“Jondron kwin rabai munkwe”

REI ASÁ tä nitre rükä kwe jie ngwen kä kiare kaibe yebiti. Judea nämene nemenkä ngutuä keta kabre ngätäite aune niaratre nämene yete nikani. Niaratre namani kä kwata kri yekänti angwane jondron jutuabare Asá ie yebätä nünankabare kwe. Nitre rükä etíope nämene nünentubu kä ngösöri yekänti. Nitre ye ja mikaka rüere nämene kwati, akwa nitre rükä Asá yekri nämene braibe.

Nitre ye rüdi ben ye medenbätä, ¿Asá käkwe dre nuaindi? ¿Drekebe ngwarbe kukwe niebare kwe nitre rükä ji ngwanka yei? ¿Nitre rükä kwe yei kukwe niebare dimikakäre? ¿Täräkwata juani kwe mräkätre kräke? Ñakare. Kukwe tare rabai bare nämene gare ie, ye medenbätä orabare kwe Ngöböi.

Orasion nuainbare kwe ye tä dre driere nie, aune kukwe meden namani barebätä ye ani mike gare jai, akwa niara töi nämene ño yebätä ani blite käne. ¿Ñobätä ja di käräbare kwe Ngöböi? ¿Ngöbökwe niara dimikai ye ñokänti nämene gare ie? ¿Kukwe ye tä dre driere nie Jehovata kukwe kwin mike nemen bare nitre niara mike täte yebätä?

¿ASÁ TÖI NÄMENE ÑO?

Israel bätä Judá ñäkänintubu ketebu ye ngwane kä nikani kwä gre ta, aune nitre Judá ja mritani kukwe ngwarbe yebe. Kä 977 kä 1 känenkri Asá namani reire, aune nitre sribikä kräke nämene ngöbö ngwarbe cananeo mike täte. Akwa Biblia tä mike gare “kukwe kwin aune jondron meden nämene tuin kwin Jehová okwäkänti” ye rei Asá nämene nuainne. “Kä jondron kukwara Ngöbö ngwarbe ie bätä kä jondron käme nuainkä aune üra dite mikani Ngöbö ngwarbe kräke bätä kri ngwarbe mika nämene ütiäte jai ye jökrä dianinkä kwe” (2 Crón. 14:2, 3). Arato, nitre nämene ‘nemen bati bati ni madabe templote’ ye juani mento Judá yebätä, nitre ye nämene nemen ni brare madabe Ngöbö ngwarbe mikakäre täte. Kukwe ngwarbe mika nämene täte ye ñan aibe dianinkä kwe, niarakwe niebare juta yei “mräkätre käne nämene Ngöbö mike täte ye erere [niaratre] rabadre Ngöbö aune kukwe ükaninte kwe ye känene” (1 Rey. 15:12, 13; 2 Crón. 14:4).

Asá ja mikani kukwe metre yekri ye namani tuin kwin Jehovai, ye medenbätä mikani nüne jäme kwe kä kwati krubäte te. Asá käkwe niebare: “Nunkwe Jehová Ngöbö nunkwe känänbare. Nunkwe niara känänbare, aune niarata ni mike nüne jäme”. Juta ye namani nüne jäme aune ja töi mikani kwetre ki ükete Judá yekänti. Biblia tä mike gare: “Niaratre ju sribebare bätä kukwe kwin namani bare bätätre” (2 Crón. 14:1, 6, 7).

RÜBARE KWE YE NGWANE

Asá käkwe kukwe kwin bämikani, aune Biblia tä mike gare Asá ngätäni nitre kwati krubäte rükä niara rüere ye ngwane ja di käräbare kwe Jehovai. Tödekata Jehovai angwane kukwe kwin tä nemen bare ye nämene gare ie. Ja di ribebare kwe Jehovai aune nämene tö ngwen ie, ñobätä ñan aune Jehová aibe raba rüe ganainne ye nämene gare ie. Jehová kä rabadre käme ye niara ñaka tö namani yebätä orabare krörö kwe: “Oh Jehová Ngöbö nunkwe, nun dimike, ñobätä ñan aune nunta tö ngwen mäi, aune mä kä yebiti nun ki rüre nitre kwati rüere. Oh Jehová, mä Ngöbö nunkwe. Mäkwe ñaka ni kä tibienbätä tuanmetre ja ganainne” (2 Crón. 14:11). Ni raba niere niarakwe niebare: “Nitre etíope tä rüre mäbe Jehová. Nitre ngwarbe ye  käkwe juta mäkwe ganaindre aune mä kä ye mikadre tuin ngwarbe kwetre ye mäkwe ñaka tuanmetre”. Ngöbökwe Asá kukwe nuabare ñobätä ñan aune Biblia tä niere “Jehovakwe nitre etíope ganainbare Asá bätä Judá ngwärekri aune nitre etíope ngitiani ngänikaire” (2 Crón. 14:12).

