Kukwe kwe mikata gare

Kä gre ketamärä nunta ja kete, aune krire nunta kömike

Bati deu kä 1951 ye ngwane monsotre nibokä, kä gre närebiti, nämene Ithaca (Nueva York) ñäkäbare köte, kä Michigan, lowa aune California. ¡Niaratre tö namani kukwe kwin mikai gare!

SÖ FEBRERO yebätä 122 prekursor nükani South Lansing (Nueva York), Kwela Galaad nuainbare bä jätäbiti bä kükü yebätä. Nitre kädekai misionero ye ngätäite, Lowell Turner aune William (Bill) Kasten (niaratre käi Michigan), Richard Kelsey (nünanka Iowa) aune Ramon Templeton (käi California) nämene siba. Nitre nibokä ye namani ja mäke kwin.

Sö nikani krärike ta ye ngwane kukwe mikani gare abokän niaratre mikani töbike krubäte: ¡Ja mräkä Nathan Knorr jatadi blite nitre ja tötikaka yebe! Ja mräkätre nibokä ye tö namani sribire gwairebe juta keteitibe te niebare kwetre. ¿Niaratre juandi medente sribi misionero nuainne ye namani gare ietre?

Ja mräkätre nämene yete ye juandi medente ye ja mräkä Knorr nikani niere ye ngwane niaratre namani ja töibikare. Ja mräkätre nibokä ye käräbare käne plataforma. Grükekä kwärä nikanintre, akwa kä nämene juto niaratre yebätä, ñobätä ñan aune niaratre juain gwairebe ye namani gare ietre. ¿Medente niaratre juani? Niaratre rikadi Alemania mikani gare ye ngwane ja mräkätre mada töi ñan namani krütare aune namanintre kise mete.

Kä 1933 ja känenkäre Hitler nämene gobrane ye ngwane ja mräkätre juta Alemania yekänti käkwe ja ngwani metre täte ye ja mräkätre kä jökräbiti tibien namani mike tuin ütiäte krubäte jai. Rü kri nuainbare bobukäre ye nikani ta angwane nitre ja tötikaka käkwe dän aune jondron mada juani ja mräkätre nünanka kä Europa kräke ye nämene törö ietre. Nitre Ngöbö mikaka täte kä yekänti nämene tödeke erametre, ñaka kä jürä ngwani kwetre jabätä, ñaka ja di ngwani nekä, aune niaratre tö ngwani metre Jehovai. Lowell töbikabare: “¡Ja mräkätre tare nikwe ye rabai gare metre nie!”. Ye medenbätä, kä namani juto niaratre yebätä aune köbö deu yete tö namani kukwe ye niei mräkätre bätä ja ketamuko kwetre yei.

NIKANINTRE ALEMANIA

Köbö 27 julio 1951 ye ngwane monsotre nibokä nämene East River (Nueva York) nikani Alemania kokwäre barco Homeland yebiti, köbö jätäbiti köböiti niaratre nuabare rabakäre Alemania. Ja mräkä Albert Schroeder nitre tötikaka Galaad käkwe kukwe ruäre driebare ietre kukwe Alemania yebiti, ye bitikäre ja mräkä ye kädekani nitre Braibe  konkrekasion jökrä Ngübabitikä. Nitre mada nämene näin barcote ye nämene nüne Alemania yebätä niaratre namani nütüre ja kitai bäri kwetre blite kukwe yebiti. Nitre ye nämene blite Alemania, akwa ñaka nämene kukwe niere ja erebe. ¡Kukwei ñan nükani gare ietre!

Niaratre ñaka nänbare nuäre, niaratre moto jatani käme aune kä namani nenbiti, akwa mrä niaratre namani dekäkri kä Hamburgo marte 7 agosto. Rü kri nuainbare ye bitikäre kä nikani kwä ti ta, akwa nitre kwati käkwe ja tare nikabare rü ye köböite ye tuani kwetre. Niaratre namani ulire kukwe yebätä, aisete nikani deu trente Wiesbaden kokwäre, kä yekänti sukursal nämene.

Mierkole dekäkri ni testiko Jehovakwe iti Alemania namani gare ietre. Ja mräkä ye kädeka nämene Hans, kä kwe yebiti namani gare kwin niara ye ni alemán, aune ja mräkä ye nikani niaratre ngwena Betel. Ja ngwai umbre ñaka blite inglere akwa kä jürä ñakabätä blitakäre yebe mikaninte kwe. Ja ngwai ye namani nütüre blitadre ja dibiti nitre blite kukwe madabiti yebe angwane kukwe raba nüke gare ietre. Niara namani ngrente ja dibiti ye ngwane bäri niara kukwei ñan namani nüke gare ietre. Ye bitikäre, ni ji ngwanka Betel Erich Frost nükani, käkwe köbö kwin niebare ietre kukwe inglere yebiti. ¡Ja manani ruin kwin ietre!

