“¿Nire ngänikaidi tikwe?”
“¿Nire ngänikaidi tikwe?”
“Rü rakadrekä tibätä angwane, [...] tikwe tödekai.” (SAL. 27:3, BWVI)
¿DRE NI DIMIKAI ÑAKA KÄ JÜRÄ NGWEN JABÄTÄ NIETA BERSIKULO NEKÄNTI?
Salmo 27:1
Salmo 27:4
Salmo 27:11
1. ¿Salmo 27 yebätä nikwe ja tötikai ye ni dimikai ño kukwe ngwantarita jatäri ye mike gare?
KUKWE tare tä nirien bäri kä jökräbiti tibien, ¿akwa ñobätä kukwe drieta ye tä nirien bäri? Ngwian ñakare käi näire nita nüne, ¿akwa ñobätä nita kä jutobiti kä denkä jai aune ni die yebiti kukwe driere? Kukwe rabai bare ja känenkäre ye jürä nitre kwatibätä, ¿akwa ño ni raba ñaka kä jürä ngwen jabätä nänkäre jankunu ja käne? Salmo 27 yebätä rei David kantabare yekänti kukwe ngwantarita ne mikata gare.
2. ¿Kä jürä krubäte ye tä mate ño nitrebätä, akwa nirei nita tö ngwen?
2 David salmo tikabare ye ngwane kukwe ne niebare kena kwe: “Ngöbö abrä ti ñotrai aune ti nirera. ¿Nire ngänikaidi tikwe? Ngöbö ti nire dira. ¿Nire ngänikaidi tikwe?” (Sal. 27:1, Book of Worship for Valiente Indians [BWVI] (tärä okwä ükaninte)). Kä jürä krubäte ye raba ni mike di krüte aune jondron mada nuain ñaka raba. Akwa, nire tä tö ngwen Jehovai ye ñaka kä jürä ngwen krubäte jabätä (1 Ped. 3:14). Nire nire niara mikai ja kriemikaka ye “rabai nüne jäme aune kukwe tare tä nemen barebätä abokän tä kä jürä mike krubätebätä yebätä rabai kwäre” (Pro. 1:33; 3:25). Ñobätä ye ani mike gare jai.
“NGÖBÖ TI ÑOTRAI AUNE TI NIRERA”
3. ¿Ño Ngöbö tä ñotra kwrere ni kräke, akwa nikwe dre nuaindre?
3 “Ngöbö abrä ti ñotrai” nieta Bibliakwe ye tä mike gare Jehová tä kukwe metre driere nie (Sal. 27:1, BWVI). Ñotra trä metre, ye raba kukwe tare tädre ni jiete ye mike gare nie. Akwa, ñaka raba denkä, ye medenbätä dre jutuadre nie ye ererebätä nikwe ja ngwandre. Ye erere arato, kukwe nemen bare kä jökräbiti tibien tä dre mike gare ye Jehová tä mike gare nie, aune tä ni mike mokre kukwe tare nibira ja ken yebätä, aune kukwe Bibliabätä ja jie ngwankäre tä bien nie ye käre tä ni dimike, akwa kukwe nemen gare nie ye erere nikwe nuaindre. Ye erere angwane nikwe ja ngwandi töbätä erametre, salmista tärä tikabare ye kwrere: “Mä kukwei ye tä ti mike bäri töbätä nitre ja mikaka ti rüere ye ngwä [...]. Kukwe niena nüke gare bäri kwin tie nitre dirikä tie ye jökrä ngwä” (Sal. 119:98, 99, 130).
4. a) ¿Ñobätä David niebare ja brukwä tätebiti: “Ngöbö abrä [...] ti nirera”? b) ¿Ñongwane Jehovakwe nitre niara mikaka täte ye mikai kwäre?
4 Salmo 27:1 yekänti David kukwe niebare ye ngwane, Jehovakwe niara mikani kwäre ye nükani törö ie. Ñodre, Jehovakwe mikani kwäre “kwra lion kisete aune oso kisete”. Jehovakwe mikani Goliat ni kri krubäte ye ganainne arato. Ye bitikäre, batire batire lanza yebiti rei Saúl tö namani David murie ketai ye ngwane kriemikani kwe (1 Sam. 17:37, 49, 50; 18:11, 12; 19:10). ¡Yebätä Davidkwe niebare ja brukwä tätebiti: “Ngöbö abrä [...] ti nirera”! “Ja tare nika[d]i kri” käi nibira ja ken ye näire, Jehovakwe nitre niara mikaka täte ye kriemikai arato, aune David mikani kwäre kwe ye erere rabai nitre ye kräke (Apoc. 7:14; 2 Ped. 2:9).
