Ja ngwandre ni “ütiäte ñakare” kwrere

“Nire tä bäri chi mun ngätäite, ye abokän bäri kri.” (LUC. 9:48)

KUKWE NE MIKADRE GARE

¿Dre käkwe ni dimikai ja ngwen ni “ütiäte ñakare” kwrere?

¿Ñokänti ni kätä ja ngwen ni “ütiäte ñakare” kwrere ye nemen “bäri ütiäte”?

¿Ni muko, nitre konkrekasionte aune nitre ja ketaka nibe yebe ni raba ja töi mike ño bobre?

1, 2. ¿Jesukwe kukwe meden driebare nitre apóstol kwe yei, aune ñobätä?

KÄ 32, Jesús nämene Galilea angwane nitre apóstol kwe käkwe ñäkäbare jai kwärikwäri. Dre namani bare ye tärä Lucas tä mike gare: “Nitre ja töitikaka Jesube mden bäri ütiäte, abkobtä nikani ja kwete kwärikwäri mda. Angwane nämane töbike ño, ye gani btä Jesukwe. Abtä Jesukwe ngäbäkre chi käräbare, mikani täkänintbe ja ken kwe, bti niebare krörö kwe ietre: Nireta ütiäte ñakare ni mda mda okwäte ngäbäkre chi ne kwrere, ye nireta kaen ngäbti ti käbti, ye abko ti ara jire kata ngäbti kwe amne, nireta ti kaen ngäbti ja dänkiene, ye abko Ngöbö ti juanka abko kata ngäbti kwe arato. Ne aisete mun jökrä ngätäite, nire nire tuen ütiäte ñakare munye, ni ye abko bäri ütiäte Ngöbö ngwärekri” (Luc. 9:46-48). Jesukwe ñaka ngratebare niaratre yebiti, ñakare aune töi jämebiti mikani gare kwe ietre ñobätä ütiäte niaratre ja töi mikadre bobre.

² ¿Kukwe niebare kwe ye nämene tuin ño nitre Judío siklo kena yei? ¿Nitre ye töi nämene ño? Nitre kirabe nämene töbike ño ye tärä kukwe mikakäre gare tä niere: “Kukwe keta kabrebätä nitre ye nämene blite nire abokän bäri ütiäte yebätä, aune nitre käikitadrekä ye nämene tuin bäri ütiäte ietre aune töi nämene krubäte kukwe yebätä” (Theological Dictionary of the New Testament [Diccionario teológico del Nuevo Testamento]). Ye medenbätä, Jesukwe niebare nitre apóstol kwe yei niaratre ñaka rabadre ja ngwen nitre ye erere.

3. a) ¿Ja ngwandre ni “ütiäte ñakare” kwrere ye dre gärätä, aune ñobätä ñaka nuäre nuaindre? b) ¿Kukwe meden ngwantarita abokän mikai gare jai?

³ Kukwe griekore abokän kwitani ni “ütiäte ñakare”  ye nie nämene nitre töi bobre yei, nitre ie ja ñaka nämene ruin bäri ütiäte, ñaka nämene bike kri, bätä sribi ütiäte abokänbätä käikitadrekä ye ñaka nämene kwetre. Monso chi yebiti Jesukwe mikani gare nitre apóstol kwe yei, ütiäte krubäte niaratre ja töi mikadre bobre aune ñaka rabadre nütüre kukwe jökrä nuain nämene gare ietre. Kukwe ye nämene ütiäte nitre kristiano siklo kena kräke, aune täbe ütiäte ni kristiano kä nengwane kräke. Akwa, ja ngwandre ni “ütiäte ñakare” kwrere ye ruäre ngwane ñaka nuäre. Bika kri ye tä nierare ni töite, aune ye köböite ni töita nemen ja tuabätä bäri kri ni madabätä. Murie käme kä nebätä tä nitre töi mike ja gabätä aune nitre ye ngätäite nita nüne, nitre ye käkwe ni töi kwitadre angwane ja raba kite ruin ütiäte krubäte nie, ni törbai ja ngie mikai bätä ni raba kite ni mada töi kwite jondron nuainkäre ja kräke. ¿Dre käkwe ni dimikai ja ngwen ni “ütiäte ñakare” kwrere? ¿Ñobätä nieta ni “ütiäte ñakare [...] ye abko bäri ütiäte”? ¿Kukwe medenkänti ja di ngwandre ja töi mike bobre? Ani mike gare jai.