Sö agosto namanina krüte ye ngwane gätä kri nuainbare kukwe Alemania yebiti Francfort del Main, yebätä niaratre kwani kena, gätä ye kädekani “Ngöbö mikadre täte kwin Deme”. Nitre 47.432 ja ükaninkrö aune nitre 2.373 ja ngökani ñöte, gätä kri ye käkwe nitre misionero ye töi mikani kukwe driere bäri kä jutobiti. Akwa, yebiti ja mräkä Knorr mikani gare ietre niaratre sribidi Betel.

Ramon jämi niken sribi misionero nuainne ye känenkri niara nübaibare sribire sucursal Estados Unidos, akwa niara tö namani sribi misionero nuain yebätä ñaka kani ngäbiti kwe. Ne madakäre, Richard aune Bill töi ñaka nämene sribibätä Betel. Akwa sribi nuain nämene kwetre yete ye nämene kä mike juto niaratrebätä, aune namani gare ietre kukwe meden kwin ni kräke ye gare kwin Jehovai.  Erametre, tö ngwandre Jehovai ye bäri ütiäte, ni töita dre nuainbätä akwle ye kräke. Nita ye erere nuainne angwane medente Jehová mikadre täte aune sribi meden bianta nuaindre nie ye nikwe kadre ngäbiti ye käkwe kä mikai juto nibätä.

“VERBOTEN!”

Kä nämene juto nitre sribikä Betel yebätä, ñobätä ñan aune niaratre namani nütüre rabadre ja kite blite inglere nitre blitaka inglere nämene yete yebe. Akwa, ye erere ñaka namani bare. Bati, mrö käi Betel yekänti niaratre jökrä nämene angwane ja mräkä Frost namani blite kukwe Alemania yebiti aune ñan namani blite jadakara kwärä. Nitre jökrä namani kwekebe nikren blatote. Dre nämene nakainkä ye ñan nükani gare nitre nibokä blitaka inglere yei, akwa biti namani gare ietre blita nämene niaratre yebätä. Ja mräkä Frost käkwe ja dibiti “VERBOTEN!” niebare ye ngwane ja ñan namani ruin kwin ietre (kukwe niebare kwe ye kukwe Alemania, aune “¡ñaka nuaindre!” ye meden gärätä). Kukwe ye niebare ja dibiti bati bobu kwe. ¿Niaratre dre nuainbare köböite kukwe ye namani bare?

Mröbare ünä ye ngwane ja mräkätre jökrä nikani jötrö ngwarbe kwartote. Ye bitikäre, ja mräkä mada kukwe ne mikani gare ietre: “Mun rabadre nun dimike yekäre, blitadre kukwe Alemania yebiti ye rabadre gare käne munye. Ye medenbätä, ja mräkä Frost nini nuen, nunkwe blitadre munbe inglere ye abokän VERBOTEN, käne blita rabadre gare kwin munye kukwe Alemania yebiti”.

Ja mräkätre Betel käkwe kukwe ye mikani täte, ye köböire blitadre kukwe Alemania yebiti ye nükani gare nitre mrä yei, arato kukwe kwin driebare kwetre ja töi kräke: ja mräkä tä mäträre mäbätä mä tare kwe yebätä, ye ngwane kenanbe ñan rabai nuäre mä kräke, akwa mäkwe kadre ngäbiti ye kwin mä kräke. Ja mräkä Frost nämene juta Jehovakwe tarere aune ja mräkätre mada tarere arato. * Ye medenbätä, ja mräkätre nibokä yekwe ja mräkä ye namani tare krubäte.

