Ja ngwandre ni nünanka Gobran Ngöbökwe yete erere

‘Nünandre kwin metre bämikakäre ni nünanka juta yete.ʼ (FILIP. 1:27)

¿MÄ RABA DRE NIERE?

¿Nire nire raba nüne Gobran Ngöbökwe yete?

¿Blitadre kukwe keteitibebiti, kukwe namani bare ye mikadre gare jai aune Gobran Ngöbökwe tä kukwe ükete ye nikwe nuaindre ño?

¿Nitre nünanka Gobran Ngöbökwe yete tätre kukwe Ngöbökwe tarere ye tätre bämike ño?

1, 2. ¿Pablokwe kukwe niebare nitre konkrekasion Filipos yei ye ñobätä namani ütiäte kräketre?

APÓSTOL Pablo kukwe ne tikani nitre kristiano konkrekasion Filipos yei: “Kukwe kuin Jesubtä rabadre ütiäte ni mda mda okwäte, abkokäre munkwe nüna kuin metre” (ñäkädre Filipenses 1:27 yebätä). Kukwe griekore ye abokän kwitata “nüna kuin metre”, arato nie raba “ja ngwandre ni nünanka juta yete ye erere”. Juta Filipos aune juta mada ye Roma nämene kain ngäbiti aune nitre nünanka juta yete ye nämene nemen ni nünanka juta Roma yete ye erere, ye medenbätä Pablokwe kukwe niebare ye nükani gare kwin nitre konkrekasion Filipos yete yei. Nitre Filipos bätä juta mada abokän nämene nemen nitre nünanka Roma erere, yei ja nämene nemen ruin ütiäte.

² Pablokwe ngwani törö ja mräkä konkrekasion Filipos yei niaratre abokän “kä käinbti bkänkä” ye medenbätä ja rabadre ruin ütiäte ietre (Filip. 3:20). Niaratre dianinkä nünankäre Gobran Ngöbökwe yete, ye abokän ñaka juta kä nebätä erere. Ye köböire niaratre kriemika nämene aune kukwe kwin nämene nemen kwetre (Efes. 2:19-22).

3. a) ¿Nire nire raba nemen ni nünanka Gobran Ngöbökwe yete erere? b) ¿Dre mikai gare jai ja tötika nebätä?

³ Nitre dianinkä gobrankäre Kristobe kä kwinbiti yei Pablokwe niebare niaratre ja ngwandre ni nünanka juta yete erere (Filip. 3:20). Akwa, nitre käkwe nünain Kä tibienbätä abokän Gobran Ngöbökwe käkwe gobrandi ye kräke kukwe ye ütiäte arato. ¿Ñobätä? Ñobätä ñan aune ni kristiano jökrä ja dianinkä sribikäre Rei Jehová kräke yebätä, aune kukwe ükaninte kwe ye niaratre käkwe mikadre täte (Efes. 4:4-6). Kä nengwane, nitre kwati tä niken nüne juta madate tätre ja di ngwen krubäte, ne kwe kädekadre nitre nünanka juta yete erere. ¡Ni raba nemen kädekani ni nünanka  Gobran Ngöbökwe yete erere ye abokän bäri ütiäte ni kräke! Gobran känebätä tä kukwe ribere ye erere Gobran Ngöbökwe tä kukwe meden ribere, ne kwe ni rabadre ni nünanka juta kwe yete ye ani mike gare jai. Ani blite kukwe ketamä abokän raba ni dimike ne kwe ni tädre kädekani käre ni nünanka Gobran Ngöbökwe yete.

KUKWE ÜKANINTE RIBETA

4. ¿Kukwe kwatibebiti “blitadre” ye raba nüke gare ño nie, aune nuain raba ño?

