Jondron biani nitre mada dimikakäre

PEDRO, Santiago aune Juan “niaratre nimä ye [namani] ürä dite dite [...] ye kwrere”. Kä 49 ye ngwane niaratre niebare Pablo bätä Bernabé yei: rikadre kukwe driere ye ngwane ñaka nitre kristiano bobre käi kwitadrekä jabiti (Gál. 2:9, 10). ¿Kukwe niebare ietre ye nuainbare ño kwetre?

Pablokwe dre nuainbare ye mikani gare kwe tärä tikani kwe yebiti. Nitre kristiano Corinto yei kukwe ne tikani kwe: “Ja mräkätre tä gätäre Jesu käbti kä Galaciate käkwe ngwian ükarekrö ño tikwe niebare ietre, ye kwrere munkwe nuen abko krörö: Käre bämän kratirekratire bämänte, munkwe ngwian mika biare jenena biandre ngwarbe ja mräkätrekrä. [...] Yebti ti rikadre nebe yete angwane, munkwe ñan ngwian ükarekrö ye näire. Mdakäre abko, ti näin nebe yete angwane, nire nire tädi mikani biare munkwe juandre Jerusalén, nitre ye abko kräke tikwe tärä tikadi, bti tikwe juandi ngwian ükakröta, ye munkwe bian ja mräkätre bobre bobreye Jerusalén” (1 Cor. 16:1-3).

Ngöbö diebiti apóstol Pablo tärä tikani ketebukäre ye ngwane blitabare kwe ngwian ükadrekrö yebätä: “Mun jändrän bkäne kabre krübäte abko ñan tä nebe krüte munye. Jändrän ye abko nitre tödekaka Jesubti nünanka juta Jerusalénte tä mdei nike, aisete kä tärä munye niaratre die mikakäre” (2 Cor. 8:12-15).

Kä 56 ye näire, Pablokwe kukwe tikani nitre kristiano Roma ie aune ngwian ükadrekrö ye bäsi ükaninkrö täte kwetre. Apóstol niebare: “Ja mräkätre nete käkwe jändrän biani ja mräkätre tödekaka Jesubti Jerusalénbo kräke abko ti bike niken bien ietre, aisete ti bike nikenta käne Jerusalén, ñobtä ñan angwane ja töi jenbti ja mräkätre Macedoniabo, Acayabo käkwe ngwian ükaninkrö juandre ni bobre bobre ja mräkätre tödekaka Jesubti Jerusalénbo ngätäite kräke” (Rom. 15:25, 26). Pablo kisete sribi mikani nuaindre ye namani bare ie, ye bitikäre niara nikaninta Jerusalén ye ngwane kitani ngite aune gobran Roma kädeka nämene Félix ie niarakwe niebare: “Ti jataba ngwian angwane jondron biankäre nitre tikwe ie” (Hech. 24:17).

Pablokwe kukwe ne niebare nitre Macedonia yebätä: “Tikwe kä biandre ietre arato ngwian biankäre abko rababa ribere kisere tie”. Nitre kristiano siklo kena töi nämene kwin, aune apóstol nitre Corinto nübaibare ja ngwen niaratre erere: “Munkwe ñan biandre ja moto ulire bti amne ñan ni mdata biamna, ñobtä ñan angwane kä nuäre nibtä ngwian bien, ni ye abko Ngöböta tarere”. ¿Dre nämene nitre konkrekasionte töi mike ja ngwen mantiame? Niaratre nämene jondron bien “ye köböire abko rabadi kuin niere kabre Ngöböye” (2 Cor. 8:4; 9:7, 12). Ye erere arato nikwe ja töi mikadre mantiame, aune Jehovakwe jondron kwin nuaindi ni kräke yei tö ngwandre. Ngöbökwe kukwe kwin mikadre nemen bare ni kräke ye abokän bäri kwin, ¿ñan ererea? (Prov. 10:22.)

 [Rekwadro página 9]

NITRE TÄ KUKWE ÜKETE JONDRON BIANKÄRE SRIBI NGÖBÖKWE KRÄKE

Pablo näire ye erere nitre kwati tä “ngwian mik[e] biare”, aune tä kite konkrekasionte kaja abokänbätä nieta “Ngwian sribi Ngöbökwe nuainkäre kä jökräbiti tibien” yete (1 Cor. 16:2). Sukursal testiko Jehovakwe tä sribi Ngöbökwe ngübarebiti yekänti konkrekasion tä ngwian ye juen sö kratire kratire te. Arato, juta mäkwe yete nitre testiko Jehovakwe kädekani kukwe ükatekäre metre gobranbe ye käbiti mä raba ngwian juen. Ngwian ye mä raba juen ño ye mä raba ngwentari sukursal mä käite yei. Kukwe ye mikata gare Internet www.pr418.com/contact. Ngwian bian raba ño ye mikata gare jatäri nete.