“NGÖBÖ ABRA KWE JÄNDRÄN KUINKUIN TÄRÄ [...] AMNE NGÖBÖ ABRA TÖBTÄ KRI”

4, 5. ¿Ñokänti ni raba ja töi mike bobre? Kukwe namani bare ye niedre.

⁴ Jehová ye bäri kri ni kräke yebätä nikwe töbikadre angwane ye raba ni dimike ja töi mike bobre. Biblia tä niere Ngöbö “töi ño ye ñaka raba nüke gare täte” nie (Is. 40:28). Pablokwe kukwe ne niebare niarabätä: “Ngöbö abra kwe jändrän kuinkuin tärä kabre krubäte nikrä, amne Ngöbö abra töbtä kri krubäte [...]. Ye aisete Ngöböta töbike ño ño, ye ni ñan raba niere jire chi amne Ngöbö töi ji mdenbtä ye ni ñakare jire iti ie rabadre gare” (Rom. 11:33). Kä nikanina mil krobu ta kukwe ye tikabare, aune kukwe keta kabre namanina gare nitre kä tibienbätä yei, akwa Pablokwe kukwe niebare ye erere tä nemen bare arato. Kukwe keta kabre namanina gare nie, akwa Jehová töi ño, jondron sribebare kwe, aune ñobätä tä kukwe nuainne ye ñan raba nemen gare täte nie, yebätä jata nemen ruin chi nie.

⁵ Kukwe keta kabre Ngöbökwe ñaka raba nüke gare täte nie yebätä töbikadre angwane, ye raba ni dimike ja ngwen ni “ütiäte ñakare” kwrere. Ni kädekata Leo * käkwe ye erere nuainbare. Niara nämene bati ye ngwane tö nämene kukwe mikai gare jai jondron sribebare yebätä. Ye medenbätä, niara ja tötikani Astrofísica, kukwe mikakäre gare täte jai jondron sribebare yebätä. Ñobätä ja töi kwitani kwe ye niara arabe tä mike gare: “Tikwe ja tötikabare ye köböire rababa gare tie, nitre ja tötikaka krikri tä kukwe mike gare jondron sribebare yebätä, akwa ñaka raba kukwe  mike gare kwin täte”. Ye medenbätä, nikani ja tötike kukwe ükatekäre. Niara namani kädekani kri aune namani kukwe ükatekä. Kä nikani ta angwane niara aune muko kwe ja tötikani Bibliabätä nitre testiko Jehovakwe ben, niaratre kukwe metre kani ngäbiti aune ja dianinkä kwetre Ngöbö mikakäre täte. Kukwe keta kabre nämene gare ie akwa, ¿dre käkwe niara dimikani ja ngwen ni “ütiäte ñakare” kwrere? Niarakwe niebare: “Ni ñan raba kukwe Jehovakwe aune jondron sribebare kwe ye mike gare täte jai ye rababa gare tie”.

6, 7. a) ¿Jehová töi bobre ye tä bämike ño? b) ¿Jehová töi bobre ye köböire dreta nemen nikwe?

⁶ Jehová ye töi bobre ye käkwe ni töi mikadre ja töi mike bobre arato. Ni “abko sribikä jen Ngöbökwe” ye ngwandre törö jai (1 Cor. 3:9). Jehová ye abokän kri krubäte, akwa tä ni mike sribire ja kräke aune tä ni tuenmetre kukwe kwin driere Bibliabiti. Nita kukwe metre ye nökö nitre brukwäte aune ñö metekäbiti, akwa Ngöböta kukwe metre ye mike nirien nitre brukwäte, aune nita sribire niarabe ye abokän ütiäte krubäte ni kräke (1 Cor. 3:6, 7). ¡Ngöböta kukwe kwin bämike! Niara töi bobre ye raba ni dimike ja ngwen ni “ütiäte ñakare” kwrere.