⁴ Blitadre ño. Nitre menteni rabadre blite kukwe medenbiti blitata juta yete ye gobran ruäre tä ribere ietre, yebiti tätre nemen kädekani ni nünanka juta yete erere. Niaratre nemen kädekani ni nünanka juta yete erere, akwa ja kitadre käre kwetre blite nitre nünanka juta yete erere. Kukwe medenbiti blitata juta yete ye tikadre ño ye raba nemen gare jötrö ngwarbe ietre, akwa niedre ño ye ñaka nuäre kräketre. Ye erere arato, nünankäre Gobran Ngöbökwe yete yekäre, ni rabadre blite “kukwe keteitibebiti” nieta Bibliabätä erere (ñäkädre Sofonías 3:9 yebätä). ¿Kukwe ye raba kwen ño nie? Ngöbö kukwei aune töita ño tä Bibliabätä rabadre gare nie. “Nita blite” kukwe keteitibebiti ye abokän Ngöbökwe kukwe ükaninte aune kukwe nieta kwe ni jie ngwankäre ye erere nita mike täte. Kukwe ütiäte drieta Bibliabätä ye nüke gare nitre nünanka Gobran Ngöbökwe yete yei. Akwa tätre ja ngökö ñöte ye bitikäre rabadre ja di ngwen “blite” kwin kukwe yebiti. ¿Nuaindre ño? Kukwe drieta Bibliabätä ye erere ja di ngwandre nuainne jankunu kwetre.

5. ¿Kukweta nemen bare kä nengwane juta Jehovakwe yebätä ye ñobätä mikadre gare jai?

⁵ Ja tötikadre kukwe namani bare yebätä. Nire nire törbadre rabai ni nünanka juta yete erere, rabadre käne dre namani bare juta yebätä ye mike gare jai. Ye erere arato, nire nire törba rabai ni nünanka Gobran Ngöbökwe yete ye rabadre kukwe mike gare jai gobran yebätä. Coré ngäbriänkä sribibare templo kira juta israelkwe yete käkwe kukwe bämikani yebätä töbikadre. Niaratre nämene juta Jerusalén bätä templo tarere aune dre namani bare juta yebätä ye niaratre nämene kädriere. Juta bätä templo ye sribebare jäbiti aune dobro rebebiti ye ñan aibätä niaratre töi nämene, ñakare aune juta bätä templo ye nämene dre bämike ye nämene bäri ütiäte kräketre. Jehová, “Rei kri” nämene juta Jerusalén bökänkä, ñobätä ñan aune juta yete niara mika nämene täte. Juta yete kukwe Ngöbökwe drie nämene, Jehová nämene nitre ye gobraine aune niarakwe nitre ye tarebare krubäte (ñäkädre Salmo 48:1, 2, 9, 12, 13 yebätä). ¿Niaratre erere mätä ja tötike aune kukweta nemen bare kä nengwane juta Jehovakwe yebätä ye mä tö kädriei? Jehová tä juta kwe dimike ño ye rabai gare mäi angwane  Gobran Ngöbökwe rabai tuin metre mäi aune mä törbai kukwe kwin ye driei arato (Jer. 9:24; Luc. 4:43).

6. ¿Jehovakwe kukwe ükaninte ye ñobätä nikwe mikadre täte aune ja jie ngwamana ie?

⁶ Kukwe ükaninte ye mikadre gare jai. Nitre töta nemen nünain juta madate ye ngwane, kukwe meden tä ükaninte juta yete ye mikadre täte ye gobran juta yekänti tä ribere ietre. Ye erere arato, Jehovakwe kukwe ükaninte ye nikwe mikadre täte aune ja jie ngwamana ie, ne kwe ni rabadre kädekani ni nünanka Gobran Ngöbökwe yete erere (Is. 2:3; Juan 15:10; 1 Juan 5:3). Nitre kä nebätä ñaka tä kukwe ükete kwin. Akwa “Jehovata kukwe bien nuaindre ye abokän metre” (Sal. 19:7). ¿Kukwe Ngöbökwe tuin kwin mäi aune mätä ñäke mantre jetebebätä? (Sal. 1:1, 2.) Kukwe Ngöbökwe rabadre gare nie yekäre ni itire itire käkwe ja tötikadre akwlebätä. Ni mada ñan raba nuainne ni kräke.

NI NÜNANKA GOBRAN YETE TÄ KUKWE NGÖBÖKWE TARERE

7. ¿Ñobätä ni nünanka Gobran Ngöbökwe yete tä kukwe ükaninte ye mike täte?

