Gätä nuainta kä kwatire kwatire yebätä kukwe mikata gare

Nita sribire keteitibe aune dreta nuaindre ja käne ye mikani gare gätä nuainbare yete

WATCH TOWER BIBLE AND TRACT SOCIETY OF PENNSYLVANIA gätä nuainne kä kwatire kwatire ye ngwane, dre mikai gare ye kukwe nua töta nemen. Gätä número 127 ye nuainbare sabado 1 octubre 2011 ju gätä kri nuainkäre Jersey City (Nueva Jersey, Estados Unidos) yekänti, aune ja mräkätre kä jökräbiti tibien nübaibare ye nükani gätä yebätä.

Gerrit Lösch, sribikä nitre Braibe konkrekasion jökrä Ngübabitikä yebe käkwe nitre kwati ye kani ngäbiti kä jutobiti. Nitre juta 85 jene jene nämene ja ükaninkrö, yei ngwaninta törö kwe nita keteitibe ye köböire blitata kwin nibätä aune Jehová käikitakata. Gätä yete blitabare metrere nüna keteitibe yebätä.

KUKWE KWIN MIKANI GARE MÉXICO

Kukwe ükaninte kädriekäre kena yekänti juta Jehovakwe tä keteitibe ye namani gare. Sukursal nämene keta ti Centroamérica ye mikani sukursal México kisete, ye köböire dre kwin niena nemen bare ye Baltasar Perla sribikä Betel México käkwe ngwanintari ja mräkätre nimä sribikä sukursal yete yei. Niaratre mikani gare ja mräkätre kä jene jene känti aune ñaka nüne ja erebe tä Betel yete, ye köböire tätre ja dimike kwärikwäri. ¡Lapibiti kukwe tikata täräbätä aune sökateta borrador yebiti, ye erere arato kukwe ruäre tä ni töite aune tä ni ñäkebiti ye Jehová tä borrador kri yebiti kukwe ye denkä kwrere!

Sukursal ñaka niena yekänti nitre kukwe driekä yei ja ñan rabadre ruin mento juta Jehovakwe yebätä, ye abokän kukwe keteiti ñaka namani nuäre ükadrete. Ye medenbätä, konkrekasion jökrä kwe correo electrónico ye tärä, ne kwe konkrekasion tä mobe ye rabadre blite sukursal ben.

DOBO KRI NAKANINKÄ JAPÓN

James Linton, sribikä sukursal Japón käkwe blitabare dobo kri nakaninkä aune kä nikani ñöte marzo 2011 yebätä. Ja mräkätre kwati mräkä krütani aune jondron kwetre juani ngwarbe kän. Ja mräkätre mada kwati krubäte nünanka kä madakänti käkwe ju 3.100 aune karo keta kabre mikani ja mräkätre ye kräke. Nitre dianinkä Ju ja Ükarakrö sribeta jie ngwankäre kä ruäre känti käkwe ja mräkätre mada sribikä ja töi jeñebiti juani ju üketeta ja mräkätre kräke, niaratre sribibare krubäte. Ja mräkätre 1.700 käkwe sribi ye nuainbare. Nitre 575 sribikä ja töi jeñebiti käkwe Ju ja Ükarakrö ükaninteta, nitre ye ngätäite ja mräkätre juta Estados Unidos nämene arato.

Nitrebätä kukwe tare namani bare ye dimikani metrere kukwe ja üairebiti aune töi mikaninta jäme. Nitre 400 ji ngwanka konkrekasionte nikani nitre namani ja di ribere yekänti. Nitre Braibe konkrekasion jökrä Ngübabitikä käkwe ni sukursal ruäre tuabitikä juani nibu nitre ye dimike. Ja mräkätre juta keta kabre känti käkwe kukwe kwin tikani ye käkwe ja mräkätre töi mikaninta jäme.