Kä nengwane, nitre Jehová mikaka täte tätre ja tuin nitre kwati dite ben. Ni ñaka tä rüre kürübiti, akwa nita ja mike metre täte Jehovai aune nita kä kwe mike tuin ütiäte jai angwane nikwe ni rüe ganaindi. Ja mika gure ye ñaka mikata tuin ütiäte, nita ja mike ngite bätä nitre törba ni mräkätre nikwe mikai bren kukwe ja üairebiti, kukwe keta kabre yebe nita ja tuin kä nengwane. Tödeka nikwe nuateta ye ngwane orasion nuainbare Asakwe ye raba ni dimike arato. Jehová käkwe rü ganainbare, aune ye tä mike gare nie ni raba tö ngwen ie. Ni kä tibienbätä di ñaka raba nüke jabätä Jehovabe.

KUKWE NIEBARE DIMIKAKÄRE AUNE MIKAKÄRE MOKRE

Asá rübare ünä jataninta jakänti ye ngwane, ni Ngöbö kukwei niekä Azarías nikani ngäbiti kukwe ne niekäre ie dimikakäre aune mikakäre mokre: “Asá, nitre Judá bätä Benjamín munkwe ti kukwe nua. Munta ja kete Jehovabe angwane niara tädi mun ken aune munkwe niara känändi angwane niarakwe ja tuainmetre kwen muen; akwa munkwe niara tuainmetre angwane niarakwe mun tuainmetre”. Ye bitikäre, niebare kwe: “Munkwe ja ngwan dite aune ñaka ja kise mika kwintomo, sribi nuainta munkwe yebätä jondron kwin rabai munkwe” (2 Crón. 15:1, 2, 7).

Kukwe ne tä tödeka nikwe mike dite. Nikwe Jehová mikai täte metre angwane niara tädi nibe. Nita ja di ribere ie angwane tä ni kukwe nuin. Azarías käkwe niebare: “Munkwe ja ngwan dite”. Ni tö kukwe kwin nuain ye ngwane nikwe ja ngwandre dite aune ñaka kä jürä ngwandre jabätä, aune Jehovata ni dimike köböire tä nemen bare nie.

Asá mölöi kädeka nämene Maacá käkwe “jondron üai krubäre sribebare kri ngwarbe mika nämene ütiäte jai kräke”, sribi ütiäte nämene “reina” ye kisete, akwa reikwe dianinkä sribi yebätä aune ye ñaka namani nuäre rei kräke. Arato, jondron üai ye kukwani kwe (1 Rey. 15:13). Ñaka kä jürä ngwani jabätä kwe kukwe ye nuainkäre yebätä Jehovakwe kukwe kwin mikani nemen bare kräke. Ni mräkä käkwe kukwe nuaindre o ja diandrekä kukwebätä, akwa nikwe ja ketadrete jankunu Jehovabätä aune ja di ngwandre kukwe kwe nuainne. Nita Jehová mike täte metre angwane niarakwe kukwe kwin mikai nemen bare nibätä.

Nitre Israel nämene nüne ngwitärikri nämene kukwe ngwarbe mike täte, akwa Jehová nämene Asá yebe namani gare ietre angwane niaratre nikaninta kä Judá yekänti. Nitre ye nämene kukwe metre mike tuin ütiäte jai, yebätä niaratre käkwe ju kwetre tuanimetre nünankäre nitre Jehová mikaka täte yebe. Kä jutobiti Asá, aune nitre Judá käkwe “kukwe ükaninte mikakäre gare, niaratre Jehová Ngöbö mräkätre kirabe yekwe känändi ja brukwä tätebiti aune ja nire tätebiti”. Ye medenbätä, Ngöbökwe “ja tuanimetre kwen ietre, aune Jehovakwe niaratre mikani nüne jankunu jäme” (2 Crón. 15:9-15). ¡Nitre kwati tä kukwe metre kain ngäbiti aune Jehová mike täte ye käita nemen juto krubäte nibätä!

Azarías ni Ngöbö kukwei niekä käkwe kukwe niebare ye tä ni mike mokre arato: “Munkwe [Jehová] tuainmetre angwane niarakwe mun  tuainmetre”. Nikwe ñaka ye nuaindre, ñobätä ñan aune kukwe tare rabai bare nibätä (2 Ped. 2:20-22). Ñobätä Jehovakwe kukwe ye niebare Asá ie ye Biblia ñaka tä mike gare, akwa reikwe ñaka kukwe ye mikani täte.

