Jehová aune Jesús tä ni ngübare bätärekä ye erere nuaindre

“Ni kwati rabadre dianintari, abkokäre ni Dänkien käta ni ngibiare bätärekä.” (2 PED. 3:15)

¿MÄ RABA DRE NIERE?

¿Jehovata ni ngübare bätärekä ye tä bämike ño?

¿Ñobätä Jesús ja töi mikani kukwe ngübare bätärekä kä nikani raire ta yete?

¿Dre nuaindre ja töi mikakäre kukwe ngübare bätärekä?

1. ¿Nitre kwati Ngöbö mikaka täte metre tä kukwe meden ngwentari jai?

JA NGWAI käkwe ja tuani kukwe keta kabre ben, akwa yebiti ta Jehová mikani täte metre kwe kä kwati te, niarakwe ngwanintari jai: “¿Kä krütai ye tikwe tuadi?”. Ja mräkätre kwati tä Ngöbö mike täte erametre kirabe nükebe kä nengwane tä kukwe ye erere ngwentari jai. Aune ye ñaka blo, ñobätä ñan aune Jehovakwe “jondron mikaita mrä jökrä”, aune kukwe tare ben nita ja tuin ye diandrekä kwe ie ni jökrä tö (Apoc. 21:5). Kukwe keta kabre tä mike gare nitre gobrainta Diablukwe ye gate köbörä, akwa köbö ye ngübadre bätärekä ye ñaka tä nemen nuäre ni kräke.

2. ¿Kukwe meden ngwantarita abokän mika bike gare jai nete?

² Biblia tä niere nikwe ja töi mikadre kukwe ngübare bätärekä. Kukwe käbämikata Ngöbökwe ye ni törba tuai angwane tödeka nikwe tädre dite aune ja töi mikadre köbö ye ngübare bätärekä, nitre Ngöbö mikaka täte kirabe käkwe nuainbare erere (ñäkädre Hebreos 6:11, 12 yebätä). Jehová töita ye erere ye ani mike gare jai. Niara törbadre akräke kirabe nitre käme gadrete kwe, akwa ñongwane bäri kwin nuaindre ye tä ngübare (Rom. 9:20-24). ¿Ñobätä niarata ni mada ngübare bätärekä? ¿Ngöböta ni ngübare bätärekä ye erere Jesukwe nuainbare ño, aune nikwe nuaindre ye erere angwane dre kwin raba nemen nikwe? Jehovata kukwe käbämike ye ñaka mike nemen bare jötrö rabadre tuin nie, akwa kukwe ngwantarita ye mikadre gare jai angwane ye käkwe ni dimikai tödeke bäri aune ja töi mike kukwe ye ngübare bätärekä.

ÑOBÄTÄ JEHOVATA NI NGÜBARE BÄTÄREKÄ

3, 4. a) ¿Jehová töita Kä tibien ne kräke ye ñobätä tä ngübare bätärekä? b) ¿Adán aun Eva ja mikani ngite ye ngwane Jehovakwe dre nuainbare?

³ Jehová abokän gobran bäri kri ni jökräbiti, akwa  kukwe keta kabrebätä niarata ni ngübare bätärekä. Kä Edén yekänti nitre ja mikani Jehová rüere ye ngwane, kukwe keta kabre ütiäte mikadre gare kwe, akwa kä ngübabare kwe kukwe ye nuainkäre. Angeletre aune ni kä tibienbätä töi ño aune ja ngwen ño ye gare kwin ie, ye medenbätä kukwe meden kwin ni kräke ye erere tä nuainne (Heb. 4:13).

⁴ Adán aune Eva monsoitre nünandre Kä jökräbiti tibien ye Jehová tö namani. Satana Eva ngökani aune Adán ñaka ja mikani täte, akwa Ngöbö töi namani ño ye Ngöbökwe ñaka kitani temen. Ñaka nütübare kwe ni kä tibienbätä jire iti ñan raba niara mike täte, ñakare aune kukwe mada ükaninte kwe niara töi ye mikakäre nemen bare ni aune kä tibien ne kräke (Is. 55:11). Kukwe kwe ye mikakäre nemen bare bätä niara aibe gobranka kri rabadre gare nitre jökrä yei, yekäre tä kä mike näin kwati krubäte ta nitre ngübakäre bätärekä.

