Ja ngwandre jankunu “ni menteni” kwrere

“Ti bike kukwe ribere krörö munye: Munta nüne ni menteni kwrere kä nebtä, aisete kukwe käme mdeita nebe munye [...] ye käkwe ñan mun ganaindre.” (1 PED. 2:11)

¿MÄ RABA MIKE GARE?

¿Ñobätä nie raba nitre dianinkä nänkäre kä kwinbiti ye tätre nüne jötrö ngwarbe?

¿Kukwe meden känti “obeja mada” tä nüne jötrö arato?

¿Kukwe meden ngübata krubäte mäkwe?

1, 2. ¿Nire nire “dianinkä Ngöbökwe” abokänbätä Pedro kukwe tikani, aune ñobätä kädekani “ni menteni kwrere”?

JESÚS nikaninta kä kwinbiti ye bitikäre kä nikani grebiti kwäjätä ta angwane, apóstol Pedro käkwe kukwe ne tikani “mun dianinkä Ngöbökwe tä nüne ni menteni kwrere kä ketareketare te kä kädianta Pontote, Galaciate, Capadociate, Asiate amne Bitiniate” (1 Ped. 1:1). Pedro erere üai deme yebiti nitre ye “dianinkä” aune “mikaninta därereta btin bobuta [...] yebti [...] raba tödeke kwatibe era metre” gobrankäre Kristobe kä kwinbiti (ñäkädre 1 Pedro 1:3, 4 yebätä). Ye bitikäre apóstol käkwe niaratre kädekani nitre “nüne ni menteni kwrere” (1 Ped. 2:11). ¿Ñobätä kädekani kore kwe? Kä nengwane nitre 650 testiko Jehovakwe ye ngätäite iti tä ja bien ni dianinkä nänkäre kä kwinbiti, ye medenbätä Pedrokwe kukwe niebare ¿ye tä dre driere nie?

² Nitre kristiano siklo kena yebätä Pedrokwe blitabare angwane niebare kwe nitre ye “ni menteni kwrere” ñobätä ñan aune niaratre ñaka nünain kärekäre Kä tibienbätä. Ye erere tä nemen bare nitre dianinkä nänkäre kä kwinbiti kä nengwane yebätä. Apóstol Pablo ye nämene arato nitre “obeja braibe” ye ngätäite, niarakwe niebare: “Ni abko kä käinbti bkänkä, aisete ni kä käinbti bkänkä käkwe nünandre ño, ye kwrere nikwe nünandre amne, ni Dänkien Jesukristo ni Diantarikä tä kä käinbti [...] abko ngibiata ngäbti nikwe” (Luc. 12:32; Filip. 3:20). Nitre dianinkä ye abokän “kä käinbti bkänkä”, ye medenbätä tä krüte Kä tibienbätä ye ngwane jondron ütiäte tä nemen kwe: ye abokän ja nire kärekäre (ñäkädre Filipenses 1:21-23 yebätä). Aisete nitre ye “ni menteni kwrere” nitre gobrainta Satanakwe ye ngätäite.

3. ¿Kukwe meden mikai gare jai “obeja mda mda” yebätä?

 ³ ¿“Obeja mda mda” yebätä dre rabai bare? (Juan 10:16.) Biblia tä käbämike kä tibien ne rabai kärekäre kwetre aune niaratre tätre ye ngübare. Akwa, nikwe mikai gare ja käne niaratre ye nitre nünankä jötrö.

“JÄNDRÄN DÄTEBARE NGÖBÖKWE ABKO TÄ JA TARE NIKE”

4. ¿Kukwe meden nitre gobranka krikri ñaka raba denkä?

⁴ Kä käme ne gate jämi känenkri nitre jökrä aune ni kristiano käkwe ja tare nikadi jankunu Satana ja mikani ngite Jehová rüere ye köböite. Ye erere Romanos 8:22 tä niere: “Jändrän dätebare Ngöbökwe abko tä ja tare nike [...] jire kira abti kä nüke mtare”. Nitre gobranka krikri kä jökräbiti tibien, nitre ja tötikaka krikri, nitre tö kukwe kwin nuain ni mada kräke, niaratre ñaka raba ja tare nikata ye denkä.