KUKWE GANINKÄ GOBRANKWE YE GANAINBARE

Stephen Hardy, sribikä sukursal Gran Bretaña aune ja mräkätre mada blitabare, ye ja mräkätre nämene ja ükaninkrö käkwe kukwe nuabare kwin, kukwe meden ganinkä gobrankwe ye ganainbare ye  mikani gare kwetre. Gobran juta Francia nämene ngwian 82 millones kärere impuesto ütiäre. Akwa, Tribunal Europeo de Derechos Humanos käkwe niebare gobran Francia ñaka kukwe ükaninte Artículo 9 del Convenio Europeo tä nuainmana erere, artículo ye tä nitre kukwebätä tö dre diain nuaindre jai ye erere tuenmetre nuainne. Ñaka ngwian täri gobrantre namani kukwe ye nuainne, ñakare aune, ñobätä töi namani ye erere ye mikata gare krörö: “Nitre kukwebätä tö dre diain nuaindre jai ye erere Artículo 9 del Convenio tä tuenmetre nuainne, akwa nitre mada ñaka tä nitre ye kan ngäbiti, dianka tö mento aune kukwe käme nieta rüere, ye medenbätä nitre ruäre tä ja mike kukwe ükaninte ye rüere”.

Nitre testiko Jehovakwe juta Armenia ye rüere kukwe nämene ükaninte, aune Tribunal Europeo tö namani kukwe ye ükaite. Kä 1965 ja käne Tribunal Europeo nämene niere nitre jökrä rabadre ja mike rükäre aune Convenio Europeo nämene ye erere niere. La Gran Sala, nitre kukwe ükatekä bäri ütiäte Tribunal Europeo yete, käkwe niebare “nire nire ñaka tö ja mikai rükäre kukwe mika nämene täte kwe o kukwe mada ütiätebätä angwane raba nuainne aune Convenio Europeo tä kukwe ye erere niere”. Kukwe ükaninte ye köböire nitre juta Armenia, juta Azerbaiyán, bätä Turquía tuanimetre tö dre diain jai ye erere nuainne.

KUKWE ÜKATETA JU SRIBEKÄRE

Ja mräkä Guy Pierce, sribikä nitre Braibe konkrekasion jökrä Ngübabitikä yebe käkwe kukwe kädriebare arato. Niara niebare ni jökrä nämene ja ükaninkrö yete tö namani mikai gare jai ñokäre ju sribeta kä Nueva York yekänti. Sribi nuainta Wallkill, Patterson aune kä mada kökani Warwick aune Tuxedo (Nueva York) yekänti, ye tä nemen bare ño ye mikani tuare videobiti. Walkill yekänti ju sribeta nünankäre aune 300 kwarto sribedi aune mika tö krüte kä 2014 yete.

Ne madakäre, ju sribe tö kä 100 hectáreas (248 acres) tä kä Warwick yekänti. Ja mräkä Pierce käkwe niebare: “Jehová töita ño kä Warwick ye kräke ñaka gare metre nuen, akwa nunta kä ükete obisina bäri kri nitre testiko Jehovakwe kwe ye kwitakäre kä yekänti”. Kä 20 hectáreas (50 acres) nemenkä 10 kilómetros (6 millas) ngwitärikri kä Warwick yekänti, dianka tö jondron sribikäre ye ükakrökäre. Arato niebare kwe: “Ju ye sribe raba niedre nuen angwane, ju ye sribedi kä kobokä näre te ye nun tö. Ye bitikäre, kä Brooklyn ye nunkwe mikai rürübäindre”.

Ye bitikäre, ngwanintari kwe: “¿Kukwe ne tä mike gare Nitre Braibe konkrekasion jökrä Ngübabitikä ñaka niena töbike ja tare nikai kri käi nibira ja ken yebätä?”. Niara arabe käkwe niebare: “¡Ñakare! Nun tädi ju ye sribere angwane ja tare nikai kri ye rükadi, ¡ye rabadre bäri kwin!”.

MOKREDRE JABITI KWRA LION RUBUN YEBÄTÄ

Ye bitikäre, Stephen Lett, sribikä Nitre Braibe konkrekasion jökrä Ngübabitikä yebe käkwe blitabare 1 Pedro 5:8 yebätä, texto ye tä niere: “Kwra lion ie mröta nebe angwane, tä [...] niken jändrän känene kwetadre jae, ye kwrere jire mun rüe diablu Satana tä näin ni känene juankäre ngwarbe, aisete munkwe töbika kuin ja käne amne munkwe mokre jabti”. Niara mikani gare kwra lion tä kukwe nuainne yebiti kukwe bämikani Pedrokwe ye raba nüke gare kwin.

