Nünain jäme mil krati aune kärekäre
Nünain jäme mil krati aune kärekäre
“Ngöbö aibe raba[i] gobrane jändrän jökräbti.” (1 COR. 15:28)
¿MÄ RABA MIKE GARE ÑO?
¿Kukwe Bibliabätä rabai bare käbämikata ye tuin ño mäi?
Miqueas 4:4
Isaías 11:6-9
Juan 5:28
1. ¿Kä ja känenkäre yete dre rabai nitre “kwati” yekwe?
¿REI KUKWE erametre nuainkä, tä ni mada mike tuin bobre jai käkwe gobrandi nitre kä tibienbiti kä mil krati te angwane, ¿dre kwin nuain raba kwe raba ruin mäi? “Ja tare nika[d]i kri” ye rükai angwane kä käme ne gaite, akwa nitre “kwati” rabaite nire yekwe jondron kwin ye rabai (Apoc. 7:9, 14).
2. ¿Kä nikanina 6.000 ta nitre kä tibienbätä tä ja gobraine ño?
2 Kä nikanina 6.000 ta nitre kä tibienbätä tä ja gobraine akwle ye köböite ja tare nikata krubäte. Kukwe ne niebare kirabe Bibliabätä: ‘Ni kä nebätä tä ni mada gobraine ngwankäre ja tarenikeʼ (Ecl. 8:9). Kä nengwane, kukwe ye erere tä nemen bare: rü nuainta, ji dikata, nünanta bobre, bren nikata, kä tibien juanta ngwarbe, aune ñü bätä kä ngire krubäte tä mate kä jökräbiti tibien, ye abokän kukwe kri ben ja tuata. Ni ñaka ja töi kwite angwane kukwe bäri tare rabai bare gobrantre kwati tä niere.
3. ¿Gobrandi Kä Mil Krati ye ngwane dre rabai bare?
3 Ni ngwanta ja tare nike bätä kä tibien juanta ngwarbe, ye Jesukristo bätä nitre 144.000 ükaite Gobran Ngöbökwe ye köböire. Gobrandi kwetre Kä Mil Krati ye ngwane kukwe kwin käbämikani Jehovakwe ye rabai bare: “Tikwe kä kwin mrä aune kä tibien mrä sribedi; aune jondron nämene känekäne ye ñaka rabaira törö, aune ñaka rükaita jire mun brukwäte” (Is. 65:17). ¿Dre kwin rabai bare kä ye ngwane? Kukwe rabai bare niebare Bibliabätä ye köböire “jändrän kuin [...] tuen ñakare” ye nüke gare nie (2 Cor. 4:18).
“JU SRIBEDI, AUNE [...] UBA NÖKAI”
4. ¿Nitre kwati tä nüne ño kä nengwane?
4 ¿Nire ñan törba ju tuai jeñe jakwe nünankäre töi jämebiti mräkätre kwe yebe? Akwa, kä nengwane nitre kwati ie ju kwin ñaka tärä nünankäre. Juta kri yekänti nitre kwati krubäte tä nüne, ye medenbätä nitre ruäre tä niken nüne kä ñaka kwin yete, ja ken krubäte bätä tätre nüne bobre aune ja tare nike. Ju kwin raba nemen kwetre ye ñaka metre tä nemen ruin ietre.
5, 6. a) ¿Kukwe nieta Isaías 65:21 bätä Miqueas 4:4 ye rabai bare ño? b) ¿Dre nuaindre ne kwe kukwe käbämikani ye nikwe tuadre nemen bare?
