Nikwe Ngöbö ni tikatekä mikadre täte

“Ngöbö tareta ye abokän ne gärätä: kukwe kwe ye nikwe mikadre täte; aune, kukwe kwe ye ñaka doboko.” (1 JUAN 5:3, NM)

¿MÄ RABA MIKE GARE ÑO?

¿Satana tä ni töi kwite ño ne kwe kukwe Ngöbökwe ye rabadre tuin ribi krubäte nie?

¿Ñobätä nikwe töbikadre kwin krubäte ja ketamuko diankäre jai?

¿Dre ni dimikai ja ngwankäre metre Ngöbö ni mikaka kwäre yei?

1. ¿Jehová tö dre nuaindi erere tä nuainne yebiti tä dre nuainne, aune Adán bätä Eva tuanimetre dre nuainne kwe?

JEHOVÁ ye aibe tö dre nuaindi ye erere tä nuainne täte. Akwa, yebiti niara ñaka tä kukwe käme nuainne. Aune nitre niara mikaka täte tä dre dre nuainne ye ñaka ñäkäire ie. Ñakare aune, ni tö dre nuaindi ye tä ni tuenmetre nuainne akwle aune ni törbadre dre dre ie ja kräke ye erere ni raba nuainne. Ñodre, “kri dre kuin btä dre käme mikakrä gare” ye aibe ñäkäibare kwe Adán aune Eva yei (Gén. 2:17, JK). Niaratre käkwe Ngöbö töi mikadre nemen bare aune, tö rabadre dre nuaindi ye erere nuaindre täte kwetre arato.

2. ¿Ngöbökwe Adán aune Eva sribebare törbadre dre nuaindi erere nuainkäre akwle ye nianinte ño kän?

² ¿Ñobätä Jehovakwe Adán bätä Eva tuanimetre jondron jökrä nuainne? Ñobätä ñan aune niaratre ye sribebare kwe ja bä kwrere aune töi mikani kwe. Adán aune Eva nämene niara tarere ye käkwe töi mikadre näin ji kwin yebiti ie tö namani (Gén. 1:27; Rom. 2:15). Akwa ye käi rabadre juto niaratre yebätä aune törbadre dre nuaindi erere rabadre nuainne ye mikadre ütiäte kwetre jai näre, ja töi mikani kwetre Satana kukwei mike ütiäte jai aune ja töi mikani akwle kwetre dre kwin o dre käme den nuaindre jai. Ye aibe köböire törbadre dre nuaindi ye erere nuaindre kwetre namani nütüre, akwa ja ngökabare kwetre. Niaratre ja mikani ngite akwle, aune ngite ye nikani ngäbriäntre ye jökräbiti arato, aune kukwe tare krubäte namani bare (Rom. 5:12).

3, 4. ¿Satana tä Ngöbö kukwei ye mike tuin ño nie?

³ Satana käkwe ni nibu töi metre aune angeletre kwati krubäte töi mikani ñaka Ngöbö mike ja gobraine, ye erere raba ni ngökö arato. Niara tä ni mike töbike käre, kukwe ükaninte Ngöbökwe ye ñaka nuäre mikadre täte aune ñaka tä kä mike juto nibätä (1 Juan 5:3). Nikwe ja töi mikai krubäte ne erere angwane, ñaka raba ni töi mike kwin. Ja ngwai  kä 24 biti ja mikani gure gore käkwe niebare: “Ja ketamuko ñaka kwin nämä tikwe ye ti töi mikaba ñaka kwin, ñobätä ñan aune ti ñaka tö nämä mikai ja rüere yebätä”. Ja ketamuko nikwe ye ni jökrä bäsi töi mikanina kukwe käme nuainne ¿ñan ererea?

⁴ Ñaka nuäre niedre, akwa konkrekasionte nitre ñaka ja ngwen kwin ye tärä ruäre arato abokän raba ni töi mike käme. Monso bati kristiano tä mike gare: “Ja ketamuko tikwe ruäre nämä niken nitre ñaka Testiko yebe basare. Ye bitikäre rükaba gare tie, ti nämä näin käre bentre ye ngwane, bäri ti nämä ja töi mike niaratre erere. Ti di riakaba ja üaire: gätä ñaka jataba nemen tuin kwin tie aune nane nane ti nämä niken kukwe driere. Ye ngwane tikwe ja ketamuko mada kwin känändre rükaba gare tie. Aune ye erere tikwe nuainba”. Erametre, ja ketamuko nikwe ye raba ni töi mike kukwe ñaka kwin nuainne. Ye erere namani bare kädrieta Bibliabätä ye ani mike gare jai (Rom. 15:4).