5. ¿Jehovata ni ngübare bätärekä ye köböire dre kwin tä nemen bare?

⁵ Jehovata ni ngübare bätärekä, ne kwe ja nire kärekäre rabadre nitre mada yekwe arato. Kä nengwane, tä kukwe keta kabre nuainne nitre “kwati krübäte” diantarikäre (Apoc. 7:9, 14; 14:6). Kukwe drieta nikwe yebiti niarata kukwe kwe aune Gobran kwe dre nuaindi ye mike gare nitre madai. Gobran Ngöbökwe kukwei drieta ye abokän “kukwe kuin” mikata gare ni kä tibienbätä yei (Mat. 24:14). Jehovata nitre kärere ja kokwäre ye tä nemen keteitibe nitre kukwe metre tarekä ye ngätäite (Juan 6:44-47). Ngöbö ni tarekä tä niaratre dimike ja ngwen kwin ne kwe niara rabadre nitre ye kain ngäbiti. Arato, Ngöbökwe nitre kä nebätä dianinkä gobrankäre kä kwinbiti. Niaratre rabai gobrane angwane nitre Jehová mikaka täte metre ye dimikai kwetre nüne kwin aune kärekäre. Jehovata ni ngübare bätärekä, aune tä kukwe ükete ne kwe kukwe käbämikata kwe ye rabadre bare ni kräke.

6. a) ¿Jehovata nitre ngübare bätärekä ye bämikani ño kwe Noé näire? b) ¿Jehovata nitre ngübare bätärekä ye tä bämike ño kä nengwane?

⁶ Nitre blo tä kukwe käme krubäte nuainne Jehová okwäkänti, akwa niara tä nitre ye ngübare bätärekä, ñodre, Ñü kri jämi näkäin tibien ye känenkri kukwe namani bare yebätä töbikadre. Kä ye näire, nitre kwati ñaka nämene ja mika gure metre mike tuin ütiäte jai, nämene ja mete aune kukwe käme krubäte nuainne ye “matani tare [Jehová] brukwäbätä” (Gén. 6:2-8). Nitre nämene kukwe käme nuainne ye niarakwe ñaka tuanimetre nuainne jankunu, ñü kri mikani näkäin kwe nitre käme gatekäre. “Ngöbö nämene niaratre ngübare bätärekä Noé näire” akwa kukwe ükaninte kwe Noé bätä mräkätre diantarikäre (1 Ped. 3:20, NGT). Ñongwane kukwe ye mikadre gare Noé ie ye ngübabare kwe aune ye erere Noé mikani kwe arka sribere (Gén. 6:14-22). Arato, nitre käme gaite köböi namanina no ye “Noé [...] nämane dirire ni mda mdaye” (2 Ped. 2:5). Jesukwe niebare nita nüne Noé näire ye kwrere. Jehovakwe kukwe käme kä nebätä mikai krüte niebare kwe, akwa “köbö mdente amne ñänä okwä nuäi” rabai bare, ye ñaka gare jire nitre kä tibienbätä yei (Mat. 24:36). Ngöböta niere nie ni rabadre nitre ye mike mokre aune dre nuaindre kwetre, ne kwe rabadrete kwäre ye nita mike gare ietre.

7. ¿Jehovata ngrötöte krubäte kukwe käbämikata kwe mikakäre nemen bare? Mä raba mike gare.

⁷ ¿Jehovata nitre ngübare bätärekä ye tä mike gare niarata kä mike niken ngwarbe ta? Ñakare. Ni mada ngübadre bätärekä ye ñan tä mike gare ni ñaka töbike jire chi ni madabätä. Nita kite umbre, nita ja tare nike ye ngwane kukwe ye ngwandre törö jai ye ñaka raba nemen nuäre ni kräke. Ni raba kite di nekä o ni raba nemen nütüre Ngöböta ngrötöte krubäte kukwe käbämikata  kwe ye mikakäre nemen bare (Heb. 10:36). Kukwe keta kabrebätä niarata nitre ngübare bätärekä aune tä kä mike näin ta, ye köböire tä nitre niara mikaka täte metre dimike ye ñaka käi kwitadrekä jabiti (2 Ped. 2:3; 3:9). Arato, Ngöböta nitre ngübare bätärekä ye erere Jesukwe nuainbare ño ye ani mike gare jai.

