Jondron nikwe ükakröta

Ani blite nitre peregrino yebätä

“¡TI ÑAKA raba kukwe driere ju ju te!” Ni peregrino käkwe kukwe ye niebare. ¿Nitre tötikata nikwe Bibliabätä ye nibe ie ja ruin ye kwrere? Nitre kädeka nämene peregrino ye nämene kukwe kädriere ni jökrä okwäkänti, kukwe nämene gare ietre aune kukwe Bibliabätä drie nämene kwin kwetre.

Nitre kwati ñäkäkä täräkwata Zion’s Watch Tower yebätä käkwe iglesia kwetre tuanimetre aune tö namani ja ketai nitre tö nämene kukwe metre Bibliabätä mikai gare jai yebe. Kukwe nie nämene täräkwata yebätä ye nämene tuin kwin ietre aune täräkwata ye niaratre töi mikani nitre abokän töi nämene niaratre erere ye känene aune ja ükökrö käre bentre ja tötikakäre Bibliabätä. Nitre ye nämene ja di ribere, ye medenbätä kä 1894 ye näire, Sociedad Watch Tower jatani nitre kukwe driekä juen nitre braibe ye tuinbiti. Ja mräkätre ye kukwe nämene gare kwin aune nämene sribire krubäte, ja känenkäre niaratre kädekani peregrinos, ja mräkätre ye nämene ja töi mike bobre, kukwe Bibliabätä nämene gare ietre, kukwe kädrie nämene gare ietre, diri nämene gare ietre, aune ni kökanintari yei nämene tödeke metre, yebätä dianka nämene sribikäre. Niaratre nämene nitre tuinbiti köböitibe o köböbu, akwa köbö yete sribi keta kabre nuain nämene kwetre. Nitre ja tötikaka Bibliabätä kwati krubäte kukwe driebare kena ye ngwane nitre nübaibare kwetre ni peregrino nämene kukwe kädriere ye kukwe nuakäre. Bati, kukwe kädriebare deu kwelate, aune Hugo Riemer, niara namani sribire Nitre konkrekasion jökrä Ngübabitikä yebe, käkwe kukwe Bibliabätä ngwantari nämene ie ye mikani gare kwe nükebe kä ruäre deu. Niara nämene nainte akwa kä jutobiti niebare kwe, gätä ye “namani bare kwin krubäte”.

Täräkwata Zion’s Watch Tower yebätä mikani gare nitre peregrino nämene “nitre tödekaka” tuinbiti aune ja ükökrö nitre ye gwirete ye köböire “kukwe kwin nämene nemen bare”. Kukwe kädrie nämene aune ngwantari nämene biti mika nämene gare ye nitre ja tötikaka Bibliabätä nünanka bäre nämene niken kukwe nuin. Ye bitikäre, kä dianka nämene arato ja ka ngäbitikäre kwin. Maude Abbott tä niere niara nämene chi angwane, nikani kukwe kädriebare ni jökrä kräke dekä ye kukwe nuin, kukwe kädriebare ünä angwane ni jökrä käkwe ja ükaninkrö mesa kri nämene jubäre yebätä. “¡Mrö ere bänänte nämä, ye törö tie! Mütü ngirie, kwi kukwani seitete, ban aune jondron mane keta kabre nämä. Nun jökrä mröba aune nun rababa trine, aune ora krobu dere nunkwe ja ükakröba kukwe mada kädrieba ni jökrä kräke kukwe nuakäre. ¡Biti köbö rababa krubäte nuen!” Ni peregrino Benjamin Barton, kukwe drie nämene gare krubäte ie, käkwe kukwe ne tikani: “Mrö bänänte drie rababa tie ye jökrä tikwe kwetadre akräke, sribi peregrino nämä ti kisete ye rabadre tie”. Ye medenbätä, obisina bäri kri nämene Brooklyn tärä juani kukwe niekäre ja ngwaitre mantiame yei, ne kwe rabadre “mrö debe näre” bien nitre peregrino yei aune tuanemetre “ja düke kwin”.

Nitre peregrino nämene jondron üai sribere, kukwe tike o jondron mada nämene kisete yebiti kukwe bämike, köböire nämene dirire kwin. Ñodre, R. H. Barber nämene kukwe kädriere ye ngwane käre nämene “jondron bämike” kukwe kädriekäre bäri kwin. W. J. Thorn nämene blite angwane ye nämene mate kwin ni madabätä, “nitre kirabe kädrieta” Bibliabätä ye kwrere nämene blite nie nämene niarabätä. Arato nieta, niara nikani Shield Toutjian kokwäre karo Ford modelo A yete, angwane niebare kwe: “¡Ngübare ken!”. Niara nankwani drekebe timo, kri blü tikaninkä kwe aune nitre nämene näin ben yebe blitabare kwe jondron sribebare yebätä.