5 Gobran Ngöbökwe käkwe gobrandi ye ngwane nire tö ju kwin tuai jakwe ye erere rabai kwe, Isaías käkwe niebare mekerabe: “Erametre ju sribei, aune nünain te; bätä erametre uba nökai aune ngwä kwetaita” (Is. 65:21). Kä nengwane, nitre ruäre kä bökäne, ju jeñe o ju kri tärä kwetre, akwa ngwian krütadre jökrä kän o ni gokä raba kukwe tare nuainnebätä ye jürätä nemen niaratre yebätä. Gobran Ngöbökwe kukwe jökrä ye diainkä, ni Ngöbö kukwei niekä Miqueas käkwe kukwe ne tikani: “Ni itire itire rabaitre täkäni vid bätä higuera kwe ye täni, arato ni ñaka rabai iti [...] kä jürä ngw[e]nbätä” (Miq. 4:4).
6 ¿Kukwe kwin käbämikata ye matadre ño nibätä? Ju kwin rabadre nikwe ye ni jökrä tä ribere jai. Akwa ñaka ja töi mikadre sribire krubäte o rürübän ütiä mike krubäte jabiti ne kwe ju kri rabadre nikwe, ja töi mikadre kukwe käbämikata Jehovakwe nie yebätä ye bäri kwin ni kräke ¿ñan ererea? Jesukwe niebare: “Ködälä kwe kä mäkä tärä. Nukwä kwinta kwe [...] juda tärä arato. Akwa Ni Brare Monsoi abrä kwe kä ñan tärä jadükakrä” (Luc. 9:58, NGT). Ju kökadre o sribedre ño ye nämene gare Jesús ie. Akwa, ¿ñobätä ñaka ja töi mikani jondron yebätä kwe? Niara ñaka tö namani jondron kä nebätä tuai ja töi kwite aune Gobran Ngöbökwe mikaite mrä. ¿Jesukwe nuainbare erere ni raba ja okwä mike kwin merebe aune ñaka ja töi mike jondron kä nebätä ribere krubäte jai? (Mat. 6:33, 34.)
“LOBO TÄI KETEITIBE OBEJA YEBE”
7. ¿Ni kä tibienbätä aune jondron nire ye käkwe nünandre ño jabe Jehovakwe niebare?
7 Käne, Jehovakwe jondron jökrä sribebare, biti mrä ni Kä tibienbätä sribebare kwe. ¿Niara töi nämene ño kräketre? Jehovakwe niebare Monso mubai kwe, sribikä kwin krubäte ie: “Ari ni dätere bäsi ja kwrere. Abti jändrän jökrä dätebare nikwe, ari bien ietre abko, rabadi jändrän jökrä ñöte, btä jändrän ngibiata gwi, btä jändrän jökrä mda jateta btä, nukwä käinta amne, jändrän yorekä tementa dänkiene” ngübare (Gén. 1:26, JK). Ngöbö tö namani Adán aune Eva tuai jondron nire ye ngübare, aune nitre jökrä käkwe nuaindre ye erere.
8. ¿Jondron nire ye raba nemen ño?
8 ¿Ni raba nüne jäme jondron nire yebe aune gobraine bätä ngübarebiti? Nitre kwati tä ja mäke aune nüne kwin nukro, minchi, aune jondron nire mada yebe. ¿Akwa ye erere nüna raba jondron nire rubun känsenta yebe? Nitre tä ne mike gare: “Nitre ja tötikaka kri abokän tätre ja tötike jondron nire yebätä aune tätre ja kete käre bentre niaratre yei gare jondron nire ye raba ni mada tarere”. Jondron nire ye raba ni jürä ngwen jabätä o raba nemen rubun, akwa ni raba nemen tare jondron nire yekwe arato. Nitre kädrite ye arabe tä niere: “Jondron nire tä ngäbäli kwe ngübare ye ngwane tä nemen tare kwe arato”.
9. ¿Jondron nire ye nünain ño nibe?
9 Biblia tä käbämike nitre kä tibienbätä nünain jäme jondron nire yebe ye gare kwin nie (ñäkädre Isaías 11:6-9 bätä 65:25 yebätä). ¿Ñobätä? Noé aune mräkätre kwe jatani jubäre arkate, angwane Jehovakwe kukwe niebare ietre ye ngwandreta törö jai: “Jändrän jökrä [nire] känebtä rabadi mun ngäniene”. Jondron nire tä ni ngänikaire aune tä ngitie ni käne yebiti tätre ja kriemike (Gén. 9:2, 3, JK). Jehová raba jondron nire miketa jäme ne kwe kukwe käbämikani kwe ye rabadre bare (Os. 2:18). ¡Nitre nünain Kä tibienbätä kukwe kwin ye tuai!