NIARAKWE GANANBARE YE JÖKRÄ ANI NGWEN TÖRÖ JAI
5, 6. a) ¿Kukwe namani bare ye nikwe ngwandre törö jai ye raba ni dimike ño ñaka kä jürä ngwen jabätä? b) ¿Jehovakwe kukwe nuainbarera nitre mikaka täte kräke yebätä nikwe ja tötikadre ye raba ni dimike ño ñaka kä jürä ngwen jabätä?
5 Kukwe keteiti raba ni dimike ñaka kä jürä ngwen jabätä ye tä mikani Salmo 27: 2, 3 (ñäkädrebätä). Ruäre ngwane Jehovakwe David mikani kwäre kukwe tare keta kabrebätä ye nükaninta törö ie (1 Sam. 17:34-37). Niara nämene kukwe ye ngwenta törö jai käkwe mikani tö ngwen bäri ja tuakäre kukwe tare ben. ¿Aune mä? ¿Jehovakwe mä dimikani ño mekerabe ye törö mäi? ¿Kukwe ye tä mä dimike ñaka kä jürä ngwen jabätä? Ñodre, ¿mäkwe orabare bäri kukwe ruäre tare krubäte namani mä kisete yebätä aune ye bitikäre Jehová mä mikani ño töbätä o ja di biani mäi ja tuakäre kukwe yebe ye tuani mäkwe? ¿Kukwe ruäre ñaka namani mä töi mike Ngöbö mike täte kä jutobiti akwa ye bitikäre ñaka namanina mä kisete, o “jukwe [...] tikani kri” kukwe driekäre bäri mäi ye törö mäi? (1 Cor. 16:9, NGT.) ¿Mätä töbiketa kukwe yebätä angwane jata nemen ruin ño mäi? Kukwe nebätä nikwe töbikadre angwane Jehová raba ni dimike kä ngwen nüke jai kukwe tare rabadre ni kisete yebätä rabadre gare metre nie, ¿ñan ererea? (Rom. 5:3-5.)
6 ¿Gobran dite törbadre nitre testiko Jehovakwe juta keteitibe kwrere ye gaite täte angwane nikwe dre nuaindre? Kä nengwane nitre kwati käkwe ja töi mikanina kukwe ye erere nuainne, akwa ñaka nemen bare ietre. Jehovakwe dre nuainbarera juta kwe kräke yebätä nikwe töbikadretari angwane, raba ni dimike tö ngwen kukwe ja känenkäre yei (Dan. 3:28).
NGÖBÖ MIKA TÄTE METRE YE MIKE ÜTIÄTE JAI
7, 8. a) Salmo 27:4 yebätä kukwe nieta ye erere, ¿David dre ribebare Jehovai? b) ¿Templo kri ja üaire Jehovakwe ye abokän dre, aune yete nita mike täte ño?
7 Ngöbö mika täte metre taredre ye raba ni dimike ñaka kä jürä ngwen jabätä arato (ñäkädre Salmo 27:4 yebätä). David näire, tabernáculo ye nämene “ju Jehovakwe”. Akwa David kukwe ükaninte templo kräke, ye bitikäre ngobo Salomón yekwe ju kri krubäte ye sribebare. Siklo nikani ta ye bitikäre, Jesukwe mikani gare ju kri te Ngöbö mika nämene täte ye ñaka rabaira ütiäte (Juan 4:21-23). Hebreos kapitulo 8 nemen 10 yekänti, apóstol Pablo niebare Jesús ja ngökabare ñöte aune namani Jehová töi nuainkäre ye ngwane templo kri ja üaire ye namani ükaninte. Ye namani bare kä 29 yete (Heb. 10:10). Templo kri ja üaire ye abokän Ngöbökwe kukwe ükaninte ne kwe Jesús ja nire biani ni kökatarikäre ie tödekadre ye köböire ni rabadre nökrö niara ken. ¿Nita niara mike täte ño templo yete? Orasion nuainta “ja töi metrebti amne tödekabtä kwatibe”, kukwe käbämikata kä ja känenkäre kräke ie nita tö ngwen metre abokän mikata gare nikwe ni jökrä ie, nitre mada Ngöbö mikaka täte dimikata nikwe konkrekasionte aune ja tötikata ni mräkäbe yebiti nuainta arato (Heb. 10:22-25). Ngöbö mika täte metre mikadre ütiäte jai ye tä ni dimike kä krüte ne näire.