 Nitre peregrino nämene ja tuin kukwe keta kabre ben, aune niaratre jatani umbre ye ngwane ja tuani bäri kwetre kukwe ruäre ben. Akwa, kukwe ükaninte mrä känti niaratre kukwe driedre ju ju te ye ñaka namani nuäre nuaindre niaratre ruäre kräke. Täräkwata La Torre del Vigía 15 marzo 1924 sribebare kukwe inglere yebiti käkwe mikani gare: “Gobran Ngöbökwe kukwei mikadre gare ye sribi bäri ütiäte nuaindre [nitre kristiano metre] yei. Nitre peregrino ye juanta sribi ye nuainne”.

Kukwe ükaninte mrä ye ñaka namani tuin kwin nitre peregrino ruäre ie, nitre tuadrebiti ye tuanimetre kwetre aune jatani iglesia sribere ja kräke. Robie D. Adkins tä mike gare ni peregrino kukwe kädriekä kwin namani ulire krubäte aune rubune namani niere: “Kukwe driedre plataforma yekänti ye aibe gare tie. ¡Ti ñaka raba niken kukwe driere ju ju te!”. Ja mräkä Adkins ie tä törö: “Gätä kri nuainbare kä 1924 Columbus (Ohio) ye ngwane tikwe niara tuabata bobukäre. Niara nämä kaibe nünaninkä kri täni, aune rababa tuin bä jene tie. Ja mräkätre kwati krubäte bätä kä nämä juto ye ngätäite niara nämä, akwa kä nämä rubun niara ngwärebätä. Biti tikwe ñaka niara tuabata mada, ñobätä ñan aune niarakwe juta Ngöbökwe tuanimetre”. Ni yebätä kä nämene rubun, akwa “ja mräkätre mada abokän kä kötare ngwärebätä nämene tärä ngwen karo kwetre ye kokwäre”, aune tö nämene kukwe driei ju ju te (Hech. 20:20, 21).

Ja mräkätre mada tötika nämene kukwe driekäre yebätä kä jürä nämene aune ye erere arato nitre peregrino yebätä kä jürä nämene, akwa nitre peregrino kwati krubäte käkwe kä jutobiti sribi ye nuainbare. Maxwell G. Friend (Freschel), ni peregrino blite kukwe alemán yebiti, käkwe kukwe ne tikabare kukwe drie ju ju te yebätä: “Nitre peregrino tä nitre tuinbiti, akwa sribi mada mikani kisete ye sribi kwin krubäte tita nuainne arato”. Peregrino mada, kädeka nämene John A. Bohnet käkwe mikani gare, kukwe ükaninte mrä Gobran Ngöbökwe kukwei driekäre ye ja mräkätre jökrä bäsi kani ngäbiti kä jutobiti. Arato niebare kwe ja mräkätre jökrä bäsi “töi nämene krubäte kukwe driekäre kena yebätä”.

Kä nikanina krubäte ta, aune nitre peregrino ye köböire kukwe kwin namani bare. Norman Larson, ni Testiko tä mekerabe kukwebätä käkwe niebare: “Ti nämä chi ye ngwane nitre peregrino nämä ni tuinbiti ye köböire kukwe kwin nämä nemen bare ye rükaba gare kwin tie. [...] Niaratre ti di mikaba krubäte nänkäre ji kwin yebiti”. Kä nengwane, nitre konkrekasion tuabitikä ye tä ja ngwen metre aune sribire krubäte, ye täbe ni jökrä dimike niere: “¡Tibrä raba niken ju ju te kukwe driere!”.

[Kukwe nieta página 32]

Ni peregrino nämene nun tuinbiti angwane kä nämene juto krubäte nunbätä

[Jondron üai bämikani página 31]

Benjamin Barton nikani nitre tuinbiti kä 1905 ye ngwane kä 170 jene jene yekänti namani

[Jondron üai bämikani página 32]

Walter J. Thorn töi nämene kwin aune nämene ni mada tarere krubäte yebätä ja mräkätre nämene Tata niere ie

[Jondron üai bämikani página 32]

J. A. Browne janamane Jamaica kä 1902 ni peregrino erere nitre nämene ja ükökrö keta jätäbiti ketabokä dimikakäre

[Jondron üai bämikani página 32]

Nitre peregrino nämene nitre kristiano mike tödeke bäri, mike nüne keteitibe aune mike nökrö juta Ngöbökwe ken