5. ¿Kä 1914 ja känenkäre nitre kwati ja töi mikanina dre nuainne aune ñobätä?

⁵ Ye medenbätä, kä 1914 ja känenkäre nitre kwati tä ja mike Rei Jesukristo ükaninte Ngöbökwe yekri. Nitre ye ñaka tö ja mikai nitre gobrainta Satanakwe yekri aune ñaka dimike jire. Ñakare aune ja nire, ngwian aune ja di yebiti tätre gobran Ngöbökwe dimike (Rom. 14:7, 8).

6. ¿Kukwe meden känti nitre testiko Jehovakwe abokän “ni menteni kwrere” kä nebätä?

⁶ Juta 200 biti bäri nitre testiko Jehovakwe tä nüne aune niaratre tä ja ngwen kwin. Niaratre tä nüne kä jene jene känti, akwa jökrä ye “ni menteni kwrere”. Niaratre ñaka ja mrite kukwe gobrankwe yebe aune nitre kä nebätä tä rüre jabe yekri. Niaratre ye niena nüne Gobran Ngöbökwe yete tä nemen ruin ietre aune tätre nüne jötrö ngwarbe kä käme te aune kä ye gate köböra ye käita juto bätätre.

7. ¿Nitre Ngöbö mikaka täte metre käkwe nünandi kärekäre medente aune ñongwane rabai bare?

⁷ Kristo köbörä ja di yebiti nitre gobrainta Satanakwe ye gainte. Gobran kwe ngite aune ja tare nikata ye diainkä Kä tibienbätä. Ne madakäre, Jehová ye ni gobranka kri ye rüere nire nire käkwe ja mikani, nitre kä nebätä o nitre kä  kwinbiti ye jökrä gaite. Ye bitikäre, nitre Ngöbö mikaka metre rabai nüne kärekäre kä Bä Nuäre yete (ñäkädre Apocalipsis 21:1-5 yebätä). “Ni sribebare tä klabore kukwe käme kisete yebätä mikadi kwäre aune Ngöbö monsoitre yekwe mikadi kwäre” (Rom. 8:21, TNM).

KUKWE MEDEN NGÜBATA NITRE KRISTIANO ERAMETRE YEBÄTÄ

8, 9. ¿“Kukwe käme mdeita nebe” yebätä blitabare Pedrokwe ye ngwane dre gäräbare kwe?

⁸ Nitre kristiano rabadre dre nuainne ye apóstol Pedro mikani gare 1 Pedro 2:11 yebätä, niarakwe niebare: “Ti bike kukwe ribere krörö munye [...] kukwe käme mdeita nebe munye, käta rüre mun rüere, ye käkwe ñan mun ganaindre, abkokäre munkwe ñan kä bian ie jabtä”. Kukwe ye niebare nitre nänkä kä kwinbätä ye kräke, akwa obeja mada Kristokwe ye kräke kukwe ye ütiäte arato.

⁹ Kukwe medenbätä ni töita ye ruäre ñaka blo, akwa Ngöbö töita ño ye erere nuaindre. Nikwe nuaindi ye erere angwane ja rabai ruin kwin nie. Ñodre, ni töta nemen mrö bänänte kwetai, tomana kwin ñan, jondron kwin keta kabre nuain, bätä kä denkä jai blitakäre ja ketamuko nikwe yebe. Nitre gure metre rabadre jabe ye ñaka blo (1 Cor. 7:3-5). Akwa, “kukwe käme mdeita nebe” yebätä blitata angwane, Pedrokwe mikani gare metre kukwe ye “käta rüre mun rüere”. Ye medenbätä, Biblia ruäre tä kukwe ye niere krörö, “ja töi miketa kukwe blo jiebiti” aune ni “töita käme” (Nueva Biblia al Día; Reina-Valera Contemporánea). Aisete, jondron tuin käme Ngöböi yebätä ni kristiano ñaka ja töi mikadre ye ütiäte krubäte ja ketakäre jankunu Ngöböbe. Ye erere ñaka nuaindre angwane ja nire raba nete kän.

