Kukwe kwin tä betekä “monso kia ye kadate”

Kukwe nämene ükaninte ye Tribunal Supremo Rusia käkwe kani ngäbiti ye köböite, sö diciembre 2009, juta Rusia yete konkrekasion nitre testiko Jehovakwe kä Taganrog ye dikani. Arato, Ju ja Ükarakrö ye dianinkä niaratre yekän aune tärä grebiti keta jätä biti ketabokä kwetre nämene kukwe käme driere nie nämene. Kukwe namani bare ye mikani gare Internet käi nitre testiko Jehovakwe yete. Ja mräkätre aune monsotre kia käkwe ja tuani kukwe tare yebe ye üai mikani Internet yete.

Nitre ja mräkäre testiko Jehovakwe nünanka Queensland (Australia) abokän ñäkäbare kukwe mikani gare yebätä käkwe tärä tikani, bätä jondron juani Centro Administrativo Testiko Jehovakwe kä Rusia yekänti, sö nikani ta ye bitikäre. Kukwe ne tikani kwetre: “Ja mräkätre tare nunkwe: Monsotre nunkwe, Cody aune Larissa, yei namani gare ja mräkätre Rusia tödekabare aune ja tuani kukwe tare ben ye matabare niaratre brukwäte. Niaratre kukwe tikani mun kräke aune jondron kia kia juani kwetre monsotre nünanka Taganrog kräke. Arato, monsotre kia yei rabadre gare kä madakänti monsotre mada tä Jehová mike täte metre töita niaratre yebätä. Ja tarebiti tätre köbö kwin juen mun kräke”.

Nitre ja mräkäre nünanka Australia jondron juani ye namani monsotre nünanka Taganrog kisete ye ngwane, niaratre tärä tikani aune jondron üai bämikani kwetre ja mräkätre ye kräke, debe biankäre ietre. Kukwe kwin tä betekä “monsotre kia ye kadate”, ye namani tuin kwin ja mräkä sribikä sukursal Rusia ie, yebätä kukwe ne tikani kwe Cody aune Larissa yei: “Ni tä monsore o ni niena kri aune ni ñaka kukwe nuainne, akwa kukwe tare nuainta nibätä ye ngwane jata nemen ruin ulire nie, ¿ñan ererea? Ye erere ja mräkätre Taganrog ñaka kukwe blo nuainbare, akwa Ju ja Ükarakrö kwetre ye dianinkä kän yebätä tätre ulire. Ja mräkätre yei rabai gare ja mräkätre juta madate töita niaratre yebätä, ye käkwe kä mikai juto bätätre. ¡Mun mantiame aune munta ni mada tarere yebätä tita kwin niere munye!” (Sal. 8:2).

Ja mräkätre kä jökräbiti tibien tä ni tarere, aune nita ja tarere kwärikwäri ye tä ni dimike ja tuin kukwe keta kabre ben. Tärä sribeta nitre testiko Jehovakwe ye tä nitre mike ja rüere kwärikwäri ye nitre kukwe ükatekä tätre niere, akwa monsotre kia abokän töita ja mräkätre tä ja tare nike yebätä. Niaratre tä nüne juta jene jene te aune töi ñaka ja erebe, akwa tätre ja mräkätre ye tarere, aune yebiti tätre kukwe niebare Jesukwe ye mike täte: “Munkwe ja taredre ne ngwane, mun abko ja töitikaka tibe ye rabadi gare ni jökräye” (Juan 13:35).

[Jondron üai bämikani página 32]

Monsotre kä Australia jondron juani monsotre Rusia kräke

[Jondron üai bämikani página 32]

Monsotre kä Rusia