Kena, kwra lion ye dite aune bäri nen jötrö ni kräke, ye erere nie raba Satana yebätä. Ye medenbätä, ni ñaka raba ja di nuen ben aune ngitiebätä ja di jeñebiti. Jehová rabadre ni dimike ye nita ribere jai (Is. 40:31). Kwra lion ye tä ja üke muntiakäre, ye medenbätä ni ñaka tädre kä drüne te kukwe ja üairebiti, ne kwe ni ñaka gediandre Satana ie. Antílope di ñakare o cebra ngäbä tä kwen kübiani kwra lion ie angwane tä kämike, ye kwrere Diablu töi käme krubäte tö  ni mikai krüte kukwe ja üairebiti. Kwra lion tä jondron nire kwete ye ngwane jondron ye ñaka tä nüketa gare, ye kwrere Satana tä nitre murie kete ja üaire ye ngwane nitre ye “töita nikenta kukwe kämekäme [...] nuene bäri mda” (2 Ped. 2:20). Ye medenbätä, kukwe Bibliabätä ja jie ngwankäre niena gare nie yebiti nikwe ja tuadre ben (1 Ped. 5:9).

NITA JU JEHOVAKWE YETE YE MIKADRE ÜTIÄTE JAI

Samuel Herd, sribikä Nitre Braibe konkrekasion jökrä Ngübabitikä yebe käkwe niebare: “Ni jökrä käi tärä Jehová jue yete”. Erametre, ni kristiano jökrä käi tärä “ju” Ngöbökwe yete, ye abokän templo üaire niarakwe, meden ükaninte kwe Jesús ja nire biani ni kökatarikäre ye köböire. Ni tädre “ju” yete ye nikwe mikadre tuin ütiäte krubäte jai. David erere, ni töita nünain “Ngöbö gwirete käre mantre jetebe” (Sal. 27:4, Book of Worship for Valiente Indians).

Ja mräkä Herd käkwe ñäkäbare Salmo 92:12-14 yebätä, biti ngwanintari kwe: “¿Jehová tä ni mike ‘nirienʼ ño kukwe ja üaire yebiti?”. Niarakwe mikani gare: “Kä bä nuäre ja üaire yete Ngöböta ni kriemike, kä ngire bien nie aune kukwe metre ñö kwrere bien nie. Ju Jehovakwe yete nikwe nünain ñaka kä braibe te, ñakare aune kärekäre, yebätä nikwe debe biandre ie aune kä rabadre juto nibätä”.

NI KRISTIANO TÄ KUKWE NGÖBÖKWE MIKE ÜTIÄTE JAI

Ja mräkä David Splane, sribikä Nitre Braibe konkrekasion jökrä Ngübabitikä yebe käkwe mikani gare nitre kristiano metre tä käre Kukwe Ngöbökwe mike ütiäte jai. Siklo kena yete niaratre käkwe kukwe ñaka nuäre ükadrete ye ükaninte Bibliabiti (Hech. 15:16, 17). Siklo ketebukäre yete, nitre ja bianka kristiano ja tötikabare kukwe griekore yebätä, kukwe nämene nüke gare ietre ye mika nämene bäri ütiäte kukwe Bibliabätä yebiti ta. Ye bitikäre, nitre mada käkwe kukwe drieta Bibliakwe ye kwitani aune kukwe nie nämene nitre kädeka nämene Padre iglesiate aune gobrantre kukwei ye mikani täte, ye köböite kukwe keta kabre ngwarbe drie jatani.

Ja mräkä Splane käkwe niebare, Jesukwe kukwe bämikani yekänti mikani gare käre nitre kristiano metre dianinkä nänkäre kä kwinbiti ye täi Kä tibienbätä aune niaratre käkwe ja mikai kukwe metre yekri (Mat. 13:24-30). Nire nire ye ñaka gare metre nie,  akwa siklo kwati krubäte nikani ta yete nitre kwati käkwe ñäkäbarera kukwe ngwarbe mika nämene täte aune ñaka drie nämene Bibliabätä ye rüere. Nitre ruäre nämene kädekani ji ngwanka, ñodre: Agobardo de Lyon siklo IX; Pedro de Bruys, Enrique de Lausana aune Valdès (o Valdo) siklo XII; John Wyclef siklo XIV; William Tyndale siklo XVI, Henry Grew bätä George Storrs siglo XIX. Kä nengwane, nitre testiko Jehovakwe täbe kukwe ükaninte Bibliabätä ye mike ütiäte jai aune tätre Kukwe Ngöbökwe ye kain ngäbiti kukwe metre ye erere. Ye medenbätä, Nitre Braibe konkrekasion jökrä Ngübabitikä käkwe texto Juan 17:17 dianinkä kä 2012 kräke, texto ye tä niere: “Mä kukwei ye metre”.