“NAMANI JANKUNU NITRE [...] BRUKWÄ KWITE JAKRI”

5, 6. a) ¿Absalón nitre Israel kwati krubäte ngökani ño? b) ¿Kukwe ye namani bare kwin Absalón ie?

⁵ Nitre kwati käkwe ni mada töi mikani kukwe käme nuainne kädekateta Bibliabätä. Nitre ye ngätäite Absalón, rei David ngobo kädekateta. Niara ye nämene bä nuäre krubäte. Akwa, Satana erere, niara tö namani krubäte jondron ie ja kräke aune ye käkwe töi mikani jondron jenena ie ja kräke: kürä gobrankäre rünkwe yei tö namani. * Kürä gobrankäre ye diankäre jai niarakwe ja bämikani ja mike nitre Israel ye mike tuin bobre jai aune gobran ye töi ñaka nämene niaratre yebätä niebare kwe ietre. Kä Edén yekänti Diablu kukwe nuainbare ye erere Absalón nuainbare arato: ja bämikani kwe ni kwin ye kwrere aune rün kwe ye rüere kukwe ngwarbe niebare kwe (2 Sam. 15:1-5).

⁶ ¿Kukwe ye namani bare kwin ie? Ruäre ngwane namani bare ie, Biblia tä mike gare: “Absalón namani jankunu nitre Israel ye brukwä kwite jakri” (2 Sam. 15:6). Akwa, nämene bike kri ye köböite kukwe tare namani barebätä. Niara aune nitre brare kwati krubäte ngökabare kwe ye jökrä murie ketani (2 Sam. 18:7, 14-17).

7. ¿Absalón kukwe nuainbare ye tä dre driere ja töi kräke nie? (Üai tä página 14 ye mike ñärärä.)

⁷ ¿Ñobätä nitre Israel ja tuanimetre ngökadre jötrö ngwarbe? Absalón namani jondron käbämike yei niaratre tö namani ja kräke, o namanintre nain niara kri aune bä nuäre yei. Ye erere o ñakare, akwa kukwe ne abokän metre: ñaka ja ngwani metre kwe Jehovai aune ni dianinkä gobrankäre Jehovakwe yei. Kä nengwane, Satana tä nitre töi Absalón kwrere yebiti nitre Jehová mikaka täte ye brukwä kwite. Nitre ruäre tä niere: “Kukwe Ngöbökwe ye ñaka nuäre nuaindre”, o: “¡Nitre ñaka Jehová mike täte yebrä tä kä ngwen juto metre jabätä!”. ¿Nita ja ngwen metre kukwe nieta yebätä? ¿Ye ni ngökata nüke gare kwin nie? “Kukwe bökän” Jehovakwe, Kristokwe kukwe biani nuaindre, ¿ye aibe köböire ni raba nemen erametre kwäre nüke gare nie? (Sant. 1:25.) Kukwe ne ütiäte ni kristiano kräke ye nikwe bämikadre aune nita kwäre yebätä nikwe ñaka ja töi mikadre nierare kukwe käme nuainne (ñäkädre 1 Pedro 2:16 yebätä).

8. Ñaka Jehová mikata täte ye ngwane nüna ñaka jire kä jutobiti, ¿ye kukwe meden meden namani bare metre tä mike gare?

⁸ Satana tä okwä mike metrere monsotre bati yebätä. Ja mräkäbiti kä niena 30 tä niere: “Ti nämä bati ye ngwane ti nämä nütüre, kukwe ükaninte Jehovakwe ja ngwandre kwin kräke ye ñaka nämä ti kriemike, ñakare aune nämä ñaka ti tuenmetre kukwe ruäre nuainne”. Ye köböite niarakwe ja mikani gure gore. ¿Kä namani bäri jutobätä? Ñakare. Niara arabe tä niere: “Kä kwati krubäte te ja rababa ruin ngite tie, aune ti töi ye rababa ti nike jankunu”. Ne madakäre, ja  ngwai itibätä kukwe namani bare nämene bati ye ngwane abokän tä mike gare krörö: “Ja mikata gure gore ye bitikäre, ja nemen ruin ulire aune ngwarbe nie. Kä nikanina kwäjätä biti kwä ökän ta, akwa kukwe käme nuainbare tikwe ye ñaka käi nikwitekä tibiti”. Ja ngwai mada tä niere: “Ti nämä ja ngwen käme yebiti nitre tare tikwe ye ti nämä mike ja tarenike rükaba gare tie angwane, ja rababa ruin ñaka kwin tie ja töibiti, kukwe ja üaire yebiti aune ti rababa ulire krubäte. Ni ñaka tä kwin Jehová okwäkänti angwane ni ñaka raba nüne kwin”. Monsotre, munkwe ñaka ja tuanmetre ngökadre Satana ie: mun törba dre nuain ye känenkri, käre munkwe töbika kukwe tare raba nemen bare yebätä.