“NIARATRE OKWÄ ÑÖI SÖKADITE”
10. ¿Kukwe medenbätä ni okwä ñöi tä nimiente?
10 “Kukwe kabre nuainta köböite nitre tä ja tare nike ñänänte” ye Salomonkwe tuani, ye medenbätä niebare kwe: “¡Ninkren!, nitre ngwan[ta] ja tare nike ye okwä ñöi [tä] nen, aune ni mada ñaka tärä niaratre töi mikakäre jäme” (Ecl. 4:1). Kä nengwane kukwe tare tä nirien bäri, aune tä ni mike ja muaire, ¿ñan ererea? Ruäre ngwane kätä nemen juto nibätä ye ngwane ni okwä ñöi tä nimiente, akwa ni brukwä tä nemen ulire ye ngwane nita muen bäri.
11. ¿Kukwe meden kädrieta Bibliabätä abokän tuin kwin mäi?
11 Ani töbike nitre ruäre kädrieta Bibliabätä abokän töi namani ulire aune muabare kwetre. Ñodre, kä namani 127 Sarabiti angwane krütani aune “Abrajan moto namani ulire krübäte, kä namani [Sara] müaire” (Gén. 23:1, 2, JK). Noemikwe jüde nibu nübaibare näinta ja käite ye ngwane jämi niken ye känenkri bobu jire “nikaninbe müen” jabe kwärikwäri (Rut 1:9, 14, Jonas/Rut, Sociedad Bíblica de Panamá). Rei Ezequías namani bren aune krütai ye namani gare ie, yebätä orabare kwe Ngöböi aune nikani “muen krubäte”, kukwe ye matabare Jehová brukwäte (2 Rey. 20:1-5). Pedrokwe niebare Jesús ñaka nämene gare ie ye ngwane antlankwe ngwänänbare aune niarakwe “ja müaibare kri”, ¿ja namani ruin ño ie yebätä mä raba töbike? (Mat. 26:75.)
12. ¿Gobran Ngöbökwe dre nuaindi ni kä tibienbätä kräke?
12 Ni jökräbätä kukwe tare tä nemen bare, ruäre ngwane kukwe chi o kukwe kri tä nemen ni kisete, ye medenbätä ni mada käkwe ni töi mikadre jäme aune ni dimikadre ye nita ribere jai. Gobran Ngöbökwe gobrandi Kä Mil Krati te Kä tibienbätä angwane kukwe jökrä ye ükaite kwe. Biblia tä käbämike Ngöbökwe “niaratre okwä ñöi sökadite jökrä ietre amne ni ñan krütadre jire iti mda amne ñan ja müaidre jire chi mda amne ñan ja müaidre ja tare nikabtä” (Apoc. 21:4). Ni ñaka rabai ulire, ni ñaka ja muai aune ja tare nika ye ñaka rabaira ye tä kä mike juto nibätä. Arato, ni rüe bäri kri: gata, ye Ngöbökwe diainkä tä käbämike nie. ¿Nuaindi ño kwe?
“NITRE JÖKRÄ TÄ DOBOTE NGWANKÄRE TÖRÖ [...] JATAITA KÄ MREBITI”
13. ¿Adán ja mikani ngite ye ngwane gata tä ni mike ja tare nike ño?
13 Adán ja mikani ngite yete ja känenkäre gata namani ni jökrä gobraine, gata ye ni rüe aune ni ñaka raba ngitie käne, tä ni mike ulire aune ni mike muen krubäte (Rom. 5:12, 14). Gata ye jürätä nemen nitre kwatibätä, ye medenbätä tätre “ja tare nike” krubäte (Heb. 2:15).