8 Kä jökräbiti tibien nitre kwati Jehová mikaka täte metre tä kukwe driere bäri. Ñodre, tätre ja kite blitakäre nitre mada kukwei yebiti o nitre ribeta Gobran Ngöbökwe kukwei driekäre bäri ye käikänti tätre niken nüne. Sribi nuainta kwetre yebiti tä bämike, salmista ye erere, tä jondron keteitibe ribere Jehovai: niaratre kadre ngäbiti kwe aune kukwe rabadre bare bätätre akwa yebiti ta mikadre täte kwetre (ñäkädre Salmo 27:6 yebätä).
NGÖBÖ NI DIMIKAKA YEI TÖ NGWANDRE
9, 10. ¿Kukwe käbämikani Salmo 27:10 ye dre gärätä?
9 Jehová ni dimikaka ie David nämene tö ngwen täte mikani gare kwe kukwe ütiäte nebiti: “Ti rün angwane ti meyekwe ti tuainmetre; näire Ngöbökwe [...] ti diain [jai, NM]” (Sal. 27:10, BWVI). Kukwe namani bare kädrieta Samuel Kena kapitulo 22 ye köböire nüke gare nie David ye ñaka tuanimetre rünkwe aune meyekwe. Akwa, ni näire nitre kwati Ngöbö mikaka täte ye mräkätre käkwe tuanimetre abokän kätä mike ja tare nike, aune konkrekasion kristiana yete niaratre dimikaka bätä kriemikaka tä kwen ietre.
10 Jehová tä juto biare nitre ja ngwanka metre niarai tuanmetreta ni madakwe ye dimikakäre, ye medenbätä ni rabai ja tare nike kukwe keta kabre kisete ye ngwane ni dimikai kwe arato. Ñodre, jondron kwetadre kwandre ño nie yebätä ni rabadre töbike angwane, Jehovakwe ni dimikai ie nikwe tö ngwandre (Heb. 13:5, 6.) Nitre niara mikaka täte metre ye jökrä tätre dre dre ribere jai aune kukwe meden meden tä kisete ye nüke gare ie.
11. ¿Nita tö ngwen Jehovai ye raba mate ño ni madabätä? Mä raba bämike.
11 Victoria, ja tötikaka Bibliabätä tä nüne Liberia yebätä ani kukwe mike gare jai. Niara nämene nirien kukwe ja üaire yebiti ja ngökakäre ñöte angwane, muko kwe käkwe tuanimetre monsoi nimä ben. Ju nünankäre aune sribi ñaka nämene ie, akwa ñaka ja di ngwani nekä kwe aune ja ngökabare ñöte kwe. Kä nikani braibe ta angwane, ngängän kä 13 biti ie ngwian kwani ere karterate. Ngwian nämene nuäi ye ñaka täinbare kwetre, ne kwe ñaka ja töi mikadre kwetre ngwian ye den jai, ñakare aune jötrö ngwarbe ni rükä ngwian bökänkä yei mikaninta gare kwe. Ni rükä yekwe niebare ni jökrä ñaka rabadre gore nitre testiko Jehovakwe erere akräke, ni jökrä rabadre nüne bäri kwin aune jäme. Jehová tä kä mrä käbämike ye Victoria mikani gare ie Bibliabiti. Victoria ñaka ngwian goibare yebätä ni rükä töi namani ñan krütare, ye ütiäre ngwian biani debe näre kwe ie. Erametre, dre dre ribeta nikwe jai ye jökrä Jehovakwe biain nie, ie nita tödeke ja brukwä tätebiti, yebätä ni testiko Jehovakwe ñaka gore ye nikwe bämikanina kwin ni madai.