10. ¿Kö okwä meden Satana tä mike ni jiete ne kwe ja mikadre niarakri?

¹⁰ Satana ñaka tö ni tuai ja ngwen “ni menteni kwrere” kä käme nete. Jondron ribedre krubäte jai ye mikata tuin bä nuäre ni okwäte, nitre ñaka gure metre nemen jabe yebätä ni töi mikata, töbikadre jabebätä ye mikata tuin kwin nie, ni mikadre ütiäte yebiti ni näkwitata, aune juta nikwe ye nikwe kriemikadre yebätä ni töi mikata, jondron jökrä ye kö okwä Satanakwe yebätä nikwe ja ngwandre mokre ne kwe ni ñaka rabadre te. Nikwe ñaka ja töi mikai kukwe käme yebätä, yebiti nita bämike ni ñaka tö ja mikai nitre gobrainta Satanakwe yekri, ñakare aune nita nüne jötrö ngwarbe nitre ye ngätäite. Nita ja di ngwen nünankäre kärekäre kä mrä Ngöbökwe yete.

“MUNKWE NÜNA KUIN”

11, 12. ¿Dre nieta nitre menteni yebätä, aune dre nie raba nitre testiko Jehovakwe yebätä?

¹¹ Bersikulo 12 yekänti “ni menteni” ye rabadre dre nuainne ye Pedrokwe mikani gare. “Nitre ie Ngöbö gare ñakare, ye okwäbti munkwe nüna kuin, ñobtä ñan angwane bäsi ni kukwe kämekäme nuenkä btä ñäkä blo, ye kwrere jire tädre ñäke mun rüere mtare, akwa munkwe jändrän kuin nuendi niaratre okwäbti ne ngwane, Ngöbökwe kukwe ükadite ni jökrä kräke, ye ngwane niaratre käkwe Ngöbö käikitadrekä kukwe kuin nuenbare munkwe yebtä”. Ruäre ngwane nitre menteni ye rüere ñäkätä aune tä nemen tuin “ni kukwe kämekäme nuenkä” ye kwrere, ñobätä ñan aune nitre ye bä ñaka ja erebe, ja ngwen jene, kukwei jene aune ja ngwäkite jene yebätä. Akwa, niaratre tä ja ngwen ño yebiti tätre bämike kukwe ngwarbe nieta bätätre.

¹² Ye erere arato kukwe keta kabrebätä nitre kristiano erametre ye ñaka ja  erebe nitre nünanka niaratre bäre yebe. Ñodre, tätre blite, ja ngwäkite aune ja ükete, jondron dianta kwetre jai ja näkwitara, yebiti niaratre nüke gare kwin. Ye medenbätä, nitre ruäre ie kukwe ñaka gare niaratre yebätä ye kätä ñäke blo niaratre rüere. Akwa, nitre ruäre tä niaratre käikitekä tätre ja ngwen kwin yebätä.

13, 14. “Ni töbätä abokän nüke gare jondron nuainta kwe yebiti” ye mikadre gare keteiti.

