Nitre tä kukwe ngwentari

¿Jesukwe kukwe niebare Mateo 19:10-12 ye tä mike gare nitre tä kaibe yei Ngöbökwe jondron biani köböire ñaka ja mike gure?

▪ Jesukwe kukwe ye niebare angwane kukwe meden nämene nakainkä ye ani mike gare jai. Nitre gure käkwe ja tuanemetre yebätä nitre fariseo kukwe ngwantaribare ie angwane, Ngöbökwe kukwe meden ükaninte nitre gure metre kräke ye Jesukwe mikani gare metre ietre. Ni brare ie rabadre gare meri kwe ñaka nämene “kukwe debe nuain[ne]” angwane rabadre täräkwata sribere meri ye tuametrekäre ye nämene ükaninte Kukwe biani Moisés ie yete, akwa kukwe ükaninte ye ñaka namani kärekäre (Deut. 24:1, 2). Nitre fariseo kukwe ngwantaribare ye ngwane Jesús niebare: “Meri ja mike ngite ñakare brare mda mdabe akwa brare kwe käkwe tuadremetre, bti ja mikadre gure meri mdabe kwe, ye ngwane ni brare ye tä ja mike ngite meri yebe meri käne kwe rüere” (Mat. 19:3-9).

Ye medenbätä, nitre ja tötikaka Jesube niebare: “Meri nikwe abko rabadre ni mdabe aibe dokwäre ni rabadre tuemetre amne kukwe mda mda dokwäre ñakare ne ngwane, nikwe ñan ja mikadre gure jirekäbe abko bäri kuin ñan ñan”. Jesukwe niebare ietre: “Nire nire ie Ngöbökwe ja di biandre kukwe ye mikakäre täte aibe tä kaen ngäbti. [...] Ni ruäre tä därere kise tökare biare, abtä ñan tä ja mike gure amne tä nebe kaibe kärekäre. Akwa ni ruäre abko ni mdara jire käta dätere kaibe, abtä tä nebe kise tökare amne ñan töta nebe ja gurebtä, aisete tä nebe nüne kaibe; akwa ni ruäre abko ñan tä ja mike gure jirekäbe nünakäre Ngöbö gobranka kä käinbti ye kräke, aisete nire nire tö raba kukwe ne kaen ngäbti nünakäre kore Ngöbökrä, ye käkwe ka ngäbti” (Mat. 19:10-12).

Ni brare ruäre nämene därere eunuco aune ruäre kukwe tare nämene nemen barebätä yebätä nämene nemen eunuco. Akwa nitre mada nämene akwle ja mike eunuco, niaratre ye raba ja mike gure akwa nämene ja töi gobraine rabakäre kaibe “Ngöbö gobranka kä käinbti ye kräke”. Jesús erere niaratre nämene ja mike eunuco Gobran Ngöbökwe mikakäre käne. Nitre ye därebare angwane Ngöbökwe ñaka jondron biani ietre ja mikakäre eunuco bätä jondron ütiäte ñaka nämene kwetre ne kwe rabadre eunuco, ñakare aune niaratre akwle ja töi mikani nemen kaibe.

Jesukwe kukwe niebare, ye erere Pablokwe mikani gare nitre kristiano kaibe bätä nitre gure, raba sribi Ngöbökwe nuainne, akwa nitre kaibe “ñan tö raba ja mikai gure” ye “rabadre bäri kwin” niebare kwe. ¿Ñobätä? Nitre gure ye rabadre muko kwe ngübare aune kä denkä jai kukwe keta kabre nuainkäre muko kwe kräke, akwa nitre kaibe raba sribire köbö täte Ngöbö kräke, ñobätä ñan aune sribita nitre gure kisete ye ñan tä kwetre. Kätä nemente bäri ietre sribikäre, ye medenbätä niaratre kräke “Ngöböta ja di [o jondron kwin] bien” ietre (1 Cor. 7:7, 32-38).

Biblia tä driere jondron kwin tä nitre kaibe yekwe, ye abokän niaratre raba nemen kaibe aune ja ñaka ruin ulire ietre. Ngöbökwe ñaka jondron biani ietre ne kwe tädre kaibe, ñakare aune tätre ja di ngwen akwle ñaka töbike ja mika gure yebätä, aune töita kwatibe Gobran Ngöbökwe mikabätä käne. Ja mräkätre kwati töita ñaka ja mikabätä gure Gobran Ngöbökwe mikakäre käne aune tätre nuainne kwin ye ja mräkätre mada niedre ietre.

[Jondron üai bämikani página 20]