⁷ Jehová töi bobre yebätä David namani töbike arato. Aisete kantabare kwe ie: “Escudo ja kriemikara mäkwe ye mäkwe biani tie, aune mä töi bobre ye kätä ti mike ütiäte” (2 Sam. 22:36). Salmista niebare jondron nämene nemen kwe juta Israel yete ye Ngöbö töi bobre köböire nämene nemen kwe, ye abokän Ngöbö nämene niara dimike ye meden gäräbare kwe (Sal. 113:5-7). Aune ye erere tä nuainne ni kräke. Ni töi kwin, kukwe gare nie, sribita nikwe ye Jehovakwe biani nie, ¿ñan ererea? (1 Cor. 4:7.) Akwa, ¿ñobätä ni ja ngwanka ni “ütiäte ñakare” kwrere ye abokän “bäri ütiäte”? Ñobätä ñan aune ni ye tä nemen tuin bäri ütiäte Jehovai (Luc. 9:48). Ani kukwe ye mike gare jai.

NIRE “ÜTIÄTE ÑAKARE [...] YE ABKO BÄRI ÜTIÄTE”

8. ¿Ja töi mikadre bobre ye raba ni töi mike ño juta Jehovakwe kräke?

⁸ Ja rabadre ruin kwin nie juta Ngöbökwe yete aune ni törbadre sribi konkrekasionte nuaindi yekäre ütiäte krubäte ja töi mikadre bobre. Meri bati kädekata Petra niara chi ngwane ngübabare kukwebätä, akwa ririabare angwane ñaka tö namani ni mada tuai kukwe niere jai, ye medenbätä nikani mento konkrekasionte. Ye bitikäre niara namaninta ja ükökrö gätäte. Kä nengwane tä konkrekasionte bobukäreta aune tä konkrekasion dimike ye tä kä mike jutobätä. ¿Dre käkwe dimikani? Niara arabe tä niere: “Ti ñaka nämä ja töi mike bobre aune kukwe jökrä ye ti rabadre nuainne ti nämä nütüre, ye medenbätä ja ñaka nämä ruin kwin tie juta Ngöbökwe yete”.

9. ¿Ni kristiano tä ja töi mike bobre ie mrö ja üaire ye tuin ño, aune ye köböire raba sribire ño bäri?

⁹ Ni kristiano tä ja töi mike bobre angwane Jehovata dre bien ie ye tä mike tuin ütiäte jai. Ñodre, mrö ja üaire. Tä ñäke mantre jetebe Bibliabätä, täräkwata Ni Mikaka Mokre, bätä ¡Despertad! yebätä. Jämi täräkwata ye mike ngwäte ye känenkri tä ñäkebätä, nitre mada Ngöbö mikaka täte erere. Kukwe nuainta kwe yebiti tä bämike täräkwata ye tuin ütiäte ie aune tä ja töi mike bobre, tä kite nirien jankunu kukwe ja üairebiti aune ye köböire Jehová raba niara mike sribire bäri ja kräke (Heb. 5:13, 14).

10. ¿Ja ngwanta ni “ütiäte ñakare” kwrere ye bämika raba ño konkrekasionte?

¹⁰ Ni “ütiäte ñakare” ye tä nemen tuin “bäri ütiäte” kukwe madabätä. Nitre umbre tä kädekani konkrekasionte üai deme ye köböire. Niaratre tä kukwe ükete  konkrekasion kräke. Niaratre tä kukwe ükete gätä nuainkäre, kukwe driekäre, aune ja mräkätre konkrekasionte tuabitikäre. Nita ja töi mike bobre aune kukwe ükateta kwetre ye nita mike täte ye köböire kä rabai juto nibätä, ja mräkätre rabai keteitibe aune jäme konkrekasionte (ñäkädre Hebreos 13:7, 17 yebätä). Jehovakwe ni kädekani sribikäre ni umbre o ni sribikä konkrekasionte erere angwane nikwe ja töi mikadre bobre aune debe biandre ie.

