiba töi kwinbiti. Kä nikanina kä kwäjätä biti kwati nunbiti aune nun täbe nete.

Jehovata kukwe ribere ye erere ti muko tä nuainne ye abokän kwin krubäte. Kä niena gre ketabokä biti bäri nunbiti aune nun ñaka nemen bren gwä gwä. Nitre kätä Jehová mike täte ye niarakwe tötikai aune kukwe kwin mikai nemen bare kräke ye erere nun tö arato.

[Kukwe nieta página 19]

Tikwe nänba bute, trente, karote aune ruäre ngwane tikwe nänba ni madabe motobiti, ti nämä tribe tikwe ngwen kise krati yebiti aune maletín kukwe driekäre ti nämä ngwen kise kwäräkri

[Kukwe nieta página 21]

Jehovakwe nun tötikadre kärekäre ie nun tö

[Jondron üai bämikani página 18]

Kise ngeberekri: Ti nämä konkrekasion tuinbiti Australia Kise ruinkri: Ti, ti rün aune ti meye

[Jondron üai bämikani página 20]

Nunkwe ja mäkäteba 31 diciembre kä 1957