¿Törö mäi?

¿Täräkwata Ni Mikaka Mokre sribeta mrä mrä jatäri yebätä mäkwe ñäkäbarera? Ye erere ngwane mä raba kukwe ngwantarita ne mike gare metre:

¿Dre nuaindre ne kwe kukwe nieta nikwe ye ñaka “ñukwä okwä” bukadrekä konkrekasionte?

Dreta ni brukwäte yebätä töbikadre käne. Nikwe ñaka töbikadre blo ja mräkätre madabätä, ñakare aune ñobätä nita ñäke rüere yebätä nikwe töbikadre. Ni tö ja käikitakamana nitre madai o ni tö ja tuai bäri ni mada yebiti ta yebätä nita nuainne. Nita blite blo ni mada rüere ye käkwe ñaka kukwe kwin mikai nemen bare nibätä, ñakare aune kukwe bäri tare rabai ni kisete (15/8, página 21).

¿Kukwe meden rakaikä kä mrä ye känenkri?

Nitre niedi: “Mtare kukwe ñakare. Nita nüne kwin jäme”. Juta mada mada rü gaikä “Babilonia Kri” rüere, ye bitikäre rü gaikä juta Ngöbökwe rüere. Yebiti rü Armagedón rakaikä aune Satana bätä chokalitre kitai kä timon mente nguse yete (15/9, página 4).

¿Gata “juaindi ngwarbe” ye ngwane dre rabai bare?

Biblia tä käbämike “gata ni rüe juaindi ngwarbe” (1 Cor. 15:26, NGT). Aune kukwe ketebu rabai bare. Keteiti, nitre Jehová mikaka täte “kwati krubäte” abokän tä nüne kä nengwane ye ñaka krütai aune rabai kä mrä yete. Ketebukäre, nitre kwati krubäte krütanina ye mikaita nire (15/9, página 11).

¿Ora nuäi aune köbö ñongwane te Ngöbökwe kä ne mikai krüte ye ñaka rabadre gare nie ye ñobätä bäri kwin ni kräke?

Ye köböire dreta ni brukwäte ye nita bämike. Ni raba kä mike juto Jehová brukwäbätä. Ni töi mikai ja di ngwen sribire bäri kräke. Ni dimikai tö ngwen bäri Ngöböi aune kukwe kwe ie. Ni töi mikai töbike kwin Ngöbö töi ye erere (15/9, páginas 24 bätä 25).

¿Nitre ja mikani ngite tä ja töi kwiteta, yebiti Ngöböta ngite juen tabiti aune ñaka ngwenta törö jai ye tä nuainne ño?

Jehová tä käbämike nitre niara mikaka täte yei: “Tikwe ñaka ngite [mäkwe] ngwain törö jire jai” (Jer. 31:34). Ni kökanintari ye köböire Ngöböta ngite nikwe ye juen ta nibiti. Niara ñaka ngite nikwe ngwenta törö jai ni mikakäre ja ngie nuin nikwe ja mikani ngite yebätä (1/10, página 18).

¿“Muke” tä Jesús kise ruinkri kädrieta Apocalipsis 1:16, 20 yebätä ye tä nire nire bämike?

Tä nitre dianinkä nänkäre kä kwinbiti abokän tä sribire ni umbre erere bätä nitre umbre konkrekasionte ye bämike arato (15/10, página 14).

¿Dre raba ni dimike kukwe nieta nikwe ye erere nuainne?

“Kä mrä” te abokän “Ngöbö rabadi ütiäte ñakare [nitre] kräke” ye ngätäite nita nüne, “nitre tödekaka era metre Jesubti, kwrere jire ja bä mikadi kwetre akwa, täditre kukwe nuene kämekäme” (2 Tim. 3:1-5). Ye medenbätä, nikwe ñaka ja ketadre nitre ye ben, ñakare aune nitre kätä jän niere kwatibe, yebe ja ükadrekrö käre (Heb. 10:24, 25) (15/10, página 30).

¿Jesús töi nämene bobre ye Isaías 50:4, 5 tä mike gare ño?

Texto yebätä mikata gare ni iti “tidrä mikani kukwe dirikäre” ye “ñaka rikaba ji mada yebiti”. Jesús tö namani kukwe mikai gare jai, yebätä Ngöbö nämene kukwe driere ie ye nämene kain ngäbiti. Ni kä tibienbätä ja mike ngite ye Jehovakwe mikani tuin bobre jai ye Jesukwe tuani arato (15/11, página 11).

¿Ñobätä ñaka nuäre ngite juandre ta ni madabiti?

Ni mada tä ja mike ngite ni rüere ye ngwane ye tä nemen ni töite, ye medenbätä ngite juandre tabiti ye ñaka nuäre nuaindre. Nita nemen rubun, ni törbadre kukwe ükatemana ben o ni törbadre ja ngie mikai (15/11, página 27).