Ni Mikaka Mokre sribebare kukwe nuärebiti: ¿Ñokäre sribebare?

KÄ NIKANINA kwati ta nitre brare aune merire kä jökräbiti tibien käkwe ñäkäbarera kukwe nieta Bibliabätä tä mikani täräkwata Ni Mikaka Mokre yebätä. Julio 2011 täräkwata ja tötikara Ni Mikaka Mokre ye sribebare kena kukwe inglere nuärebiti aune ye nuainbare kä kwati näre.

Kä jutobiti nunta mike gare nunkwe täräkwata ye sribedi jankunu, arato sribedi kukwe suliare, francés bätä portugués yebiti.

NUNTA DEBE BIEN TÄRÄKWATA YEBÄTÄ

Täräkwata kukwe nuärebiti ye namani nitre Testiko nünanka kä mötörikri Océano Pacífico ye kisete angwane ruäre käkwe niebare: “Dre nieta Ni Mikaka Mokre yebätä ye nüke gare kwin ja mräkätre ie kä nengwane”. Tärä mada tikani yebätä niebare: “Nun nämene kä denkä jai kukwe ruäre ñan nämene nüke gare ye känene, akwa nengwane nunta kä ye denkä jai ja tötikakäre texto Bibliabätä, aune ye tä dre mike gare yebätä nunta ja tötike arato”.

Ja ngwai nünanka Estados Unidos käkwe ja tötikani kwela krite, niarakwe niebare: “Kä kwäjätä näre ti nämä blite aune kukwe tike kukwe ribibiti nitre ja tötikaka krikri ye kwrere. Ti nämä töbike aune blite kukwe ribibiti. Tikwe ja töi mikadre kukwe mada nuainne rababa gare tie”. Kä nengwane niarata kukwe driere kwin aune töita ño ye tä mike gare: “Täräkwata Ni Mikaka Mokre sribebare kukwe nuärebiti ye tä nun dimike krubäte. Kukwe nietabätä yebiti nüke gare nunye ñaka blitadre kukwe ribibiti”.

 Ja ngwai nünanka Inglaterra käkwe ja ngökani ñöte kä 1972, niarakwe niebare: “Tikwe ñäkäba täräkwata sribebare kena yebätä angwane Jehová nämä ñäkebätä ti olote aune kise kite ti ngärä rababa ruin tie, ni rüne tä ñäke kukwe namani bare yebätä ngänkä chi ie ye kwrere”.

Ja ngwai sribikä Betel Estados Unidos niarakwe ja ngökani ñöte ye ngwane kä niena gre ketebu biti bäri niarabiti, tä niere täräkwata sribebare kukwe nuärebiti ye käkwe niara dimikani kukwe mike gare bäri kwin jai. Ñodre, “Tetiko kri krubäte” kädrieta Hebreos 12:1 yebätä blitabare recuadro tä täräkwata 15 septiembre 2011 yekänti. Nitre testiko kwati krubäte ye abokän ñaka täin raba meden gärätä ye rükaba gare. Niarata niere: “Kukwe nieta bersikulo yebätä ye rükaba gare bäri kwin tie”. Ja tötikata konkrekasionte, yebätä niarata niere: “Monso kia blitadre kukwe nieta täräkwata sribebare kukwe nuärebiti yebätä angwane ni jökrä kwe täräkwata Ni Mikaka Mokre ja tötikara mada tädre kwetre yei ye kukwe nuadre kwin, ñobätä ñan aune monso ye käkwe kukwe nuäre niedi yebätä”.

Ja ngwai mada sribikä betelte käkwe kukwe ne tikani: “Monsotre kia blitadre gätäte ye ti töta nemen kukwe nuai. Täräkwata mrä sribebare ye kätä niaratre dimike blite kä jutobiti. Kukwe nieta kwetre ye tä ti dimike arato”.

Ja ngwai mada käkwe ja ngökani ñöte kä 1984 yete, niarakwe kukwe ne niebare debe  biankäre: “Kukwe tikani täräkwata yebätä ye tikani ti kräke kwrere. Tita ñäke kukwe yebätä aune tä nüke gare jötrö tie, aune ja tötikata Ni Mikaka Mokre yebätä ye ngwane jata nemen ruin jäme tie blitakäre”.

KUKWE ÜTIÄTE NITRE RÜNE KRÄKE

Monso chi kä kwä kükü niarabiti, meyekwe niebare: “Nun nämene kä denkä krubäte jai ja tötikakäre täräkwata Ni Mikaka Mokre yebätä, aune nun nämene nemen nainte”. ¿Täräkwata sribebare mrä ye niaratre dimikani ño? Niarata mike gare: “Monso tikwe tä ñäke parrafobätä aune tä nüke gare ie ye tä ti töi mike ñan krütare. Kukwe nuärebiti kukwe mikata gare aune ñaka kukwe nga krubäte nieta yebätä ja nemen ruin kwin ie. Arato, niarata kaibe kukwe denkä jai niekäre gätäte aune tä nemen gätä kukwe nuin kwin”.

Ja ngwai mada tä blite ngängän kwe yebätä, kä kwä ökän monso yebiti, niarata niere: “Kukwe meden niedre kwe gätäte yebätä ti ñaka niena dimike krubäte. Ti ñaka niena kä denkä krubäte jai kukwe meden ñaka nüke gare ie kädrieta täräkwata yebätä ye mikakäre gare jökrä ie. Täräkwata ye sribebare kukwe meden raba nüke gare monso ie ye ererebätä, ye medenbätä ja tötikata Ni Mikata Mokre yebätä angwane jata nemen ruin kwin ie”.

¿MONSOTRE KIA TÄTRE DRE NIERE?

Täräkwata mrä sribebare ye sribebare niaratre ye kräke ruin ietre. Rebecca, kä kwäjätä biti kubu niarabiti käkwe niebare: “¡Mun raba sribere jankunu! Recuadro yebätä kukwe mikata gare ye nemen nuäre rükakäre gare monso kia yei aune kukwe ye raba nüke gare kwin monsotre kia yei”.

Nicolette kä kwä kükübiti tä mike gare: “Täräkwata Ni Mikaka Mokre ye nämä nemen ribi ti kräke. Akwa kä nengwane tita blite gätäte aune ni mada ñaka ti dimike”. Emma kä kwä ökän niarabiti käkwe kukwe ne tikani: “Ti aune ti ngwai chi kä kwä ti niarabiti, kukwe nieta yete ye kätä nun dimike kukwe mike nüke gare bäri kwin jai. ¡Tä debe täräkwata yebätä!”.

Nibi gare nie erere, täräkwata yebätä kukwe nuäre nieta ye tä nitre kwati dimike. Täräkwata ye ribe nämene jai, ye medenbätä täräkwata Ni Mikaka Mokre sribebare kä 1879 aune sribebare mrä kukwe nuärebiti ye sribedi jankunu.

[Jondron üai bämikani página 29]

[Jondron üai bämikani página 30]

[Kukwe nieta página 30]

“Nun nämene kä denkä jai kukwe ruäre ñan nämene nüke gare ye känene, akwa nengwane nunta kä ye denkä jai ja tötikakäre texto Bibliabätä, aune ye tä dre mike gare yebätä nunta ja tötike arato”

[Jondron üai bämikani página 31]

[Kukwe nieta página 31]

“Monso tikwe tä ñäke parrafobätä aune ye tä nüke gare ie ye tä ti töi mike ñan krütare”