12. Jehová mikabätä täte ngwian o sribi tä nete nikän ¿akwa ñobätä nita mike täte jankunu? Mä raba bämike keteiti.
12 Thomas, ni kukwe driekä jämi ja ngökö ñöte nünanka Sierra Leona, ie ja namani ruin ño ye bämike ja töibätä arato. Kä nikani kwati ta bäsi yete niarakwe sribibare profesor kwrere, akwa sribi ye ñaka ütiä biani ie. Sribi nämene kwe ye jökrä ütiä biandre ie yekäre ¿dre nuaindre kwe? Sacerdote ji ngwanka kwelate yebe niarakwe blitadre. Sacerdote ye käkwe niebare ie nitre testiko Jehovakwe tä kukwe niere ye drie ñaka nämene kwela yete, aune niarakwe dre diandre nuaindre jai yebätä töbikadre kwe niebare kwe ie, sribi o kukwe Bibliabätä mika nämene täte kwe. Ngwian nämene biandre sribi ütiäre niarai aune sribi kwelate tuanimetre kwe ye bitikäre, sribi mada kwani ie, namani radio aune teléfono ükete. Kukwe ne aune kukwe mada bäsi ne kwrere namanina bare ye tä bämike, ni jondron jökrä Sribekä aune juta kwe Kriemikaka ie nita tö ngwen metre ye bäri dite kukwe tare rabadre bare nibätä jürä ngwandre jabätä ye kräke, kä krüte nete kä jürä ye tä ni jökräbätä.
13. ¿Juta ruäre te nitre nüne bobre yekänti kukwe drieta ye tä nirien ño?
13 Juta keta kabre te nitre tä nüne bobre krubäte, yekänti nitre Gobran Ngöbökwe kukwei driekä ye tä kä jutobiti kukwe driere. ¿Ñobätä? Sukursal keteiti tä mike gare: “Nitre kwati ñaka sribire ye tä ja tötika Bibliabätä kain ngäbiti, aune köbö tä nemente bäri ja tötikakäre ietre. Ja mräkätre aune ja ngwaitre yei kätä nemente bäri kukwe driekäre arato. Nita nüne kä krüte te, ye niena gare nitre nünanka juta ruäre bäri bobre känti yei, ñobätä ñan aune kukwe tä nakainkä niaratre bäre ye tä mike gare metre ietre”. Juta ruäre känti, nitre kukwe driekä ye itire itire tä ni nimä biti bäri tötike Bibliabätä. Misionero tä nüne kä kwäjätä biti kubu biti bäri juta yekänti käkwe tikabare: “Nitre kukwe driekä kwati krubäte tä nüne jondron braibe kwetre yebiti aune töi ñaka krubäte jondron känebätä yebätä, köböire niaratre raba kä denkä bäri kukwe driekäre aune ni mada tötikakäre Bibliabätä”.
14. ¿Nitre kwati krubäte ye Ngöbö tä kriemike ño?
14 Jehovakwe juta kwe dimikai, kriemikai aune mikai kwäre gwairebe, metre aune kukwe ja üaire yebiti käbämikani kwe, aune nita tö ngwen niarai (Sal. 37:28; 91:1-3). “Ja tare nika[d]i kri” yete nitre kwati krubäte rabaite nire (Apoc. 7:9, 14). Ye medenbätä kä krüte nete nitre kwati krubäte ye ñaka gaite gare nie. Niaratre rabai ja di ribere ye näre biandi ietre kä ngwankäre nüke jai tödeka kwetre nuaite ye ngwane aune ja mäkäkäre kwin Ngöböbe. Aune ja tare nikai kri rabaira krüte ye näire, Jehovakwe juta kwe kriemikai.
“TI TÖTIKE, JEHOVÁ JI MÄKWE YEBÄTÄ”
15, 16. ¿Ngöböta ni tötike erere nita nuainne ye köböire dre kwin tä nemen nikwe? Mä raba bämike.