KUKWE KWIN DRIEBARE KWETRE JAI

Ja ketamuko nikwe Ngöbö mikaka täte ye raba ni dimike ja kete bäri kwin Jehovabe. Ñodre, ja mräkätre nibokä ye käkwe kukwe mikani gare krubäte jai ja mräkätre Alemania nämene Ngöbö mike täte yebätä, kwati krubäte aisete ñan kädeka raba jökrä, akwa niaratre nibokä käkwe kukwe kwin driebare jai kwärikwäri arato. Richard niebare: “Blitadre kukwe Alemania yebiti ye Lowell  nämä nuainne kwin, akwa nun kräke ye ñaka nämä nemen nuäre. Ne madakäre, niara bäri umbre nun kräke, aisete kukwe meden ñan nämä nüke gare nunye ye nun nämä ngwentari ie aune rabadre nun jie ngwen käne nun nämä ribere ie”. Ramon ie tä nüketa törö: “Kä rikaba kwati nunbiti Alemania angwane nunkwe köbö käräba ngwarbe jai basakäre, ja mräkä abokän käi Suiza nun nübaiba ja gwirete juta kwe yete. ¡Kä rababa juto nunbätä! ¡Bämän krobu yete nun ñaka töbikadre blitakäre kukwe Alemania yebiti, rababa ruin nuen! Akwa, Lowell nämä töbike ño ñan nämä gare nunye, niarakwe nieba texto dianinkä köbö kwatire kwarite kräke yebätä nun rabadre ñäke aune ja tötike kukwe Alemania yebiti. Ye ñaka kä mikaba juto tibätä akwa niarakwe ñaka ja di ngwanba nekä. Nire tö kukwe kwin tuai nemen bare mäbätä ye tä kukwe niere aune ñan rabadre nuäre mä kräke, akwa ñobätä ütiäte krubäte mikadre täte ye rükaba gare nuen. Kä nikanina kwati ta kukwe ye käkwe nun dimikani aune ye köböire kukwe Ngöbökwe tä dre niere ye tä nemen nuäre ja jie ngwandre nunye”.

Ja mräkätre nibokä yei nükani gare niaratre rabadre ja töi mike kukwe meden kwin nuain nämene kwetre yebätä, Filipenses 2:3 tä niere erere “bika tidrä ni mda mdabtä amne ni mda mda mika bäri ütiäte jakrä”. Ñodre, Lowell, Richard batä Ramon nämene niere kukwe ükadrete ño ye nämene gare kwin Bill ie. Lowell tä niere: “Kukwe nämä nakainkä jabätä nuen aune ñaka nämä nuäre ükadrete angwane nun nämä niken blite Bill ben. Niara yebätä kä jürä ñaka nämä aune kukwe ükadre ño ye nämä gare bäri kwin ie nun ngwä”.

JA MÄKÄNINTE KWETRE

Niaratre itire itire jatani ja mäkete. Jehová aune sribi köbö täte kräke ye nämene tare kwetre, yebätä ja ngwai meden töi rabadre sribi Jehovakwe mikabätä käne ye känänbare kwetre. Nire tä jondron bien yebätä kätä nemen juto bäri ni jondron ka ngäbitikä kräke, ye sribi köbö täte Ngöbö kräke mikani gare ietre, aune Gobran Ngöbökwe mikadre käne kukwe mada yebiti ta ye bäri ütiäte ye namani gare ietre. Ye medenbätä, niaratre ja mäkäninte ja ngwaitre nämene sribire köbö täte Ngöbö kräke yebe, aune niaratre ja mikani gure metre ye namani dite aune kä namani juto niaratre yebätä.

Ja ketadre kwin aune ja mika gure metre ye tädre käre, yekäre Jehová tädre yete arato (Ecl. 4:12). Bill aune Ramon muko krütani, akwa niaratre nünanbare kwin muko kwe yebe aune muko kwe ye nämene niaratre dimike arato. Lowell bätä Richard tä nüne kä jutobiti muko kwe ben. Bill käkwe ja mäkäninteta bobukäre ja ngwai sribikä köbö täte Ngöbö kräke yebe ne kwe rabadre sribire jankunu.

Kä nikani ta angwane sribi keta kabre mikani niaratre kisete ye käkwe mikani niken juta jene känti, Alemania, Austria, Luxemburgo, Canadá aune Estados Unidos. Niaratre tö namani jondron ruäre nuaindi gwairebe, akwa ñaka namanina ja käntibe, ye medenbätä käre niaratre nämene blite jabe aune dre nämene kä mike juto o dre nämene  mike ulire ye nämene kädriere jabe kwärikwäri (Rom. 12:15). Ja ketamuko ye kwrere ye Jehovata bien nie ye nikwe ñaka käi kwitadrekä jabiti (Prov. 17:17). Ja ketamuko kwin kwandre nie kä nengwane ye abokän ñaka nuäre, akwa nitre testiko Jehovakwe kä jökräbiti tibien tätre ja mäke kwin jabe, aune tätre ja mäke kwin Jesús bätä Jehová yebe.