JESÚS, KUKWE NGÜBAREBARE BÄTÄREKÄ

8. ¿Jesukwe ja töi mikani kukwe meden ngübare bätärekä?

⁸ Kirabe Jesuta Ngöbö kukwei mike täte kä jutobiti. Satanakwe ja mikani Jehová rüere ye ngwane Jehovakwe ja töi mikani Monso kwe itibe juen Kä tibienbätä ne kwe rabadre kädekani Mesías. Sribi kri mikani Jesús kisete, akwa kä kwati krubäte rikadre ta ne kwe rabadre bare ie, aune niarakwe ye ngübabare bätärekä (ñäkädre Gálatas 4:4 yebätä). Akwa, ye ñan aibätä namani kwekebe kise mikani ja teta, ñakare aune Rünkwe sribi mikani kisete yebätä ja töi mikani kwatibe kwe nuainne. Ngöbökwe niebare känenkri Jesús jatadre Kä tibien nebätä angwane Satanakwe murie ketadi aune kukwe ye nämene gare Jesús ie (Gén. 3:15; Mat. 16:21). Ja tare nikadi kwe ye nämene gare ie, akwa ja töi mikani kwe kukwe ye ngübare bätärekä, ne kwe niarakwe Ngöbö töi mikadre nemen bare aune yebiti bämikani kwe nämene Ngöbö mike täte metre. Niara ñaka töbikabare jabebätä aune sribi nämene kisete yebätä. ¡Kukwe kwin bämikani kwe ni kräke! (Heb. 5:8, 9.)

9, 10. a) Jehovakwe kukwe ükaite ye Jesuta ngübare bätärekä, ¿akwa ye känenkri tä dre nuainne? b) ¿Jehovata kä kite kukwe kwe nuainkäre yebätä nikwe ja töi mikadre ño?

⁹ Jesús ganinkröta ye ngwane kädekani kri kä kwinbiti aune Kä tibienbätä (Mat. 28:18). Ye medenbätä, Jehová töita ño ye niarakwe mikai nemen bare aune tä nuainne Jehovata kukwe ükete ye ererebätä. Ngöbökwe Jesús “rüe mikadi [niara] ngoto täni” ye Jesukwe ngübabare bätärekä Rün kise ruin yekri nememe kä 1914 (Sal. 110:1, 2; Heb. 10:12, 13). Gwäune niarakwe nitre gobrainta Satanakwe ye gaite, akwa ye känenkri tä ni ngübare bätärekä aune tä ni jie ngwen “ñö ni mikaka nüne kärekäre” ye kokwäre (Apoc. 7:17).

¹⁰ Jesukwe kukwe kwin bämikani ni käne. Ñongwane Jehovata kä kite kukwe nuainkäre ye nikwe ngübadre bätärekä. Rün nämene dre dre ribere ie ye erere nämene juto biare nuainkäre, akwa ñongwane tö namani niara tuai kukwe ye nuainne ye ngübabare bätärekä kwe. Nitre gobrainta Satanakwe ye gaite ye nita ngübare, akwa ni jökrä käkwe ja töi mikadre kukwe ye ngübare bätärekä, ne kwe ni ñaka rabadre ja di ngwen nekä aune ni ñaka rabadre kukwe ükateta Ngöbökwe ye kwite jene. Akwa, ¿nikwe dre nuaindre ja töi mikakäre kukwe ngübare bätärekä?

¿NGÖBÖTA NI NGÜBARE BÄTÄREKÄ YE ERERE NUAIN RABA ÑO?

11. a) ¿Tödeka aune kukwe ngübadre bätärekä ye ñobätä ütiäte? b) ¿Kukwe medenbätä tödeka nikwe mikadre bäri dite?