9. a) ¿Nikwe kukwe meden ngwandretari jai Jehová yebätä aune kukwe ükaninte nuaindre kwe bätä kukwe ni jie ngwankäre biani kwe nie yebätä? b) ¿Ñobätä ütiäte nikwe Ngöbö mikadre gare kwin jai?

⁹ Ja mräkätre bati, aune mada abokän ñaka niena bati, käkwe kukwe käme nuainbare köböire namani gare ietre kukwe käme nuainta ye köböite kukwe tare tä nemen bare nibätä (Gál. 6:7, 8). Ni itire itire rabadre ngwentari jai: “¿Satana tä ja di ngwen kö okwä kämebiti ti ngökö ye nüke gare tie? ¿Tita Jehová ye mike ja ketamuko bäri kwin aune niara tä käre kukwe metre niere bätä tö kukwe kwin ie ti kräke yei tita tö ngwen? ¿Jondron raba kukwe kwin mike nemen tikwe aune kä mike juto tibätä ye niara ñaka raba ñäkäire jire tie gare kwin tie?” (ñäkädre Isaías 48:17, 18 yebätä). Ni törbadre metre jän niei angwane, ni ñaka rabadre kukwe ruäre aibe mike gare Jehová yebätä jai. Nikwe niara mikadre gare kwin jai aune ni raba niere metre kukwe ükaninte nuaindre kwe, kukwe ni jie ngwankäre biani kwe ye nuainbare kwe ni tare kwe yebätä aune ñaka ni tö dre nuaindi ye ñäkäikäre nie (Sal. 25:14).

 JEHOVÁ NI MIKADRE TÖBÄTÄ AUNE NIKWE MIKADRE TÄTE KÄRÄDRE IE

10. ¿Ñobätä nikwe ja di ngwandre ja ngwen rey Salomón nämene bati ye erere?

¹⁰ Salomón nämene bati angwane, orabare kwe töi bobrebiti Ngöböi ye ngwane niebare kwe: “Ti abokän tä monsore. Kukwe jämi gare täte tie”. Biti niara rabadre töbätä aune Jehová mike täte käräbare kwe ie (1 Rey. 3:7-9, 12). Orasion nuainbare kwe ye Jehovakwe kukwe nuabare. Ni bati o ni niena umbre akwa niarakwe ye erere nuaindi ni kräke. Niarakwe ñaka ja töbiti kukwe mikai gare nie aune ni mikai töbätä. Nikwe ja tötikai kwin Bibliabätä, nikwe üai deme käräi ie, kukwe keta kabre ja üaire bianta kwe nie konkrekasion kristiana yebiti ye nikwe kain ngäbiti angwane ni mikai töbätä kwe (Sant. 1:5). Kukwe nebiti Jehová tä monsotre bati kätä mike täte ye dimike rabakäre bäri töbätä nitre tä ñaka niara mike täte ngwä, ye nikwe ngwandre törö jai, aune nitre “töbätä kri angwane ni ie jondron nüke gare kwin” kä nebätä ye ngwä arato (Luc. 10:21 NGT; ñäkädre Salmo 119:98-100 yebätä).

11-13. a) ¿Salmo 26:4, Proverbios 13:20 aune 1 Corintios 15:33 ye tä kukwe meden ütiäte ja töi kräke driere nie? b) ¿Kukwe nieta Bibliabätä ja jie ngwankäre ne ni raba nuainne ño?

¹¹ Ni raba mike ñärärä, ni tö Jehová mikai gare kwin jai angwane, ütiäte krubäte ja tötikadre Bibliabätä aune kukwebätä nita ñäke yebätä töbikadretari. Bämikakäre, bersikulo keta kabre yebätä kukwe ütiäte ja jie ngwankäre mikata gare ja ketamuko yebätä ye ani mike gare jai. Salmo 26:4 tä niere: “Ti ñaka täke ni kukwe ngwarbe niekä yebe; aune ti ñaka tä näin nitre ja bämike jerekäbe yebe”. Proverbios 13:20 tä niere: “Nire kätä näin ni töbätä ben ye rabai töbätä arato, akwa nire kätä ja kete ni ñaka töbätä ben, kukwe tare tä kräke”. Aune 1 Corintios 15:33 tä mike gare: “Ni kukwe muko diän diän ben ni töi kuin metre tä ja gete angwane, ni töi kuin metre abko tä neme diän arato”.