⁷ Ni nünanka Gobran Ngöbökwe yete rabadre kukwe ükaninte Ngöbökwe ye mike gare jai aune tarere arato, ne kwe rabadre kädekani käre ni nünanka Gobran Ngöbökwe yete. Kä nengwane, gobrantre tä kukwe ükete ye nitre kwati tätre niere tätre kain ngäbiti. Akwa, kukwe ruäre ükaninte abokän ñan tuin kwin nitre yei aune ni mada ñaka okwäta jiebiti nütüta kwetre, ye ngwane tätre kukwe ye kite tibien. Niaratre tä jondron nuainne ni mada “moto mikakäre nuäre” (Col. 3:22). Akwa, ni nünanka Gobran Ngöbökwe yete ñaka tä nuainne ye erere. Ni mada ñaka okwäta ni jiebiti, akwa nita käre kukwe nieta Ngöbökwe ye mike täte. ¿Ñobätä? Nire käkwe kukwe ye ükaninte ye nita tarere yebätä (Is. 33:22; ñäkädre Lucas 10:27 yebätä).

8, 9. ¿Mätä kukwe ükaninte Ngöbökwe tarere ye ñokänti raba nüke gare mäi?

⁸ ¿Kukwe ükaninte Ngöbökwe mätä tarere ye ñokänti raba nüke gare mäi? Kukwe ruäre nuaindre ño ye tä gare mäi, akwa ni mada käkwe kukwe niedre mäi angwane ye matadre ño mäbätä. Ñodre, ja ngwä kitata aune ja ükateta yebätä. Mä jämi nemen ni nünanka Gobran Ngöbökwe yete angwane mä ñaka nämene ja ngwä kite kwin. Akwa, mä jatani Ngöbö tarere bäri angwane mä jatani ja ngwä kite Ngöbö käikitakakäre (1 Tim. 2:9, 10; 1 Ped. 3:3, 4). Kä nengwane mätä ja ngwä kite kwin raba ruin mäi. Akwa, ni umbre konkrekasionte käkwe niedre mäi mätä ja ngwä kite ye tä nitre kukwe driekä ruäre ngwen ngoto ritete, ¿mäkwe dre nuaindre? ¿Mäkwe kukwe mikadre jabiti? ¿Mä rabadre rubun aune mäkwe ñaka ja töi kwitadre? Nire törbadre nemen ni nünanka Gobran Ngöbökwe yete angwane ja ngwandre kwe Kristo erere (1 Ped. 2:21). Ye medenbätä, apóstol Pablokwe kukwe ne tikani: “Ni jökrä käkwe jändrän kuin nuendre ni [...] mda mda kräke, ñobtä ñan angwane Kristo ara jire käkwe ñan jändrän kuin känäbare kaibe au jakrä” (Rom. 15:2, 3). Ni ünä kukwe ja üairebiti tä juto biare töbikakäre nitre mada töita ño yebätä, ne kwe nünandre jäme konkrekasionte (Rom. 14:19-21).

⁹ Ani blite kukwe mada ketebu ütiätebätä: ni nemen jabe aune ja mika gure metre mikadre tuin ño jai yebätä. Ni brare o merire ja erebe nemen jabe o ni üai butiere mrusaita ye tuin kwin nitre ñaka nünanka Gobran Ngöbökwe yete yei, arato ni tärä gure metre akwa nemen ni madabe bätä ja tuanmetreta ye tä gare ni itire itire ie tätre niere. Akwa, kukwe ye ñaka tuin kwin ni nünanka Gobran Ngöbökwe yete yei aune ñaka tätre töbike jabebätä. Niaratre jämi ja mike kukwebätä ye känenkri nämene nemen bati bati ni madabe, akwa  ni nemen jabe aune ja mika gure metre ye ütiäte Jehová kräke ye nüke gare ietre kä nengwane. Kukwe nieta Ngöbökwe ye ütiäte kräketre, aune nire nire ñaka tä ja mika gure metre mike tuin ütiäte jai ye käkwe ñaka nünain Gobran Ngöbökwe yete ye gare kwin ietre (1 Cor. 6:9-11). Arato, ni brukwä raba ni ngökö ye gare ietre (Jer. 17:9). Ye medenbätä, mäträta niaratre yebätä ja ngwankäre kwin ye tätre kain ngäbiti.

