Ja ngübadrebiti kukwe ngwarbe yebätä

APÓSTOL Pablo kukwe ne tikani: “Ngöbö Kukwei abko nire amne dite” (Heb. 4:12). ¿Kukwe ye tä dre mike gare? Ye tä mike gare kukwe Bibliabätä raba mate nitre brukwäte aune raba töi kwite.

Apóstol jökrä krütani ye bitikäre nitre ruäre jatani kukwe metre mrite kukwe ngwarbe yebe aune kukwe metre kwita jatani jene (2 Ped. 2:1-3). Ye bitikäre, ni ji ngwanka iglesiate jatani niere Biblia ye jondron ja kriemikara kwrere. “Kukwe Ngöbökwe yebiti nitre nämene ja kriemike” yebätä Harry Y. Gamble käkwe mikani gare siklo III, Orígenes ni ji ngwanka Iglesiate käkwe mikani gare “kukwe deme Ngöbökwe kukwe nuata ye tä jondron kwin mike nemen bare ni kräke, kukwe nuainta sukiakwe ye raba kukwe ükete ni kräke, akwa Kukwe Ngöbökwe ye raba nuainne bäri ni kräke”. Gamble tä niere arato Juan Crisóstomo, nünanbare siklo IV namanina krüte näire, käkwe niebare nitre nämene texto ruäre tä tärä ketabokä Bibliabätä tä blite Jesús yebätä ye kite ja ngärä ja kriemikara. Gamble niebare Juan Crisóstomo kukwe ne tikani: “Kukwe nieta tärä ketabokä Bibliabätä tä blite Jesús yebätä ye tädre gwi nikwe angwane chokali ñan raba nemen ni gwirete”. “Kübiadre ye ngwane tärä Juan mikadre ja dokwä täni ye kwin ja dokwä tare kräke” ye Agustín de Hipona nämene kain ngäbiti niebare kwe arato. Kukwe ne tä mike gare nitre nämene nütüre Kukwe Deme Ngöbökwe ye jondron ja kriemikara kwrere. ¿Biblia ye ngwandre jai jondron ja kriemikara kwrere ye kwin raba ruin mäi?

Kä nengwane, nitre tä kukwe keta kabre nuainne Biblia yebiti ja kriemikakäre. Ñodre, tätre Biblia ye metete angwane tärä meden tä kwen kena ietre yebätä tätre ñäke aune ye käkwe niaratre jie ngwain tätre niere. Profesor Gamble tä mike gare, bati monso chi nämene niere: “Den aune ñäkebätä, den aune ñäkebätä”, ye kukwe juruabare ju madate Agustín de Hipona ie angwane nütübare kwe Ngöbö nämene niere ie niara rabadre Biblia ye metete aune tärä meden kwandre kena ie yebätä rabadre ñäke.

Nitre tä ja tuin kukwe tare ben ye ngwane tä orare Ngöböi, yebiti tä Biblia metete aune texto meden tä kwen kena ietre yebätä tätre ñäke aune ye niaratre dimikai ja tuin kukwe kwe yebe tätre nütüre. Töi kwinbiti tätre kukwe ye nuainne, akwa ni kristiano törbadre Kukwe Ngöbökwe tuai ja jie ngwen angwane ñaka nuaindre ye erere.

“Mun Die Mikaka Ngöbö Üai Deme” ye tikwe juandi Jesukwe käbämikani nitre nänkä ben yei. Arato niebare kwe: “Kukwe era Ngöböbtä ütiäte munkrä, erere diridi jökrä kwe munye. Erere arato, tita kukwe niere munye, ye mikadita töre jökrä kwe munye” (Juan 14:26). Akwa, käne niaratre ja tötikadre kukwe Ngöbökwe yebätä. Nitre tä Biblia metete aune texto meden tä kwen kena ietre yebätä tätre ñäke ye ñaka tä niaratre dimike kukwe Ngöbökwe mike gare kwin jai.

Nitre tä kukwe keta kabre ngwarbe nuainne Biblia yebiti, akwa Kukwe Ngöbökwe tä niere kukwe ngwarbe känändre aune mikadre era jai ye ñaka nuaindre (Lev. 19:26; Deut. 18:9-12; Hech. 19:19). Erametre, “Ngöbö Kukwei abko nire amne dite”, akwa raba ni dimike ño ye nikwe mikadre gare kwin jai. Biblia ye mikata jondron ja kriemikara kwrere aune kukwe ngwarbe mikata täte ye ñaka tä nitre dimike, ñakare aune kukwe metre kädrietabätä ye tä nitre dimike nüne kwin. Biblia ye tä kukwe kwin driere, tä ni dimike ji käme tuenmetre, nita nüne bäri kwin ni mräkätre ben aune nita ja mäke bäri kwin Ni Biblia bökänkä yebe.

[Jondron üai bämikani página 3]