Ja mräkätre nibokä nämene ja kete kwin ye ja tuani kukwe ruäre ben, ruäre kän muko krütani, ruärebätä bren tare namani, ruäre käkwe rün namanina umbre ngübabare, ruäre nämene sribi Ngöbökwe nuainne köbö täte akwa monso ngübare, ruäre ie sribi mada Ngöbökwe mika nämene kisete ye nämene mike töbike krubäte bätä ruäre jatani umbre ye ñaka namani nuäre kräketre. Kukwe namani bare bätätre ye käkwe mikani gare ietre, ja ketamuko kwin ye tädre ni ken o mente, akwa tätre juto biare ni Jehová tarekä ye dimikakäre ja tuin kukweta nemen barebätä yebe.

JA KETAI KÄRE

Lowell, Ramon, Bill bätä Richard ja dianinkä sribikäre Jehová kräke ye ngwane niaratre yebiti kä nämene 18, 12, 11 bätä 10, aune kä namani 17 aune 21 näre niaratre yebiti angwane sribi köbö täte Ngöbö kräke ye diani kwetre jai. ¡Ye abokän kwin krubäte! Kukwe nieta Eclesiastés 12:1 ye niaratre nuainbare: “Mätä bati ye ngwane mäkwe Ngöbö mä Sribekä ye ngwan törö jai”.

Mätä bati angwane, Jehovata mä nübaire sribire köbö täte kräke. ¿Mä raba ye kain ngäbiti? Mäkwe ye erere nuain angwane kukwe kwin ñaka nuain bä mä kräke, akwa nuain raba mä kräke, namani bare ja mräkätre nibokä yebätä erere, niaratre sribi keta kabre nuainbare, ñodre, sribi ni ni tuabitikä erere, ni gätä kri köböbu tuabitikä, ni sukursal ruäre tuabitikä, nitre sukursal jie ngwanka, Kwela Sribi Ngöbökwe jie ngwankäre, bätä Kwela nitre Sribikä Prekursor kräke, kukwe kädriebare kwetre gätä krikri te arato. Sribi nuain nämene ja mräkätre nibokä yekwe ye nämene nitre kwati dimike ye nämene kä mike juto niaratre yebätä. Jehovakwe niaratre nübaibare nämene bati ye ngwane ye kani ngäbiti kwetre ja brukwä tätebiti (Col. 3:23).

Kä nengwane, Lowell, Richard aune Ramon tätre gwairebe sribireta sukursal Alemania nemenkä Selters yekänti. Kä 2010 Bill krütani, niara nämene sribi prekursor especial nuainne Estados Unidos. Ja mräkätre nibokä käkwe ja ketabare kwin bäsi kä gre ketamä näre, aune iti krütani ye ñaka namani nuäre kräketre. Akwa, Jehová Ngöbö nikwe ye ñaka ja ketamuko kwe käi kwitaikä jabiti. Gobran Ngöbökwe gobrandi ye ngwane nitre abokän kän ja ketamuko krütani ye rabaita gwairebe ja kete kwin bobukäreta.

Bill jämi krüte ye känenkri kukwe ne tikani kwe: “Nunkwe ja ketabare kä gre ketamä näre yete kukwe mada ñaka ja mäkä kwin ye juani ngwarbe nunkän. Nun nämä ja kete ye ütiäte ti kräke”. Nitre nimä töita kwatibe kä mrä bä nuäre yebätä, aune tätre niere: “Nunta krire kömike”.

[Notas]

[Jondron üai bämikani página 17]

Kise ngeberekri jatäri: Richard, Lowell, Ramon bätä Bill ja ketabare kwin Kwela Galaad yete

[Jondron üai bämikani página 18]

Ramon tä Kwela Sribi Ngöbökwe jie ngwankäre ye nuainne

[Jondron üai bämikani página 18]

Richard tä sribi nuainne makinabiti Betel Wiesbaden

[Kukwe nieta página 18]

Sribi nuain nämene kwetre ye kä mikani juto niaratrebätä, ye mikani gare ietre kukwe meden kwin ni kräke ye gare kwin Ngöböi

[Jondron üai bämikani página 19]

Mintini: Eric Frost (kise ruinkri) aune ja mräkätre mada abokän Nathan Knorr nikani tuinbiti (kise ngeberekri)

[Jondron üai bämikani página 19]

Köbö diani ngwarbe jai Suiza kä 1952

[Jondron üai bämikani página 20]

Kise ngeberekri jatäri: Richard, Bill, Lowell, aune Ramon tätre Selters sukursal mrä sribebare ye käi ngwen juto jabätä, 1984

[Kukwe nieta página 21]

“Nunkwe ja ketabare kä gre ketamä näre yete kukwe mada ñaka ja mäkä kwin ye juani ngwarbe nunkän”

[Jondron üai bämikani página 21]

Kise ngeberekri jatäri: Ramon, Richard aune Lowell