“NI TÖI ÑAKA ERERE JA NGWANI” KWE

Asá namanina gobrane kä grebiti kwä jätäbiti kwä ti angwane rei Baasá nämene gobrane nitre Israel yebiti käkwe ja mikani nitre Judá rüere. Ñodre, juta Ramá nämene 8 kilómetros (5 millas) ngwitärikri Jerusalén, ye ükaninte kwe ne kwe nitre gobrain nämene kwe ye käkwe ñaka ja mikadre Asá aune kukwe metre yekri. Asá käkwe ja di käräbare Jehovai nitre etíope ganainkäre, akwa ye erere ñaka nuainbareta kwe, ñakare aune nikani ja di kärere ni madai. Rei Siria ye kräke jondron juani kwe, aune ribebare kwe ie rikadre gobran Israelkwe ye rüere rüre. Nitre Siria nikani bati bobu kä yekänti rükäre, yebätä Baasá käkwe kä mikaninkä juta Ramá yekänti (2 Crón. 16:1-5).

Kukwe ye ñaka namani tuin kwin Jehovai ye mikani gare kwe Asá ie ni niara kukwei niekä Hananí yebiti. Jehovakwe rei ye dimikani rükäre nitre etíope ben aune niara “okwätä kä tibien nebätä ja die mikakäre tuare, nitre brukwä täte niara kräke ye ütiäre” ye ngwandre törö kwe jai. Ni raba niere ni mada käkwe ñaka kukwe kwin niebare Asá ie. Arato, Baasá bätä nitre rükä kwe ye ñaka nämene krubäte yebätä Asá namani nütüre niara rabadre kukwe ye ükete ja di jeñebiti. Asá ñaka tö ngwani Jehovai, ñakare aune tö ngwani kwe ni kä nebätä ie. Hananí käkwe niebare ie: “Ni töi ñaka erere mäkwe ja ngwani, ye medenbätä nitre rüdi mä rüere.” (2 Crón. 16:7 -9.)

Kukwe ye matabare tare Asabätä, namani rubun ni Ngöbö kukwei niekä kräke aune mikani krite kwe (2 Crón. 16:10). ¿Kä namanina kä grebiti kwä jätäbiti kwärike niarabiti Jehová mikabätä täte yebätä ñaka ñäkädi ie? ¿Jatani umbre yebätä ñaka namanina töbike metre? Biblia ñaka tä mike gare.

Kä namanina kä grebiti kwä jätäbiti kwä ükän niarabiti gobrane, ye ngwane ngoto namani bren krubäte. Biblia tä niere niara “namani bäri bren, akwa yebiti ta ñaka Jehová känänbare kwe, ñakare aune nikani ni kräkä dianka känti”. Kukwe ye kätä mike gare niara ñaka nämenena dite kukwe ja üairebiti. Kä gre ketebubiti kwati nämene gobrane angwane krütani, ye medenbätä, nie raba niara ñaka nämene dite kukwe ja üairebiti angwane krütani (2 Crón. 16:12 -14).

Niara töi nämene kwin aune ja mikani kwe kukwe metre yekri ye namani bäri ütiäte kukwe blo nuainbare kwe yebiti ta. Käre niarakwe sribibare Jehová kräke (1 Rey. 15:14). ¿Kukwe ye tä dre driere nie niarabätä? Jehovakwe ni dimikanina ño käne yebätä nikwe töbikadre, aune kukwe ye käkwe mikaita törö nie ni rabadre ja di ribere ie ja tuakäre kukwe tare ben. Ne madakäre, ni niena raire kukwebätä ye ñan aibätä ni rabadre nütüre ni mada ñan rabadre kukwe niere nie Bibliabiti ni töi ükatekäre. Sribi meden meden nikwe nuainbarera Ngöbö kräke, akwa nikwe ja mikai ngite angwane Jehovakwe mäträi nibätä. Kukwe niedi nie angwane ja töi mikadre bobre ye köböire kukwe kwin rabai nikwe. Arato, nikwe ni Rün kä kwinbätä mikai täte käre angwane niara tädi nibe. Nire nire tä ja ngwen metre täte Kä tibienbätä ye jiebiti Jehová okwäta aune dimikai kwe di kwe yebiti. Nuainbare kwe Asá kräke ye erere nuaindi kwe ni kräke arato.

[Kukwe nieta página 9]

Nikwe ja ngwain metre täte angwane Jehovakwe ni dimikai ni rüe ganainne

[Kukwe nieta página 10]

Ja ngwandre dite aune ñaka kä jürä ngwandre jabätä kukwe kwin nuainkäre Jehová okwäkänti