15 Nikwe ñaka kä jürä ngwandre jabätä yekäre, nikwe ja tuanemetre jankunu jie ngwandre Ngöböi, David orasion nuainbare tä mike gare ne erere: “Ti tötike, Jehová, ji mäkwe yebätä, aune nitre ti rüere yebätä ti jie ngwen ji metre yebiti” (Sal. 27:11). Orasion ne ererebätä ja ngwandre ye abokän nitre braibe dianinkä Jehovakwe ji ngwanka tä kukwe niere nuaindre nie ye jökrä nikwe kukwe nuadre kwin aune mikadre täte jötrö. Ja mräkätre kwati krubäte ñaka niena rürübän ütiä mike ngwarbe jabiti, ye raba niere nünandre jondron braibebiti nieta mikani täte kwetre ye köböire kukwe kwin namanina kwetre. Niaratre tä ja töi mike nüne jondron braibebiti ye köböire kätä nemente bäri ietre kukwe driekäre. Ni itire itire rabadre ngwentari jai: “¿Biblia aune nitre sribikä täte metre bätä töbätä tä tärä aune täräkwata sribere yebätä tita ñäke aune ye erere tita nuainne jötrö ngwarbe, ñaka nuäre nuaindre akwa tita nuainne?” (Mat. 24:45).
16 Nikwe ja tuainmetre tötikadre aune jie ngwandre ji metre yebiti Jehovai angwane, kä jürä ñaka rabai nibätä. Ni prekursor regular nünanka Estados Unidos käkwe sribi ribebare jai ne kwe niara aune mräkätre kwe ye jökrä rabadre jankunu kukwe driere köbö täte, akwa ni sribi jie ngwanka käkwe niebare ie niara ñaka ja tötikabare kwela krite angwane sribi ye erere ñaka raba nemen kisete. Ye erere rabadre bare mäbätä angwane, ¿mäkwe kukwe drie köbö täte diani nuaindre jai köböite mäkwe ñaka ja tötikabare kwela krite yebätä mä rabadre ulire? Bämän nikani krobu ta ye bitikäre, ni sribi jie ngwanka ye kitaninkä sribibätä aune ni mada sribi jie ngwanka käkwe ngwanintari ja mräkä yei niara töi nämene dre dre nuainbätä. Ja mräkä ne käkwe niebare niara aune muko kwe nämene sribi Jehovakwe nuainne köbö täte aune töi nämene nuaindi jankunu. Ja mräkä ye kukwe mada niedre känenkri, ni sribi jie ngwanka käkwe niebare ie: “¡Mä abokän töi ñaka ni mada erere ye rababara gare tie! Ti rün rababara krütadre angwane, nitre Testiko nibu nämä nüke köbö kwatire kwatire känti aune nämä ñäke Bibliabätä ie. Ye medenbätä tikwe nieba jai kä rabai tie ni testiko Jehovakwe dimikakäre angwane, tikwe nuaindi”. Ni sribi jie ngwanka käne käkwe ñaka sribi biani ja mräkä ie ye abokän jetebe se kwrere biani nuaindre ie mada. Erametre, nita sribi Gobran Ngöbökwe mike käne nuaindre jai angwane, jondron ribeta nikwe jai abokän Jehovakwe biain nie käbämikata kwe ye tä nuainne metre (Mat. 6:33).
TÖDEKA AUNE JONDRON KÄBÄMIKATA IE TÖ NGWANTA YE ÜTIÄTE
17. ¿Dre ni dimikai ja tuin töi jämebiti kukwe tä ja känenkäre yebe?
17 Tödeka aune jondron käbämikata ie tö ngwanta ye ütiäte David mikani gare kukwe niebare kwe nebiti: “¡Ngöbö töi kwin kä tibienbiti ni nire jökrä ngätäite [...] tikwe ñakare [tödekadre, NM] ngwane...!” (Sal. 27:13, BWVI). Mä raba töbike: ¿jondron käbämikani Ngöbökwe ie tö ngwanta ye ñaka nikwe aune Ngöböta jondron kwin nuainne ni kräke mikata gare Salmo 27 ye ni ñaka mike ütiäte jai ngwane dre raba nemen bare nibätä? Kukwe keta kabre rabai bare Armagedón yete, yebätä Jehovakwe ni dimikadre aune ni kriemikadre kärädre jankunu ie ja brukwä tätebiti (ñäkädre Salmo 27:14 yebätä).
[Kukwe ngwantarita]
[Jondron üai bämikani página 23]
Jehovakwe David mikani kwäre ye ngwaninta törö kwe jai ye ngwane namaninta dite
[Jondron üai bämikani página 25]
¿Ngwian ñakare käi näire nita nüne ye tä ni töi mike kukwe driere bäri?