¹² Bersikulo ne tä kukwe ütiäte ja töi kräke driere nie. Kena, ja ketamuko kwin nikwe diandre jai yei Jehová tö, niara tö ni kriemikai kukwe käme yebätä aune kukwe ja üaire yebiti. Ketebukäre, nirebe nita ja kete ye raba, kukwe kwin o kukwe tare mike nemen bare nibätä. Ne madakäre, bersikulo ne tä tikani ño jatäri ye kätä mike gare ja ruin ño nie ye Jehová tö mikai gare. ¿Tä nuainne ño? Ni raba mike ñärärä kukwe tikani nuaindre yekänti ñaka nieta nie “Mäkwe ñaka kukwe ne nuain o kukwe se nuain”, ñakare aune kukwe nieta metre ta nie yebiti kukwe metre mikata gare. Ye abokän Jehová tä kukwe ne kwrere niere nie: “Kukwe tä ükaninte ye erere nuaindre aune ñaka nuaindre bä jene”. Aune, ¿mäkwe dre nuaindi mada? ¿Dreta mä brukwäte?”.

¹³ Ne madakäre, besikulo ye tikani kukwe niebare kwrere, o kukwe ñäkätä ni kräke kwrere, ye ütiäte kä jökrä ngwane aune kukwe keta kabre kräke. Ñodre, nikwe ngwandretari jai: “¿Tikwe dre nuaindre ne kwe tikwe ñaka ja ketadre ‘nitre ja bämike jerekäbe yebe’? ¿Kukwe meden raba ti töi mike ja mäke bentre? (Pro. 3:32; 6:12.) ¿Nire nire ‘töbätä’ abokän ben tikwe ja ketadre ie Jehová tö, aune nire nire abokän ‘ñaka töbätä’? (Sal. 111:10; 112:1; Pro. 1:7.) ¿Ni töi ñaka kwin ben tikwe ja ketai ye köböite ti ‘töi kuin metre’ meden meden raba nete tikän? Nitre ñaka Ngöbö mike täte, ¿ye aibe ja ketamuko ñaka kwin? (2 Ped. 2:1-3.)”. Kukwe ngwantarita ne mikata gare ño yebätä nikwe töbikadretari.

14. ¿Ja Tötikata ni Mräkäbe ye ni raba nuainne ño bäri kwin?

¹⁴ Kukwe meden ütiäte ni aune ni mräkätre kräke ye tuin ño Jehovai mikata gare texto mada känti ye mikakäre gare jai nikwe ja tötikadrebätä angwane nikwe töbikadretari kukwe yebätä. * Erametre, nitre rüne tädre Ja Tötike Mräkäbe ye ngwane rabadre ja tötike kukwe  nebätä, aune rabadre nuainne mräkätre kwetre itire itire ye dimikakäre ne kwe rükadre gare ietre, Ngöbökwe ni tare krubäte yebätä kukwe ükaninte nuaindre kwe aune kukwe ja jie ngwankäre biani kwe nie (Sal. 119:72). Ye aibe köböire mräkätre kwe ye jökrä rabai nüne keteitibe jabe aune rökrai bäri Jehová ken.

15. ¿Nita ja ngwen töbätä aune nita Ngöbö mike täte ye ñokänti gare nie?

¹⁵ ¿Ñokänti gare nie nita ja ngwen töbätä aune Ngöbö mike täte? Nitre kirabe ja ngwani metre Ngöböi töi nämene ño ye erere ni töita o ñakare yebätä nikwe töbikadre. Ñodre, rei David tikabare: “Ngöbö tikwe, sribi mäkwe ye käi juto tibätä, aune kukwe mäkwe ye tä ti brukwäte” (Sal. 40:8). Aune ni Salmo 119 tikaka ye niebare: “¡Tita kukwe mäkwe tarere krubäte! Mantre jetebe tita ja tötikebätä” (Sal. 119:97). Ja tötikata kwin, orasion nuainta, töbikatarita, aune Ngöbö kukwei mikata täte köböire kukwe kwin tä nemen nikwe, ye aibe ngwane ja tare tä nirien (Sal. 34:8).