NI NÜNANKA GOBRAN NGÖBÖKWE YETE TÄ JA NGWEN MOKRE

10, 11. ¿Ni nünanka Gobran Ngöbökwe yete ye mikata mokre ño aune ye tuin ño mäi?

¹⁰ Gobrantre tätre ni mike mokre mrö o kräkä raba ni mike bren yebätä. Jondron jökrä ye ñaka käme. Akwa, jondron ruäre raba ni murie kete angwane gobrantre tä ni mike mokre, ne kwe nikwe ja kriemikadre. Gobran ñaka ye nuaindre angwane ngite rikadre niaratre yebiti. Ye kwrere Gobran Ngöbökwe tä ni mike mokre jondron meden raba kukwe tare mike nemen bare nibätä o ni mike bren kukwe ja üairebiti. Ñodre, nitre sribikä täte metre tä käre ni mike mokre, tätre niere Internet yete nitre üai butiere mikata tuare ye käme nitre nünanka Gobran Ngöbökwe yete ye kräke. ¡Ni mikata mokre yebätä nita debe bien krubäte!

¹¹ Kä nengwane sribi keta kabre nuain raba Internet yebiti, akwa ja ngwandre mokre nuainkäre. Ñodre, redes sociales yete ni rikadre kukwe känene angwane ye raba kukwe tare mike nemen bare nibätä, ñobätä ñan aune yete ja ketamuko ñaka kwin raba kwen nie (1 Cor. 15:33). Ye medenbätä, juta Jehovakwe tä ni mike mokre Internet yebätä. ¿Redes sociales yebätä nitre sribikä täte metre tätre kukwe mike gare yebätä mä tärä ñäke? Kukwe mikata gare yebätä ñaka ñäkädre käne angwane nita kräkä käme ñain aune kräkä yebätä kukwe nieta ni ñaka ñäkebätä ye kwrere nita nuainne. *

12. ¿Kukwe nieta ni mikakäre mokre ye ñaka mikadre täte ye ñobätä ñaka kwin?

¹² Nitre sribikä täte metre tä ni mike mokre, akwa nire nire ñaka tä kukwe ye kukwe nuin, ye tä kukwe tare mike nemen bare jabätä aune kukwe kri mike mräkätre tare kwe ye kisete. Nire tä nitre üai butiere mikata tuare ye tuin o tä ñaka ja mika gure metre mike tuin ütiäte jai, angwane tä ja ngököta akwle, tä nemen nütüre Jehová ñaka tä niara tuin. Kukwe nuainta nikwe ye ni raba üke tä nemen ruin nie ye ngwane töbikata ñaka metre (Prov. 15:3; ñäkädre Hebreos 4:13 yebätä). Nire ñaka tä kukwe ükaninte gobrankwe ye mike täte angwane gobran tä nitre ye juen mento juta yebätä. Ye erere arato nitre ñaka tä kukwe Jehovakwe mike täte aune ñaka ja töi kwite ye niarakwe ñaka tuainmetre nüne Gobran kwe yete (1 Cor. 5:11-13). * Nitre ruäre tä ja ngwen käme, akwa Jehová ni mikaka tuin bobre jai, ye medenbätä tö nitre ye dimikai aune tä nuainne juta kwe tä kä tibienbätä yebiti (Gál. 6:1). Nire nire ie ja ruin ngite kukwe käme nuainbare kwe yebätä aune tä ja töi kwiteta, ye abokän Jehovata kain ngäbiti aune raba nementa nüne Gobran Ngöbökwe yete (2 Cor.  2:5-8). ¡Rei ni tarekä ye kräke sribidre ye ütiäte krubäte!

NI NÜNANKA GOBRAN NGÖBÖKWE YETE TÖTIKATA YE TÄ KAIN NGÄBITI

13. ¿Nitre nünanka Gobran Ngöbökwe yete tätre bämike ño Ngöböta tötike ye niaratre tä kain ngäbiti?