KWELA NUAINKÄRE KUKWE KWIN ÜKANINTE

Kukwe ükaninte mrä nitre misionero aune nitre prekursor especial kräke ye Anthony Morris, sribikä Nitre Braibe konkrekasion jökrä Ngübabitikä yebe käkwe mikani gare. Kwela nitre Kristiano Gure tötikakäre Bibliabätä ye nuaindi juta ruäre känti septiembre kä 2012 ja känenkäre. Ne madakäre, Kwela Galaad ükaninte kukwe mada kräke. Sö octubre ja käne, nitre tä sribire köbö täte ye tä niken ja tötike kwela yebätä, ñodre, nitre misionero ñaka janamane käne Kwela Galaad, nitre prekursor especial, nitre konkrekasion tuabitikä o nitre sribikä Betel. Nitre ja tötikaka ye käkwe juta Ngöbökwe dimikai sukursal jene jene yekänti, sribire ni tuabitikä erere o ni gätä kri köböbu tuabitikä erere, o nitre kwati krubäte nüne yekänti niaratre raba konkrekasion dimike kukwe driere bäri.

Kä mente yekänti nitre prekursor especial juain kukwe driere kena. Sö 1 enero kä 2012 ja känenkäre nitre janamane Kwela nitre Brare Kaibe tötikakäre Bibliabätä aune nitre janamane Kwela nitre Kristiano Gure tötikakäre Bibliabätä yebätä, ye kädekai sribikäre sö braibe te prekursor especial erere kukwe drieta kömikakäre aune mikakäre nirien kä mente yekänti. Juandi kä kwati o kä komä näre te. Kukwe kwin rabai bare kä yekänti angwane, kädekai kukwe driekäre köbö täte te.

Gätä nuainbare kä 2011 yete ye käi namani juto ni jökräbätä. Kukwe mrä ükaninte nuaindre abokän köböire kukwe driedi bäri aune ja mräkätre kä jökräbiti tibien mikakäre sribikäre keteitibe, ye kräke Jehovakwe kukwe kwin mikadre nemen bare ne kwe niara käikitadrekä ye nunta ribere ie.

[Recuadro/Jondron üai bämikani página 18]

MERITRE SRIBIKÄ NGÖBÖ KRÄKE

Ja ngwaitre ni ökän abokän muko kwe nämene sribire nitre Braibe konkrekasion jökrä Ngübabitikä kwrere akwa ja ngwaitre ye muko krütani kän; niaratre nirike Marina Sydlik, Edith Suiter, Melita Jaracz, Melba Barry bätä Sydney Barber ie kukwe ngwantaribare. Kukwe metre namani gare ño aune sribi Ngöbökwe köbö täte ye kömikani ño kwetre ye niaratre mikani gare. Ja ngwaitre ye blitabare muko tukwe yebätä, kukwe kwin namani bare niaratre yebätä aune sribi meden kwin biani ietre yebätä arato. Blitabare ünä bentre angwane ni jökrä käkwe kantiko 86, kädekata “Fieles siervas de Dios” kantaibare kä jutobiti.

[Jondron üai bämikani]

(Kuini) Daniel aune Marina Sydlik; Grant aune Edith Suiter; Theodore aune Melita Jaracz

(Ngösöri) Lloyd aune Melba Barry; Carey aune Sydney Barber

[Mapa página 16]

(Tärä okwä sribebare ño kena ye tuakäre, tärä ne mikadre ñärärä)

Juta keta ti känti sukursal nämene ye mikani gare sukursal México ie

MÉXICO

GUATEMALA

HONDURAS

EL SALVADOR

NICARAGUA

COSTA RICA

PANAMÁ

[Jondron üai bämikani página 17]

Nitre testiko Jehovakwe tö obisina sribedi kä Warwick (Nueva York)