¹³ Ñäkäi blo nibätä akwa nita kukwe kwin nuainne angwane kukwe nieta nibätä ye ngwarbe rabai gare metre nitre mada yei. Jesús abokän ñaka ja mikani ngite jire, akwa niara rüere ñäkäbare ye nikwe ngwandre törö jai. Niebarebätä “ni ye mröre aune bino ñain krubäte, ja ketaka nitre jondron ütiä käräkä yebe bätä nitre ja mikaka ngite yebe”. Akwa, niarakwe ja ngwani töbätä aune Ngöbö mikani täte metre kwe yebiti bämikani kwe kukwe ngwarbe nie nämenebätä. Niebare kwe: “Ni töbätä abokän nüke gare jondron nuainta kwe yebiti” (Mat. 11:19, TNM). Ye erere nemen bare kä nengwane. Ñodre, kä Selters yekänti nitre nünanka Betel Alemania ye ken kätä nütüre ja mräkätre tä sribire yete ye töi jene. Akwa, ni sribikä alcalde käkwe ja mikani ja mräkätre yekri aune niebare kwe: “Nitre testiko Jehovakwe tä sribire yete ñaka ja ngwen ni mada mada ye kwrere, akwa ñaka tätre nitre nünanka niaratre bäre ye nike”.

¹⁴ Ye erere namani bare nitre testiko Jehovakwe nünanka kä Moscú (Rusia) yekänti, kukwe ngwarbe niebare krubäte niaratre ye rüere. Sö junio kä 2010 ye ngwane niaratre nikani Tribunal Europeo de Derechos Humanos, kä Estrasburgo (Francia) yekänti. “Niaratre nämene Ngöbö mike täte aune ja ükökrö ye gobrantre [Moscú] käkwe ñäkäibare ietre, akwa Tribunal tä niere kukwe ñaka metre nuainbare bätätre. Tribunal mada juta yete ñaka kukwe metre mikani gare, niaratre nämene niere nitre testiko Jehovakwe nämene ja denkä mento mräkätre kwe yebätä, nämene nitre töi mike ja murie kete o ja kräkäi mikadre ye ñaka nämene kain ngäbiti. Tribunal juta yete käkwe kukwe nuainbare niaratre yebätä ye abokän ñaka kwin aune ñaka ükaninte kwin”.

GOBRANTRE MIKADRE TÄTE

15. ¿Nitre kristiano erametre kä jökräbiti tibien tä kukwe meden nieta Bibliabätä ja jie ngwankäre mike täte?

¹⁵ Nitre testiko Jehovakwe nünanka Moscú aune kä madakänti tä kukwe mada niebare Pedrokwe ne mike täte: “Ni Dänkien rabadre ütiäte ni mda mda okwäte, abkokäre ni jökrä tä mikani gobrane ji dokwäte, ye munkwe kukwei mika täte” (1 Ped. 2:13, 14). Ni kristiano erametre ñaka ja mike nitre kä nebätä yekri, akwa “ni jökrä tä nebe gobrane ye abko Ngöbö ara jire tä mike” ye gare nie, ye medenbätä nita gobrantre mike täte  Pablo kukwe niebare ye ererebätä (ñäkädre Romanos 13:1, 5-7 yebätä).

16, 17. a) ¿Kukwe meden tä bämike ni ñaka ja mike gobrantre rüere? b) ¿Gobrantre ruäre tä dre niere?

¹⁶ Ni testiko Jehovakwe tä ja ngwen “ni menteni” kwrere kä nebätä, akwa nita ja ngwen yebiti ni ñaka tä bämike nita jondron jökrä kä nebätä ye rüere. Blitata kukwe gobrankwe yebätä ye ngwane nun ñaka tä ja mike nitre mada tä kukwe ye nuainne ye rüere. Iglesia mada tä ja mrite kukwe gobrankwe yete ye erere ni ñaka nuainne aune gobrantre tä kukwe ükete ye ni ñaka tä näin biti ta. Nita nitre mike ñaka nüne kwin jäme aune nita jondron nuainne gobrantre diankakäre nieta nibätä ye abokän kukwe ngwarbe nieta.