NIKWE JA DI NGWANDRE RABAKÄRE JANKUNU KWÄRE

16. ¿Nikwe dre ngwandre törö jai ne kwe nita rüre ja üaire ye ngwane nikwe ganandre aune ni rabadre erametre kwäre?

¹⁶ Kirabe nükebe kä nengwane, juta keta kabre rü nuainbarera krubäte nünankäre jäme. ¡Ni kristiano ja di ngwandre bäri kukwe ja üaire yebiti ne kwe ni tädre jankunu kwäre! Nikwe ngwandre törö jai ni ñaka tä ja tuin Satana, nitre ñaka Ngöbö mike täte aune üai käme ye aibe ben, ñakare aune nita ja tuin ni töi ñaka metre aune ni brukwä ni ngökö krubäte yebe arato (Jer. 17:9; Efe. 2:3). Akwa Jehová diebiti, ni raba ganane. Aune nikwe ganandi batire batire, kri o chi, akwa ye köböire kukwe ketebu kwin rabai nikwe. Kena, nikwe kä mikai juto Jehovabätä (Pro. 27:11). Ketebukäre, “kukwe bökän [...] ni mikaka kwäre” ye rabai ni mike kwäre angwane, nikwe bäri ja töi mikai kwatibe nänkäre jankunu ji krä chi tä niken ni ngwena ja nire käre kokwäre yebiti. Mrä, Jehová tä käbämike niarakwe ni ja ngwanka metre mikai kwäre, ye ngwane kä rabai juto nibätä (Sant. 1:25 NGT; Mat. 7:13, 14).

17. Nikwe ja mikadre ngite ye ngwane, ¿ñobätä nikwe ñaka ja ngwandre di nekä, aune drebiti Jehová tä ni dimike?

¹⁷ Erametre, ni jökrä tä ja mike ngite (Ecl. 7:20). Ye rabadre bare nibätä angwane, ñaka ja ngwandre di nekä aune ni ñaka ütiäte ye ñan nütüdre. Ni ja mikadre ngite ye ngwane, ñaka ja ngwandre di nekä aune nändre jankunu ja käne, ye rabadre bare niekäre nikwe ja di kärädre nitre umbre konkrekasionte yei. Santiago mikani gare “ni tä tödeke Ngöböbiti [...], aune ja di käräi ie ni bren kräke ngwane, ne käkwe ni bren mikaita kwin; angwane Ji dokwäte kri [Jehová, NM] kwe ni bren gaikröta krö. Arato niarakwe ja mikani ngite ngwane, ngite ne diandi niarabiti ta” (Sant. 5:15, NGT). Jehová ni mike tuin bobre krubäte jai aune niara jatani ni ngwena konkrekasionte ñobätä ñan aune kukwe kwin jutuabare ni brukwäte ie ye nikwe ngwandre törö jai (ñäkädre Salmo 103:8, 9 yebätä). Nikwe ja di ngwain ja ngwen metre ie ja brukwä tätebiti ye ngwane, niarakwe ñaka ni tuainmetre jire (1 Cró. 28:9).

18. Jesukwe orabare tä Juan 17:15 ye ererebätä, ¿nikwe dre nuaindre ne kwe Jehovakwe ni kriemikadre?

¹⁸ Jesús murie ketadre ye känenkri köbö mrä deu te, orasion nuainbare kwe Jehovai nitre apóstol nijätä biti iti ye kräke: “Makwe ngibiadre rüe Satana ngäniene abko tita ribere mae” (Juan 17:15). Kä nengwane, Kristo töi täbe ye erere ni jökrä ja tötikaka niarabe kräke. Ye medenbätä, Ngöbökwe orasion Jesukwe ye kukwe nuai aune ni kriemikai kwe kä krüte ne näire ie nikwe tö ngwandre. Biblia tä käbämike: “Niara escudo kwrere nitre mikaka täte metre kräke, [...] aune nitre tä ja ngwen metre niarai ye kriemikai kwe” (Pro. 2:7, 8). Ja ngwandre metre ye ñaka nuäre ni raba niere, akwa ji ye aibe raba niken ni ngwena nüna kärekäre aune ni rabai kwäre erametre ye kokwäre (Rom. 8:21). ¡Ni ñaka jire iti raba ni denkä yete!

[Nota]

[Kukwe ngwantarita]

[Jondron üai bämikani página 14]

¿Kä nengwane nire nire Absalón ye kwrere, aune ño nita ja kriemike ne kwe ñaka ni töi mikadre käme kwetre?