11, 12. ¿Nikwe ja ngwandre ño sribikäre bäri juta Jehovakwe kräke aune ñobätä?

¹¹ Nire tä ja ngwen ni “ütiäte ñakare” kwrere ye “bäri ütiäte”, ye abokän mika raba sribire bäri juta Jehovakwe kräke, ñobätä ñan aune tä ja töi mike bobre ye köböire raba nitre mada dimike. Nitre ja tötikaka Jesube namani ja tuenmetre töi kwitadre nitre nünanka niaratre näire yei, ye medenbätä niaratre ja töi mikadre bobre ye Jesukwe niebare ietre. Lucas 9:46 tä niere “[nire] mden bäri ütiäte, abkobtä nikani ja kwete kwärikwäri”. ¿Ni abokän töita ño? ¿Ja raba kite ruin bäri ütiäte nie ja mräkätre konkrekasionte aune nitre mada yebätä? Nitre kwati töita jabebätä aune ja nemen ruin bäri kri ietre. Ye medenbätä, nikwe ja di ngwandre ñaka ja töi mike nitre ye erere, ñakare aune ja töi mikadre bobre. Jehová töita ño ye mikadre nuaindre käne aune ja töi mikadre bobre ye köböire ni rabai ja mräkätre mada dimike bäri.

¹² Nikwe ja ngwandre ni “ütiäte ñakare” kwrere Jesús niebare, ye käkwe ni töi mikadre ja töi mike bobre kä jökrä känti. Ani kukwe ketamä mike gare jai.

JA DI NGWANDRE JA MIKE NI “ÜTIÄTE ÑAKARE” KWRERE

13, 14. ¿Nitre gure ja ngwandre ño ni “ütiäte ñakare” kwrere, aune ye köböire niaratre nünandi ño jabe?

¹³Nitre gure metre. Kä nengwane nitre kwati töita kukwe kwe aibe nuainbätä aune ñaka töbike nitre mada yebätä. Pablokwe kukwe niebare ye nitre töi bobre tä mike täte: “Jändrän jökrä käta ni die mike nüne jäme jabe kwärikwäri amne tä ni die mike gwaire jökrä, ye abko ari känentari bäri ja käne” (Rom. 14:19). Nire tä ja ngwen ni “ütiäte ñakare” kwrere tä ja di ngwen nüne jäme ni jökrä ben, aune tä nuainne bäri muko kwe yebe.

¹⁴ Ñodre, nitre gure ñan töbike ja erebe jondron nuainkäre. Ni brare törbadre rabai gwi ñäke täräbätä, akwa muko kwe törbadre näin mröre mrö rürübäinta yekänti o törbadre näin basare ja ketamuko kwetre yekänti. Ni brare ye ja töi mikadre bobre aune muko kwe töita drebätä yebätä töbikadre kwe, angwane muko kwe raba niara kukwei mike täte. Akwa, meri töita drebätä ye ñaka rabadre ribere ja dibiti muko kwe ie, ñakare aune muko kwe töita ño yebätä ja töi mikadre kwe angwane muko kwe rabai niara tarere bäri aune mikai ütiäte kwe jai. Nitre gure tä ja ngwen ni “ütiäte ñakare” kwrere angwane niaratre nünain bäri kwin jabe (ñäkädre Filipenses 2:1-4 yebätä).

15, 16. ¿Dre nuaindre niebare Davidkwe Salmo 131 yekänti, aune ye tä ni töi mike ño konkrekasionte?