¹⁷ Pedrokwe niebare “emperador [rei] abko mika ütiäte munkwe” aune kukwe ükateta kwetre ye nita mike täte yebiti nita niaratre mike tuin ütiäte jai (1 Ped. 2:17). Gobrantre ruäre tä niere nitre testiko Jehovakwe ye ñaka jürä ngwandre jabätä. Kukwe ye erere nükani gare ni nünanka Alemania kädeka nämene Steffen Reiche ie, niara ye namani sribire gobranbe kä Brandeburgo yekänti aune ye bitikäre namani kädekani bäri kri. Gobran nazi käkwe nitre testiko Jehovakwe kitani ngite yebätä niarakwe niebare: “Niaratre ja ngwani kwin kirabe aune kä nengwane yebiti bämikani kwetre nitre käkwe gobran ükadrete gobrankäre. Arato, (SS) nitre rükä ütiäte nazi yekri ye ñaka jürä ngwani kwetre jabätä aune nitre mada nämene ngite ye kräke ja töi mikani kwin kwetre. Nitre menteni mikata tuin ngwarbe jai nitre madakwe, aune nitre tä töbike jene ni madabätä ye ngätäite nita nüne, aisete nitre nünanka juta nikwe nete ye rabadre ja töi mike kwin nitre mada kräke niaratre ye erere ye kwin krubäte”.

NIKWE JA MRÄKÄTRE TAREDRE

18. a) ¿Ñobätä nita “ja mräkätre tödekaka Jesubti tare[re]”? b) ¿Kukwe meden tä nitre ruäre töi mike ñan krütare?

¹⁸ Apóstol Pedro niebare kukwe ne nuaindre: “Munkwe ja mräkätre tödekaka Jesubti tare amne munkwe Ngöbö jürä ngwian” jabätä (1 Ped. 2:17). Ni testiko Jehovakwe tä Ngöbö jürä ngwen jabätä aune ñaka tö kukwe tuin käme ie ye nuainbätä ye kätä ni töi mike Niara mikabätä täte. Ne madakäre, kätä nemen juto nibätä nita keteitibe ja mräkätre kä jökräbiti tibien tä Jehová mike täte yebe. Ye medenbätä, nita “ja mräkätre tödekaka Jesubti tare[re]”. Nitre ñaka ja tarere ye ngätäite nita nüne akwa ni abokän tä ja tarere kwärikwäri yebätä nitre töi ñan tä nemen krütare. Ñodre, kä 2009 yete, ja mräkätre nünanka juta madate nikani gätä kri känti nitre juta madate nübaita yebätä, angwane ja mräkätre nünanka Alemania käkwe niaratre kani ngäbiti kwin, ye meri Estados Unidos täräkwata ükatekä nitre basaka juta madate ye kräke käkwe tuani angwane töi ñan namani krütare. Niarakwe niebare kukwe ye niara ñaka tuabare erere tuani kwe. Ye bitikäre, ja mräkä mada käkwe niebare: “Niara rababa blite nunbätä ye ngwane töi ñan rababa krütare aune kä nämä jutobätä rababa tuinbätä”. ¿Ye erere mä tärä kukwe nuin gätä kri nuainta nunkwe yete?

19. ¿Ni töita kwatibe dre nuainbätä, aune kukwe meden ie nita tö ngwen?

¹⁹ Kukwe nibi gare nie nete ye tä mike gare nitre testiko Jehovakwe tä bämike metre niaratre ye “ni menteni” kwrere nitre gobrainta Satanakwe ye ngätäite. Yebätä kätä juto nibätä, aune ni töita kwatibe ja ngwanbätä kwin. Kä mrä Ngöbökwe yete ni köböra nüne kärekäre ie nita tö ngwen metre. Ni tö köbö ye tuai nüke ¿ñan ererea?

[Kukwe ngwantarita]

[Jondron üai bämikani página 19]

[Jondron üai bämikani página 20]

Ni ñaka ja di ngwen kä gobrainta Satanakwe ükete. Nünain kä mrä Ngöbökwe yete ye nita mike gare

[Jondron üai bämikani página 22]

Kukwe Bibliabätä drieta ye tä ja mräkätre Rusia kwati mike nüne keteitibe