NGWIAN BIANDRE KÄREKÄRE

• Ngwian bätä jondron ütiäte jeñe bianta.

• Jondron ütiäte biani ye nikwe biani kärekäre ye mikadre gare täräbätä.

NGWIAN BIANDRE YE BIANDRETA MÄI

• Ni ngwian bianka tä ngwian bien, akwa ribedre kwe jai angwane bian rabata ie.

• Ngwian bianta kwe ye biandreta ie ye mikadre gare kwe täräbätä.

KUKWE ÜKATETA JONDRON BIANKÄRE

Nibira gare mäi mä raba ngwian bätä jondron mada ütiäte mäkwe bien, akwa dre mada nuain raba Sribi Ngöbökwe nuainta kä jökräbiti tibien dimikakäre ye mikata gare nete. Meden rabadre tuin kwin mäi ükatekäre, ye känenkri ngwantaridre sukursal juta mäkwe yete yei. Gobrantre juta jene jene te ñan tä kukwe ükete ja erebe, aisete nire ie kukwe gare aune raba mä dimike kukwe yebätä ye mäkwe känä ja dimikakäre.

Seguros. Seguro de vida bätä ngwian bianta nitre jubilabarera yekwe, ye mika raba nitre testiko Jehovakwe kädekani kukwe ükatekäre metre gobranbe ye käbiti.

Ngwian bankote. Ngwian bankote, ngwian mikata plazo fijo bankote aune ngwian bianta nitre jubilabare yei, ni mada mika raba jondron ye döräire o ni krütadre angwane ngwian ye rabadre nitre testiko Jehovakwe kädekani kukwe ükatekäre metre gobranbe ye käbiti ye mikadre gare.

Acciones y bonos. Nitre testiko Jehovakwe kädekani kukwe ükatekäre metre gobranbe ye käbiti mika raba ne kwe rabadre kärekäre kwetre.

Ju aune kä. Ju nikwe ye ni raba mike nitre testiko Jehovakwe kädekani kukwe ükatekäre metre gobranbe ye käbiti, ne kwe rabadre gare kärekäre ietre o ni ju bianka ye krütadre angwane batibe ju ye rabadre gare ietre ye mikadre gare.

Jondron biani ye ütiäre ngwian bianta. Kukwe ükateta täräbätä mikakäre gare jondron ütiäte mikata nitre testiko Jehovakwe kädekani kukwe ükatekäre metre gobranbe ye käbiti, aune ni jondron bianka o (ni mada mikani ja täte kwe) ie ngwian biandre kä kwatire kwatire te. Kukwe ükaninte ye köböire impuesto bianta gobran ie jondron ütiäre kä kwatire kwatire te ye ütiä bian rabai bäri braibe.

Kukwe tikata täräbätä bätä ni mada mikata jondron döräikä. Ngwian, kä o jondron tä nikwe ye mika raba nitre testiko Jehovakwe kädekani kukwe ükatekäre metre gobranbe ye käbiti, ye mikadre gare ni kukwe ükatekä ie o kukwe ye tikadre täräbätä. Nitre mada o gobrantre ñaka raba ngwian namani ye denkä niaratre yekän.

“Kukwe ükateta jondron biankäre” ye tä mike gare ni jondron bianka kukwe ye ükadrete känenkri. Sribi Ngöbökwe nuainta nitre testiko Jehovakwe kä jökräbiti tibien ye nire torbadre dimikai, yekäre täräkwata sribebare inglere aune suliare, täräkwata ye kädekata Donaciones planificadas para favorecer el servicio del Reino en todo el mundo. Jondron bian raba ño sribi Ngöbökwe kräke o jondron mikate raba ño sribi ye nuainkäre ye kädrieta täräkwata yebätä. Kukwe nieta täräkwata yebätä ye ruäre nuain ñaka juta mäkwe yete, ñobätä ñan aune ngwian, impuesto o gobrantre tätre kukwe mada ribere. Ye medenbätä, mäkwe ñäkädre täräkwata yebätä, ye bitikäre mäkwe blita ni käkwe ja tötikani kukwe ye nuainkäre yebe. Kukwe ükateta jondron biankäre ye köböire, nitre kwati tä sribi Ngöbökwe aune nitre mada ye dimike kä jökräbiti tibien, arato jondron bianta ye gobrantre ñaka raba denkä nikän. Täräkwata ne tärä angwane mäkwe kärä ni kukwe konkrekasionte tikaka yei.

Mä törba kukwe mikai gare bäri jai angwane, mä raba kukwe tike Oficina de Donaciones Planificadas yekänti (Charitable Planning Office), medente kukwe tikadre ye mikata gare nete, o sucursal tä juta mäkwe yete ben mä raba blite arato.

CHARITABLE PLANNING OFFICE

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Teléfono: (845) 306-0707

[Jondron üai bämikani página 8]