¹⁵Konkrekasionte. Nitre kwati töita drebätä ye erere tätre ja di ngwen känene jai aune töta nemen bengwairebe ie. Niaratre ñaka raba ni mada ngübare bätärekä, ñobätä ñan aune niaratre töta nemen jondron tuai jötrö jakwe. Nikwe ja ngwandre ni “ütiäte ñakare” kwrere ye ni dimikai kukwe Jehovakwe ye ngübare bätärekä (ñäkädre Salmo 131:1-3 yebätä). Nita ja töi mike bobre aune nita jondron ngübare bätärekä ye köböire jondron kwin keta kabre rabai nikwe: nünandi kwin, ni töi rabai jäme, kä rabai juto nibätä aune Ngöbökwe jondron kwin biain nie. Ye medenbätä, nitre  Israel rabadre Jehová ngübare kukwe ükatekäre ye Davidkwe niebare ietre.

¹⁶ Jehová ngübadre bätärekä ye raba mä töi mike ñaka ja töibikare krubäte (Sal. 42:5). ¿Mä “tö ja mikai nitre tödekaka Jesubti jie ngwanka” konkrekasion dimikakäre bäri? (1 Tim. 3:1-7). Akwa, mä rabadre ja di ngwen ne kwe Ngöbö üai deme mä dimikadre ja töi mike kwin sribi ye nuainkäre. Akwa, ¿nane ni mada kädekadre käne sribi ye nuainkäre ye ngwane mäkwe töbikadre ño? Mä töita ni “ütiäte ñakare” kwrere angwane sribi ye mäkwe ngübai bätärekä aune mäkwe sribidi jankunu kä jutobiti Jehová kräke, sribi ño ño mikadre mä kisete ye rabai tuin kwin mäi.

17, 18. a) ¿Ngite juandre ta nibiti ribedre ni madai aune nikwe ngite juandre ta ni madabiti ye köböire dre kwin rabai nikwe? b) ¿Dre nuaindre nieta Proverbios 6:1-5 yekänti?

¹⁷Ja ketakäre ni mabade. Ni jökrä bäsi tä ja mike ngite ni mada rüere ye ngwane ngite juandre tabiti ye ñaka töta nemen niei ni madai. Ni Ngöbö mikaka täte abokän tä ja mike ngite angwane tä ngite juanmana ta jabiti ni madai aune yebiti tä bämike tä ja töi mike bobre. Ne madakäre, ni mada tä ja mike ngite rüere ye ngwane tä ngite juen tabiti. Bika kri ye ñaka tä ni mike nüne keteitibe aune tä ni mike ja rüere, akwa ngite juandre ta jabiti kwärikwäri ye köböire nüna raba jäme konkrekasionte.

¹⁸ Arato, nikwe ja kukwei kitaninkä ni madai jondron nuainkäre, aune ñan rabadre bare nie ye ngwane nikwe blitadre ni yebe aune ngite juandre ta nibiti kwe ye ribedre ie. Nane ngwane ñan ni aibe köböite jondron ñan namani bare, akwa kukwe ruäre naninte nie ye nikwe niedre angwane ni töita bobre ye nita bämike (ñäkädre Proverbios 6:1-5 yebätä).

19. ¿Biblia tä ni nübaire ja ngwen ni “ütiäte ñakare” kwrere ye ñobätä nita mike tuin ütiäte jai?

¹⁹ ¡Biblia tä ni nübaire ja ngwen ni “ütiäte ñakare” kwrere ye ütiäte krubäte! Ja töi mikadre bobre ye ñaka nuäre ni kräke, akwa ni ni Sribekä ye bäri kri ni kräke aune niara tä ja töi mike bobre yebätä töbikadre angwane ye käkwe ni dimikai ja töi mike bobre. Arato, Jehovakwe ni mikai sribire bäri aune ni rabai ütiäte kräke. Ye medenbätä, ja ngwandre käre ni “ütiäte ñakare” kwrere.

[Notas]

[Kukwe ngwantarita]

[Jondron üai bämikani página 15]

[Jondron üai bämikani página 16]

Jehovata ni tuenmetre kukwe driere yebiti tä ni mike tuin ütiäte jai

[Jondron üai bämikani página 19]

¿Kukwe medenkänti mä raba ja ngwen ni “ütiäte ñakare” kwrere?