¹¹ Ni jökrä ngite akwa, ¿yebiti ta raba kä ngwen nüke jai? Jän, ñobätä ñan aune Jesús jämi nüke Kä tibienbätä, ye känenkri nitre Ngöbö kukwei niekä bätä nitre mada Ngöbö mikaka täte metre käkwe kä ngwani nüke jai. Niaratre nämene tödeke aune nämene kukwe ngübare bätärekä (ñäkädre  Santiago 5:10, 11 yebätä). Jehovakwe kukwe niebare ietre yei ñaka tödekadre kwetre angwane, ¿kukwe käbämikani ietre ye rabadre ngübare bätärekä? Ruäre ngwane ja tuani kwetre kukwe tare ben, akwa kukwe käbämikani ietre ye erere Ngöbökwe mikai nemen bare kräketre yei nämene tö ngwen (Heb. 11:13, 35-40). Kukwe keta kabrebätä ni rabadre tödeke bäri, ñobätä ñan aune kä nengwane Jesuta “ni mik[e] tödeke bäri kuin metre” (Heb. 12:2). Kukwe rabai bare niebare känenkri ye erere niarakwe  nuainbare aune Ngöbö töita ño ye mikani gare kwe, ye kätä ni dimike tö ngwen bäri Jehovai.

12. ¿Ni raba dre nuainne tödeka nikwe mikakäre dite?

¹² ¿Ni raba dre nuainne tödeka nikwe mikakäre dite aune ni töi rabadre kukwe ngübare bätärekä? Ngöböta kukwe ükete ye nikwe mikadre täte ye ütiäte krubäte. Ñodre, ñobätä ni rabadre Gobran Ngöbökwe mike käne yebätä töbikadre. ¿Ni raba ja di ngwen bäri kukwe nieta Mateo 6:33 ye nuainne? Kukwe ye mikakäre täte ni rabadre kä denkä bäri jai kukwe driekäre aune jondron ruäre tuenmetre. Nita ja di ngwen Jehová mike täte ye köböire niarata kukwe kwin mike nemen bare nibätä ye ñaka käi kwitadrekä jabiti. Tä ni dimike ni mada tötike Bibliabätä aune tä kä jäme kwe bien nie, ne kwe ni “ñan töbikadre dikaro ngwarbe” (ñäkädre Filipenses 4:7 yebätä). Jehová tä kukwe bien nuaindre nie ye mikata täte ye köböire kukwe kwin tä nemen nikwe yebätä töbikadre angwane, kukwe ngübadre bätärekä ye rabai tuin ütiäte nie (Sal. 34:8).

13. Tödeka aune kukwe ngübata bätärekä ye bämika raba ño ye mäkwe mika gare

¹³ Kukwe ngübata bätärekä ye bämikata nita nura nökö aune ötö ye kwrere. Ni nura nökaka tä nura nökö, aune ngwä tä nemen kwin, ye medenbätä nura mada nökaita kwe ye ngwane nura ngwä ötai ere kwe ie tä tö ngwen. Ye erere tä nemen bare Ngöböta kukwe niere nie ye ngwane. Nita ja tötike kukwe kwe yebätä, mike täte aune jondron kwin tä nemen nikwe, ye ngwane nita nemen tö ngwen bäri Jehovai aune kukwe käbämikata kwe ye rabai bare metre ye nita ngübare bätärekä (ñäkädre Santiago 5:7, 8 yebätä).

14, 15. ¿Ja tare nikata yebätä nikwe töbikadre ño?

¹⁴ Jehovata ni aune nitre jökrä käbiti tibien mike tuin ño jai yebätä nikwe töbikadre angwane ye raba ni dimike kukwe ngübare bätärekä. Ñodre, kä kwati krubäte te  ni kä nebätä tä ja tare nike ye nemen tare ie, akwa ye ñan aibätä tä käre ulire. Niarakwe Monso ngöräbe kwe juani “sribi diablukwe bätäkä ngwarbe juankäre ngwarbe” aune kukwe jökrä tä ni mike ja tare nike ye ükatekäre (1 Juan 3:8). Ye bitikäre, ja tare nika ye jökrä näin ta aune Ngöbökwe kukwe kwin ükaite ni kräke ye abokän rabai kärekäre. Ye medenbätä, ni ñaka rabadre käre ulire kukwe käme nuainta Satanakwe o niara gadrete jötrö ngwarbe yebätä ni ñaka rabadre töbike krubäte, ñakare aune nikwe tödekadre jondron ñaka tuin, akwa nuadi kärekäre yei. Jehovakwe köbö kitani kä ne gatekäre aune kukwe ye rabai bare ie köbö kitani kwe ye ererebätä (Is. 46:13; Nah. 1:9).