14. ¿Gata “juandi ngwarbe” ye ngwane dre rabai bare?
14 Biblia tä käbämike “gata ni rüe juandi ngwarbe” (1 Cor. 15:26, NGT). Aune kukwe ketebu rabai bare. Keteiti, nitre Jehová mikaka täte “kwati krubäte” abokän tä nüne kä nengwane ye ñaka krütai aune rabai kä mrä yete. Ketebukäre, nitre kwati krubäte krütanina ye mikaita nire. Nitre “kwati krubäte” käkwe nitre krütanina kai ngäbiti ye ngwane, ¿ja rabai ruin ño ietre raba ruin mäi? Nitre krütani ganinkröta kädrieta Bibliabätä yebätä ñäkädre kukwe ye mikakäre gare jai (ñäkädre Marcos 5:38-42; Lucas 7:11-17 yebätä).
15. ¿Mä mräkä krütani gaikröta ye ngwane ja rabai ruin ño mäi?
15 Kukwe nakaninkä yete kukwe ketebu ne nieta “nitre nämane kwati, ye töi ñan namani krütare jire chi kukwe nakaninkä yebtä” aune “namanintre Ngöbö käikitekä”. Nitre krütani ganinkröta kädrieta Bibliabätä ye nikwe tuadre angwane nikwe kukwe ye arabe niedre arato. Ni mräkätre tare nikwe krütani gaikröta ye nikwe tuaita angwane kä rabai juto krubäte nibätä. Jesukwe niebare: “Munkwe ñan ja ngwan nikenkä kukwe nebätä, ne ñan ñobätä kä rükai näre angwane nitre jökrä tä dobote ngwankäre törö ye ietre niara kukwe juruai aune jataita kä mrebiti” (Juan 5:28, 29, NM). Ni gaikröta ye “jändrän kuin [...] tuen ñakare” nie kä nengwane, akwa kukwe ye rabai bare ye ngwane nikwe ñaka käi kwitaikä jire chi jabiti.
“NGÖBÖ AIBE RABA[I] GOBRANE JÄNDRÄN JÖKRÄBTI”
16. a) ¿Ñobätä ni rabadre blite kä jutobiti “jändrän kuin [...] tuen ñakare” nie yebätä? b) ¿Pablokwe nitre kristiano Corinto dimikani ño?
16 Nita nüne kä käme te, akwa nire nire kätä Jehová mike täte metre kä nengwane yekwe jondron kwin rabai ja känenkäre. Kukwe kwin rabai bare ye ñaka tuin nie kä nengwane, akwa ni töita kukwe ye jiebiti angwane, ye käkwe ni töi mikai kukwe bäri ütiäte yebätä aune ni dimikai ñaka ja töi mike jondron kä nebätä jiebiti (Luc. 21:34; 1 Tim. 6:17-19). Nita ja tötike aune Ngöbö mike täte gwairebe ni mräkätre ben, blitata ja mräkätre mada ben, nitre tötike Bibliabätä aune kukwe driere, ye ngwane kukwe meden ie nita tö ngwen yebätä blitadre kä jutobiti. Nikwe ye erere nuaindre angwane dre dre ie nita tö ngwen ye rabai ni töite aune ni brukwäte. Kristo gobrandi ño Kä Mil Krati, yebätä apóstol Pablo nitre kristiano töi mikani bämike ja töite. Kukwe tikani kwe 1 Corintios 15:24, 25, 28 ye dre gärätä yebätä nikwe töbikadre kwin (ñäkädre texto yebätä).
17, 18. a) ¿“Ngöbö aibe [nämene] gobrane jändrän jökräbti” ye dre gärätä? b) ¿Jesuta dre nuainne nitre mikakäreta nüne jäme aune keteitibe?