¹³ Gobran kwati tätre kukwe ükete nitre nünanka juta yete tötikakäre. Ñodre, tätre kukwe ükete nitre tötikakäre ñäke täräbätä aune tärä tikabätä, aune tätre tötike ne kwe rabadre sribire kwin. Nitre kristiano tätre kukwe ye kain ngäbiti kwin, tätre ja kite ñäke täräbätä aune tärä tikabätä, bätä tätre sribire ja ngübakäre, akwa Gobran Ngöbökwe tä kukwe ükete ye tuin bäri ütiäte ietre. Konkrekasion yebiti Jehová tä ni nübaire ñäke kwin täräbätä. Nitre rüne nübaita ñäke täräbätä monsotre kia kwe yei. Sö kratire kratire nitre sribikä täte metre tätre kukwe Bibliabätä mike gare täräkwata Ni Mikaka Mokre bätä ¡Despertad! yebätä. Mäkwe ñäkädre mantre jetebe páginas ruärebätä angwane Ngöböta ni tötike ye erere mätä kain ngäbiti.

14. a) ¿Ni tötikata ño konkrekasionte? b) ¿Ja tötikadre ni Mräkätre yebe yebätä kukwe nieta ye meden mä tärä nuainne?

¹⁴ Bämän kratire kratire te nitre nünanka Gobran Ngöbökwe yete tötikata konkrekasionte. Ñodre, kä nikanina gre ketamä ta angwane nitre tötikata Kwela Sribi Ngöbökwe Kräke yebiti, ne kwe rabadre Kukwe Ngöbökwe dirire kwin. ¿Mäkwe ja kä bianina kwela ye kräke? Nitre sribikä täte metre tätre ni jökrä nübaire ja tötike ni Mräkätre yebe bämän kratire kratire te. Kukwe ükaninte ye tä nitre ja mräkäre mike ja mäke kwin jabe. ¿Ja tötika ye nuain raba ño mikata gare täräkwata sribeta yebätä ye erere mä tärä nuainne? *

15. ¿Sribi meden ütiäte tä ni kisete?

¹⁵ Nitre tä ja mike gobran kä nebätä yekri ye tätre gobran ye dimike, arato tätre niken nitre känti diankakäre jakri. Nitre nünanka Gobran Ngöbökwe yete tätre sribire bäri kä jutobiti Gobran Ngöbökwe yebe, tätre nuainne ji ngrabare aune ju ju te. Ja tötikaba käne yete mikaba gare nie täräkwata Ni Mikaka Mokre ye döräita bäri tärä mada yebiti ta, aune ye tä Gobran Jehovakwe mike gare. Nita kukwe mike gare Gobran Ngöbökwe yebätä ni madai ye sribi ütiäte tä ni kisete. ¿Mätä sribi ye nuainne kä jutobiti? (Mat. 28:19, 20.)

16. ¿Nita ja ngwen ni nünanka Gobran Ngöbökwe yete ye bämikadre ño?

¹⁶ Gobran Ngöbökwe aibe köböra nemen gobrane Kä tibien nebiti. Ni jie ngwain kwe kukwe jökräbätä, kukwe ja üairebiti aune kukwe mada mada yebiti. ¿Kä ye rükai angwane nikwe ja ngwain kwin Gobran Ngöbökwe yete? Kä nengwane nikwe kukwe ye bämikadre. Nita dre nuainne köbö kwatire kwatire te, ye nuaindre Jehová käikitakakäre aune nikwe bämikadre nita ja ngwen kwin ni nünanka Gobran Ngöbökwe yete erere (1 Cor. 10:31).

[Nota]

[Kukwe ngwantarita]

[Kukwe nieta página 14]

¿Kukwe nieta Bibliabätä ni mikakäre mokre Internet yebätä ye mätä mike täte?

[Jondron üai bämikani página 12]

Coré ngäbriänkätre erere, ¿mätä kukwe metre aune dre namani bare juta Ngöbökwe yebätä ye tarere?

[Jondron üai bämikani página 15]

Ja tötikadre ni Mräkätre yebe ye mä aune mä mräkätre dimikai ja ngwen kwin ni nünanka Gobran Ngöbökwe yete erere