¹⁵ Kä krüte te tödeka nikwe nuate raba kukwe keta kabre tarebiti. Kukwe tare nuaindre nibätä o ni mräkä tare nikwe tä ja tare nike, akwa ni ñaka rabadre rubun käre kukwe yebätä. Ni ngite yebätä ñaka raba nemen nuäre ni kräke, akwa ja di ngwandre tö ngwen Jehovai aune Jesukwe ja töi mikani kädrieta Mateo 26:39 ye erere ja töi mikadre (ñäkädrebätä).

16. ¿Kä nibira braibe yete ñaka ja töi mikadre dre nuainne?

¹⁶ Ngöböta ni ngübare bätärekä ye erere ni törba nuain angwane, Jehovata kukwe niere yei nikwe tö ngwandre metre. ¿Ye dre gärätä? Jehovakwe niebare känenkri kä ne krütai, akwa kä ne nibira ja ken ye nire ñaka tä tö ngwen metre ie, angwane tä niken “ja töi mike jondron mada nuainne” nane kukwe niebare ye erere ñaka rabadre bare yebätä. Ñodre, ni ye törbadre ja tuai ütiäte aune ja tuai ngwian bökäne aune jatadre Gobran Ngöbökwe mikete mrä o törbadre ja tötikai bäri kwela krite ne kwe nünandre kwin kwe. Nire tä ja töi mike ye erere ye tä bämike ñaka tä tödeke. Pablokwe kukwe niebare ni kräke ne ngwandre törö jai, “ni mda mda käta tödeke [...] käta jändrän [...] ngibiare bätärekä jae” aune Jehovakwe kukwe käbämikani ye rabai kwe (Heb. 6:12). Jehovakwe ñaka kä käme ne tuainmetre jankunu, ñobätä ñan aune niarakwe dre käbämikani ye erere mikai nemen bare kwe (Hab. 2:3). Akwa, ni ñaka jatadre sribi Jehovakwe nuainne nierare o nane nane, ñakare aune nikwe ja ngwandre mokre bätä nikwe kukwe kwin ye driedre kä jutobiti, sribi ye kätä kä mike juto nibätä kä nengwane (Luc. 21:36).

KUKWE NGÜBATA BÄTÄREKÄ KÖBÖIRE KUKWE KWIN TÄ NEMEN NIKWE

17, 18. a) ¿Jehovata ni ngübare bätärekä ye köböire dre raba nemen nikwe? b) ¿Ja töi mikata kukwe ngübare bätärekä ye käkwe ni dimikai ño?

¹⁷ Jehová niena gare nie kä kwati te o kä braibe te, akwa ni jökrä tö niara mikai täte kärekäre. Kä ne krütai ñongwane ñan gare nie, akwa ja töi mikadre kukwe ye ngübare bätärekä ye käkwe ni dimikai kä ngwen nüke jai nememe ni rabai dianintari ye ngwane. Kä nengwane, Jehová tä kä bien nie ne kwe nikwe bämikadre kukwe ükateta kwe yei nita tö ngwen ja brukwä tätebiti, aune nita juto biare ja tare nikakäre niara kä yebätä (1 Ped. 4:13, 14). Ne madakäre, tä ni tötike ne kwe ni töi rabadre jondron ngübare bätärekä, ye abokän ütiäte ja nire nikwe diantarikäre (1 Ped. 5:10).

¹⁸ Jesús tä kädekani kri gobrankäre kä kwinbiti aune Kä tibienbätä, ye medenbätä nikwe ja ngwandre täte metre angwane ni mada ñan raba ni denkä mento niarabätä (Juan 10:28, 29). Gata aune dre rabai bare ja känenkäre ye ñaka jürä ngwandre jabätä. Nire nire käkwe kä ngwain nüke jai aune kukwe ngübai bätärekä nememe kä krüte yete, yekwe ja nire rabai. Aisete, nikwe tö ngwandre käre Jehovai aune ñaka ja ngökamana jondron kä nebätä yei. Tödeka nikwe mikadre dite bätä Ngöböta ni ngübare bätärekä ye nikwe mikadre tuin ütiäte jai (Mat. 24:13; ñäkädre 2 Pedro 3:17, 18 yebätä).

[Kukwe ngwantarita]

[Jondron üai bämikani página 18]

[Jondron üai bämikani página 21]

[Jondron üai bämikani página 21]

Ngöböta ni ngübare bätärekä ye erere nuaindre angwane nikwe Gobran Ngöbökwe mikai käne aune jondron kwin rabai nikwe