17 Pablokwe mikani gare kukwe käbämikani ye rabai bare metre, ye medenbätä niebare kwe: “Ngöbö aibe raba[i] gobrane jändrän jökräbti”. ¿Kukwe yebiti dre gäräbare kwe? Adán bätä Eva jämi ja mike ngite ye känenkri nämenentre Jehová monsoitre jökrä ye ngätäite aune nämenentre nüne jäme. Jehová Gobran kri Kä Kwinbiti nämene angeletre aune nitre nünanka kä tibienbätä gobraine. Adán bätä Eva nämene niara mike täte aune blite ngwärere ben, aune Jehová nämene kukwe kwin mike nemen bare kräketre. Erametre, “Ngöbö aibe [nämene] gobrane jändrän jökräbti”.
18 Akwa, Satana käkwe nitre kä nebätä töi kwitani aune töi mikani ja mike Gobran Jehovakwe rüere, ye ngwane ja mäkä kwin Ngöböbe ye nianinte kän. Akwa, kä 1914 ja känenkäre Rei Dianinkä Ngöbökwe tä sribire nitre mikakäreta ja mäke kwin Ngöböbe aune nüne keteitibe (Efes. 1:9, 10). Gobran Ngöbökwe gobrandi Kä Mil Krati te ye ngwane “jändrän kuin [...] tuen ñakare” ye rabai bare. Ye bitikäre, “kä mrä” rükai, ye abokän Kristo tädi gobrane Kä Mil Krati te rabaira krüte meden gärätä. ¿Dre rabai bare ye bitikäre? “Kä käinta se amne kä temen ne Ngöbökwe mikani gare jökrä” Jesús ie, akwa niara ñaka tö ja tuai nemen bäri Jehovabiti ta, ñobätä ñan aune niara ñaka tä jondron ni madakwe ye ribere jai. Niara töi bobre, aune Ngöbökwe gobran mikani gare ie, “ye mikadita Rün Ngöbö kisete kwe”, jondron jökrä nämene gare ie aune sribi ütiäte nämene kisete ye nuainbare kwe “Rün käikitakakäre” (Mat. 28:18; Filip. 2:9-11, NM).
19, 20. a) ¿Nitre tö nünain Gobran Ngöbökwe yete käkwe bämikai ño tätre Jehová gobranka kri kain ngäbiti? b) ¿Kukwe meden ütiäte tä ni kräke?
19 Kä ye ngwane nitre nünanka gobran Ngöbökwe töi rabai metre. Niaratre ye ja ngwain Jesús erere, ja töi mikai bobre aune Jehovakwe gobraindi ye kai ngäbiti kwin kwetre. Niaratre nuaite mrä ye ngwane kukwe ye bämikai kwetre (Apoc. 20:7-10). Ye bitikäre, nitre ja mikaka Ngöbö rüere, nitre kä nebätä aune angeletre käme, ye jökrä gaite kärekäre. ¡Kä rabai juto krubäte nibätä! Jehová monsoi käkwe niara käikitaikä kä jutobiti mikakäre gare niara “aibe raba [nemen] gobrane jändrän jökräbti” (ñäkädre Salmo 99:1-3 yebätä).
20 Gobran Ngöbökwe köböra kukwe kwin käbämikata ye mike nemen bare abokänbätä ja tötiri ¿ye mati ño mäbätä? ¿Mä töi miri kwe ja di ngwen Ngöbö mike täte? ¿Mä töita kwatibe ñaka ja töi kwitamana jondron kä nebätä käbämikata Satanakwe yei? ¿Mä tö nibi mikai gare Jehová aibe gobranka kri? Mätä dre nuainne yebiti mäkwe bämika mä tö Ngöbö mikai täte kärekäre. Mäkwe nuaindi ye erere angwane nünain kä mil krati aune kärekäre jäme, yete mäkwe nünain arato.
[Kukwe ngwantarita]
[Jondron üai bämikani página 8]
[Jondron üai bämikani página 11]
[Jondron üai bämikani página 11]
[Jondron üai bämikani página 11]
Jesukwe sribidi ünä Reire, ye bitikäre gobran ye biandi kwe Rün ie
